A Zeova tõe n sõng-y-la wakat buud fãa

1. A Moyiiz sẽn wa n na n tall Israyɛll nebã n yi Ezɩptã, wãn to la a wilg t’a kɩsa a Zeova sɩda?

EBRE-RÃMB sebrã pʋgẽ, b goma neb sẽn tall tẽeb yelle. B nin-yend yaa a Moyiiz sẽn yɩ ned tẽeb sẽn da tar pãngã. (Ebre. 3:2-5; 11:23-25) A sẽn wa n na n tall Israyɛll nebã n yi Ezɩptã, a wilgame t’a tara tẽebo. A pa bas t’a Farawõ ne a tãb-biisã kẽes-a rabeem ye. A kɩsa a Zeova sɩda, n tall nin-buiidã tɩ b pasg Mog-miuugã, la a wilg-b sor we-raoogẽ wã. (Ebre. 11:27-29) Israyɛll neb wʋsg n wa n pa le kɩs sɩd t’a Zeova tõe n gesa b yelle, la a Moyiiz yẽ kell n kɩsa a Wẽnnaamã sɩda. A sẽn teeg Wẽnnaamã pa yɩ zaalem ye. Bala Wẽnnaam maana yel-soalem n kõ nin-buiidã rɩɩb la koom we-raoogã sẽn da yaa zĩ-koɛɛngẽ wã.a—Yik. 15:22-25; Yɩɩn. 78:23-25.

2. Bõe n kɩt tɩ Wẽnnaam sok a Moyiiz yaa: “A Zeova pa tõe n maan bõn-kãngã sɩda”? (Sõdbo 11:21-23)

² Baa ne a Moyiiz tẽebã sẽn da tar pãngã, na maan yʋʋmd a Zeova sẽn maan yel-solemd n yiis Israyɛll nebã Ezɩptã poore, a wa n sãmbda a Zeova sã n na n tõog n kõo a nin-buiidã nemdo. Ra yaa toog ne a Moyiiz t’a tẽ t’a Zeova na n tõog n paama nemd tɩ sek neb milyõ-rãmbã sẽn da be we-raoogã sẽn yaa zĩ-koɛɛngẽ wã. Rẽ n so t’a Zeova sok a Moyiiz yaa: “A Zeova pa tõe n maan bõn-kãngã sɩda?” (Karm-y Sõdb 11:21-23.) Ebre wã pʋgẽ, b gomda “a Zeova nugã” yelle. Yaa a vʋʋsem sõngã bɩ a pãngã a sẽn tar n pidsd a raabã yell la b sẽn da gomdã. Ra yaa wa a Zeova sẽn sok a Moyiiz yaa: ‘Fo tagsdame tɩ mam sɩd pa tõe n maan bũmb ning m sẽn yeelã bɩ?’

3. Bõe yĩng tɩ d na n gom bũmb ning sẽn paam a Moyiiz ne Israyɛll nebã yelle?

³ Yãmb zoe n maana sãmbs a Zeova sã n na n gesa yãmb wall y zakã rãmb yell bɩ? Sẽn yaa a soab fãa, d na n goma a Moyiiz ne Israyɛll nebã sẽn da pa kɩs sɩd tɩ Wẽnnaam tõe n sõng-b lame tɩ b paam bũmb nins sẽn yaa tɩlɛ ne-bã yelle. D na n yãame tɩ b kibarã tõe n sõng-d lame tɩ d maneg n kɩs sɩd t’a Zeova nugã zɩ n yɩ koɛɛg ye.

YAM NING D SẼN TÕE N DƖK A MOYIIZ NE ISRAYƐLL NEBÃ KIBAR PƲGẼ

4. Tõe tɩ bõe n wa n kɩt tɩ Israyɛll neb wʋsg sãmbd a Zeova sã n tõe n gesa b yelle?

⁴ Bõe n wa kɩt tɩ Israyɛll neb kẽer sãmbd a Zeova sã n tõe n gesa b yelle? Rẽ tɩ Israyɛll nebã n paas “neb kʋʋng sẽn yaa buud toor-toor nebã” sẽn yi Ezɩpt n sɩng kẽn n dabd kãabg tẽngẽ wã kaoosa bilfu. (Yik. 12:38; Tõo. 8:15) Neb kʋʋngã yamã wa n yii mannã rɩɩbo, tɩ Israyɛll neb wʋsg me naag-b n sɩng yẽgengo. (Sõd. 11:4-6) Nin-buiidã wa n data rɩbd nins sẽn da be Ezɩptã n dɩ. B sẽn da yẽgemd ne a Moyiizã kɩtame t’a wa tagsdẽ tɩ yaa yẽ n segd n bao nemd n kõ b fãa, n pa mi a sẽn na n maan to-to ye.—Sõd. 11:13, 14.

