“Wẽnnaam kolgr n nafd” tõndo

1-2. a) D sã n dat n yõg zood ne neda, bõe la d segd n maane? b) Bõe yell la d na n gom sõs-kãngã pʋgẽ?

YÃMB tara zoa hakɩɩk bɩ? Y maana a wãn n wa lebg zo-rãmba? Yaa vẽeneg tɩ y ra nong n bee ne taaba, n bao n bãng zu-loees nins ned kam fãa sẽn maood ne-wã, a sẽn nong la a sẽn kisi. Y bãngame tɩ y zoa wã tara zʋg-sõma tɩ y rat n dɩk a togs-n-taare. Y wa n nong-a lame.

² Y sã n dat n yõg zood ne neda, baooda sẽk la modgre. Y sã n dat t’a Zeova yɩ y zoa me, yaa woto. Sõs-kãngã pʋgẽ, d na n yãa bũmb nins d sẽn tõe n maan n kolg Wẽnnaam la rẽ sẽn wat ne bark ninsi. D na n deng n yãa bũmb ning sẽn kɩt tɩ yaa sõma tɩ d kolg a Zeova sẽn yaa d zoa hakɩɩkã.

3. Bõe yĩng tɩ d rat n bʋgsd tõnd sẽn yaa a Zeova zo-rãmbã sẽn wat ne nafa ninsã zugu? Rɩk-y makre.

³ Sãmbg kae tɩ y kɩsa sɩd t’a Zeova kolgr n nafd yãmb ye. La d sã n bʋgsd rẽ sẽn nafd tõnd to-to wã zugu, na n kɩtame tɩ d rat n kolgd Wẽnnaam n paasdẽ. (Yɩɩn. 63:6-8) Wala makre, d miime tɩ d sã n dɩt rɩbd sẽn yaa sõma, n nong n wɩsgd d yĩnsi, n vʋʋsdẽ tɩ sekdẽ la d yũud koom, paasda d yĩnsã laafɩ. La neb wʋsg maanda b toog kae ne bõn-kãense, n pa get b yĩnsã laafɩ wã yell sõma ye. La d sã n wae n tagsd bõn-kãens sẽn nafd tõnd to-to wã yelle, tõe n kɩtame tɩ d modgd n maand rẽ. Woto me, d miime tɩ d sã n kolgd a Zeova sẽn yaa d zoa wã nafda tõndo, la d sã n bʋgsd rẽ sẽn nafd tõnd to-to wã zugu, tõe n kɩtame tɩ d rat n ket n kolgd-a.—Yɩɩn. 119:27-30.

4. Yɩɩn-gʋlsdã tagsg ra yaa wãna? (Yɩɩn-sõamyã 73:28)

⁴ Karm-y Yɩɩn-sõamyã 73:28. Yɩɩn-sõamyã 73 soabã naaga yɩɩn-sõamyã nins a Azaf wall a yageng sẽn gʋlsã sʋka. Ra yaa Levi buudã ned b sẽn yãk t’a yaa yɩɩn-yɩɩnd a Zeova roogã pʋgẽ. Yaa vẽeneg t’a tũ a Zeova ne a sũur fãa yʋʋm wʋsgo. Baasgo, a ra miime tɩ “Wẽnnaam kolgr” n nafd-a, n dat tɩ neb a taabã me maan woto. D sã n kolg Wẽnnaam bark-bʋs la d paamda?

“WẼNNAAM KOLGR” WATA NE SŨ-NOOGO

5. a) Bõe yĩng t’a Zeova kolgr wat ne sũ-noogo? b) Wãn to la sagls nins a Zeova sẽn kõ a Gomdã pʋgẽ wã sõngd yãmb la kogend yãmba? (Yel-bũnã 2:6-16)

⁵ D sã n kolgd a Zeova n paasdẽ, d sũ-noogã me paasdame. (Yɩɩn. 65:4) Bõe n kɩt tɩ yaa woto? D sã n tũud sagls nins sẽn be Biiblã pʋgẽ wã nafd-d lame. Sagl-kãens tõe n kogla tõndo, n kɩt tɩ d ra maan yel-wẽn-kãsems ye. (Karm-y Yel-bũn 2:6-16.) Rẽ n so tɩ Biiblã yeel yaa: “Sũ-noog soab la ned ning sẽn paam yam, la ned ning sẽn paam yam-vẽenem.”—Yel. 3:13.

