Yãmb ‘sakda nana’ bɩ?

1. Bõe yĩng tɩ tõe n yɩ toog tɩ d yɩ sakdba?

MI N yaa toog ne yãmb tɩ y yɩ sakdb bɩ? Ra mi n yaa toog ne rĩm a Davɩɩde. Rẽ n so t’a pʋʋs Wẽnnaam n yeel yaa: “Kɩt tɩ m tʋll n sak foo.” (Yɩɩn. 51:12) A Davɩɩd ra nonga a Zeova. La ra mi n yaa toog ne-a t’a yɩ sakda. Yaa woto ne tõnd me. Bõe yĩnga? Pipi, d rogdame tɩ d yamã be kɩɩsgo. Yiibu, a Sʋɩtãan maanda a sẽn tõe fãa sẽn na yɩl tɩ d lebg tõat wa yẽ. (2 Kor. 11:3) Tãabo, dũniyã yamã sẽn yaa “yam ning sẽn tʋmd kɩɩsdbã pʋsẽ rũndã-rũndã wã” bee zĩig fãa. (Efɛɛ. 2:2) D segd n modga wʋsg tɩ wẽngã tʋlsem ra tõog-do, la d modg me t’a Sʋɩtãan ne a dũniyã ra tõog tɩ d lebg kɩɩsdb ye. D segd n modgd n sakda a Zeova, la neb nins a sẽn kõ zu-sobendã.

2. “Sakd nana” rat n yeelame tɩ bõe? (Zak 3:17)

² Karm-y Zak 3:17. Biibl-gʋlsd a Zak yeelame tɩ neb nins sẽn tar yamã ‘sakda nana.’ Tags-y n ges-y rẽ sẽn dat n yɛɛlga. D segd n yɩta tao-tao n sakd neb nins a Zeova sẽn kõ zu-sobendã, la d maand rẽ ne yamleoogo. La ned sã n wa yeel tɩ d maan bũmb sẽn kɩɩsd a Zeova noore, yaa vẽeneg t’a Zeova pa rat tɩ d sak ye.—Tʋʋ. 4:18-20.

3. Bõe yĩng t’a Zeova rat tɩ d sakd neb nins a sẽn kõ zu-sobendã?

³ Yaa nana tɩ d sak a Zeova n yɩɩd ninsaala. Sɩd me, wakat fãa a Zeova kõta noy sẽn zems zãnga. (Yɩɩn. 19:7) La pa woto ne neb nins sẽn tar zu-sobendã ye. Baa ne rẽ, d saasẽ Ba wã kõo roagdbã, nanambsã la kãsem-dãmbã zu-sobendo. (Yel. 6:20; 1 Tes. 5:12; 1 Pɩy. 2:13, 14) D sã n sakd-ba, yaa a Zeova la d sakda. Bɩ d ges d sẽn tõe n sak neb nins a Zeova sẽn kõ zu-sobendã to-to, baa d sã n mi n getẽ tɩ yaa toog tɩ d sak b saglsã la d tũ.

SAK-Y Y ROAGDBÃ

4. Bõe yĩng tɩ kamb wʋsg kɩɩsd b roagdbã?

⁴ Rũndã-rũndã, kom-bɩɩs wʋsg yaa “ba-rãmb la ma-rãmb kɩɩsdba.” (2 Tɩm. 3:1, 2) Bõe yĩng tɩ kom-bɩɩsã wʋsg yaa kɩɩsdba? Kẽer getame tɩ b roagdbã yaa pʋ-lik rãmba. Roagdbã mi n datame tɩ b kambã maan bũmb bãmb mengã sẽn pa maande. Kamb kẽer getame tɩ b roagdbã sagls pa zems ne b wakatã, tɩ b tũub yaa toogo, wall tɩ yaa dem-dem wʋsgo. Fo sã n yaa bi-bɩɩga, fo-me tagsg yaa woto bɩ? Neb wʋsg getame tɩ yaa toog tɩ b tũ a Zeova noor ning sẽn yet yaa: “Sak-y y ba-rãmbã la y ma-rãmbã Zu-soabã pʋgẽ, bala rẽ yaa tɩrga.” (Efɛɛ. 6:1) Bõe n tõe n sõng-y tɩ y maan dẽ?

