D sẽn tõe n maan tɩ koɛɛgã mooneg kõ-d sũ-noog n paase

1. Neb kẽer tagsg yaa wãn ne koɛɛgã moonego? (Ges-y fotã me.)

D SẼN yaa a Zeova Kaset rãmbã, d moonda koɛɛgã d sẽn nong a Zeova wã yĩnga, la d sẽn dat n sõng neb a taabã tɩ b bãng-a wã yĩnga. Koe-moondb wʋsg nonga koɛɛgã moonego. La koɛɛgã mooneg pa nana ne sãnda ye. Bõe yĩnga? Kẽer yaa yãn-zoɛtba, n tagsdẽ tɩ b pa mi neb zãmsg ye. Yaa toog ne neb kẽer tɩ b kẽng ned b sẽn pa mi zakẽ. Sãnda yɛɛsda b na wa n dig-ba. B zãmsa neb kẽer hal b yãadmẽ tɩ b zãag b meng ne no-koɛɛma. Rẽ n so tɩ baa nin-kãensã sẽn nong a Zeova wʋsgã, yaa toog ne-b tɩ b tɩ moon ned b sẽn pa mi koe-noogã. La b miime tɩ tʋʋmdã tara yõod wʋsgo, n moond koɛɛgã wakat fãa. Yaa vẽeneg t’a Zeova sũur nooma ne-ba.

2. Koɛɛgã mooneg sã n pa kõt-y sũ-noogo, bõe yĩng tɩ y pa segd n koms raoodo?

² Yɛl a woto mi n kɩtame tɩ koɛɛgã mooneg pa kõt-y sũ-noog bɩ? Sã n yaa rẽ, bɩ y ra koms raood ye. Y sẽn pa kɩs y meng sɩdã tõe n wilgdame tɩ y yaa sik-m-meng soaba, tɩ y pa rat tɩ neb a taabã get-yã, la tɩ y ginda no-koɛɛma. Sẽn paase ned kae n dat tɩ b rig-a, sẽn yɩɩd fãa a sã n wa baood n maan a taabã neer ye. Yãmb saasẽ Ba wã mii bũmb nins sẽn namsd yãmbã sõma, n dat n sõng-yã. (Eza. 41:13) Sõs-kãngã pʋgẽ d na n yãa sagls a nu sẽn tõe n sõng-d yel-kãensã wɛɛngẽ, la d sẽn tõe n maan to-to n paam sũ-noog koɛɛgã mooneg pʋgẽ.

WẼNNAAM GOMDÃ TÕE N KÕ-Y-LA RAOODO

3. Bõe n sõng no-rɛɛs a Zeremi t’a moon koɛɛgã?

³ Hal pĩnd wẽndẽ, Wẽnnaam Gomdã sõnga a tʋm-tʋmdbã tɩ b tõog n tʋm tʋʋmd sẽn da pa nana. Wala makre no-rɛɛs a Zeremi. A Zeova sẽn wa n yãk-a t’a moon koɛɛgã, a ra yɛɛsdame. A Zeremi yeelame: “Mam pa mi goam ye. Mam yaa biig bala.” (Zer. 1:6) Bõe n sõng a Zeremi t’a tõog a rabeemã? Wẽnnaam goamã n kõ-a raoodo. A yeelame: “A goamã lebga wa bugum sẽn tar pãng n be mam kõabẽ wã, hal tɩ m pa le tõe n sĩnd ye.” (Zer. 20:8, 9) Baa neb nins a Zeremi sẽn da segd n taas koɛɛgã sẽn da yaa tõatbã, koɛɛg ning Wẽnnaam sẽn yeel t’a moonã kõ-a-la raoodo, t’a tõog n tʋm tʋʋmdã.

4. D sã n karemd Wẽnnaam Gomdã la d bʋgsdẽ, wãn to la na n naf-do? (Kolos rãmbã 1:9, 10)

⁴ Koɛɛg ning sẽn be Wẽnnaam Gomdã pʋgẽ wã kengda kiris-nebã raoodo. Tẽn-tʋmd a Poll sẽn wa n gʋls lɛtr n tool Kolos kiris-nebã, a yeel-b lame tɩ b sã n paas b bãngrã, na n sõng-b lame tɩ b “sẽn kẽnd to-to wã waoogd a Zeova,” la sõng-b tɩ b ket n “womd biis tʋʋm-sõma buud fãa pʋgẽ.” (Karm-y Kolos rãmb 1:9, 10.) Koe-noogã mooneg naaga tʋʋm-sõma nins b sẽn na n tʋmã. Rẽnd d sã n karemd Wẽnnaam Gomdã la d bʋgsdẽ, paasda d tẽebã pãnga, la kɩtdẽ tɩ d maneg n ne vẽeneg tɩ Rĩungã koɛɛgã mooneg tara yõod wʋsgo.

