A Zeova nonga yãmb wʋsgo

1. Y sã n wa tagsd a Zeova yelle, bõe n wat y yamẽ?

YÃMB zoe n mamsa a Zeova sẽn yaa to-to wã y yamẽ bɩ? Y sã n wa pʋʋsd-a, y mamsdame t’a yaa wãn to? Baa d sẽn pa tõe n yã a Zeova ne nifã, Biiblã tũnuga ne bũmb toor-toor n bilg a sẽn yaa to-to wã. Wala makre, Biiblã yeelame t’a Zeova yaa “wĩntoog la gãongo,” la t’a yaa “wa bugum sẽn dɩte.” (Yɩɩn. 84:11; Ebre. 12:29) Biibl-gʋlsd a ye bilga a Zeova sẽn yaa to-to wã n yeel t’a yaa wa bũmb sẽn pɩnda, n zao safɩɩr kugr geer zugu, tɩ saag-gomtɩʋʋg sẽn pɩnd gũbg-a. (Eze. 1:26-28) D sã n kelgd b sẽn bilgd a Zeova to-to wã, tõe n kɩtame tɩ d neẽ t’a yaa ziir-kãseng soaba, wall kɩt tɩ d getẽ tɩ d pa zem baa fʋɩ a taoor ye.

2. Bõe n tõe n kɩt tɩ yaa toog ne neb sãnda tɩ b kolg a Zeova?

² D sẽn pa tõe n yã a Zeova ne nifã, tõe n yɩɩ toog tɩ d sak n deeg t’a nong-d lame. Neb kẽer tõe n tagsdame t’a Zeova pa tol n tõe n nong-ba, yel-beed sẽn paam-b pĩnd yĩnga. Tõe tɩ b ba-rãmbã pa tol n wilg tɩ b nong-b lame ye. A Zeova wʋmda nin-kãens sẽn tagsd woto wã võore, la a mi rẽ sẽn namsd-b to-to wã me. Sẽn na yɩl n sõng tõndo, a Zeova wilga a sẽn yaa Wẽnnaam ning buudã a Gomdã pʋgẽ.

3. Bõe yĩng tɩ d segd n gom a Zeova nonglmã yelle?

³ Gom-bil ning b sẽn tõe n tall n bilg a Zeova sẽn yaa to-to wã tɩ zems n yɩɩd yaa nonglem. (1 Zã 4:8) A Zeova yaa nonglem. A sẽn maand fãa yaa ne nonglem. Wẽnnaam nonglmã yaa kãsenga, hal tɩ baa neb nins sẽn pa nong-a wã tõe n dɩ a nonglmã yõodo. (Mat. 5:44, 45) Sõs-kãngã pʋgẽ, d na n goma a Zeova la a nonglmã yelle. D sã n bãngd d Wẽnnaamã n paasdẽ, d sẽn nong-a to-to wã me na n paasdame.

A ZEOVA NONG-D-LA WƲSGO

4. A Zeova nonglmã sẽn yaa to-to wã kɩtame tɩ y tagsg yaa wãna? (Ges-y fotã me.)

⁴ ‘A Zeova tara nonglem wʋsgo, n leb n yaa nimbãan-zoɛta.’ (Zak 5:11) Biiblã pʋgẽ, a Zeova wilgame t’a yaa wa pag sẽn nong a kamba. (Eza. 66:12, 13) Mams-y n ges-y pag sẽn get a biig yell ne nonglem to-to. A zãada a biigã n deemdẽ, la a gomd ne-a ne bʋgsem. Biigã sã n wa yãbd wall a bũmb n zabde, a geta a yell sõma. D sã n wa maood ne zu-loɛɛga, d tõe n teega a Zeova a nonglmã yĩnga. Yɩɩn-gʋlsdã yeelame: “Yɩɩrã sẽn wa n loog maamã, yãmb belsa maam la y kɩt tɩ m yam gãand bãane.”—Yɩɩn. 94:19.

