Bõe n tõe n sõng-d tɩ d bas sãmbse

1-2. a) A Zeova Kaset soab tõe n wa maanda sãmbs bõe wɛɛngẽ? b) Bõe yell la d na n gom sõs-kãngã pʋgẽ?

D FÃA mii n maanda sãmbsa wakat ninga, baa d yʋʋmã sẽn yaa a soaba. Wala makre, bi-bɩɩg tõe n sokda a meng a Zeova sã n sɩd nand-a lame. A tõe n maanda sãmbs n pa rat n deeg lisg ye. Makr a to yaa saam-biig sẽn yãk yam a bi-bɩɩlem wakat n bas ligd baoob n lʋɩɩs a Zeova raabã taoore. Masã, yɩl n paam ligd n ges a zakã rãmb yell mi n pa nana, t’a sokd a meng yam ning a sẽn yãk a bi-bɩɩlmã wakatã sã n zemsame. Tags-y saam-bi-poak sẽn kʋʋl wʋsg n pa le tar pãng me yelle. A sũurã tõe n sãamda a sẽn pa le tõe n maan bũmb nins a sẽn da maand pĩndã yĩnga. Yãmb zoe n soka y meng yaa: ‘A Zeova nanda maam sɩda? M sẽn mong m meng bũmb kẽerã zemsame bɩ? M ket n tara yõod a Zeova nifẽ bɩ?’

² D sã n sokda d meng sogsg a woto buud n pa bao leoorã, tõe n booga d tẽebã pãnga, n wa kɩt tɩ d bas a Zeova tũub menga. Sõs-kãngã pʋgẽ, d na n yãa Biiblã saglsã sẽn tõe n sõng-d to-to d sã n wa tagsdẽ t’a Zeova toog kae ne-do, tɩ yam nins d sẽn yãk pĩndã pa sõma, wall tɩ d pa le tar yõod a Zeova nifẽ.

BÕE N TÕE N SÕNG-Y TƖ Y BAS SÃMBSE

3. Bõe la d tõe n maan tɩ sõng-d tɩ d bas sãmbse?

³ Bũmb a ye sẽn tõe n sõng-d tɩ d bas sãmbs yaa d sẽn na n bao d sogsgã leoor Wẽnnaam Gomdã pʋgẽ. D sã n maan woto, tõnd ne a Zeova zoodã pãng na n paasame tɩ d tõog n ‘yals kãn-kãe tẽebã pʋgẽ.’—1 Kor. 16:13.

4. Wãn to la d tõe n ‘mak bũmb fãa n gese’? (1 Tesalonik rãmbã 5:21)

⁴ Karm-y 1 Tesalonik rãmb 5:21. Biiblã sagenda tõnd tɩ d ‘mak bũmb fãa n gese.’ Wãn to la d tõe n maan dẽ? D sã n dat n bãng d tagsg sã n zemsame, d segd n maka rẽ ne Biiblã sẽn yetã. D tags bi-bɩɩg ning sẽn sokd a meng a Zeova sã n sɩd nand-a lame wã yelle. A segd n sak n deegame t’a sẽn sokd a meng woto wã sɩd wilgdame tɩ Wẽnnaam toog kae ne-a bɩ? Ayo, a segd n zãmsa Biiblã, n bao n bãng a Zeova tagsg sẽn sɩd yaa a soab ne-a n ‘mak bũmb fãa n gese.’

5. D sã n dat n bãng a Zeova tagsg yell ning wɛɛngẽ, bõe la d tõe n maane?

⁵ D sã n karemd Biiblã, yaa wa a Zeova sẽn gomd ne-do. La d sã n dat n bãng a Zeova tagsg sẽn yaa a soab yell ning wɛɛngẽ, Biiblã kareng bal pa sek ye. D segd n bao vɛrse-rãmb sẽn gomd bũmb ning sẽn pak-dã yell n karme. D tõe n tũnuga ne vaeesgã tʋm-teed nins a Zeova siglgã sẽn yiisã n maan vaeesg rẽ wɛɛngẽ. (Yel. 2:3-6) D tõe n pʋʋsa a Zeova t’a sõng-d vaeesgã sasa tɩ d bãng a tagsg sẽn yaa a soab yellã zugu. Rẽ poore, d tõe n baoo Biiblã sagls la kibay a taab sẽn tõe n sõng-d yellã pʋgẽ. Yɩta sõma me tɩ d karem Biiblã kibay sẽn gomd neb sẽn da tar tõnd zu-loɛɛgã buud yelle.

