Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • w25 Tʋʋl-nif kiuugu s.n. 14-19
  • D sã n yõg zood ne d tẽed-n-taasã, nafd-d lame

Video pa be zĩ-kãngã ye.

Video wã pa tõog n yi ye.

  • D sã n yõg zood ne d tẽed-n-taasã, nafd-d lame
  • Gũusg Gasgã moonda a Zeova Rĩungã (Zãmsgã rẽnda)—2025
  • Gom-zu-bõonesã
  • Bũmb sẽn wõnd woto
  • D SẼN SEGD N NONG D TẼED-N-TAASÃ VÕORE
  • D WAOOGD TAABA
  • “WELSG PA SEGD N ZĨND YÃMB SƲK YE”
  • D NONG TAAB “NE TƲƲMA, LA NE SƖDA”
  • A Zeova nonga yãmb wʋsgo
    Gũusg Gasgã moonda a Zeova Rĩungã (Zãmsgã rẽnda)—2024
  • “Wẽnnaam kolgr n nafd” tõndo
    Gũusg Gasgã moonda a Zeova Rĩungã (Zãmsgã rẽnda)—2025
  • Yam-yãkr sẽn wilg tɩ d teega a Zeova
    2023 Kiris-nebã vɩɩm la b tʋʋma: Tigissã na-kẽndre
  • Yɩ-y kõatb tɩ rẽ la y na n paam sũ-noogo
    Gũusg Gasgã moonda a Zeova Rĩungã (Zãmsgã rẽnda)—2024
Bũmb a taaba
Gũusg Gasgã moonda a Zeova Rĩungã (Zãmsgã rẽnda)—2025
w25 Tʋʋl-nif kiuugu s.n. 14-19

ZÃMSGÃ YĨNGA 16

YƖƖLL 87 Wa-y tɩ y na paam tẽeb kengre

D sã n yõg zood ne d tẽed-n-taasã, nafd-d lame

“Ade! Saam-biis sã n be ne taab zems-n-taar pʋgẽ, sɩd yaa sõma, la bee yamleoogo!”—YƖƖN. 133:1.

D SẼN NA N BÃNGE

Sõs-kãngã na n wilga d sẽn tõe n maan to-to n yõg zood ne taaba, la bark nins rẽ sẽn wat ne wã.

1-2. Bõe n tar yõod wʋsg a Zeova nifẽ, la bõe la a rat tɩ d maane?

D MANESEM sẽn yaa to-to ne neb a taabã tara yõod wʋsg a Zeova nifẽ. A Zeezi yeelame tɩ d segd n nonga d taabã wa d menga. (Mat. 22:37-39) Woto rat n yeelame tɩ d segd n maanda nebã fãa neere, baa neb nins sẽn pa tũud a Zeova wã. D sã n maand woto d rɩkda Wẽnnaam a Zeova togs-n-taare. “Bala a kɩtdame t’a wĩntoogã zẽkd nin-wẽnsã la nin-sõma wã yĩnga, la a kɩtdẽ tɩ saagã niid nin-tɩrsã la sẽn pa-b tɩrsã yĩnga.”—Mat. 5:45.

2 Yaa sɩd t’a Zeova nonga ninsaalbã fãa, la yaa neb nins sẽn sakd-a wã la a nong n yɩɩda. (Zã 14:21) A ratame tɩ d rɩkd a togs-n-taare. Rẽ n so t’a sagend-d tɩ d nong d saam-biisã la d saam-bi-pogsã wʋsgo. (1 Pɩy. 4:8; Rom. 12:10) Nonglem-kãng wõnda d sẽn nong d roagd wall d zoa hakɩɩk to-to wã.

3. Bõe la d pa segd n yĩm nonglmã wɛɛngẽ?

3 Nonglem yaa wa tɩɩg d sẽn sel d zakẽ. D segd n maanda bũmb toor-toor sẽn na yɩl t’a bɩ. Tẽn-tʋmd a Poll yeela kiris-nebã yaa: “Bɩ y kell n nong taab ne saam-biir nonglem.” (Ebre. 13:1) A Zeova ratame tɩ d paasd d nonglmã pãnga. Sõs-kãngã pʋgẽ d na n yãa d sẽn segd n nong d tẽed-n-taasã võore, la d sẽn tõe n maan to-to n ket n nong-ba.