5. Wãn to la a Zeova maan-neerã nafd yãmba?

⁵ A Zeova yaa maan-neer soaba. (Yɩɩn. 103:8) Baa d sã n wa maan bũmb sẽn pa sõma, a pa raagd-d n bas ye. Israyɛll nebã sãama a Zeova sũur naoor wʋsgo. La b sẽn wa n tek yam n kos sugrã, a wilg-b lame t’a ket n nong-b lame. A yeela Israyɛll buudã yaa: “Fo tara yõod mam nifẽ. Mam zẽka fo zug la m nong foom.” (Eza. 43:4, 5) Wẽnnaam nonglmã pa toeem ye. D tõe n teeg-a-la wakat fãa. Baa d sã n wa maan yel-wẽn-kãsenga, a Zeova pa raagd tõnd n bas ye. D sã n tek yam n kos sugr n lebg n wa a Zeova nengẽ, d na n yãame t’a ket n nong-d lame. A pʋlmame t’a ‘na n kõ-d-la sugr wʋsgo.’ (Eza. 55:7) Biiblã yeelame tɩ rẽ poore, d paamda ‘yolsg sẽn yit a Zeova meng nengẽ.’—Tʋʋ. 3:19.

6. Zakari 2:8 sõngda tõnd tɩ d bãng bõe a Zeova zugu?

⁶ Karm-y Zakari 2:8. A Zeova sẽn nong tõndã yĩnga, a mii bũmb nins sẽn namsd tõndo, la a tʋll n kogl-do. Bũmb sã n namsd tõndo, namsda yẽ me. Rẽ n so tɩ d tõe n pʋʋs-a n yeel yaa: “Kogl-y maam wa y nin-beelle.” (Yɩɩn. 17:8) Nifr yaa yĩngã will sẽn zoet toogo, la sẽn tar yõod wʋsgo. Rẽnd a Zeova sẽn mak tõnd ne a nin-beellã, yaa wa a sẽn yeel yaa: ‘Ned ning fãa sẽn maan yãmb a mam nin-buiidã wẽnga, yaa bũmb sẽn tar yõod wʋsg ne maam la a sẽn maan wẽngã.’

7. Bõe yĩng tɩ d segd n maneg n kɩs sɩd t’a Zeova nong-d lame?

⁷ A Zeova ratame tɩ d ned kam fãa bas a yam t’a nong-a lame. La a miime tɩ zu-loees kẽer d sẽn seg pĩndã tõe n kɩtame tɩ d maand sãmbs a sã n sɩd nong-d lame. D leb n tõe n maooda ne zu-loees rũndã-rũndã, tɩ kɩt tɩ d sãmbd a Zeova sã n nong-d lame. Bõe n tõe n kɩt tɩ d kɩs sɩd t’a Zeova nong-d lame? Yaa d sẽn na n bao n bãng a Zeova sẽn wilgd to-to t’a nonga a Zeezi, sẽn paam-b vʋʋsem sõng zaeebã, la tõnd fãa.

A ZEOVA SẼN WILGD TO-TO T’A NONG-D LAME

8. Bõe n kɩt t’a Zeezi ra kɩs sɩd t’a Ba wã nong-a lame?

⁸ A Zeova ne a Bi-nongrã zĩnda ne taab yʋʋm kõn bãng n sõde, tɩ b sẽn nong taab to-to wã pa tõe n bãng n bilg ye. B zoodã kaoos n yɩɩda zood buudã fãa. Matiye 17:5 pʋgẽ, a Zeova wilga vẽeneg t’a nonga a Zeezi. A Zeova ra tõe n yeelame bal yaa: ‘Ad sẽn ta-a mam yamã.’ La a sẽn dat tɩ d bãng a sẽn nong a Zeezi to-to wã, a yeelame yaa: “Yãoã yaa mam Bi-ribla, mam sẽn nong a soabã.” A Zeova sũur da nooma ne a Zeezi, sẽn yɩɩd fãa, a sẽn sak n na n kõ a vɩɩmã yĩnga. (Efɛɛ. 1:7) A Zeezi ra kɩsa sɩd t’a Ba wã nong-a lame. A ra nee rẽ vẽenega. A yeela naoor wʋsg ne bas-m-yam t’a Ba wã nonga yẽ.—Zã 3:35; 10:17; 17:24.

9. Gom-bʋg n wilgd a Zeova sẽn nong sẽn paam-b vʋʋsem sõng zaeebã to-to wã? Wilg-y y leoorã võore. (Rom dãmbã 5:5)

⁹ A Zeova wilgdame me t’a nonga sẽn paam-b vʋʋsem sõng zaeebã. (Karm-y Rom dãmb 5:5.) Vɛrse wã pʋgẽ, b yeelame tɩ b “pʋdga” Wẽnnaam nonglmã. Sebr a ye bilga rẽ võore, n yeel t’a “sigda tõnd zut wa kʋɩlg koom.” Woto bilgda a Zeova sẽn nong sẽn paam-b vʋʋsem sõng zaeebã wʋsg to-to wã. Nin-kãens miime tɩ ‘Wẽnnaam nong-b lame.’ (Ziid 1) Tẽn-tʋmd a Zã goma rẽ yell n yeel yaa: “Ges-y Ba wã sẽn nong tõnd ne nonglem ning buudu, n sak tɩ b na n boond tõnd tɩ Wẽnnaam kambã!” (1 Zã 3:1) Yaa sẽn paam-b vʋʋsem sõng zaeebã bal la a Zeova nong bɩ? Ayo. A Zeova wilgame t’a nonga tõnd fãa.