5-6. Yam-bʋg la d tõe n dɩk kʋʋngã manesem sẽn kɩt tɩ Israyɛll neb wʋsg rɩk b togs-n-taarã pʋgẽ?

⁵ Wõnda Israyɛll nebã rɩka kʋʋngã sẽn yaa buud toor-toor nebã togs-n-taare, n pa nand bũmb nins a Zeova sẽn da maand n kõt-bã ye. A buud tõe n paama tõnd me. Rũndã-rũndã neb wʋsg sẽn yaa sõm-zɩtbã yĩnga, d sã n pa gũusi d tõe n wa lebga wa bãmba, tɩ d sũur pa le noom ne bũmb nins a Zeova sẽn kõt-dã ye. D tõe n wa tagsda bũmb nins d sẽn da tar pĩndã yell wʋsgo, wall d maand sũ-kiir ne neb a taaba, bũmb nins b sẽn tarã yĩnga. La baa d yɛlã sẽn yaa to-to, yaa d sã n kɩtdẽ tɩ bũmb nins d sẽn tarã sekd tõnd la d na n paam sũ-noog n yɩɩda.

⁶ Israyɛll nebã ra segd n tẽegame tɩ Wẽnnaam pʋlmame tɩ yaa b sã n wa ta kãabg tẽngẽ wã la b na n paam bõn-sõma tɩ seke, pa b sẽn wat n kẽnd we-raoogẽ wã ye. Tõnd me sã n dat tɩ d vɩɩmã yɩ noogo d pa segd n tagsd bũmb nins d sẽn pa tar rũndã-rũndã wã yell wʋsg ye. D segd n tagsda bõn-sõma nins a Zeova sẽn pʋlem t’a na n kõ-d-la dũni-paalgã pʋgẽ wã yelle. D leb n tõe n karemda Biiblã vɛrse-rãmb sẽn tõe n sõng tõnd tɩ d maneg n kɩs a Zeova sɩda, la d bʋgse.

7. Bõe n kɩt tɩ d tõe n bas d yam t’a Zeova tõe n sõng-d-la wakat buud fãa?

⁷ A Zeova sẽn wa n sok a Moyiiz sokr ning sẽn be Sõdb 11:23, tõe t’a ra ratame t’a tags bũmb a yiib yelle. Pipi, a pãngã pa tar koak ye. Yiibu, a tõe n talla a pãngã n maan a raabã zĩig fãa. Wẽnnaam ra tõe n kõo Israyɛll nebã nemd tɩ seke, baa ne b sẽn da be we-raoogã sʋkã. Wẽnnaam tũnuga ne “nug sẽn tar pãnga, la ne kang sẽn tẽege,” n wilg a tõogã sẽn ta zĩig ningã. (Yɩɩn. 136:11, 12, notã) Rẽnd d sã n wa maood ne zu-loeese, d segd n kɩsa sɩd t’a Zeova nugã tõe n sõng-d lame, baa d sẽn be zĩig ning fãa.—Yɩɩn. 138:6, 7.