D SẼN SEGD N NONG D TẼED-N-TAASÃ VÕORE

4. Bõe la d tõe n maan tɩ zems-n-taar kell n zĩnd tõnd ne tẽed-n-taasã sʋk wa Yɩɩn-sõamyã 133:1 sẽn yetã? (Ges-y fot-rãmbã me.)

4 Karm-y Yɩɩn-sõamyã 133:1. Yɩɩn-gʋlsdã yeelame tɩ nonglem hakɩɩk sã n be neb nins sẽn nong a Zeova wã sʋka, “sɩd yaa sõma, la bee yamleoogo.” La d tõeeme n wa pa le getẽ tɩ zems-n-taar ning sẽn be tigingã pʋgẽ wã bee yamleoog wʋsg ye. Yaa wa d sẽn na n yãt tɩ-bedr daar fãa. D wat n pa le neẽ t’a bee rasãnd ye. D wae n yãta d saam-biisã. Tõe tɩ d yãt-b-la naoor wʋsg semen fãa. Bõe la d tõe n maan n ket n nand-ba? D sã n baood sẽk n bʋgsd tigingã ned kam fãa sẽn nafd a taabã la tõnd mengã to-to wã zugu, na n kɩtame tɩ d maneg n nong d tẽed-n-taasã.

Fot-rãmbã: 1. Saam-bi-poak sẽn get tɩɩg vãad sẽn yaa kulɛɛr toor-toore. 2. A sẽn wa n kẽng tigis-kãseng zĩigẽ, n mobgd saam-bi-poak a to. Neb a taab n be tigis-kãsengã zĩigẽ n sõsd ne taab noog-noogo.

Ra tol-y n yĩm-y tɩ zems-n-taar ning sẽn be tigingã pʋgẽ wã bee yamleoog ye (Ges-y sull a 4)


5. Nonglem ning sẽn be tõnd sʋkã tõe n kɩtame tɩ neb a taabã maan bõe?

5 Neb kẽer sã n wa tõnd tigsg pipi n yã nonglem ning sẽn be tõnd sʋkã, noom-b-la wʋsgo. Rẽ bal tõe n kɩtame tɩ b kɩs sɩd tɩ tõnd la kiris-neb hakɩɩkã. A Zeezi yeelame yaa: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:35) Yɩɩ woto ne a Sãntalla sẽn yaa inivɛrsite karen-biig sẽn da zãmsd Biiblã ne a Zeova Kaset rãmbã. B bool-a-la d rasem a tãab tigis-kãseng a ye t’a sak n kẽnge. Tigis-kãsengã pipi daarã sẽn sa wã, a yeela a Biibl karen-saambã yaa: “Mam doagdbã zɩ n mobg-m ye. La yãmb tigis-kãsengã sasa, neb pis-nu la a yiib n mobg maam daar-n-yɛng bala! Mam neeme t’a Zeova tũnugda ne a nin-buiidã n na n wilg maam t’a nong-m lame. Mam dat n lebga a zakã neda.” A Sãntall kell n modga ne Biiblã zãmsgo. A wa n tõog n deega lisg yʋʋmd 2024 pʋgẽ. Sɩd-sɩda, nin-paalsã sã n yã tõnd sẽn nong taab to-to wã la d tʋʋm-sõma a taabã, wae n kɩtdame tɩ b yãk yam n lebg a Zeova Kaset rãmba.—Mat. 5:16.

6. Zood hakɩɩk sã n be tõnd ne d tẽed-n-taasã sʋka, wãn to la tõe n kogl-do?

6 Zood hakɩɩk sã n be tõnd ne d tẽed-n-taasã sʋka, tõe n kogla tõndo. A Poll yeela a tẽed-n-taasã yaa: “Bɩ y kell n keng taab raood daar fãa, . . . sẽn na yɩl tɩ yel-wẽndã pãng sẽn yaa belgrã ra wa kɩt tɩ yãmb ned baa a ye sũur riglem ye.” (Ebre. 3:13) D sã n wa koms raood hal tɩ d naoã rat n bʋdg n bas tɩrlmã sore, a Zeova tõe n tũnuga ne d tẽed-n-taag sẽn yaa gũusda, n sõng tõndo. (Yɩɩn. 73:2, 17, 23) Sõngr a woto buud sɩd nafd-d lame.