6. Wãn to la tigissã tõe n sõng-d tɩ d bas sãmbse?

⁶ Tigissã sasa me d “kelgda” a Zeova goamã. D sã n kẽnd tigissã n pa vaandẽ, d tõe n wʋma bũmb sõsg sasa wall ned leoor pʋgẽ sẽn kell n yaa bũmb ning d sẽn dat sẽn na yɩl n bas sãmbsã bal kɛpɩ. (Yel. 27:17) Bɩ d ges d sẽn tõe n maan to-to n bas sãmbs kẽere.

Y SÃ N SÃMBD A ZEOVA SÃ N SƖD NAND-Y LAME

7. Sok-bʋg la neb kẽer mi n sokd b mense?

⁷ Yãmb zoe n soka y meng a Zeova sã n sɩd nand-y lame bɩ? Yãmb sã n tagsdame tɩ y ka võore, y tõe n getame tɩ y pa tol n tõe n yɩ Naandã zoa ye. Tõe tɩ wakat n zĩnd tɩ rĩm a Davɩɩd me ra tagsdẽ t’a ka yõod ye. A tagsame tɩ ninsaalbã sẽn ka zem baa fʋɩ t’a Zeova get b yellã yaa bõn-kãsenga. Rẽ n so t’a sok yaa: “Zeova, ninsaal yaa bõe tɩ yãmb segd n get a yelle, wall ninsaal sẽn yaa kiidã biig yaa bõe tɩ yãmb segd n get-a?” (Yɩɩn. 144:3) Yɛ la d tõe n paam sok-kãngã leoore?

8. Sã n yaa ne 1 Sãmwɛll 16:6, 7, 10-12, bõe la a Zeova get ninsaalbã nengẽ?

⁸ Biiblã wilgdame t’a Zeova nanda baa neb nins sẽn pa tar yõod neb a taabã nifẽ wã. Wala makre, daar a yembre a Zeova tʋma a Sãmwɛll t’a keng n tɩ yãk a Zese bi-ribl a yembr t’a wa lebg Israyɛll rĩma. A Zese ra tara kom-dibli a nii. A boola bãmb b yopoe tɩ b wa a Sãmwɛll nengẽ, n pa bool a Davɩɩd sẽn yaa yao-zʋʋgã ye.b (Karm-y 1 Sãmwɛll 16:6, 7, 10-12.) Baasgo, yaa a Davɩɩd la a Zeova yãk-yã. A Zeova ra mii a Davɩɩd sẽn yaa ned ningã. A ra miime tɩ yaa bi-bɩɩg sẽn nong yẽ ne a sũur fãa.

9. Bõe yĩng tɩ y tõe n kɩs sɩd t’a Zeova nong-y lame? (Ges-y fotã me.)

⁹ Tags-y bũmb nins a Zeova sẽn zoe n maan n wilg t’a nong-y lame wã yelle. A kõt-y-la sagls sẽn zems ne y yɛlã kɛpɩ. (Yɩɩn. 32:8) A sã n da pa mi yãmb sõma, a ra na n tõogd n maanda woto sɩda? (Yɩɩn. 139:1) Y sã n tũud a Zeova saglsã, n ne rẽ sẽn nafd yãmb to-to wã, y na n maneg n kɩsa sɩd t’a geta y yelle. (1 Kib 28:9; Tʋʋ. 17:26, 27) A Zeova nee y sẽn modgd to-to wã. A nee y zʋg-sõma wã, n dat tɩ y yɩ a zoa. (Zer. 17:10) A ratame tɩ yãmb me bao a zoodo.—1 Zã 4:19.

Y SÃ N SOKD Y MENG Y PĨND YAM-YÃKR SÃ N ZEMSAME

10. D sã n tags d pĩnd yam-yãkr yelle, sogs-bʋs n tõe n wa d yamẽ?

¹⁰ Wakat ninga kẽer tõe n tagsa yam b sẽn yãk pĩnd yelle, n sokd b meng yam-yãkrã sã n zemsame. Tõe tɩ b basa tʋʋmd sẽn da kẽesd-b ligd wʋsgo, wall b zãgsame n pa bao tʋʋmd a woto buud sẽn na yɩl n kẽes b meng zãng a Zeova tʋʋmdã pʋgẽ. Tõe tɩ b sẽn maan dẽ wã kaoosa yʋʋm wʋsg masã. B tõe n nee b mitins sẽn tʋmd tʋʋm a woto buudu, tɩ wõnd b yɛlã yaa sõma masã. Rẽ tõe n kɩtame tɩ b sokd b meng yaa: ‘M sẽn mong m meng bũmb kẽer a Zeova yĩngã zemsame sɩda? Pa kɩt tɩ m bõn bũmb kẽer sɩda?’