6. Bõe n wa n kɩt tɩ yɩɩn-gʋlsdã sũur pa le noome?

⁶ Baa a Zeova zo-rãmbã sũur mii n sãama wakat ninga. Yɩɩn-sõamyã 73 soabã gʋlsd wa n tara tags-kɛg tɩ kɩt t’a pa le tar sũ-noog ye. A wa n tagsdame tɩ neb nins sẽn pa tũud a Zeova wã vɩɩm yaa sõma. Rẽ ra namsd-a lame la kɩt t’a maand sũ-kiir ne-ba. A wa n tudg n tagsdame tɩ nen-kɛglem dãmbã la wuk-m-mens rãmbã fãa yaa rakãag-rãmba, tɩ b yĩnsã tara laafɩ la tɩ b pa tar zu-loees ye. (Yɩɩn. 73:3-7, 12) Ra namsd-a-la wʋsgo, hal t’a wa sãmbd a sẽn tũud a Zeova wã sã n tara yõodo. A yeela ne sũ-sãang yaa: “Sɩd-sɩda, yaa zaalem yĩng la mam sẽn mao tɩ m sũurã yaa yɩlemde, la m pek m nus n wilg tɩ m pa tar yellã.”—Yɩɩn. 73:13.

7. D sũur sã n wa sãam wʋsgo, bõe la d tõe n maan tɩ sõng-do? (Ges-y fotã me.)

⁷ La yɩɩn-gʋlsdã pa bas tɩ sũ-sãangã kɩt t’a bas a Zeova tũub ye. A maana bũmb tɩ sõng-a. A kẽnga “Wẽnnaam do-kãsengẽ” wã t’a Zeova sõng-a t’a toeem a tagsgã. (Yɩɩn. 73:17-19) D sũur sã n sãame, a Zeova sẽn yaa d zoa hakɩɩkã miime. D sã n pʋʋs-a n kos sõngr la d sak t’a tũnug ne a Gomdã la tigingã n sõng-do, na n kõ-d-la raood tɩ sũ-sãangã ra tõog tɩ d bas a tũub ye. Baa d sã n wa getẽ tɩ yɩɩrã rat n loog-d lame, a Zeova na n bels-d lame la a kɩt tɩ d yam gãand bãanẽ.—Yɩɩn. 94:19.a

“WẼNNAAM KOLGR” KITDAME TƖ D VƖƖMÃ TAR BARKA, TƖ D SAAGD MANEGR ME

8. Bõe wɛɛngẽ me la Wẽnnaam kolgr nafd tõndo?

⁸ Bũmb a yiib me n kɩt tɩ Wẽnnaam kolgr nafd tõndo. Pipi, kɩtdame tɩ d vɩɩmã tar barka. Yiibu, kɩtdame tɩ d tõe n bas d yam zãng-zãng tɩ manegr n wate. (Zer. 29:11) Bɩ d maneg n gom bõn-kãens yell ball-balle.

9. Bõe yĩng t’a Zeova kolgr kɩtdẽ tɩ d vɩɩmã tar barka?

⁹ D sã n paam a Zeova zoodo d vɩɩmã tara barka. Rũndã-rũndã, neb wʋsg n pa sak n deeg tɩ Wẽnnaam beeme, n tagsdẽ tɩ vɩɩmã pa tar barka, la tɩ ninsaalbã na n wa sãama zãnga. La tõnd sẽn zãms Wẽnnaam Gomdã d kɩsa sɩd tɩ Wẽnnaam “beeme, la t’a lebgda neb nins sẽn baood-a ne b sũy fãa wã roanda.” (Ebre. 11:6) Baa rũndã-rũndã d tara sũ-noogo, bala d maanda bũmb ning d saasẽ Ba a Zeova sẽn naan-d tɩ d maanã, rat n yeel tɩ d tũud-a lame.—Tõo. 10:12, 13.

10. Bõe la a Zeova pʋlem neb nins sẽn teeg-a wã? (Yɩɩn-sõamyã 37:29)

¹⁰ Sẽn pak neb wʋsg yaa bũmb nins b sẽn tõe n paam vɩ-kãngã pʋgẽ wã bala. Sẽn pak-b yaa tʋme, kẽ kãadem n dog kamb la b segl b mens n wa tõog n ges b mens yell b kʋʋlem wakate. B pa tagsd Wẽnnaam yell ye. La a Zeova Kaset rãmbã yẽ teeg-a-la zãng-zãnga. (Yɩɩn. 25:3-5; 1 Tɩm. 6:17) D kɩsa Wẽnnaam ning sẽn yaa d zoa wã sɩda, la d kɩs sɩd me t’a sẽn pʋlem-dã fãa na n pidsame. D saagdame tɩ d na n paama bõn-sõma beoog-daare. Wala makre, d saagdame tɩ d na n tũ-a-la wakat sẽn kõn sa arzãnã pʋgẽ.—Karm-y Yɩɩn-sõamyã 37:29.

11. Tõnd sã n yaa Wẽnnaam zo-rãmba, wãn to la nafd tõnd mengã la Wẽnnaam?

¹¹ Wẽnnaam kolgr nafda tõnd bũmb a taab wɛɛngẽ me. Wala makre, a Zeova pʋlmame t’a zoa sã n maan yel-wẽnd n tek yam n kos sugri, a na n kõ-a-la sugri. (Eza. 1:18) Rẽ kɩtame tɩ d pa ningd d meng taal yel-wẽn d sẽn maan pĩnd yĩng ye. (Yɩɩn. 32:1-5) Sẽn paase, d sã n kolgd a Zeova d noogda a sũuri. (Yel. 23:15) Yaa vẽeneg tɩ y nee bark a taab d sẽn paamd d sẽn yaa Wẽnnaam zo-rãmbã yĩnga. Bɩ d ges y sẽn tõe n maan to-to n paas yãmb ne Wẽnnaam zoodã pãnga.

D SẼN TÕE N KET N ‘KOLGD WẼNNAAM’ TO-TO

12. Bõe la y maan n kolg a Zeova?

¹² Yãmb sã n zoe n deega lisgu, rat n yeelame tɩ y zoe n maana bũmb wʋsg n kolg a Zeova. Y bãnga bũmb wʋsg Wẽnnaam a Zeova la Kirist Zeezi zugu. Y teka yam n kos sugr yel-wẽn nins y sẽn maan pĩndã yĩnga. Y bɩɩsa tẽeb sẽn tar pãng la y modgd n maand a Zeova raabã. La d sã n dat tɩ tõnd ne a Zeova zoodã pãng paase, d segd n ket n maanda bõn-kãense.—Kolo. 2:6.

13. Bũmb a tãab la d tõe n maan n ket n kolgd a Zeova. Bãmb la bʋse?

¹³ Bõe la d tõe n maan tɩ tõnd ne a Zeova zoodã pãng ket n tar paasgo? 1) D segd n ket n karemda Biiblã la d bʋgsdẽ. La d pa segd n karemd Biiblã sẽn na yɩl n bãng Wẽnnaam zugẽ-zugẽ bal ye. D na n baood n bãngda Wẽnnaam daabã võor n paasdẽ, la d sẽn tõe n tũ sagls nins a sẽn kõ a Gomdã pʋgẽ wã to-to. (Efɛɛ. 5:15-17) 2) D segd n bʋgsda kaset nins sẽn wilgd t’a nonga tõndã zug tɩ paasd d tẽebã pãnga. 3) D segd n kell n kisga bũmb nins a Zeova sẽn kisã la d ra bao neb nins sẽn maand bõn-kãensã zood ye.—Yɩɩn. 1:1; 101:3

14. Bõe ne bõe la d tõe n maan n noog a Zeova sũuri? (1 Korẽnt rãmbã 10:31) (Ges-y fot-rãmbã me.)

¹⁴ Karm-y 1 Korẽnt rãmb 10:31. Tara yõod tɩ d modgd n maand bũmb nins sẽn noom a Zeova wã. Rẽ zʋʋga koɛɛgã mooneg la tigissã kẽnd bala. Bũmb nins fãa d sẽn maand raasenkamã segd n taa a Zeova yam. Wala makre, D sã n yaa pʋ-peelem dãmb bũmb fãa pʋgẽ la d yaa kõatba, noogda a Zeova sũuri. (2 Kor. 8:21; 9:7) A ratame me tɩ d wilg tɩ d nanda vɩɩmã. Rẽ n so tɩ d maand gũusg rɩɩbã la rãamã yũub wɛɛngẽ, la d maand bũmb a taab sẽn tõe n paas d yĩnsã laafɩ wã. A Zeova sã n neẽ tɩ d modgdame n na n maan sẽn noom-a bũmb fãa pʋgẽ, kɩtdame t’a maneg n nong tõndo.—Luk 16:10.

