ZÃMSGÃ YĨNGA 10
YƖƖLL 31 Tũ Wẽnnaam
Tall-y-yã a Zeova la a Zeezi tagsa wã buudu
“Kiristã sẽn nams yĩngã pʋgẽ wã, bɩ yãmb me keng y mens n tall a yamã buudu.”—1 PƖY. 4:1.
D SẼN NA N BÃNGE
D na n yãa a Zeezi sẽn da get yɛlã to-to wã sẽn sõng tẽn-tʋmd a Pɩyɛɛr t’a bãng bũmb ninsi, la yam ning d sẽn tõe n dɩk rẽ pʋgẽ.
1-2. Nong a Zeova rat n yeelame tɩ bõe, la wãn to la a Zeezi wilg t’a nonga a Zeova ne a yamã fãa?
“YÃMB segd n nonga a Zeova sẽn yaa yãmb Wẽnnaamã ne y sũurã fãa, ne y sɩɩgã fãa, ne y pãngã fãa, la ne y yamã fãa.” (Luk 10:27) A Zeezi sak n deegame tɩ no-kãng n yaa kãseng n yɩɩd a Moyiiz Tõogã pʋgẽ. Rẽnd d segd n nonga a Zeova ne d bũmbã fãa, la ne d yalẽ wã fãa, rat n yeel tɩ ne d raabã, d tʋlsmã la d pãngã fãa. Nong a Zeova wã naaga d sẽn tagsd to-to wã la d sẽn get yɛlã to-to wã. Yaa sɩd tɩ d pa tõe n wʋm a Zeova tagsa wã fãa võor ye. La d sã n dat n wʋm Wẽnnaam tagsa wã võor n paase, d segd n bao n bãnga “Kiristã yamã.” Bala a Zeezi ra tara a Ba wã tagsa wã buudu.—1 Kor. 2:16.
2 A Zeezi ra nonga a Zeova ne a yamã fãa. A ra mii Wẽnnaam sẽn dat t’a maan bũmb ninsã, n yãk yam n na n maand rẽ baa sã n wa yaa tɩlɛ t’a nams tɩrlmã yĩnga. A Ba wã raabã maaneg n da pak-a n yɩɩda, hal t’a pa bas tɩ baa fʋɩ tiis-a ye.
3. Bõe la tẽn-tʋmd a Pɩyɛɛr bãng a Zeezi nengẽ, la bõe la a sagl a tẽed-n-taasã tɩ b maane? (1 Pɩyɛɛr 4:1)
3 A Pɩyɛɛr ne tẽn-tʋmdb a taabã paam n zĩnda ne a Zeezi, n bãng a sẽn da tagsd to-to wã. A Pɩyɛɛr sẽn wa n gʋlsd a pipi lɛtrã Wẽnnaam sẽn vẽneg-a wã, a sagla a tẽed-n-taasã tɩ b keng b mens n tall Kiristã yamã buudu.a (Karm-y 1 Pɩyɛɛr 4:1.) Gom-biis nins a Pɩyɛɛr sẽn pʋd tɩ b lebg tɩ “keng y mensã” bilgda sodaag sẽn bob zab-teoog zabr yĩnga. Rẽnd kiris-ned sã n tar a Zeezi yamã buudu, yaa wa a sẽn bob zab-teoog sẽn tar pãng sẽn na n sõng-a t’a tõog a tʋls-wẽnsã la a Sʋɩtãan dũniyã.—2 Kor. 10:3-5; Efɛɛ. 6:12.
4. Wãn to la sõs-kãngã tõe n sõng-d tɩ d tũ a Pɩyɛɛr saglgã?
4 D na n bao n bãnga a Zeezi sẽn get yɛlã to-to, la d sẽn tõe n dɩk a togs-n-taar to-to. D na n bao n bãnga a mak-sõngã sẽn tõe n sõng-d to-to tɩ d tall a Zeova tagsa wã buudu, tɩ rẽ sõng-d tɩ d tagsa wã ra kɩɩsd taaba, tɩ d yɩ sik-m-mens rãmba, la d yɩ neb yam sẽn vẽene, n pʋʋsd a Zeova n wilgdẽ tɩ d teeg-a lame.
