Sõma la wẽngã: Bõe la neb wʋsg tikd n yãkd yam?

Sõma la wẽngã wɛɛngẽ, bũmb kẽer la nebã fãa la bal sak n deege. Wala makre, neb wʋsg sak n deegame tɩ nin-kʋʋre, pʋg-yõgre, belg biig n tʋm tʋʋm-dẽgd ne-a yaa wẽng wʋsgo. B sak n deegame me tɩ tɩrlem, sõmblem la nimbãan-zoeer yaa sõma wʋsgo. La bũmb kẽer wɛɛngẽ, wʋsg tagsdame tɩ sẽn yaa sõma wall wẽng kae ye. Wala makre, pag ne rao lagengã wɛɛngẽ, pʋ-peelmã la kambã wubr wɛɛngẽ, b tagsdame tɩ yam-yãkr fãa yaa sõma. Nebã wae n tikda bãmb mensã tagsgo, wall neb a taabã tagsg n yãkd yam. Woto maaneg yaa sõma bɩ?

D SEGD N TIKDA D MENSÃ TAGSG N YÃKD YAM BƖ?

Noor wʋsgo, d tikda tõog ning d sẽn tar tɩ kɩt tɩ d tõe n bãng sõma la wẽng n bakã n yãkd yam. Rẽ la b sẽn boond tɩ sũur-kasetã. (Rom dãmbã 2:14, 15) Baa kom-bõonegã mii sẽn yaa sõma. B sã n maan bũmb sẽn pa sõma, b sũyã tõe n sãamame. Hal baa d yãadmẽ, d tõe n bãnga sẽn yaa sõma la sẽn pa sõma n bake, tɩ d sã n maan bũmb sẽn pa sõma bɩ d ningd d meng taale. La d sã n wa bɩtẽ, d sũur-kasetã sẽn tʋmd to-to wã toeemdame tɩ zemsd ne bũmb nins d sẽn zãmsd d zakã rãmb nengẽ, d zo-rãmbã la d karen-saam-dãmbã nengẽ wã. A leb n toeemdame tɩ zemsd ne d babgẽ wã neb sẽn get yɛlã to-to wã, d sẽn be tũudum ning pʋgẽ wã, la d buudã neb minimdã. D sã n yãk yam, d sũur-kasetã tikda d sẽn zãms sõma la wẽngã wɛɛngẽ wã n wilg d yam-yãkrã sã n yaa sõma.

D tagsg sẽn yaa a soab sõma la wẽngã wɛɛngẽ wã tõe n kɩtame tɩ d zoe ned nimbãanega, n wilg tɩ d yaa sõm-mita, n maan sẽn yaa tɩrga, la d kʋm d taaba. Leb n tõe n sõng-d lame tɩ d bas n pa maan bũmb d sẽn mi tɩ tõe n sãama d taabã sũuri, wall tɩ tõe n ning-d-la yãnd bɩ n kɩt tɩ d ningd d meng taale.

D tõe n teega d mengã tagsg wakat fãa bɩ? A Garik sẽn wa n yaa bi-bɩɩgã, a ra vɩɩ wa a sẽn date. A yeelame yaa: “M da maanda bũmb ning fãa m sẽn tagsd tɩ yaa sõma.” La a wa n bãngame t’a sẽn maand rẽ wã pa nafd-a ye. A yeelame t’a vɩɩmã ra pa kõt-a sũ-noog baa bilfu, bala a ra yooda wʋsgo, n yũud dorge, n yũud rãam tɩ loogdẽ, la a tʋmd nin-kɛglem tʋʋma.

D SEGD N TIKDA NEB A TAABÃ TAGSG N YÃKD YAM BƖ?

Tõnd mensã tagsg sẽn yãk a toogo, d wae n tikda neb a taabã tagsg n yãkd yam. D sã n maand woto, b yamã la b minimã tõe n naf-d lame. D sã n maand bũmb nins d zakã rãmba, d zo-rãmbã la d babgẽ wã neb sẽn tagsd tɩ yaa sõma wã, b nand-d lame.

D tõe n teega neb a taabã tagsg wakat fãa bɩ? A Pirsill sẽn wa n yaa pʋg-sadã, a ra nong n maanda bũmb nins a zo-rãmbã wʋsg sẽn da maandã. A ra sakd n yoodame. La baa a taabã sẽn da get t’a sẽn maandã yaa sõma wã, ra pa kõt-a sũ-noog ye. A yeelame: “Mam sẽn da maand bũmb nins m taabã sẽn da maandã pa kɩt tɩ m paam sũ-noog ye. Rẽ kɩtame tɩ m maan bũmb kẽer n pa reng n tagse, tɩ ra tõe n tũ ne m yõore.”

BŨMB BEE SẼN YAA SÕMA N YƖƖD D SẼN TÕE N TIKD N YÃKD YAM BƖ?

D sã n wa segd n yãk yam sõma la wẽngã wɛɛngẽ, tõnd mengã tagsgã la neb a taabã tagsg tõe n sõng-d-la wʋsgo. La d sã n tikd rẽ bala, pa wae n yãkd neng ye. Wakat ninga d tõe n yãka yam n maan bũmb n wã tõnd mengã wall neb a taaba, bala d pa reng n yã d yam-yãkrã sẽn na n wa ne yɛl ninsã ye. (Yel-bũnã 14:12) Sẽn paase, bũmb pa be n wilgdẽ tɩ tõnd ne neb a taabã sẽn get tɩ bũmb nins yaa sõma wã sɩd na n naf-d lame, tɩ pa tɩlɛ tɩ d toeem d sẽn get yɛlã to-to wã ye. Sɩd me, rũndã-rũndã nebã getame tɩ manesem kẽer pĩnd dãmbã sẽn da yet tɩ yaa wẽng yaa sõma, tɩ manesem kẽer b sẽn da yet tɩ yaa sõma yaa wẽnga.

Bũmb bee sẽn yaa sõma n yɩɩd d sẽn tõe n tikd n bãngd sẽn yaa sõma la wẽng n bakdẽ bɩ? Sagls bee d sẽn tõe n tũ rũndã-rũndã, n pa wa maan d bãngẽ kaoosg zugẽ bɩ?

Zu-noogo, zĩig bee d sẽn tõe n paam sagls ned buud fãa sẽn tõe n tũ wakat fãa. Sõsg ning sẽn pʋgdã pʋgẽ, b na n wilg-d-la zĩig ning d sẽn tõe n paam sagls sẽn yaa sõma n yɩɩda.