7. Wãn to la nonglmã ne zems-n-taarã tũud taaba? (Kolos rãmbã 3:13, 14)

7 D bee neb sẽn modgd wʋsg n wilgdẽ tɩ b nonga taab sʋka, tɩ kɩt tɩ d paamd bark wʋsgo. (1 Zã 4:11) Wala makre nonglmã kɩtame tɩ d “maand sũ-mar ne taaba,” tɩ sõngdẽ tɩ zems-n-taar be d sʋka. (Karm-y Kolos rãmb 3:13, 14; Efɛɛ. 4:2-6) Rẽ n so tɩ d sã n wa tigim taab d tigissã sasa bɩ noomẽ. A buud pa be zĩig a to tẽngã zug ka ye.

D WAOOGD TAABA

8. Bõe la a Zeova maand n sõngd tõnd sẽn na yɩl tɩ zems-n-taar zĩnd d sʋka?

8 D sẽn zemsd taab dũniyã gill zugã yaa yel-solemde. A Zeova kɩtame tɩ d zemsd taaba, baa ne d sẽn pa zems zãngã. (1 Kor. 12:25) Biiblã yeelame tɩ ‘Wẽnnaam zãmsda tõnd sẽn na yɩl tɩ d nong taaba.’ (1 Tes. 4:9) Woto rat n yeelame t’a Zeova tũnugda ne Gʋls-sõamyã, n wilgd tõnd d sẽn tõe n maan to-to tɩ d zoodã pãng paasdẽ. D sã n dat tɩ ‘Wẽnnaam zãmsd-do’ d segd n maagda d yĩng zãmsd a Gomdã la d tũudẽ. (Ebre. 4:12; Zak 1:25) Yaa woto bal kɛpɩ la a Zeova Kaset rãmbã modgd n maandẽ.

9. Bõe la Rom dãmb 12:9-13 wilgd tõnd waoog taabã wɛɛngẽ?

9 Wãn to la Wẽnnaam Gomdã wilgd tõnd d sẽn tõe n maan to-to tɩ zood hakɩɩk zĩnd d sʋka? Tẽeg-y-yã a Poll sẽn yeel bũmb ning rẽ wɛɛngẽ tɩ be Rom dãmb 12:9-13. (Karm-y-yã.) Gomd a sẽn yeel tɩ tar pãng yaa a sẽn yeel tɩ d “yɩt pipi n waoogd taabã.” Woto rat n yeelame tɩ bõe? Rat n yeelame tɩ d segd n baooda segb buud toor-toor n wilgd d taabã tɩ d ‘nong-b-la wʋsgo.’ Wala makre, n yaa sug-kõatba, n nong sãamb reegre, la d yaa kõatba. (Efɛɛ. 4:32) Y pa segd n gũudẽ tɩ y saam-biig wall y saam-bi-poak maan bũmb n wilg t’a rata y zood ye. Y tõe n ‘yɩɩ pipi’ n maan dẽ. Sɩd me a Zeezi yeelame: “Kũun wata ne sũ-noog n yɩɩd reegre.”—Tʋʋ. 20:35.

10. Waoog taabã wɛɛngẽ, bõe la d tõe n maan n wilg tɩ d yaa neb sẽn tʋmd wʋsgo? (Ges-y fotã me.)

10 A Poll sẽn yeel tɩ d yɩt pipi n waoogd taabã poor bala, a sagl-d lame tɩ d yɩ ‘neb sẽn tʋmd wʋsgo, la d ra yɩ kʋɩɩmb ye.’ Ned sẽn tʋmd wʋsg tara yẽesem, n nong tʋʋma. B sã n kõ-a tʋʋmde, a tʋmd-a-la sõma. Yel-bũn 3:27, 28 yetame: “Fo sã n tar tõog n tõe n sõnge, bɩ f ra zãgs n pa maan neb nins sẽn segd ne sõngrã neer ye.” Rẽ n so tɩ d sã n yã ned sẽn dat sõngr bɩ d na n maan d sẽn tõe fãa n sõng-a. D pa na n bas tɩ kaoose, wall d tagsdẽ tɩ ned a to na n sõng-a lame ye.—1 Zã 3:17, 18.

Saam-biig sẽn yaa bi-bɩɩg sẽn dʋ radg zug n wʋkd vãad sẽn be saam-biig sẽn kʋʋl roog zugu.