TALL-Y-YÃ A ZEOVA TAGSA WÃ BUUDU
5. Bõe n wilgd tɩ daar a ye, a Pɩyɛɛr talla tagsg sẽn pa zems ne a Zeova rẽndã?
5 Daar a ye, a Pɩyɛɛr talla tagsg sẽn pa zems ne a Zeova rẽndã ye. A Zeezi yeela a tẽn-tʋmdbã t’a segd n kẽnga Zerizalɛm, tɩ b na n yõk-a lame n ning tũudmã taoor dãmb nusẽ, tɩ b na n nams-a lame, n yaool n kʋ-a. (Mat. 16:21) A Pɩyɛɛr da miime t’a Zeezi la Mesi ning Wẽnnaam sẽn da pʋlmã, la t’a na n fãaga Israyɛll nebã. (Mat. 16:16) Tõe tɩ ra yaa toog ne-a t’a tẽ tɩ Wẽnnaam na n basame tɩ b kʋ a Zeezi. Rẽ n so t’a Pɩyɛɛr tall a Zeezi n yi kɛɛng n yeel-a yaa: “Zu-soaba, ra yeel-y woto ye. Bõn-kãngã pa na n paam yãmb a bada.” (Mat. 16:22) A Pɩyɛɛr sẽn da pa get yɛlã wa a Zeova wã kɩtame t’a tagsa wã ra yaa toor ne a Zeezi rẽndã.
6. Bõe la a Zeezi maan n wilg t’a tagsa wã ra zemsa ne a Zeova rẽndã?
6 A Zeezi tagsa wã ra zemsda ne a saasẽ Ba wã rẽnd wakat fãa. A yeela a Pɩyɛɛr yaa: “Leb mam poorẽ, Sʋɩtãana! Fo yaa bũmb sẽn tõe n kɩt tɩ mam lake. Bala fo tagsa wã pa Wẽnnaam tagsa ye. Yaa ninsaalb rẽnda.” (Mat. 16:23) Tõe t’a Pɩyɛɛr da tara yam-sõngo, la a Zeezi pa kelg a saglgã ye. Rẽ wilgda tõnd bũmb sẽn tar yõodo. A Zeezi ra miime t’a Zeova raabã yaa a sak namsgo. Daar-n-kãnga, a Pɩyɛɛr bãngame tɩ tara yõod t’a modg n tall Wẽnnaam tagsa wã buudu.
7. Bõe la a Pɩyɛɛr wa n maan n wilg t’a ratame t’a tagsa wã zems ne a Zeova rẽndã? (Ges-y fotã.)
7 Kaoosg zugẽ, a Pɩyɛɛr wilgame t’a ratame t’a tagsa wã zems ne a Zeova rẽndã. Rẽ tɩ wakat ning a Zeova sẽn yãk tɩ bu-zẽmsã tõe n wa naag a nin-buiidã taame. B tʋma a Pɩyɛɛr t’a tɩ moon a Korney sẽn da yaa bu-zẽng nedã koɛɛgã. A Korney zĩnda bu-zẽmsã neb nins sẽn yɩ pipi n lebg kiris-nebã sʋka. Zʋɩf-rãmbã sẽn da pa baood bu-zẽmsã neb zĩigẽ wã yĩnga, pa lingr la sẽn yɩ tɩlɛ tɩ b sõng a Pɩyɛɛr t’a yaool n sak tʋʋmdã ye. A Pɩyɛɛr sẽn wa n bãng Wẽnnaam tagsg sẽn yaa a soab yel-kãngã wɛɛngẽ wã, a remsa a tagsgã. Rẽ n so tɩ b sẽn tʋm tɩ b bool-a wã, a kẽngame n “pa zãgs ye.” (Tʋʋ. 10:28, 29) A moona a Korney ne a zakã rãmb koɛɛgã, tɩ b reeg lisgu.—Tʋʋ. 10:21-23, 34, 35, 44-48.
A Pɩyɛɛr sẽn kẽed a Korney roogã pʋgẽ (Ges-y sull a 7)
8. Wãn to la d tõe n wilg tɩ d tagsa wã zemsa ne a Zeova rẽndã? (1 Pɩyɛɛr 3:8)
8 Yʋʋm a wãn poore, a Pɩyɛɛr sagla a tẽed-n-taasã tɩ b “tall yam a yembre.” (Karm-y 1 Pɩyɛɛr 3:8.) D sã n bao n bãng a Zeova tagsa wã sẽn be Biiblã pʋgẽ wã, tõe n kɩtame tɩ tõnd ne d tẽed-n-taasã yɩ yam a yembre. Wala makre, a Zeezi sagla a karen-biisã tɩ b lʋɩɩs Rĩungã yɛl taoore. (Mat. 6:33) Rẽ tõe n kɩtame tɩ y tigingã koe-moond a ye yãk yam n na n kẽes a meng zãng Wẽnnaam tʋʋmdã pʋgẽ. D pa na n yeel-a t’a bao naar vɩɩm ye. D segd n pẽg-a-la a yam-yãkrã sẽn yaa sõma wã yĩnga, la d teel-a.
YƖ-Y SIK-M-MENG SOABA
9-10. Bõe la a Zeezi maan n wilg t’a sɩd yaa sik-m-meng soaba?
9 A Zeezi yõkrã yʋngo, a zãmsa a Pɩyɛɛr ne tẽn-tʋmdb a taabã bũmb sẽn tar yõod wʋsg sik-m-mengã wɛɛngẽ. Nand tɩ zĩigã sobge, a tʋma a Pɩyɛɛr ne a Zã tɩ b tɩ segl rɩɩb t’a naag-b n dɩ a yaoolem dɩɩb nand t’a ki. Tõe tɩ bũmb a ye b sẽn da segd n maan yaa b bao laag ne koom la peende, sẽn na yɩl tɩ sãambã sã n wa bɩ b waas b naoã tɩ b yaool n dɩ. La ãnda n da na n sik a meng n maan dẽ?
10 Zĩig pʋgẽ a Zeezi maana bũmbu, n wilg t’a sɩd yaa sik-m-meng soaba. Yaa vẽeneg tɩ tẽn-tʋmdbã sẽn yã a Zeezi sẽn maand bũmb tʋʋmd biig sẽn segd n maanã ling-b-la wʋsgo. A Zeezi yeega a zugẽ fuugã, n dɩk peend n sẽbg a sɛɛgã, n ning koom laagã pʋgẽ n sɩng b naoã waasgo. (Zã 13:4, 5) Sẽn na yɩl n waas tẽn-tʋmdb piig la a yiibã naoã, baa a Zida sẽn yaa ned ning sẽn na n wa zãmb-a wã naoã tog n dɩka sẽka. Baa ne rẽ, a Zeezi sika a meng n maan dẽ. Rẽ poore a Zeezi maaga a yĩng n yeel-b yaa: “Yãmb wʋmda bũmb ning mam sẽn maan yãmbã võor sɩda? Yãmb boonda maam tɩ ‘Karen-saamba,’ la ‘Zu-soaba.’ La y bee bʋʋm, bala mam sɩd yaa woto. Dẽnd, mam sẽn yaa Zu-soab la Karen-saambã sã n waasa yãmb naoã, yãmb me segd n waasa taab nao.”—Zã 13:12-14.
Sik-m-meng hakɩɩkã . . . bee ne tõnd tagsg sẽn yaa a soab ne tõnd mengã la ne neb a taabã
11. Bõe la a Pɩyɛɛr maan n wilg t’a bɩɩsa sik-m-menga? (1 Pɩyɛɛr 5:5) (Ges-y fotã me.)
11 A Pɩyɛɛr dɩka yam a Zeezi sik-m-mengã pʋgẽ. A Zeezi sẽn leb saasẽ wã poore, a Pɩyɛɛr maana yel-solemd n sãoog rao sẽn da yaa põor hal a rogmẽ. (Tʋʋ. 1:8, 9; 3:2, 6-8) Neb wʋsg n yã yel-solemdã, n zoe n wa gũbg a Pɩyɛɛre. (Tʋʋ. 3:11) A Pɩyɛɛr sẽn dog neb sẽn nong naam la ziir sʋkã kɩtame t’a tũnug ne rẽ n bao yʋʋr bɩ? Ayo. A sika a meng n wilg tɩ pa yẽ n segd ne pẽgr ye. Yaa a Zeova ne a Zeezi. A yeelame: “Yaa [a Zeezi] yʋʋr yĩnga, ne tõnd sẽn tẽed a yʋʋrã yĩng la ra-kãngã yãmb sẽn ne la y miẽ wã sẽn paam keelmã.” (Tʋʋ. 3:12-16) Kaoosg zugẽ, a Pɩyɛɛr gʋlsa lɛtr n sagl a tẽed-n-taasã tɩ b bɩɩs sik-m-menga. A sẽn gom to-to wã tõe n kɩtame tɩ d tẽeg a Zeezi sẽn dɩk peend n sẽbg a sɛɛg n waas tẽn-tʋmdbã naoã yelle.—Karm-y 1 Pɩyɛɛr 5:5 ne notã.