10. Bũmb nins a Zeova sẽn maan n wilg t’a nonga tõndã sʋka, bʋg n yaa kãseng n yɩɩda?

¹⁰ Bũmb nins a Zeova sẽn maan n wilg a nonglmã sʋka, bʋg n yaa kãseng n yɩɩda? Yaa a sẽn tʋm a Zeezi t’a wa ki tɩ yɩ maoongã. A Zeova sẽn sak t’a Zeezi ki wã, a wilga a nonglmã n yɩɩd ned buud fãa. (Zã 3:16; Rom. 5:8) A Zeova sakame t’a Bi-nongrã wa ki ninsaalbã fãa yĩnga, sẽn na yɩl tɩ d tõe n paam d yel-wẽnã sugri, la d tõe n yɩ a zo-rãmba. (1 Zã 4:10) D sã n bʋgsd bũmb ning a Zeova ne a Zeezi sẽn maanã zugu, d na n maneg n neeme tɩ b nonga tõnd ned kam fãa wʋsgo. (Gal. 2:20) A Zeova pa kɩt t’a Zeezi ki tõnd yĩnga, a tɩrlmã sẽn kɩt tɩ rẽ ra yaa tɩlɛ wã yĩng bal ye. Yaa a sẽn nong tõndã yĩng me. A Zeova rɩka a Zeezi sẽn yaa soab ning a sẽn nong n yɩɩdã n kõ n na n wilg t’a nonga tõndo. A basame t’a Biigã nams la a ki tõnd yĩnga.

11. Zeremi 31:3 sõngda tõnd tɩ d bãng bõe?

¹¹ A Zeova pa nong tõnd bal ye. A yet-d lame me t’a nong-d-la wʋsg wa d sẽn yã wã. (Karm-y Zeremi 31:3.) A Zeova taka tõnd tɩ d wa a nengẽ, a sẽn nong-dã yĩnga. (Ges-y Tõod 7:7, 8.) Bũmb wall ned kae n tõe n welg tõnd ne Wẽnnaam nonglmã ye. (Rom. 8:38, 39) Yãmb tagsg yaa wãn ne nonglem-kãnga? Karm-y Yɩɩn-sõamyã 23 tɩ y na n yãa a Davɩɩd tagsg sẽn da yaa to-to ne a Zeova nonglmã la a sẽn da get a yell to-to wã, la rẽ sẽn tõe n kɩt tɩ d tall tagsg ningã.

A ZEOVA NONGLMÃ KƖTAME TƖ Y TAGSG YAA WÃNA?

12. Kʋms-y Yɩɩn-sõamyã 23 sẽn yet bũmb ningã.

¹² Karm-y Yɩɩn-sõamyã 23:1-6. Yɩɩn-sõamyã 23 pʋgẽ, yɩɩn-gʋlsdã wilgame t’a kɩsa sɩd t’a Zeova nong-a lame la a get a yelle. A Davɩɩd sẽn yaa yɩɩn-kãng gʋlsdã bilga zood ning sẽn da be yẽ ne a Zeova sẽn yaa a Pe-kɩɩmã sʋka. A Davɩɩd ra sakdame t’a Zeova wilgd-a sore, tɩ kɩt t’a yam gãe bãane. A ra teeg-a-la zãng-zãnga. A ra miime t’a Zeova na n wilgda daar fãa t’a nong-a lame, a vɩɩmã tõre. Bõe n kɩt t’a ra kɩs sɩd woto fãa?

13. Bõe yĩng t’a Davɩɩd ra kɩs sɩd t’a Zeova na n gesa a yelle?

¹³ “Bũmb pa na n paoog maam ye.” A Davɩɩd ra neeme t’a Zeova geta a yell sõma, bala wakat fãa, a ra kõt-a-la bũmb nins sẽn yaa tɩlɛ ne-a wã. Sẽn paase, a Davɩɩd ra miime t’a yaa a Zeova zoa, la t’a tata a yam. Rẽ n kɩt t’a ra kɩs sɩd tɩ baa yɛlã sẽn wa n yaa to-to beoog-daare, a Zeova na n kell n gesa a yelle. A Davɩɩd sẽn da kɩs sɩd t’a Zeova nong-a lame, la t’a na n gesa a yellã yĩnga, a ra tara su-noogo, n da pa maand yɩɩr baa ne a zu-loeesã ye.—Yɩɩn. 16:11.