5. Bõe la d tõe n maan tɩ Biiblã kareng la a zãmsg naf-d sõma?

⁵ D sã n dat n dɩ Wẽnnaam Gomdã yõod sõma, d pa segd karemd-a, n zãmsd-a la d bʋgsd a zug var-var ye. Maagd-y y yĩng n maand rẽ. Y sã n wa karemd Biiblã n yã vɛrse y sẽn pa wʋmd a võor sõma, bɩ y ra long n loog ye. Tũnug-y ne Index des publications des Témoins de Jéhovah sebrã, wall ne Vaeesg sebre, a Zeova Kaset rãmbã yĩnga n bao n wʋm vɛrse wã võore. Y sã n maagd y yĩng n zãmsdẽ, y na n maneg n kɩsa sɩd tɩ Wẽnnaam Gomdã yaa sɩda. (1 Tes. 5:21) Y sã n kɩs sɩd ne bũmb ning y sẽn zãmsdã, y na n maneg n moona rẽ ne sũ-noogo.

SEGL-Y Y MENG SÕMA KOƐƐGÃ MOONEG YĨNGA

6. Bõe yĩng tɩ d segd n segend d mens sõma koɛɛgã mooneg yĩnga?

⁶ Y sã n segl-y meng sõma koɛɛgã mooneg yĩnga, y na n tõog n basda y yam n sõsd ne nebã. Nand t’a Zeezi tʋm a karen-biisã tɩ b tɩ moon koɛɛgã, a reng n sõng-b lame tɩ b segl b mense. (Luk 10:1-11) Karen-biisã sẽn tũ a Zeezi saglsã, bũmb nins b sẽn tõog n maanã kõ-b-la sũ-noog wʋsgo.—Luk 10:17.

7. Wãn to la d tõe n segl d meng koɛɛgã mooneg yĩnga? (Ges-y fotã me.)

⁷ Bõe la d tõe n maan n segl d meng koɛɛgã mooneg yĩnga? D tog n tagsa d sẽn na n taas nebã sɩdã koɛɛgã to-to ne d meng goama. D tog n tagsa bũmb ning yell d sẽn dat n gomã zugu, n bao n bãng d sẽn na n gom to-to tɩ kẽ nebã sũyã. Yɩta sõma me tɩ d tags bũmb a yiib bɩ a tãab nebã sẽn wae n yet koɛɛgã mooneg sasa, la d ges d sẽn tõe n leok to-to, b sã n yeel woto. Dẽ, d sã n wa gomd ne neda, d na n modg n basa d yam, tɩ d nengã be laado, la d wilgdẽ tɩ d rata a neere.

8. Bõe yĩng tɩ d tõe n yeel tɩ kiris-nebã yaa wa tãnd laas nins yell tẽn-tʋmd a Poll sẽn gomã?

⁸ Tẽn-tʋmd a Poll rɩka makr n gom koɛɛgã mooneg yelle, n yeel yaa: “Tõnd tara bõn-sõn-kãngã tãnd laas pʋsẽ.” (2 Kor. 4:7) Bõn-sõngã yaa bõe? Yaa Rĩungã koɛɛgã mooneg sẽn fãagd yõyã. (2 Kor. 4:1) Tãnd laasã makda bõe? B makda Wẽnnaam tʋm-tʋmdbã sẽn moond neb a taabã koe-noogã. A Poll dãmb wakatẽ wã, toandbã ra tara tãnd rʋgd n ningd b bõn-sõma wã. Wala makre, rɩɩbo, divẽ la ligdi. Woto me, a Zeova bobla tõnd koe-noogã sẽn yaa bõn-sõngã. Ne a Zeova sõngre, d tõe n paama raood n taas nebã koɛɛgã sõma.

PƲƲS-Y-YÃ A ZEOVA N KOS RAOODO

9. Y sã n zoeta ninsaal wall y yɛɛsd b na wa n dig-yã, bõe la y tõe n maan tɩ sõng-yã? (Ges-y fotã me.)

⁹ Wakat ninga, ninsaal zoees wall d sẽn yɛɛsd tɩ b na wa n dig-d yĩng tõe n komsa d raoodo. Yɛl a woto taoore bõe n tõe n sõng-d tɩ d ra koms raoodo? Tẽeg-y tẽn-tʋmdbã sẽn pʋʋs to-to, b sẽn wa n yeel-b tɩ b ra le moon koɛɛgã. B pa bas tɩ rabeemã tõog-b ye. B kosa a Zeova t’a sõng-b tɩ b “kell n moon [a] gomdã ne raood wʋsgo.” A Zeova leoka b pʋʋsgã zĩig pʋgẽ. (Tʋʋ. 4:18, 29, 31) Tõnd me sã n mi n zoeta ninsaala, d segd n pʋʋsa a Zeova n kos sõngre. Kos-y-yã a Zeova t’a sõng-y tɩ y sẽn nong nebã kɩt tɩ y bas ninsaal zoeesã.