5. Bõe yĩng t’a Zeezi yaa mak-sõng sẽn ka to roagdbã sakr wɛɛngẽ? (Luk 2:46-52)

⁵ Y tõe n zãmsa sakr soab ning sẽn kõ mak-sõng sẽn ka to rẽ wɛɛngẽ wã nengẽ. Yaa a Zeezi. (1 Pɩy. 2:21-24) A ra yaa ned sẽn zems zãnga, t’a roagdbã pa zems zãng ye. La a Zeezi ra waoogda a roagdbã baa b sã n mi n konge, wall b pa wʋm a manesem ning võore. (Yik. 20:12) D gom bũmb ning sẽn maan a sẽn wa n tar yʋʋm piig la a yiibã yelle. (Karm-y Luk 2:46-52.) A roagdbã loog n bas-a-la Zerizalɛm. Tigrã poore, nand t’a Zozɛf ne a Maari lebg n kuili, bãmb n da segd n ges b kambã fãa sã n bee ne-ba. A Zozɛf ne a Maari sẽn wa n yã a Zeezi wã, a Maari ning-a-la taal a sẽn pa Zerizalɛmmã yĩnga. A Zeezi ra tõe n yeelame tɩ pa zems tɩ b ning-a taal ye. Baasgo, a maaga a yĩng n leok a roagdbã ne waoogre. La a Maari ne a Zozɛf ra ‘pa wʋmd bũmb ning a sẽn yeel-bã võor ye.’ Baa ne rẽ a Zeezi “kell n sak-b lame.”

6-7. Bõe n tõe n sõng kom-bɩɩsã tɩ b sak b roagdbã?

⁶ Kom-bɩɩse, yaa toog tɩ y sak y roagdbã b sã n wa tudgi, wall b sã n wa pa wʋmd y yell võor bɩ? Bõe n tõe n sõng-yã? Pipi, tags-y n ges-y rẽ sẽn na n noog a Zeova sũur to-to. Biiblã yeelame tɩ y sã n sakd y roagdbã, “rẽ nooma Zu-soabã.” (Kolo. 3:20) Bãng-y tɩ y roagdbã sã n wa pa wʋmd y yell võore, wall b lugl noy sẽn yaa dem-deme, a Zeova miime. La y sã n sak n tũ, y noogda a sũuri.

⁷ Yiibu, tags-y n ges-y rẽ sẽn na n noog y roagdbã sũur to-to. Y sã n sakd y roagdbã, y noogda b sũuri, la y paam me tɩ b kɩs-y sɩda. (Yel. 23:22-25) Y moorã na n maneg n yɩɩ noogo. Saam-biig a ye yʋʋr sẽn boond t’a Alɛgsãndr sẽn yit Bɛlzik yeelame: “Mam sẽn wa n sɩng m roagdbã sakr sõma wã, d zems-n-taarã pãng paasame, tɩ d sũur me maneg n noome.”b Tãabo, tags-y n ges-y y sakrã sẽn na n naf-y to-to beoog sẽn wate. A Paulo sẽn be Berzɩllã yeelame: “Mam sẽn sakd m roagdbã sõng-m lame tɩ m sakd a Zeova, la neb nins sẽn tar zu-sobendã.” Wẽnnaam Gomdã kõta bʋʋm-kãseng sẽn kɩt tɩ y segd n sak y roagdbã. A yetame: “Tɩ fo yɛlã tõe n yɩ sõma, la tɩ fo tõe n vɩɩmd n kaoos tẽngã zugu.”—Efɛɛ. 6:2, 3.

8. Bõe yĩng tɩ kom-bɩɩs wʋsg yãk yam n sakd b roagdbã?

⁸ Kom-bɩɩs wʋsg yãa b sakrã sẽn kɩt tɩ b yɛl yɩ sõma to-to. A Luiza me sẽn be Berzɩllã roagdbã yãka yam n pa na n kõ-a telefõn nananda, t’a ra pa wʋmd rẽ võor ye. Sɩd me, a rog-taasã wʋsg tara telefõn-dãmba. La a wa n bãngame tɩ yaa a koglg yĩng la a roagdbã sẽn pa kõ-a telefõnnã. A bãngame masã t’a sã n sakd a roagdbã, a pa segd n getẽ tɩ b weoogd-a lame ye. Bala sagls nins b sẽn kõt-a wã yaa bũmb ning a sẽn datã bal kɛpɩ. Saam-bi-poak a ye sẽn yaa bi-bɩɩg n be Etazĩni t’a yʋʋr boondẽ t’a Elizabɛt ket n getame tɩ wakat ninga, yaa toog t’a sak a roagdbã. A yeelame: “M sã n wa pa wʋmd noor ning m roagdbã sẽn lugl võor sõma, m lebgd n tẽega wakat ning b noyã sakr sẽn kogl maam yelle.” A Monika sẽn be Armeni wã yeelame t’a sã n sakd a roagdbã, a yɛlã yaa sõma n yɩɩd a sã n kɩɩsd-ba.