14. Wãn to la a Zeova tõe n ges d yell ne nonglem?

¹⁴ A Zeova geta tõnd me yell ne nonglem, sẽn yɩɩd fãa d sã n wa maood ne zu-loe-kɛgemse. A Klɛɛra yaa saam-bi-poak sẽn tʋm Betɛllẽ wã yʋʋm 20 la zaka. A zakã rãmb wa n paama zu-loe-kɛgemse, hal t’a pa mi a sẽn na n maan n sõng-b ye. Tãnsiyõ n lub a ba wã, tɩ b yiis a yao-bi-pugl tigingã pʋgẽ me. Sẽn paase, b zakã rãmb sẽn da naag taab n tʋmd tʋʋmd ningã sãamame, tɩ bãnkã reeg b zakã. Wãn to la a Zeova wilg t’a nong-b lame? A Klɛɛr yeelame: “A Zeova gesame tɩ tõnd zakã rãmb ra paamd bũmb nins sẽn yaa tɩlɛ ne-b daar fãa wã. Naoor wʋsgo, a Zeova kõo tõnd tɩ zʋʋg bũmb nins sẽn da yaa tɩlɛ ne-dã menga. M mii n lebg n tagsa a Zeova sẽn sõng-d ne nonglem to-to wã yelle, hal tɩ noom-ma. Sõngd-m lame tɩ m ket n tũud a Zeova ne sũ-noogo, baa sã n wa pa nana.”

15. Bõe n da kõt a Davɩɩd pãnga? (Ges-y fotã me.)

¹⁵ “A kõta maam pãnga.” Wakat ninga, zu-loees nins a Davɩɩd sẽn da paamdã kɩtame t’a maand yɩɩr wʋsgo. (Yɩɩn. 18:4-6) La a Zeova sẽn da get a yell ne nonglmã ra kõt-a-la pãnga. A Zeova ra tallda a zoa wã sẽn koms raoodã n kẽnd “yam-maas zĩigẽ” la “vʋʋsg zĩig sẽn tar koom wʋsgo.” Rẽ ra kõta a Davɩɩd pãnga, t’a ket n tũud a Zeova ne sũ-noogo.—Yɩɩn. 18:28-32.

16. Wãn to la a Zeova nonglmã kõt-y pãnga?

¹⁶ Rũndã-rũndã me, “yaa a Zeova maan-neerã yĩng la tõnd sẽn pa sa wã,” baa d sẽn maood ne zu-loe-kɛgemsã. (Wiis. 3:22; Kolo. 1:11) D gom a Rasɛll yelle. A sũurã sãama wʋsgo, a sɩdã sẽn bas yẽ ne a Zeova koronavirisã bã-loangdgã sasa wã. Bõe la a Zeova maan n sõng-a? A yeelame: “A Zeova sõnga maam tɩ m yã t’a nong-m lame. A kɩtame tɩ m tar zo-rãmba. B ra nong n bee ne maam, b ra nong n kõt-m-la rɩɩbo, la b ra toond-m mesaaz-rãmb la vɛrse-rãmb sẽn kengd raoodo. B ra mii n maana bũmb n kɩt tɩ m la, la b tẽegd-m t’a Zeova geta m yelle. M pʋʋsda a Zeova bark wakat fãa, m sẽn tar tẽed-n-taas wʋsg woto tɩ d nong taab wa zag-yɛng nebã.”

17. Bõe yĩng t’a Davɩɩd ra pa ‘yɛɛsd bũmb na wa n paam-a’?

¹⁷ “Mam pa yɛɛsd bũmb na wa n paam-m ye. Bala yãmb bee ne maam.” A Davɩɩd vɩɩmã ra wae n bee yell pʋgẽ. Sẽn paase, a ra tara bɛɛb sẽn tar pãng wʋsgo. La a Zeova sẽn da nong-a wã kɩtame t’a yam gãe bãane. Yell buud fãa pʋgẽ, a Davɩɩd ra neeme t’a Zeova bee ne-a tɩ ra kengd a raoodo. Rẽ n so t’a tõog n yeel yaa: “[A Zeova] fãaga maam ne bũmb nins fãa sẽn da kẽesd-m rabeemã.” (Yɩɩn. 34:4) A Davɩɩd ra mi n maana rabeem wʋsgo, la a sẽn da kɩs sɩd t’a Zeova nong-a lame wã ra boogda a rabeemã.