D sã n yã d tẽed-n-taag sẽn dat sõngr bɩ d yɩ tao-tao n sõng-a (Ges-y sull 10)


11. Bõe n tõe n paas d zoodã pãnga?

11 Bũmb a to d sẽn tõe n maan n wilg tɩ d waoogda d taabã yaa d sẽn na n yɩt tao-tao n kõt-b sugri, b sã n wa beeg-do. Efɛɛz rãmb 4:26 yetame: “Ra bas-y tɩ wĩndgã tɩ lʋɩ tɩ y sũurã ket n nan pa sig ye.” Bõe yĩnga? Vɛrse 27 wã yeelame tɩ yaa sẽn na yɩl n da “kõ Sʋɩtãanã weer ye.” A Zeova yeela naoor wʋsg a Gomdã pʋgẽ tɩ d kõt taab sugri. Kolos rãmb 3:13 yeelame tɩ d “sakd n kõt taab sugri.” Bũmb d sẽn tõe n maan tɩ paas tõnd ne d taabã zoodã pãng wʋsg yaa d sẽn na n sakd n kõt-b sugri. D sã n maand woto, d sõngdame tɩ “laafɩ” la “zems-n-taar” kell n zĩnd d sʋka. (Efɛɛ. 4:3) Yaa vẽeneg tɩ d sã n kõt d taabã sugri d sõngdame tɩ laafɩ la zems-n-taar ket n be d sʋka.

12. Wãn to la a Zeova sõngd tõnd tɩ d tõogd n kõt d taabã sugri?

12 Yaa sɩd tɩ tõe n yɩɩ toog tɩ d kõ ned sẽn beeg-d sugri. La ne Wẽnnaam vʋʋsem sõngã sõngre, d na n tõogame. Gʋls-sõamyã sẽn sagl-d tɩ d ‘nong taab wʋsgo,’ la tɩ d “yɩ neb sẽn tʋmd wʋsgã” poore, a paasame yaa: “Bɩ y bas tɩ vʋʋsem sõngã kɩt tɩ y tall yẽesem.” Woto rat n yeelame tɩ vʋʋsem sõngã tõe n sõng-d lame tɩ d paam yẽesem wʋsgo, n maand sẽn yaa tɩrga. Rẽnd Wẽnnaam vʋʋsem sõngã tõe n sõng-d lame tɩ d wilgd d taabã tɩ d nong-b lame, la d sakd n kõt-b sugri. Rẽ n so tɩ d pelgd d pʋg n pʋʋsd n kot a Zeova t’a sõng-do.—Luk 11:13.

“WELSG PA SEGD N ZĨND YÃMB SƲK YE”

13. Bõe n tõe n wa ne welsg d sʋka?

13 Yaa “neb buud fãa” n be tigingã pʋgẽ, tɩ b yɛlã yaa toor-toore. (1 Tɩm. 2:3, 4) Rẽ tõe n kɩtame tɩ d yãkd yam sẽn yaa toor-toor bũmb sãnda wɛɛngẽ. Wala makre fu-yerdɩ wã la zutã manegr wɛɛngẽ, yĩns laafɩ wã gesg la bũmb nins d sẽn maand n kokd pemsmã wɛɛngẽ. D sã n pa gũusi, rẽ tõe n kɩtame tɩ welsg zĩnd d sʋka. (Rom. 14:4; 1 Kor. 1:10) Wẽnnaam sẽn zãmsd tõnd sẽn na yɩl tɩ d nong taabã yĩnga, d segd n gũusame n da wa pẽdgd neb a taabã n dat tɩ b maan wa tõndo, tɩ yaa wa tõnd yam-yãkrã n yaa sõma n yɩɩd ye.—Fili. 2:3.

14. Bõe la d segd n modgd n maand wakat fãa, la bõe yĩnga?

14 D sã n dat tɩ welsg ra wa zĩnd tõnd tigingã pʋgẽ, d segd n modgdame n kengd taab raoodo, la d paasd taab tẽeb pãng wakat fãa. (1 Tes. 5:11) Rasmã noorã, neb wʋsg sẽn da bas tigissã waoong la koɛɛgã moonego, wall b sẽn da yiis tigingã pʋgẽ lebgd n watame. D reegd-b-la ne sũ-noogo. (2 Kor. 2:8) Saam-bi-poak a ye n da bas tigissã waoong la koɛɛgã mooneg n maan yʋʋm piiga. Ges-y b sẽn deeg-a Rĩungã roogẽ to-to. A yeelame: “Nebã fãa pʋʋsa maam sõma ne sũ-noogo.” (Tʋʋ. 3:19) Wãn to la b sẽn deeg-a woto wã naf-a? A yeelame: “Kɩtame tɩ m neẽ t’a Zeova ratame tɩ m le paam sũ-noogo.” D sã n modgd n kengd d taabã raoodo, Kiristã tõe n tũnuga ne tõnd n bels neb nins “sẽn yɛ la sẽn tʋk zɩɩbã.”—Mat. 11:28, 29.