8. Bõe n tõe n sõng-d tɩ d ra wa maan wa Israyɛll neb wʋsg sẽn maan we-raoogẽ wã? (Ges-y fotã me.)

⁸ A Zeova pidsa a pʋlengã, n kɩt t’a nin-buiidã paam kodens wʋsgo. La Israyɛll nebã pa pʋʋs Wẽnnaam bark a sẽn maan yel-solemd tɩ b paam rẽ wã ye. B pʋd n wʋka kodensã ne yão-beedo. B tʋma wĩndg la yʋngo, n wʋk kodensã wa b sẽn tõe tɛka. A Zeova sũur puuga ne “neb nins sẽn wilg tɩ b yaa yão-be-nebã,” t’a sɩbg-ba. (Sõd. 11:31-34) D tõe n dɩka yam kiba-kãngã pʋgẽ. D segd n modgame n da wa lebg yão-be-ned ye. D yaa rakãagr tɩ d yaa naong soab me, d segd n modgame n bĩngd d “paoongã saasẽ,” rat n yeel tɩ d na n modgd n paasda tõnd ne a Zeova la a Zeezi zoodã pãnga. (Mat. 6:19, 20; Luk 16:9) D sã n maand woto, d tõe n basa d yam t’a Zeova na n gesa d yelle.

9. D tõe n basa d yam ne bõe?

⁹ A Zeova tẽegda a nug n sõngd a nin-buiidã rũndã-rũndã. La woto pa rat n yeel tɩ ligd wall rɩɩb pa na n tol n paoog-d ye.b La a Zeova pa na n tol n daag-d n bas ye. A na n sõng-d lame tɩ d mao ne zu-loɛɛg buud fãa. Wãn to la d tõe n wilg tɩ d kɩsa sɩd t’a Zeova na n gesa d yelle? D na n goma bũmb a yiib yelle. D sã n wa maood ne ligd zu-loeese, la d sã n wa magd d sẽn na n maan to-to n ges d meng yell d kʋʋlmã wakate.

D SÃ N WA MAOOD NE LIGD ZU-LOEESE

10. Bõe n tõe n wa kɩt tɩ d paam ligd zu-loeese?

¹⁰ D miime tɩ dũniyã saab sẽn kolgdã, ligdã zu-loees na n tara paasgo. Politikã wɛɛngẽ zu-loeese, zaba, sabab-wẽns wall bã-longds tõe n tiig n kɩtame tɩ teedã ligd paas wʋsgo, tɩ d bõn d teedo, tɩ d tʋʋm sãame, wall kɩt tɩ yɩ tɩlɛ tɩ d yi n bas d zakã. Tõe n wa yɩɩ tɩlɛ tɩ d bao tʋʋmd a to d sẽn beẽ wã, wall d tagsd d sã n pa na n yika ne d zakã rãmb n kẽng tẽng a to sẽn na yɩl n tõog n ges b yelle. Bõe n tõe n sõng tɩ d yam-yãkr toor-toorã wilg tɩ d kɩsa a Zeova sɩda?

11. Bõe n tõe n sõng-y tɩ y mao ne ligd zu-loeese? (Luk 12:29-31)

¹¹ Pipi bũmb y sẽn tõe n maan tɩ sõng-y n yɩɩd yaa y sẽn na n pʋʋs a Zeova, n wilg bũmb nins sẽn kɩt tɩ y maand yɩɩrã. (Yel. 16:3) Kos-y-yã a Zeova t’a kõ-y yam tɩ y bãngd n yãkd yam, la t’a sõng-y tɩ y yam gãand bãan tɩ “y ra le maan yɩɩr ne sẽn wat ye.” (Karm-y Luk 12:29-31.) Kos-y-yã-a t’a sõng-y tɩ y ra bao tɩ zʋʋg bũmb nins sẽn yaa tɩlɛ wã ye. (1 Tɩm. 6:7, 8) Maan-y vaeesg tõnd sɛbã pʋsẽ, n bãng y sẽn tõe n mao ne ligdã zu-loees to-to. Neb wʋsg yetame tɩ bũmb nins sẽn be jw.org n gomd ligdã zu-loees yellã nafa bãmb wʋsgo.