10. Bõe la a Zeova maand n sõngd tõnd tɩ d moond koɛɛga? (Ezayi 43:10-12)

¹⁰ A Zeova yãka tõnd tɩ d yaa a Kaset rãmba, n pʋlem t’a na n sõng-d lame tɩ d tall raoodo. (Karm-y Ezayi 43:10-12.) D ges bũmb a naas wɛɛngẽ a sẽn maand woto. Pipi, a Zeezi bee ne tõnd wakat ning fãa d sẽn moond koe-noogã. (Mat. 28:18-20) Yiibu, a Zeova yãka malɛgs tɩ b sõngd tõndo. (Vẽn. 14:6) Tãabo, a Zeova kõta tõnd a vʋʋsem sõngã sẽn yaa sõangdã, t’a tẽegd tõnd bũmb nins d sẽn zãmsã. (Zã 14:25, 26) Naase, a Zeova kõo tõnd saam-biis la saam-bi-pogs tɩ b yãagd tõndo. Ne a Zeova la d tẽed-n-taasã sẽn nong-dã sõngre, d tõe n kell n talla raood n moon koɛɛgã.

SAKD-Y N TOEEMD-Y-YÃ, LA Y TALL YAM-SÕNGO

11. Y sã n wa moond koɛɛgã, bõe la y tõe n maan n paam neb wʋsg n sõs ne? (Ges-y fotã me.)

¹¹ Yãmb sã n moondẽ n pa paamd nebã yiri, komsda y raood bɩ? Sã n yaa woto bɩ y sok y meng yaa: ‘Tõnd koe-moonegã zĩigẽ nebã bee yɛ wakat kãnga?’ (Tʋʋ. 16:13) ‘B kẽnga tʋʋm wall raag bɩ?’ Sã n yaa rẽ, y sã n moond soayã noyã, y kõn paam neb n yɩɩd sɩda? Saam-biig yʋʋr sẽn boond t’a Zozuwe yeelame: “Mam paamda neb wʋsg n moond butig-bɛdã noy la parkĩng-rãmbẽ wã.” Yẽ ne a pag a Birzit moonda koɛɛgã zĩ-sobd n paas hat daar zaabre, n paamd neb wʋsgo.—Efɛɛ. 5:15, 16.

12. Bõe la d tõe n maan n bãng nebã sẽn tẽed bũmb ninsã, la bũmb nins sẽn pak-bã?

¹² Nebã sã n pa kelgd koɛɛgã sõma, bɩ y bao n bãng b sẽn tẽed bũmb ninsã, la bũmb nins sẽn pak-bã. A Zozuwe ne a Birzit sã n wa moond koɛɛgã, b tikda sokr sẽn be d seb-vãoog a ye zugu. Wala makre, b tikda Yãmb tagsg yaa bõe ne Biiblã? seb-vãoogã n sok yaa: “Neb kẽer tẽedame tɩ Biiblã yaa Wẽnnaam Gomde, tɩ sãnda pa tẽed rẽ ye. La yãmb tagsg yaa wãna?” Naoor wʋsgo, rẽ pakda sor tɩ b moon koɛɛgã.

13. Baa nebã pa sak n kelg-d koɛɛgã mooneg sasa, bõe yĩng tɩ d tõe n yeel tɩ d tʋma d tʋʋmdã? (Yel-bũnã 27:11)

¹³ Baa d sã n moond koɛɛgã tɩ nebã pa kelgdẽ, pa rat n yeel tɩ d tʋʋmdã pa womd biis ye. Bõe yĩnga? Bala d maanda bũmb ning a Zeova ne a Biigã sẽn yeel tõnd tɩ d maanã. D kõta kasetã. (Tʋʋ. 10:42) Baa d pa paam ned n moon koɛɛgã, wall b zãgsame tɩ b kõn kelg-do, d tõe n maana sũ-noogo, bala d miime tɩ d noogda d saasẽ Ba wã sũuri.—Karm-y Yel-bũn 27:11.