15. A Zeova ratame tɩ d tall manesem-bʋg ne neb a taabã?

¹⁵ A Zeova maanda nin-tɩrsã la sẽn pa-b tɩrsã neere. (Mat. 5:45) A ratame tɩ tõnd me maand neb a taabã neere. Wala makre, a ratame tɩ d ‘ra gom ned baa a ye wẽnga, tɩ d ra yɩ zab-zabdba,’ la d “yɩ neb sẽn tar bʋgsem wʋsg ne nebã fãa.” (Tɩt 3:2) Rẽ n so tɩ d pa paoogd ned a tẽeb sẽn yaa toor ne tõnd yĩng ye. (2 Tɩm. 2:23-25) D sã n maand d taabã neer wakat fãa paasda tõnd ne a Zeova zoodã pãnga.

D TÕE N ‘KOLGA WẼNNAAM’ BAA D SÃ N WA TUDGI

16. Yɩɩn-sõamyã 73 soabã gʋlsd wa n tagsda bõe a mengã zugu?

¹⁶ La y sã n wa tagsdẽ tɩ y pa zems ne a Zeova nonglmã y maanda wãna? A buud paama Yɩɩn-sõamyã 73 soabã gʋlsd wa d sẽn yãa wã. A yeelame yaa: “Ra kella bilf tɩ m naoã bʋdge. Mam naoã naan n salgame.” (Yɩɩn. 73:2) A meng yeelame t’a sũurã ra “sãama wʋsgo,” t’a ra yaa “yalma,” n yaa “wa rũng sẽn pa tar yam” n be a Zeova taoore. (Yɩɩn. 73:21, 22) A tagsame t’a kongrã yĩnga a yellã pa le tar tɩɩm, la t’a pa le zems ne a Zeova nonglmã bɩ?

17. a) Yaa wa yɩɩn-gʋlsdã maana bõe a sũurã sẽn wa n sãam wʋsgã? b) Yam-bʋg la d tõe dɩk a kibarã pʋgẽ? (Ges-y fot-rãmbã me.)

¹⁷ Yɩɩn-gʋlsdã sã n tagsame t’a Zeova pa le nong-a, pa kaoos la a toeem yam ye. A sũurã sẽn wa n sãam wʋsgã, a bãngame t’a segd n kolga Wẽnnaam n paas wa a meng goamã sẽn wilgdã. A yeelame: “La masã, mam bee ne yãmb [a Zeova] wakat fãa. Yãmb gãda mam nug-rɩtgo. Yãmb wilgda maam sor ne y saglsã maasem, la y na n kɩt tɩ m paam ziiri.” (Yɩɩn. 73:23, 24) Tõnd me sã n wa getẽ tɩ d tẽebã pãng boogame wall d komsa raood d kongr yĩnga, d tõe n kosa a Zeova t’a kõ-d pãnga. (Yɩɩn. 73:26; 94:18) Baa d naoã sã n wa bʋdg tɩ d zãag bilf ne a Zeova, d tõe n lebg n waa a nengẽ, n kɩs sɩd t’a “kõta sugr wʋsgo.” (Yɩɩn. 86:5) Sẽn yɩɩd fãa, d sũurã sã n wa sãam wʋsgo d segd n kolga a Zeova.—Yɩɩn. 103:13, 14.

‘KOLG-Y WẼNNAAM’ WAKAT FÃA YĨNGA

18. Bõe yĩng tɩ d pa tõe n paas tõnd ne a Zeova zoodã pãng tɩ seke?

¹⁸ D pa tõe n paas tõnd ne a Zeova zoodã pãng tɩ sek ye. D leb n pa tõe n bãng-a n sa me ye. Biiblã yetame tɩ “ned pa tõe” n bãng a Zeova soayã, a yamã la bãngrã fãa ye.—Rom. 11:33.

19. Yɩɩn-sõamyã 73 soabã goamã kɩtame tɩ y tõe n bas y yam ne bõe?

¹⁹ Yɩɩn-sõamyã 73 soabã gʋlsd ra kɩsa sɩd t’a na n ket n kolgda a Zeova. Yɩɩn-sõamyã 79:13 sẽn yaa a Azaf wall a yageng n gʋlsã pʋgẽ b yeelame yaa: “Tõnd sẽn yaa yãmb nin-buiidu, la rũm-bõoneg sẽn be y rũms wãbneg zĩigẽ wã na n pʋʋsa yãmb bark wakat fãa yĩnga. Tõnd na n moona yãmb pẽgrã zãmaan woo zãmaana.” Yãmb me sã n ket n kolgd a Zeova, y tõe n kɩsa sɩd tɩ y na n wa paama bark sẽn pa sate. Yãmb me tõe n yeela wa yɩɩn-gʋlsda yaa: “Wẽnnaam yaa mam sũurã pĩiga, la m pʋɩɩr wakat fãa yĩnga.”—Yɩɩn. 73:26.