A Pɩyɛɛr sẽn maan yel-solemdã poore, a yeelame tɩ yaa a Zeova ne a Zeezi n segd ne pẽgre. Tõnd me tõe n wilgame tɩ d yaa sik-m-mens rãmba, d sã n maand neer n pa baood tɩ b pẽg-d wall b keo-d rẽ yĩnga (Ges-y sull 11-12)
12. Wãn to la d tõe n ket n bɩɩsd sik-m-meng wa a Pɩyɛɛre?
12 Tõnd me tõe n dɩka a Pɩyɛɛr togs-n-taare, n bɩɩs sik-m-menga. Tẽeg-y tɩ sik-m-meng hakɩɩkã pa be ne d no-goamã bal ye. Gom-bil ning a Pɩyɛɛr sẽn pʋd tɩ b lebg ka tɩ sik-m-mengã wilgdame tɩ sik-m-mengã bee ne tõnd tagsg sẽn yaa a soab ne tõnd mengã la ne neb a taabã. D sõngda neb a taabã, d sẽn nong a Zeova la nebã yĩnga. Pa d sẽn dat tɩ b pẽg-d yĩng ye. D sã n maand d sẽn tõe fãa n tũud a Zeova la d sõngd d tẽed-n-taasã n pa baood tɩ b pẽg-d rẽ yĩnga, d wilgdame tɩ d yaa sik-m-mens rãmba.—Mat. 6:1-4.
YƖ-Y “NEB YAM SẼN VẼENẼ”
13. Yɩ “neb yam sẽn vẽen” rat n yeelame tɩ bõe?
13 Yɩ “neb yam sẽn vẽen” rat n yeelame tɩ bõe? (1 Pɩy. 4:7) Kiris-ned yam sẽn vẽen maanda a sẽn tõe fãa n yãkd yam sẽn zems ne a Zeova tagsa wã. Kiris-ned a woto miime tɩ bũmb kae t’a yõodã ta yẽ ne a Zeova zoodã ye. A tara tagsg sẽn zems a mengã zugu, n sak n deeg t’a pa mi bũmb fãa ye. A sikda a meng n pʋʋsd a Zeova, tɩ wilgdẽ t’a teeg-a lame.b
14. Bõe la a Pɩyɛɛr maan daar a ye tɩ wilg t’a pa teeg a Zeova?
14 A Zeezi yõkrã yʋngo, a yeela a karen-biisã yaa: “Yãmb fãa na n daaga maam n bas yʋn-kãngã.” A Pɩyɛɛr leoka ne bas-m-yam n yeel yaa: “Baa neb a taabã fãa sã n daag yãmb n base, mam pa na n daag yãmb n bas a bada!” Yʋn-kãnga, a Zeezi sagla a karen-biis kẽer n yeel-b yaa: “Bɩ y gũudẽ la y pʋʋsd wakat fãa.” (Mat. 26:31, 33, 41) A Pɩyɛɛr sã n da tũ sagl-kãnga, a ra na n sak n deega ne raood t’a yaa a Zeezi karen-biiga. La a Pɩyɛɛr yeelame t’a pa mi a Zeezi sẽn yaa a Zu-soabã, n wa maand a bãngẽ.—Mat. 26:69-75.
15. A Zeezi yõkrã yʋngo, bõe la a maan n kell n tall yam sẽn vẽene?
15 A Zeezi ra teega a Zeova zãng-zãnga. Baa ne a sẽn da zems zãngã, a pʋʋsa a Zeova naoor wʋsg a yõkrã yʋngo. Sõng-a lame t’a tall raood n maan a Zeova raabã. (Mat. 26:39, 42, 44; Zã 18:4, 5) Vẽenega, a Pɩyɛɛr pa tol n yĩm t’a Zeezi pʋʋsa naoor wʋsg a yõkrã yʋng ye.