15. Bõe me la d tõe n maan n sõng tɩ zems-n-taar kell n zĩnd d sʋka? (Ges-y fotã me.)

15 D tõe n tũnuga ne d no-goamã me n sõng tɩ zems-n-taar kell n zĩnd d sʋka. Zoob 12:11 pʋgẽ b sokame yaa: “Tʋbr ka kelgd goam n ges wa zɩlemd sẽn lembd rɩɩbã sɩda?” Ned sã n segl rɩɩbo, a rengd n lembame n bãng sã n yaa noog n yaool n yãk n kõ nebã. Woto me, d segd n deng n tagsa d sẽn na n yeel bũmb ningã zug sõma n yaool n gome. (Yɩɩn. 141:3) D ratame tɩ d sã n na n gom fãa bɩ d kɩs sɩd tɩ d sẽn na n yeel bũmb ningã na n “nafa neb nins sẽn kelgdã,” n paas b tẽebã pãng la keng b raoodo.—Efɛɛ. 4:29.

Saam-biig sẽn lembd rɩɩb n dat n bãng sã n yaa noogo, nand t’a yãk n kõ a sãamba.

Reng-y n tags-y y sẽn na n yeel bũmb ningã zug n yaool n gome (Ges-y sull 15)


16. Sẽn yɩɩd fãa, ãnd dãmb n segd n modg tɩ b goamã kengd raoodo?

16 Sẽn yɩɩd fãa, pʋg-sɩdbã la roagdbã segd n modgame tɩ b goamã kengd raoodo. (Kolo. 3:19, 21; Tɩt 2:4) Kãsem-dãmbã me segd n kengda a Zeova piisã raoodo, la b belsd-ba. (Eza. 32:1, 2; Gal. 6:1) Biiblã yel-bũnd a yembr yetame yaa: “B sã n togs gomd a wakate, ad sɩd yaa sõma!”—Yel. 15:23.

D NONG TAAB “NE TƲƲMA, LA NE SƖDA”

17. Bõe la d tõe n maan n wilg tɩ nonga d tẽed-n-taasã ne d sũur fãa?

17 Tẽn-tʋmd a Zã sagla tõnd tɩ d ra “nong taab ne no-goam wall ne noor ye. D segd n nonga taab ne tʋʋma, la ne sɩda.” (1 Zã 3:18) D rat n nonga d saam-biisã la d saam-bi-pogsã ne d sũur fãa. Bõe la d tõe n maan n wilg tɩ sɩd yaa woto? D sã n baood weer n be ne d tẽed-n-taasã d nonglmã pãng na n paasdame, tɩ d zoodã me pãng paasdẽ. Woto wã, baood-y sẽk n sõsd ne y tẽed-n-taasã tigissã sasa la koɛɛgã mooneg sasa. Kẽnd-y n kaagd-ba. D sã n maand woto, d wilgdame tɩ d sakdame tɩ ‘Wẽnnaam zãmsd tõnd sẽn na yɩl tɩ d nong taaba.’ (1 Tes. 4:9) Rẽ la d na n neẽ tɩ “saam-biis sã n be ne taab zems-n-taar pʋgẽ, sɩd yaa sõma, la bee yamleoogo!”—Yɩɩn. 133:1.

Y NA N LEOKAME TƖ BÕE?

  • Bõe yĩng tɩ d sã n yõg zood ne d tẽed-n-taasã bɩ nafd tõndo?

  • Bõe la d tõe n maand n wilgdẽ tɩ d yɩta pipi n waoogd d taabã?

  • Bõe la d tõe n maan n sõng tɩ zems-n-taar kell n zĩnd d sʋka?

YƖƖLL 90 D keng taab raoodo

a Pa a yʋʋrã meng la woto ye.

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole