A Zeova ratame tɩ nebã fãa tek yam n kos sugri

1. Wãn to la ned wilgd t’a teka yam n kot sugri?

D SÃ N maan bũmb sẽn pa sõma, tara yõod tɩ d tek yam n kos sugri. Biiblã pʋgẽ b sã n yeel tɩ ned teka yam n kos sugri, rat n yeelame t’a toeema yam yel-wẽnd a sẽn maan wɛɛngẽ, n bas rẽ maaneg la a yãk yam n pa na n tol n le maan ye.—Ges-y Biiblã gom-biis võor bilgrã zĩigẽ: “Tek yam n kos sugri.”

2. Bõe yĩng tɩ d fãa segd n bao n bãng tek yam n kos sugrã sẽn dat n yɛɛlga? (Neemi 8:9-11)

² Ninsaal buud fãa segd n bao n bãnga tek yam n kos sugrã sẽn yaa bũmb ninga. Bõe yĩnga? Bala tõnd fãa maanda yel-wẽn daar fãa. D sẽn yaa a Ãdem ne Awa yagensã yĩnga, d rogda ne yel-wẽndã n yaa kiidba. (Rom. 3:23; 5:12) Ned baa a ye pa tõe n gil rẽ ye. Baa neb sẽn da tar tẽeb sẽn tar pãng ra segd n maoome n da maan yel-wẽnd ye. Wala makre, tẽn-tʋmd a Polle. (Rom. 7:21-24) Woto rat n yeelame tɩ d segd n kẽnda ne sũ-sãang wakat fãa d yel-wẽnã yĩng bɩ? Ayo. A Zeova yaa nimbãan-zoɛta, n dat tɩ d vɩɩmã yɩ noogo. Tẽeg-y bũmb ning sẽn paam Zʋɩf-rãmb nins sẽn da be a Neemi wakatẽ wã yelle. (Karm-y Neemi 8:9-11.) A Zeova ra pa rat tɩ b sãam b sũy wʋsg yel-wẽn b sẽn maan pĩnd yĩng ye. A ra ratame tɩ b tũ-a ne sũ-noogo. A Zeova miime tɩ d sã n tek yam n kos sugri, wata ne sũ-noogo. Rẽ n so t’a wilg tõnd tek yam n kos sugrã sẽn dat n yɛɛlga. D sã n maan yel-wẽnd n tek yam n kos sugri, d tõe n basa d yam tɩ d Ba wã sẽn yaa nimbãan-zoɛtã na n kõ-d-la sugri.

3. Bõe yell la d na n gom sõs-kãngã pʋgẽ?

³ Bɩ d bao n bãng tek yam n kos sugrã sẽn dat n yɛɛlgã n paase. D na n goma bũmb a tãab yelle. Pipi, d na n yãa a Zeova sẽn wilg Israyɛll nebã bũmb ning tek yam n kos sugrã wɛɛngẽ. Rẽ poore, d na n yãa a Zeova sẽn sõng yel-wẽn-maandb to-to sẽn na yɩl tɩ b tek yam n kos sugri. Sẽn na n baase, d na n goma a Zeezi karen-biisã sẽn bãng bũmb ning tek yam n kos sugrã wɛɛngẽ.

A ZEOVA SẼN WILG ISRAYƐLL NEBÃ BŨMB NING TEK YAMÃ WƐƐNGẼ

4. Bõe la a Zeova sõng Israyɛll nebã tɩ bãng tek yam n kos sugrã wɛɛngẽ?

⁴ A Zeova sẽn wa n na n yãk Israyɛll nebã tɩ b lebg buud a sẽn so wã, a maana kaool ne-ba. B sã n da kell n sak a noyã a ra na n kogend-b lame la a ningd-b barka. A Zeova goma Tõogã yelle, n yeel-b yaa: “No-kãngã mam sẽn taasd yãmb rũndã wã pa toog wʋsg ne-yã, bɩ n yɩɩd yãmb nug ye.” (Tõo. 30:11, 16) La b sã n da tõdg-a, wala makre b sã n da yãk yam n tũ wẽnnaam-dãmb a taaba, a ra na n bas-b lame n pa le ningd-b barka, tɩ b namse. Baa ne rẽ, b ra tõe n le paama a Zeova zoodo. B ra tõe ‘n lebg n waa b Wẽnnaam a Zeova nengẽ n kelg a koɛɛgã.’ (Tõo. 30:1-3, 17-20) Rat n yeelame tɩ b tõe n teka yam n kos sugri. B sã n maan woto, b le paamda a Zeova zood la a barka.

5. Wãn to la a Zeova wilg t’a pa raag a nin-buiidã n base? (2 Rĩm-dãmbã 17:13, 14)

⁵ A Zeova nin-buiidã kɩɩs-a-la naoor wʋsgo. B sẽn pʋʋs bõn-naandsã sẽn yãk a toogo, b tʋma tʋʋm-beed a taaba. Rẽ yɩɩ sabab tɩ b namse. La a Zeova pa raag a nin-buiidã sẽn yaa tõatbã n bas ye. A tʋma a no-rɛɛsdb naoor wʋsg tɩ b sagl a nin-buiidã sẽn na yɩl tɩ b tek yam n kos sugr n lebg n wa a nengẽ.—Karm-y 2 Rĩm-dãmb 17:13, 14.

6. Wãn to la a Zeova tũnug ne a no-rɛɛsdbã n wilg a nin-buiidã tɩ tara yõod tɩ b tek yam n kos sugri? (Ges-y fotã me.)

⁶ A Zeova ra wae n tʋmda a no-rɛɛsdbã tɩ b keoogd a nin-buiidã la b remsd-ba. Wala makre, a Zeova kɩtame t’a Zeremi yeel yaa: “Israyɛll sẽn pa maand sɩda, lebg n wa. . . . Mam pa na n sulg n ges foo ne sũ-yikr ye. . . . Mam sũurã pa na n kell n puud wakat fãa yĩng ye. Sak n deeg bal tɩ f tara taale, bala fo kɩɩsa f Wẽnnaam a Zeova.” (Zer. 3:12, 13) A Zeova tũnuga ne a Zowɛll n yeele: “Lebg-y n wa-y mam nengẽ ne y sũyã fãa.” (Zow. 2:12, 13) A kɩtame t’a Ezayi yeel yaa: “Yɩlg-y y mense. Yiis-y y tʋʋm-wẽnsã mam taoore. Bas-y wẽng maanego.” (Eza. 1:16-19) Sẽn paase, a Zeova tũnuga ne a Ezekɩyɛll n yeel yaa: “Mam maanda sũ-noog ne nin-wẽng kũum bɩ? . . . Mam daabã pa a toeem a manesmã n kell n vɩɩmd sɩda? Mam pa maand sũ-noog ne ned baa a ye kũum ye. . . . Woto wã, toeem-y n kell n vɩɩmde.” (Eze. 18:23, 32) Ned sã n tek yam n kos sugri, nooma a Zeova wʋsgo. Bala a ratame t’a wa paam vɩɩm sẽn kõn sa wã. La a Zeova pa zĩ n gũudẽ tɩ ned tek yam n kos sugr t’a yaool n sɩng a soab sõngr ye. Ad kibay a taab sẽn wilgd rẽ.

7. A Zeova tũnuga ne a Ooze la a pagã kibarã n na n wilg Israyɛll nebã bõe?

⁷ Ges-y-yã a Zeova sẽn tũnug ne no-rɛɛs a Ooze la a pag a Gomeer n wilg Israyɛll nebã bũmb ningã. A Gomeer yoome, n wa tolg n bas a Ooze n pʋg rap a taaba. A yellã ra sãamame n pa le tar tɩɩm bɩ? A Zeova sẽn da tõe n bãng sẽn be ninsaal sũurẽ wã yeela a Ooze yaa: “Kẽng yɛs tɩ f yamã kẽ pag ning rao a to sẽn nonge, la sẽn yoodã, wa a Zeova sẽn nong Israyɛll nin-buiidã tɩ b yaool n bas n baood wẽnnaam-dãmb a taabã.” (Ooze 3:1; Yel. 16:2) A Ooze pagã ra ket n yoodame. Baa ne rẽ a Zeova yeela a Ooze t’a kõ-a sugr la a le rɩk-a n maan a paga.a A Zeova tũnuga ne a Ooze kibarã n na n sõng a nin-buiidã tɩ b bãng a tagsg sẽn yaa a soab ne-ba. Baa ne b sẽn maand yel-wẽn-kãsemsã, a ket n nong-b lame n tʋmd a no-rɛɛsdbã sẽn na yɩl n sõng-b tɩ b tek yam n kos sugr la b toeem zʋgo. Kiba-kãngã wilgdame t’a Zeova sẽn yaa “soab ning sẽn feesd sũyã” tõe n yãka yam n na n sõng ned sẽn ket n maand yel-wẽn-kãseng sẽn na yɩl t’a tek yam n kos sugr bɩ? (Yel. 17:3) Bɩ d bao sok-kãng leoore.

A ZEOVA SẼN SÕNG YEL-WẼN-MAANDB TO-TO SẼN NA YƖL TƖ B TEK YAM

8. Wãn to la a Zeova bao n na n sõng a Kayẽ sẽn na yɩl t’a tek yam n kos sugri? (Sɩngre 4:3-7) (Ges-y fotã me.)

⁸ A Kayẽ n yɩ a Ãdem ne a Awa pipi biiga. A roagdbã sẽn yaa yel-wẽn-maandbã yĩnga, a roga ne yel-wẽndã n mi n tar tʋls-wẽnse. Sẽn paase, Biiblã yeelame t’a Kayẽ “meng tʋʋmã ra yaa wẽnse.” (1 Zã 3:12) Tõe tɩ yaa rẽ yĩng la a Zeova “sũur sẽn pa yɩ noog baa bilf ne a Kayẽ la a maoongã.” La a Kayẽ pa toeem a manesmã ye. A “sũurã yika wʋsgo, t’a koms raoodo.” Bõe la a Zeova maan rẽ poore? A goma ne a Kayẽ. (Karm-y Sɩngr 4:3-7.) A goma ne-a ne bʋgsem n wilga t’a sã n toeeme, a na n ning-a-la barka, la a keoog-a lame t’a sã n pa sik a sũurã a tõe n wa maana sẽn pa sõma. Zu-bʋgo, a Kayẽ pa kelg ye. A pa bas t’a Zeova sõng-a t’a tek yam n kos sugr ye. Rẽ kɩtame t’a Zeova bas n pa le sõng yel-wẽn-maandb a taab sẽn na yɩl tɩ b tek yam n kos sugr bɩ? Ayo.

9. Bõe la a Zeova maan n sõng a Davɩɩd t’a tek yam n kos sugri?

⁹ A Zeova ra nonga rĩm a Davɩɩd wʋsgo. A pʋd n yeelame t’a yaa ‘ned yẽ sũur sẽn noom ne.’ (Tʋʋ. 13:22) La a Davɩɩd maana yel-wẽn-kãsemse. Wala makre, a yoome la a kʋ neda. Sã n yaa ne a Moyiiz Tõogã sẽn wilgã, a Davɩɩd ra segda ne kũum. (Maan. 20:10; Sõd. 35:31) Baa ne rẽ a Zeova yãka yam n na n sõng a Davɩɩd t’a tek yam n kos sugri.b A tʋma a no-rɛɛs a Natã a Davɩɩd nengẽ, baa ne a sẽn da nan pa tek yam n kos sugrã. A Natã rɩka makr n na n sõng a Davɩɩd t’a bãng t’a sẽn maanã yaa wẽng wʋsgo. A goamã kẽe a Davɩɩd wʋsg t’a tek yam n kos sugri. (2 Sãm. 12:1-14) A Davɩɩd gʋlsa yɩɩll sẽn wilgd a sũurã sẽn sãam to-to ne bũmb ning a sẽn maanã. (Yɩɩn. 51, sɩngr goamã) Yɩɩn-kãng belsa neb wʋsg sẽn maan yel-wẽna, la kɩt tɩ b tek yam n kos sugri. A Zeova sẽn sõng a Davɩɩd t’a tek yam n kos sugrã pa noom-y sɩda?

10. Yãmb tagsg yaa wãn ne a Zeova sũ-marã la a sẽn kõt yel-wẽn-maandbã sugrã?

¹⁰ A Zeova kisa yel-wẽnd buud fãa. (Yɩɩn. 5:4, 5) La baa a sẽn mi tɩ d yaa yel-wẽn-maandbã, a sẽn nong tõndã yĩnga a yãka yam n na n sõng-d tɩ d tõog n tũ-a. Wakat fãa a sõngda baa sẽn maan-b yel-wẽn-kãsemsã sẽn na yɩl tɩ b tek yam n kos sugri. D sẽn mi rẽ wã pa kengd raood sɩda? D sã n tags a Zeova sũ-marã ne a sẽn kõt sugrã yelle, kɩtdame tɩ d rat n sak-a ne d sũur fãa, tɩ d sã n maan yel-wẽnd bɩ d yɩ tao-tao n tek yam n kos sugri. Masã d ges b sẽn sõng pipi kiris-nebã tɩ b bãng bũmb ning n paas tek yam n kos sugrã wɛɛngẽ.

A ZEEZI KAREN-BIISÃ SẼN BÃNG BŨMB NING TEK YAMÃ WƐƐNGẼ

11-12. Bõe la a Zeezi sõng a kɛlgdbã tɩ b bãng a Ba wã sẽn kõt sugr to-to wã wɛɛngẽ? (Ges-y fotã.)

¹¹ Wakat ning Mesi wã sẽn da segd n wa tẽngã zugã wa n taame. Sõsg ning sẽn loogã pʋgẽ, d yãame t’a Zeova tũnuga ne a Zãmbatiis la a Zeezi fãa n wilg nebã tek yam n kos sugrã yõodo.—Mat. 3:1, 2; 4:17.

¹² A Zeezi sẽn wa n moond koɛɛgã, a wilga a kɛlgdbã a Ba wã sẽn kõt sugr to-to wã. A wẽe yel-bũnd n gom biig sẽn sãam a ba paoong yelle, n na n sõng a kɛlgdbã tɩ b wʋm rẽ võor sõma. Biigã yãka yam n yi a ba wã zakẽ n tɩ tʋm tʋʋm-dẽgdo. La ‘a wa n bãnga yam’ n lebg na n kuil a ba wã zakẽ. A ba wã manesem yɩɩ wãna? A Zeezi yeelame t’a “sẽn wa n ket n be hal yɩɩga, a ba wã yã-a lame t’a nimbãaneg yõk-a. A ba wã wudgame n tɩ mobg-a, la a mok-a sõma.” Biigã ra rat n kos a ba wã t’a rɩk-a t’a lebg a tʋm-tʋmda. La a ba wã bool-a lame t’a biiga, n lebg n deeg-a a zakẽ wã. Ba wã yeelame yaa: “A ra menemame, la a lebg n waame.” (Luk 15:11-32) A Zeezi sẽn wa n be saasẽ nand t’a wa tẽngã zugã, yaa vẽeneg t’a yãa a Ba wã sẽn zoe yel-wẽn-maandb sẽn tek yam n kos sugr nimbãaneg naoor wʋsgo. Yel-bũn-kãngã a Zeezi sẽn wẽ wã sɩd kengda raoodo, la wilgd d Ba a Zeova nimbãan-zoeerã sẽn yaa kãseng to-to.

13-14. Bõe la tẽn-tʋmd a Pɩyɛɛr bãng tek yam n kos sugrã wɛɛngẽ, la bõe la a wilg neb a taabã rẽ wɛɛngẽ? (Ges-y fotã me.)

¹³ A Zeezi sõnga tẽn-tʋmd a Pɩyɛɛr t’a bãng bũmb wʋsg tek yam n kos sugrã la a Zeova sẽn kõt sugr to-to wã wɛɛngẽ. A Pɩyɛɛr tudga naoor wʋsg t’a Zeezi sak n kõ-a sugri. Wala makre, a Pɩyɛɛr sẽn kɩɩs naoor a tãab t’a pa mi a Zeezi wã poore, a sũurã sãama wʋsgo. (Mat. 26:34, 35, 69-75) La a Zeezi vʋʋgrã poore, a vẽnega a meng ne a Pɩyɛɛre. Wõnda rẽ t’a ra yaa a yembre. (Luk 24:33, 34; 1 Kor. 15:3-5) A Zeezi ra miime t’a Pɩyɛɛr teka yam n da rat n sõng-a t’a bas a yam t’a kõ-a-la sugri.

¹⁴ A Pɩyɛɛr bãnga ned sẽn tek yam n kos sugr tagsg sẽn yaa a soaba, la ned sẽn paam tɩ b kõ-a sugr tagsg me sẽn yaa a soaba. Rẽ n so t’a ra tõe n gom rẽ yell ne neb a taaba. Pãntekotã loogr poor bilfu, a Pɩyɛɛr goma ne Zʋɩf-rãmb kʋʋng sẽn da pa tẽed a Zeezi, n wilg-b tɩ yaa bãmb n yɩ sabab tɩ b kʋ Mesi wã. Baa ne rẽ, a sagl-b-la ne nonglem n yeel yaa: “Woto yĩnga, bɩ y tek yam n kos sugri, la y toeem sẽn na yɩl tɩ b yẽes y yel-wẽnã, tɩ yolsg yi a Zeova meng nengẽ n wa.” (Tʋʋ. 3:14, 15, 17, 19) A Pɩyɛɛr yeela a kɛlgdbã tɩ ned sẽn tek yam n kos sugr toeemda a yamã la a manesmã n maand sẽn tat Wẽnnaam yam masã. A yeelame me t’a Zeova na n yẽesa b yel-wẽnã, n menes-b zãnga. Yʋʋm wʋsg poore, a Pɩyɛɛr yeela kiris-nebã yaa: “A Zeova . . . maanda sũ-mar ne yãmba, bala a pa rat tɩ ned baa a ye sãam ye. A ratame tɩ nebã fãa tek yam n kos sugri.” (2 Pɩy. 3:9) D sã n maan yel-wẽnd n tek yam n kos sugri, baa sã n yaa yel-wẽn-kãsenga, a Zeova kõt-d-la sugr zãng-zãnga. D sẽn mi rẽ wã pa kengd raood sɩda?

15-16. a) Bõe la tẽn-tʋmd a Poll bãng tek yam n kos sugrã wɛɛngẽ? (1 Tɩmote 1:12-15) b) Bõe yell la d na n gom sõsg ning sẽn pʋgdã pʋgẽ?

¹⁵ Nand tɩ Tars rao a Soll lebg kiris-neda, a tʋma tʋʋm-wẽns wʋsgo. Yaa yẽ la b sẽn wa n boond t’a Pollã. A ra namsda a Zeezi karen-biisã wʋsgo. Tõe tɩ kiris-nebã fãa la bal ra tagsdame t’a pa tol n tõe n toeem ye. La a Zeezi tagsgã ra yaa toor fasɩ. Yẽ ne a Ba wã ra neeme t’a Soll tara zʋg-sõma. A Zeezi goma a yell n yeele: “Ra-kãngã yaa tʋʋm-teoog mam sẽn yãke.” (Tʋʋ. 9:15) A Zeezi maana yel-solemd meng tɩ yɩ sabab t’a Soll tek yam n kos sugri. (Tʋʋ. 7:58–8:3; 9:1-9, 17-20) A Poll sẽn wa n tek yam n kos sugr n lebg kiris-nedã, a Zeezi yãk-a lame t’a lebg a tẽn-tʋmda. Naoor wʋsgo, a Poll yeelame t’a sũur nooma a Zeova ne a Zeezi sẽn maan-a neer n zoe a nimbãanegã. (Karm-y 1 Tɩmote 1:12-15.) A Poll yeelame yaa: “Wẽnnaam sẽn yaa sõmblem soabã rat n sõnga foo tɩ f tek yam n kos sugri.”—Rom. 2:4.

¹⁶ A Poll wa n wʋmame tɩ rao n be Korẽnt tigingã pʋgẽ n yooda, tɩ tigingã neb sĩnd n getẽ. Wãn to la a Poll welg yel-kãnga? A sẽn welg yellã to-to wã kɩtame tɩ d bãng t’a Zeova kibinda a nin-buiidã ne nonglem, la tɩ b sã n tek yam n kos sugri, a zoeta b nimbãanega. Sõsg ning sẽn pʋgdã pʋgẽ, d na n maneg n goma bũmb ning sẽn maan Korẽnt tigingã pʋgẽ wã yelle.