11. Bõe n da namsd Yɩɩn-sõamyã 73 soabã gʋlsdã?

¹¹ Yãmb sã n sokda y meng sogsg a woto buudu, bɩ y ges Yɩɩn-sõamyã 73 soabã gʋlsdã tagsg sẽn da yaa a soabã. A ra nee neb sẽn pa tũud a Zeova n yaool n tar laafɩ la arzɛka, tɩ yaa wa b pa tar zu-loees ye. (Yɩɩn. 73:3-5, 12) A sã n da get-ba, sẽn yaa wa b yɛlã yaa sõma wã kɩtame t’a tagsdẽ tɩ yẽ sẽn modgd n tũud a Zeova wã pa tar yõod ye. Tags-kãensã ra komsda a raood hal t’a ‘maand yɩɩr daarã tõre.’ (Yɩɩn. 73:13, 14) La a maana wãn n bas tags-kɛgã?

12. Bõe n sõng Yɩɩn-sõamyã 73 soabã gʋlsdã t’a bas a tags-kɛgã? (Yɩɩn-sõamyã 73:16-18)

¹² Karm-y Yɩɩn-sõamyã 73:16-18. Yɩɩn-gʋlsdã kenga a Zeova roogẽ wã. Sõng-a lame t’a tõog n tags neere. A bãngame tɩ baa nin-kãensã sẽn vɩ naar pʋgẽ wã, b yɛlã pa na n baas neer ye. A sẽn bãng rẽ wã, a yam gãanda bãane, t’a kɩs sɩd t’a sẽn yãk yam n lʋɩɩs a Zeova raabã taoorã yaa sõma wʋsgo. Kɩtame t’a yãk yam n na n maneg n tũ a Zeova ne a sũur fãa.—Yɩɩn. 73:23-28.

13. Y sã n wa maand y bãngẽ y pĩnd yam-yãkr wɛɛngẽ, bõe n tõe n sõng-y tɩ y yam gãand bãane? (Ges-y fotã me.)

¹³ Ne Wẽnnaam Gomdã sõngre, yãmb me tõe n paama sũur pʋgẽ bãane. Wãn to? Tags-y bõn-sõma nins y sẽn tarã yelle. Wala makre, y tara arzɛgs sẽn be saasẽ. Tẽeg-y tɩ neb nins sẽn pa tũud a Zeova wã sẽn tõe n paamã yaa bũmb nins sẽn be dũniyã pʋgẽ wã bala. Neb nins sẽn pa tũud a Zeova wã wʋsg teega bũmb nins b sẽn tarã bala, b sẽn pa tar saagr beoog-daarã wɛɛngẽ wã yĩnga. La a Zeova pʋlma yãmb t’a na n ning-y-la bark masã menga, la t’a na n kõ-y-la bõn-sõma beoog sẽn wat hal tɩ y pa tõe n bãng n bilg ye. (Yɩɩn. 145:16) Sẽn paase, tags-y n ges-y-yã: Y tõe n bãnga y vɩɩmã sẽn da na n yɩɩ a soab rũndã-rũndã, y sã n da pa yãk yam nins y sẽn yãkã sɩda? La ad bũmb y sẽn tõe n kɩs sɩd ne: Neb nins sẽn yãkd yam b sẽn nong Wẽnnaam la b taabã yĩngã pa na n kong bũmb nins sẽn tõe n kõ-b sũ-noog hakɩɩkã ye.

Y SÃ N WA TAGSDẼ TƖ Y PA LE TAR YÕOD A ZEOVA NIFẼ

14. Neb kẽer yɛl yaa wãn to, la tõe tɩ b sokda b mens sok-bʋgo?

¹⁴ A Zeova Kaset rãmb kẽer kʋʋlame tɩ yɛlã pa le yaa nana ne-b ye. Kẽer maooda ne bãase, tɩ sãnda lebg koms-rãmba. Rẽ tõe n kɩtame tɩ b tagsdẽ tɩ b pa tar yõod a Zeova nifẽ ye. B tõe n sokda b meng yaa: ‘M ket n tara yõod a Zeova nifẽ sɩda?’

