Sõma la wẽngã: D fãa mi n dat n bãng n bakame

Yãmb sã n dat n tog sor n kẽng zĩig y sẽn pa mi, y maanda wãn n ta be?

1. 1. Y na n dɩka sor y sẽn tagsd tɩ rabda be bɩ?

2. 2. Y na n pʋga neb a taaba, n saagdẽ tɩ b mii sorã bɩ?

3. 3. Y na n gesa kart wall y sok y zoa sẽn mi sorã bɩ?

D sã n yãk yam n na n maan wa pipi wã bɩ yiib-n-soabã, d na n taa zĩiga, la tõe tɩ pa yɩ d sẽn datẽ wã ye. La d sã n maan wa tãab-n-soabã, d tõe n basa d yam tɩ d na n taa d sẽn datẽ wã.

D tõe n dɩka d vɩɩmã n mak ne so-toaka. D ratame tɩ d sẽn vɩ to-to wã kɩt tɩ d paam sũ-noog beoog-daare. La sẽn yɩɩd fãa, rẽ bee ne d sẽn baood sagls zĩig ninga, d sã n wa segd n yãk yam.

Yaa sɩd tɩ yam nins d sẽn yãkdã wʋsg pa bõn-kãsems wɛɛngẽ ye. La d yam-yãkr kẽer tara yõod wʋsgo. D sẽn yãkd yam ning bõn-kãsemsã wɛɛngẽ wã wilgda d tagsg sẽn yaa a soab sõma la wẽngã wɛɛngẽ. Yam-yãkr a woto tõe n nafa tõnd la neb nins d sẽn nongã n kaoose, wall wã-do. Tõe n yɩɩ yam-yãkr bũmb kẽer wɛɛngẽ. Wala makre:

• Pag ne rao lagengã la kãadmã wɛɛngẽ

• Pʋ-peelmã, tʋʋmã la ligdã wɛɛngẽ

• Kambã wubr wɛɛngẽ

• D manesem sẽn segd n yɩ to-to ne neb a taabã wɛɛngẽ

Bõe n tõe n sõng-y tɩ y kɩs sɩd tɩ y sẽn yãkd yam nins bõn-kãens wɛɛngẽ wã na n kɩtame tɩ yãmb ne y zakã rãmb paam sũ-noog beoog sẽn wate?

Ad sokr d ned kam fãa sẽn segd n sok a menga: Bõe n tõe n sõngd-m tɩ m bãngd n yãkd yam sõma la wẽngã wɛɛngẽ?

Seb-kãngã pʋgẽ, b na n wilga bũmb ning sẽn kɩt tɩ d tõe n kɩs sɩd ne Biiblã sẽn yet sõma la wẽngã wɛɛngẽ wã, la rẽ sẽn tõe n naf-y to-to.