SAK-Y “NANAMBSÔ

9. Goosneema wã noyã sakr wɛɛngẽ, neb wʋsg tagsg yaa wãna?

⁹ Neb wʋsg sak n deegame tɩ goosneema-rãmbã tara yõodo, la tɩ d segd n saka noy kẽer “nanambsã” sẽn lugli. (Rom. 13:1) La nin-kãens sã n wa getẽ tɩ noor yaa dem-deme, wall pa manegd-ba, b pa sakd n tũ ye. Wala makre, lampo-rãmbã yaoobo. Erop tẽng a ye pʋgẽ b soka nebã n mik tɩ wʋsg tagsdame tɩ “f sã n getẽ tɩ lampo pa zemse, f pa segd n yao ye.” Yaa rẽ yĩng la tẽn-kãng nebã sẽn pa yaood lampo nins goosneema wã sẽn yeel tɩ b yao wã kẽerã.

10. Bõe yĩng tɩ d sakd baa nanambsã noy nins d sẽn pa nongã?

¹⁰ Biiblã wilgdame tɩ ninsaalbã goosneema-rãmbã kɩtdame tɩ namsg beẽ, tɩ yaa a Sʋɩtãan n so-ba, la tɩ ka la bilfu, b na n sãam-b lame. (Yɩɩn. 110:5, 6; Koɛ. 8:9; Luk 4:5, 6) A leb n yetame tɩ “ned ning sẽn kɩɩsd naab noor kɩɩsda Wẽnnaam sẽn sigl yɛlã to-to wã.” Rũndã-rũndã, a Zeova basame tɩ goosneema-rãmbã rɩt naam, sẽn na yɩl tɩ zũnd-zãnd ra zĩndi, n dat tɩ d sak-ba. Rẽ n so tɩ d segd n “kõ b fãa bũmb ning b sẽn segd ne wã,” rat n yeel tɩ lampo, waoogr la sakre. (Rom. 13:1-7) D tõe n getame tɩ noor ning yaa dem-deme, t’a pa tɩrga, wall t’a tũubã baoodame tɩ d yiis ligd wʋsgo. La d sẽn sakd a Zeova wã yĩnga, d sakda nanamb-kãensã, sã n pa b wa n datame tɩ d maan bũmb sẽn kɩɩsd a Zeova noyã.—Tʋʋ. 5:29.

11-12. Bõe la a Zozɛf ne a Maari maan n tũ noor sakr sẽn da pa nana ne-ba, la baasa wãna? (Luk 2:1-6; ges-y fotã me.)

¹¹ D tõe n dɩka yam a Zozɛf ne a Maari nengẽ. B ra sakda nanambsã, baa sã n wa pa nana ne-ba. (Karm-y Luk 2:1-6.) A Maari sẽn wa n tar pʋg sẽn kolg kiuug a wɛ wã, tẽngã taoor dãmb yeelame tɩ b maan bũmb sẽn pa nana. A Ogust sẽn da yaa Rom soolmã naabã yeelame tɩ b sõd nebã. A Zozɛf ne a Maari ra segd n toga sor n dʋʋg tãense, n kẽng Betlehɛm sẽn be kɩlo koabg la pis-nu zĩigẽ wã. So-toakã ra pa na n yɩ nana ne-ba, sẽn yɩɩd fãa ne a Maari. Tõe tɩ b ra maanda yɩɩr bũmb na wa n maan a Maari la biigã sẽn da be a pʋgẽ wã. Rogmã sã n da yik sorã zugu b ra na n maana wãna? Biig ning sẽn da na n wa lebg Mesi wã n da be a pʋgẽ wã. B tika rẽ n padem n pa tũ goosneema wã noorã bɩ?

¹² A Zozɛf ne a Maari pa bas tɩ bõn-kãensã kɩt tɩ b pa sak noorã ye. A Zeova ning-b-la bark b sakrã yĩnga. A Maari taa Betlehɛm ne laafɩ, n dog biig sẽn tar laafɩ, la a sõng meng tɩ Biiblã bãngr-gomd pidsi!—Mis. 5:2.

13. Wãn to la d sakrã tõe n naf d tẽed-n-taasã?

¹³ D sã n sakd nanambsã, nafda tõnd la neb a taabã. Wãn to? Bũmb a ye yaa tɩ d na n põsa sɩbgr ning kɩɩsdbã sẽn paamdã. (Rom. 13:4) D sakrã tõe n kɩtame tɩ nanambsã pẽg a Zeova Kaset rãmbã. Wala makre, yʋʋm wʋsg sẽn looge, sodaas n da gẽesd tẽn-dãmbdb sẽn pa rat n yao lampo-rãmba, n tɩ kẽ Nizeriya Rĩung roog a ye pʋgẽ tigsg wakate. Sodaag ning sẽn da lʋɩ taoorã yeela sodaas a taabã tɩ b yi, la a paas yaa: “A Zeova Kaset rãmbã yaooda b lampo-rãmbã wakat fãa.” Y sã n sakd nanambsã noyã, na n kɩtame t’a Zeova Kaset rãmbã kell n tall yʋ-noogo, tɩ rẽ tõe n kogl d tẽed-n-taasã daar ninga.—Mat. 5:16.

14. Bõe n sõng saam-bi-poak a ye t’a sakd nanambsã nana masã?

¹⁴ Pa wakat fãa la d na n dat n sak nanambsã ye. Saam-bi-poak a ye yʋʋr sẽn boond t’a Zoana sẽn be Etazĩni yeelame: “Ra yaa toog wʋsg ne-m tɩ m sak nanambsã, bala b maana d zakã neb kẽer pãnga.” La a Zoana modgame n toeem a tagsgã. Pipi, a basame n pa le karemd bũmb nins sẽn be rezo sosiyo-rãmbẽ wã, n tõe n kɩt t’a tall tags-kɛg nanambsã wɛɛngẽ wã. (Yel. 20:3) Yiibu, a pʋʋsa a Zeova t’a sõng-a t’a kɩs-a sɩda, la a ra baoodẽ tɩ ninsaalbã goosneema-rãmbã toeem ye. (Yɩɩn. 9:9, 10) Tãabo, a karma sõss sẽn be tõnd sɛbã pʋsẽ n gomd kiris-nebã sẽn pa kẽesd b toog dũniyã yɛlẽ wã yelle. (Zã 17:16) A Zoana yeelame tɩ yẽ sẽn waoogd nanambsã la a sakd-b masã wã, kɩtame t’a tar “bãan sẽn pa tõe n bãng n bilgi.”

SAK-Y-YÃ A ZEOVA SIGLGÃ SAGLSÃ

15. Bõe yĩng tɩ tõe n yɩ toog tɩ d sak noor a Zeova siglgã sẽn kõ?

¹⁵ A Zeova yeelame tɩ d “kelg sẽn lʋɩt-b taoor” tigingã pʋgẽ wã. (Ebre. 13:17) Baa tõnd taoor soab a Zeezi sẽn zems zãngã, neb nins a sẽn yãk tɩ b lʋɩt tõnd taoor tẽngã zugã pa zems zãng ye. Tõe n yɩɩ toog tɩ d sak-ba, sẽn yɩɩd fãa b sã n wa yeel tɩ d maan bũmb d sẽn pa nonge. Wakat n zĩnd tɩ tẽn-tʋmd a Pɩyɛɛr ra pa rat n sak noor b sẽn kõ-a ye. Malɛk n wa n yeel-a t’a wãb rũms a Moyiiz Tõogã sẽn da wilg tɩ yaa rẽgd t’a zãgse. Pa yɩ vugr ye. Yɩɩ hal naoor a tãabo! (Tʋʋ. 10:9-16) Bõe yĩng t’a zãgse? A ra pa wʋmd noorã võor ye. Ra yaa toor fasɩ ne a sẽn da minim n maandẽ wã. Yɩɩ toog ne a Pɩyɛɛr t’a sak noor malɛk sẽn zems zãng sẽn kõ. Dẽnd pa lingr la sẽn mi n yaa toog tɩ d sak noor neb sẽn pa zems zãng sẽn kõ wã ye!