18. Y sã n wa maand rabeem, wãn to la a Zeova nonglmã na n kõ-y pãnga?

¹⁸ D sã n wa maood ne zu-loees sẽn kẽesd rabeem, wãn to la d sẽn mi t’a Zeova nong-d lame wã kõt-d raoodo? So-pakd a ye yʋʋr sẽn boond t’a Suuzi wilga yẽ ne a sɩdã sũur sẽn sãam to-to, b biig sẽn kʋ a meng poore. A yeelame: “Yel-beed sã n tiig n paam-fo, f sũur tõe n sãama wʋsgo, tɩ f yɛɛsdẽ tɩ yel-beed sẽn yɩɩd rẽ na n paam-f lame. La a Zeova nonglmã kɩtame tɩ d neẽ t’a kogend-d lame, tɩ d yamã gãe bãane.” A Rasɛll sẽn yaa saam-bi-poak ning yell d sẽn zoe n gomã yeelame: “Daar a ye yʋng m sũurã sẽn wa n sãam wʋsg hal tɩ m maand yɩɩr la rabeem, m zẽka m koɛɛg n pʋʋs a Zeova ne nintãm. Zĩig pʋgẽ, m yãame t’a bels-m lame tɩ m yam gãand bãane, wa pag sẽn maand to-to ne a bi-pɛɛlga. Rẽ poore, m paama gõeem. M pa tol n tõe n yĩm bõn-kãngã ye.” B yõka kãsem-soab a ye yʋʋr sẽn boond t’a Tasos n kẽes bãens roogo, a sẽn zãgs t’a kõn kẽ sodaarã yĩnga. Bõe n kɩt t’a yã t’a Zeova nong-a lame la t’a geta a yelle? A yeelame: “A Zeova sõng-m lame tɩ m paam sẽn yɩɩd bũmb ning sẽn da yaa tɩlɛ wã. Woto kɩtame tɩ m maneg n kɩs sɩd tɩ m tõe n teeg-a lame. Sẽn paase, a Zeova tũnuga ne a vʋʋsem sõngã n sõng-m tɩ m paam sũ-noogo, baa m sẽn da be bãens roogẽ tɩ pa nana wã. Rẽ kɩtame tɩ m neẽ tɩ m sã n maneg n kɩs a Zeova sɩda, m na n maneg n dɩɩ a sõmblmã yõodo. Rẽ n so tɩ m lebg wakat fãa so-pakd bãensã roogẽ.”

KOLG-Y Y WẼNNAAMÃ SẼN YAA NONGLMÃ

19. a) D sã n mi tɩ Wẽnnaam nong-d lame, wãn to la d na n pʋʋsd-a? b) Bõe la b yeel a Zeova nonglmã wɛɛngẽ tɩ noom yãmb n tɩ yɩɩda? (Ges-y zĩ-gũbrã: “Goam sẽn sõngd tɩ d neẽ t’a Zeova nong-d-la wʋsgo.”)

¹⁹ Neb nins yell d sẽn gomã wilgdame t’a Zeova sẽn yaa ‘nonglem Wẽnnaamã’ bee ne tõndo. (2 Kor. 13:11) Tõnd ned kam fãa yell pak-a lame. D kɩsa sɩd t’a ‘maan-neerã gũbga’ tõndo. (Yɩɩn. 32:10) D sã n bʋgsd a sẽn wilgd to-to t’a nonga tõndã zugu, d na n maneg n neeme tɩ d yell pak-a lame, la kɩt tɩ d kolgd-a n paasdẽ. D tõe n pʋʋs-a-la ne bas-m-yam, n togs-a tɩ d rata a nonglmã ne d sũur fãa. D tõe n togs-a-la bũmb ning fãa sẽn kɩt tɩ d maand yɩɩrã, n kɩs sɩd t’a wʋmda rẽ võore, la t’a rat n sõng-d lame.—Yɩɩn. 145:18, 19.

20. Wãn to la a Zeova nonglmã kɩt tɩ y rat n kolg-a?

²⁰ D rata a Zeova nonglmã wa d sẽn dat bugum n wood waood wakatã. A Zeova nonglmã tara pãng wʋsgo. Woto wã, bɩ y maan sũ-noog a Zeova sẽn nong yãmbã yĩnga. Bɩ a nonglmã kɩt tɩ d ned kam fãa yeel yaa: “Mam nonga a Zeova”!—Yɩɩn. 116:1.