15. Yɩɩn-sõamyã 71 soabã gʋlsdã ra kɩsa sɩd ne bõe?

¹⁵ Yɩɩn-sõamyã 71 soabã gʋlsdã ra tagsda woto. A pʋʋsa a Zeova n yeel yaa: “Ra n daag-y-m n base, m pãngã sã n wa sa ye.” (Yɩɩn. 71:9, 18) Baa ne rẽ, a ra kɩsa sɩd t’a sã n kell n maan sɩd ne a Zeova, a na n wilgd-a-la sor la a kogend-a. Yɩɩn-gʋlsdã bãngame t’a Zeova sũur nooma ne neb nins sẽn maand b sẽn tõe fãa n ket n tũud-a baa ne b yɛlã sẽn pa nana wã.—Yɩɩn. 37:23-25.

16. Bõe yĩng tɩ d tõe n yeel tɩ sẽn kʋʋl-bã tara yõod a Zeova nifẽ? (Yɩɩn-sõamyã 92:12-15)

¹⁶ Y sã n kʋʋlame bɩ y tags a Zeova sẽn get-y to-to wã yelle. A tõe n sõng-y lame tɩ y tẽebã kell n tall pãng baa y keelmã sã n boogdame. Bas-y bũmb nins y sẽn pa le tõe n maanã, n tagsd bũmb nins y sẽn tõe n maanã yelle. (Karm-y Yɩɩn-sõamyã 92:12-15.) Wala makre, y sẽn maand sɩd la y wilgdẽ tɩ y taabã yell pak-y lame wã tõe n kenga neb a taabã raoodo. Y tõe n togsa neb a taabã a Zeova sẽn sõng yãmb to-to yʋʋm wʋsgã pʋgẽ, la Biiblã pʋlems nins y sẽn yãgd tɩ pidsã. Tẽeg-y me tɩ y sẽn pelgd y pʋg n pʋʋsd neb a taabã yĩngã tõe n naf-b-la wʋsgo. (1 Pɩy. 3:12) Baa d yɛlã sẽn yaa to-to, tõnd fãa tara bũmb n tõe n kõ a Zeova la d taabã.

17. Bõe yĩng tɩ d pa segd n mak d meng ne neb a taabã?

¹⁷ Y sũur sã n sãamda y sẽn pa le tõe n tʋm a Zeova tʋʋmdã wa y sẽn datã, bɩ y bas y yam t’a nanda bũmb nins y sẽn tõe n maanã. Y tõe n mi n dat n maka bũmb nins y sẽn maandã ne neb a taabã sẽn maandã. La ra n maan-y woto ye. Bõe yĩnga? Yaa t’a Zeova pa rɩkd nebã n makd taab ye. (Gal. 6:4) Wala makre, a Maari kõo a Zeezi kaam ligd sẽn yaa toogo. (Zã 12:3-5) La pʋg-kõor sẽn yaa naong soabã ninga ligd-koeems a yiib sẽn pa zem baa fʋɩ wẽnd-doogã kogl pʋgẽ. (Luk 21:1-4) A Zeezi yeelame tɩ b yiibã fãa sẽn maanã wilgdame tɩ b tara tẽebo. A Zeova sẽn yaa a Ba wã nanda bũmb nins fãa y sẽn maand y sẽn tẽed-a la y nong-a wã yĩnga, baa y sã n getẽ tɩ pa zem baa fʋɩ.

18. Bõe n tõe n sõng-y tɩ y bas sãmbse? (Ges-y zĩ-gũbrã me: “A Zeova Gomdã tõe n sõng-y lame tɩ y bas sãmbse.”)

¹⁸ D fãa mi n maanda sãmbse. La Wẽnnaam Gomdã sẽn yaa sɩdã tõe n sõng-d lame tɩ d bas sãmbsã wa d sẽn yã wã. Bɩ y maan y sẽn tõe fãa n bas sãmbse, tɩ rẽ la y pa na n le maand yɩɩre. A Zeova mii yãmb sõma. A sũur nooma y sẽn sak n mong y meng bũmb kẽer a tʋʋmdã yĩnga, n pʋlem t’a na n keo-y lame. Bas-y y yam t’a Zeova nonga neb nins fãa sẽn maand sɩd ne-a wã n get b ned kam fãa yelle.