16. Bõe la a Pɩyɛɛr maan tɩ wilg t’a lebga ned yam sẽn vẽene? (1 Pɩyɛɛr 4:7)
16 A Pɩyɛɛr wa n pʋʋsda a Zeova n yɩɩd pĩndã, tɩ wilgdẽ t’a teeg-a lame. A Zeezi vʋʋgrã poore, a yeela a Pɩyɛɛr ne tẽn-tʋmdb a taabã t’a na n kõ-b-la vʋʋsem sõngã tɩ b tõog n moon koɛɛgã. La a yeel-b lame tɩ b pa Zerizalɛm n tãag b sẽn na n wa paam vʋʋsem sõngã. (Luk 24:49; Tʋʋ. 1:4, 5) A Pɩyɛɛr sẽn wa n gũudẽ wã bõe la a ra maanda? Yẽ ne a tẽed-n-taasã “ra wɩngda ne pʋʋsgo.” (Tʋʋ. 1:13, 14) A pipi lɛtrã pʋgẽ, a sagla a tẽed-n-taasã tɩ b yɩ neb yam sẽn vẽene, n pʋʋsd a Zeova wakat fãa tɩ wilgdẽ tɩ b teeg-a lame. (Karm-y 1 Pɩyɛɛr 4:7.) A Pɩyɛɛr wa n bãnga a Zeova teegre, n lebg wa ra-luk tigingã pʋgẽ.—Gal. 2:9.
17. Baa d minimã sẽn yaa a soaba, bõe la d segd n ket n maandẽ? (Ges-y fotã me.)
17 Sẽn na yɩl n yɩ neb yam sẽn vẽene d segd n pʋʋsda a Zeova wakat fãa. D miime tɩ d segd n ket n pʋʋsda a Zeova, baa d minimã sẽn yaa a soaba. Sẽn yɩɩd fãa, d sã n wa segd n yãk yam n maan bũmb sẽn tar yõod wʋsgo, d kota a Zeova t’a wilg-d sore, n kɩs sɩd t’a mii bũmb ning sẽn yaa sõma ne-dã.
A Pɩyɛɛr wa n pʋʋsda a Zeova, tɩ wilgdẽ t’a teeg-a lame. Tõnd me tõe n wilgame tɩ d tara yam sẽn vẽene, d sã n pʋʋsd a Zeova n kot sõngre, sẽn yɩɩd fãa d sã n wa segd n yãk yam n maan bũmb sẽn tar yõod wʋsgo (Ges-y sull 17)c
18. Wãn to la d tõe n maneg d tagsa wã tɩ zems ne a Zeova rẽndã?
18 D sũurã nooma wʋsg a Zeova sẽn naan-d tɩ d tõe n dɩk a togs-n-taar n bɩɩs zʋg-sõma wã. (Sɩng. 1:26) Yaa sɩd tɩ d pa tõe n dɩk a Zeova togs-n-taar kɛpɩ ye. (Eza. 55:9) La tõnd me tõe n manega d tagsa wã tɩ zems ne a Zeova tagsa wã wa a Pɩyɛɛre. Bɩ d kell n tagsd wa a Zeova, n yɩ sik-m-mens rãmb la neb yam sẽn vẽene.
YƖƖLL 30 Mam Wẽnnaam, mam Ba, la m zoa
a D tõe n lebga gom-bil ning sẽn yaa “yamã” sẽn be 1 Pɩyɛɛr 4:1 pʋgẽ wã tɩ “d sẽn tagsd to-to, d manesmã.”
b Y sã n dat n bãng tall yam sẽn vẽenã sẽn dat n yɛɛlgã n paase, bɩ y kẽ jw.org wall JW Library® zĩig ning sẽn yaa: “Biiblã vɛrse-rãmb b sẽn bilg a võore,” n ges sõsg ning gom-zug sẽn yaa: “2 Tɩmote 1:7: ‘Vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye,’” zĩig ning b sẽn gʋls tɩ “yam-vẽenem.”
c FOTÃ BILGRI: Saam-bi-poak sẽn pʋʋsd a sũurẽ, nand tɩ b sõs ne-a n ges b sã n na n dɩk-a-la tʋʋmde.