14. Koe-moond sã n paam ned sẽn sak n na n zãms Biiblã, bõe yĩng tɩ d fãa sũur noomẽ?

¹⁴ Koe-moond a to sã n paam ned sẽn na n sak n zãms Biiblã, tõnd me tõe n maana sũ-noogo. Gũusg Gasg a ye pʋgẽ, b maka tõnd tʋʋmdã ne biig sẽn menem tɩ d gẽesdẽ. Neb wʋsg gilgda zĩig fãa n gẽesd-a. B sã n wa yã biigã, pa ned ning sẽn yã-a wã bal sũur n noom ye. Nebã fãa sũur noomame. Woto me, sõng nebã tɩ b lebg Kirist karen-biisã pa nin-yɛng tʋʋmd ye. Sẽn na yɩl n tõog n moon d koɛɛgã mooneg zĩigẽ nebã fãa, d rata koe-moondbã fãa sõngre. Nin-paall sã n sɩng tigissã waoongo, koe-moondbã fãa sũur noomame.

TAGSD-Y Y SẼN NONG A ZEOVA LA NEB A TAABÃ YELLE

15. D sã n tũ Matiye 22:37-39 wã sẽn yetã, bõe yĩng tɩ na n paas d yẽesmã koɛɛgã mooneg pʋgẽ? (Ges-y fotã me.)

¹⁵ D sã n tagsd d sẽn nong a Zeova la d taabã yelle, tõe n paasa d yẽesmã koɛɛgã mooneg pʋgẽ. (Karm-y Matiye 22:37-39.) Tags-y n ges-y-yã a Zeova sũur sẽn noom to-to a sã n ne d sẽn tʋmd tʋʋmdã, la nebã sũur sẽn na n yɩ noog to-to b sã n sɩng Biiblã zãmsgo. Tẽeg-y me tɩ neb nins sẽn kelgd koɛɛgã n yãk yam n na n tũ a Zeova wã tõe n wa vɩɩmda wakat sẽn kõn sa.—Zã 6:40; 1 Tɩm. 4:16.

16. Bũmb ning sã n wa kɩt tɩ d pa tõe n yi d zakẽ wã, bõe la d tõe n maan n paam sũ-noog koɛɛgã mooneg pʋgẽ? Togs-y kibare.

¹⁶ Bũmb ning n kɩt tɩ y pa tõe n yi y zakẽ wã bɩ? Sã n yaa woto, bɩ y tagsd bũmb nins y sẽn tõe n maan n wilg tɩ y nonga a Zeova la neb a taabã yelle. Koronavirisã bã-loangdgã wakate, a Sãmwɛll ne a pag a Daniya ra pa tõe n yi b zakẽ wã ye. Wakat kãng sẽn pa yɩ nana wã, b ra tũnugda ne telefõn la lɛta n moond koɛɛgã, la b tũnugd ne Zoom n zãmsd nebã Biiblã. A Sãmwɛll moona neb nins a sẽn da yãt logtorã yiri, a sẽn wa n be be tɩ b tɩpd-a kãnsɛɛr sẽn da tar-a yĩnga. A yeelame: “D sã n wa maood ne zu-loeese d tõe n maanda yɩɩre, d tõe n yaame, wall d tẽebã tõe n komsame. D rata sũ-noog a Zeova tʋʋmdã pʋgẽ.” Zu-loe-kãens sasa, a Daniya lʋɩɩme n pogle, tɩ yɩ tɩlɛ t’a pa zakẽ kiuug a tãabo. Rẽ poore, yɩɩ tɩlɛ t’a zomb puus-puus kiuug a yoobe. A yeelame: “M da modgd n maanda bũmb nins fãa m sẽn tõe n maan wakat kãngã. M tõog n moona logto-poak sẽn da wat n get m yelle, la neb nins fãa sẽn da wat tõnd zakẽ wã. M tõogame me n tũnug ne telefõnnã, n sõs ne pag a ye sẽn tʋmd ne siglg sẽn koosd logtoɛɛmb teedo.” A Sãmwɛll ne a Daniya yɛlã kɩtame tɩ b ra pa tõe n moon koɛɛgã wʋsgo, la b maana b sẽn tõe, tɩ rẽ ra kõt-b sũ-noogo.

17. Y sã n dat tɩ sagls nins d sẽn paam sõs-kãngã pʋgẽ wã naf-y sõma, bõe la y segd n maane?

¹⁷ Y sã n dat tɩ sagls nins b sẽn kõ sõs-kãngã pʋgẽ wã naf-y sõma, y segd n tũu b fãa. Saglg fãa yaa wa zõod b sẽn tall n segl rɩɩbo. Yaa zõodã fãa sẽn na n naag taab la rɩɩbã nooma. D sã n tũ saglsã fãa, d na n tõog n basa tags-kɛga, la d paam sũ-noog wʋsg koɛɛgã mooneg pʋgẽ.