16. Baa ne tẽn-tʋmd a Poll sẽn da tõe n tags tɩ bũmb ning b sẽn yeel-a wã pa zemsã, bõe la a maan-yã? (Tʋʋma 21:23, 24, 26)

¹⁶ Baa b sẽn wa n yeel tẽn-tʋmd a Poll t’a maan bũmb a sẽn da tagsd tɩ pa zemsã, ‘a saka nana.’ Zʋɩf-rãmb nins sẽn yaa kiris-nebã ra wʋmdame tɩ b gomd t’a Poll zãmsda nebã “n yetẽ tɩ b bas a Moyiiz Tõogã,” la t’a paoogda Tõogã. (Tʋʋ. 21:21) Zerizalɛm tigingã kãsem-dãmb yeela a Poll t’a tall rap a naas n kẽng wẽnd-doogẽ wã, n tɩ yɩlg a meng wa Tõogã sẽn yetã, tɩ wilg t’a tũuda a Moyiiz Tõogã. La a Poll ra miime tɩ pa le yaa tɩlɛ tɩ kiris-nebã tũ a Moyiiz Tõogã ye. Sẽn paase, a ra pa maan bũmb sẽn yaa wẽng ye. Baa ne rẽ, a Poll saka b sẽn yeelã zĩig pʋgẽ. A “peega rapã vẽkembeoogã, n tɩ yɩlg a meng wa Tõogã sẽn wilgã ne bãmb me.” (Karm-y Tʋʋm 21:23, 24, 26.) A Poll sakrã kɩtame tɩ zems-n-taar kell n zĩnd saam-biisã sʋka.—Rom. 14:19, 21.

17. Yam-bʋg la d tõe n dɩk a Ɛstefani kibarã pʋgẽ?

¹⁷ Pa yɩ nana ne saam-bi-poak a ye yʋʋr sẽn boond t’a Ɛstefani t’a sak noor b tẽngã saam-biis sẽn lʋɩt taoor sẽn kõ ye. Yẽ ne a sɩdã ra tɩ sõngda sull sẽn gomd buud-gom-zẽnga, hal tɩ b sũy noomẽ. Filyallã wa n sãeega sullã neba, la b kɩt tɩ saam-bi-poakã ne a sɩdã leb tiging sẽn gomd b buud-gomdã pʋgẽ. A Ɛstefani yeelame: “M sũurã ra pa noom baa bilfu. M da pa tagsd tɩ tiging ning sẽn gomd tõnd buud-gomdã rata sõngr wʋsg ye.” Baasgo, a sakame n na n tũ b sẽn yeelã. A paasame yaa: “Kaoosg zugẽ, m wa n yãame tɩ saam-biisã yam-yãkrã yaa sõma. D tigingã pʋgẽ, neb wʋsg n yaa b yembr b zakã pʋgẽ n tũud a Zeova. D lebga wa b roagdba, n kengd b raoodo. M zãmsda Biiblã ne saam-bi-poak tẽeb sẽn da maage. Masã, m paamda sẽk wʋsg me n zãmsd Biiblã. M sẽn mi tɩ m maana m sẽn tõe fãa n na n yɩ sakdã, m sũur-kasetã pa ningd-m taal ye.”

18. Wãn to la sakrã nafd tõndo?

¹⁸ D tõe n zãmsa sakre. A Zeezi “zãmsa sakr namsg ning a sẽn paamã maasem yĩnga,” la pa yɛlã sẽn da yaa nana ne-a yĩng ye. (Ebre. 5:8) Tõnd me wae n zãmsa sakr zu-loees sasa wa a Zeezi. Wala makre, koronaviriisã bã-loangdgã sẽn wa n sɩng tɩ b yeel tɩ d ra le tigimd taab Rĩungã rotẽ la d ra le moond koɛɛgã zak-zakã, yɩɩ toog ne-y tɩ y sak bɩ? Yaa vẽeneg tɩ y sakrã kogl-y lame, n kɩt tɩ zems-n-taar kell n zĩnd tigingã pʋgẽ, la noog a Zeova sũuri. Tõnd ned kam fãa segl n saame n na n sak noy nins fãa b sẽn na n kõ-d to-kãsengã sasa wã. Tõe n yɩɩ yõor yelle.—Zoob 36:11.

19. Bõe yĩng tɩ y rat n yɩ sakda?

¹⁹ D yãame tɩ sakrã wata ne bark ka tɛka. La d sẽn yãk yam n na n sak a Zeova wã, yaa d sẽn nong-a la d rat n ta a yamã yĩnga. (1 Zã 5:3) D pa tõe n dol a Zeova bũmb nins fãa a sẽn maan n kõ-dã ye. (Yɩɩn. 116:12) La d tõe n saka yẽ ne neb nins a sẽn kõ zu-sobendã. D sã n yaa sakda, d wilgdame tɩ d yaa yam soaba. D sã n yaa yam soaba, noogda a Zeova sũuri.—Yel. 27:11.