12. Sogs-bʋs n tõe n sõng kiris-ned t’a bãng n yãk yam sẽn na n naf a zakã rãmba?

¹² Neb kẽer sak n yikame n bas b zagsã rãmb n kẽng zĩig a to tʋʋm yĩnga, la b wat n bãngame tɩ b yam-yãkrã pa yɩ sõma ye. Y sã n wa baood tʋʋmde, y pa segd n tags a sẽn na n kẽes yãmb ligd ningã yell bal ye. Y segd n deng n bao n bãnga a sã n pa na n koms yãmb ne y zakã rãmb tẽebo. (Luk 14:28) Sok-y y meng yaa: ‘M sã n bas m pagã wall m sɩdã n kẽng zĩig a to, d na n tõogame tɩ d kãadmã kell n tall pãnga sɩda? M na n tõog n ket n kẽnda tigissã n pa vaandẽ, n moond koɛɛgã la m be ne m tẽed-n-taasã bɩ?’ Y sã n tara kamba, y segd n soka y meng yaa: ‘M sã n pa be ne m kambã, m na n maana a wãn n “wub bãmb a Zeova kiblgã la a saglsã pʋsẽ?”’ (Efɛɛ. 6:4) Bao-y n bãng-y Wẽnnaam tagsg sẽn yaa a soab yel-kãng wɛɛngẽ wã n tũ, la y ra kelg y zakã rãmb wall y zo-rãmb nins sẽn pa tũud Biiblã noyã sagls ye.c B pʋlma a Toni sẽn be Aazi wã tʋʋm-sõma naoor wʋsg tẽn-zẽnga. La a sẽn pʋʋs a Zeova la a sõs ne a pagã poore, a yãka yam n zãgs tʋʋm-kãens fãa. B baoome n bãng b sẽn tõe n maan to-to n boog b zakã depãens-rãmbã. A Toni tagsa yɛlã sẽn yɩ to-to rẽ poorã yell n yeel yaa: “Mam tõog n sõnga neb wʋsg tɩ b bãng a Zeova. Tõnd kambã me sũur nooma ne sɩdã. Tõnd zakã rãmb bãngame tɩ d sã n tũud Matiye 6:33 sẽn yetã, a Zeova geta d yelle.”

D SÃ N WA MAGD D SẼN NA N MAAN TO-TO N GES D MENG YELL D KƲƲLMÃ WAKATE

13. Bõe la d tõe n maan rũndã-rũndã, tɩ wa sõng-d tɩ d tõog n ges d meng yell d kʋʋlmã wakate?

¹³ D sã n wa magd d sẽn na n maan to-to n ges d meng yell d kʋʋlmã wakat me, d tõe n wilgame tɩ d kɩsa a Zeova sɩda. Biiblã sagenda tõnd tɩ d wɩsg d meng n tʋm sẽn na yɩl n wa tõog n ges d meng yell beoog sẽn wate. (Yel. 6:6-11) Sã n mik tɩ tõeeme, yɩta sõma tɩ d bĩng ligd kɛɛng beoog yĩnga. Sɩd me, ligd tõe n kogla neda. (Koɛ. 7:12) La d pa segd n lʋɩɩs ligdã baoob taoor ye.

14. Wãn to la Ebre-rãmb 13:5 goamã tõe n sõng-d tɩ d ra maan yɩɩr wʋsgo?

¹⁴ A Zeezi rɩka makr n wilg tɩ ned sã n tigsd ligd wʋsg n yaool n pa “arzɛk soab Wẽnnaam nifẽ,” yaa yalemdo. (Luk 12:16-21) Ned baa a ye pa mi beoog ye. (Yel. 23:4, 5; Zak 4:13-15) D mi n segda zu-loɛɛga, d sẽn yaa Kirist karen-biisã yĩnga. A Zeezi yeelame tɩ yɩl n yɩ yẽ karen-biiga, d segd n segl n saame n na n “bas” d paoongã fãa. (Luk 14:33) A buud paama kiris-neb nins sẽn da be Zide tẽn-tʋmdbã wakatẽ wã, la b sak n bõna b paoongã ne sũ-noogo. (Ebre. 10:34) Tõnd wakatã, d tẽed-n-taas wʋsg sak n bõna bũmb wʋsgo, b sẽn zãgs tɩ b kõn teel politik siglg baa a yembrã yĩnga. (Vẽn. 13:16, 17) Bõe n sõng-b tɩ b sak rẽ? B kɩsa sɩd zãng-zãng ne a Zeova sẽn pʋlmã. A yeelame yaa: “Mam pa na n loog n bas foom a bada, la m pa na n tol n daag-f n bas ye.” (Karm-y Ebre-rãmb 13:5.) D maanda d sẽn tõe fãa sẽn na yɩl n wa tõog n ges d meng yell d kʋʋlem wakate, la d kɩsa sɩd t’a Zeova na n gesa d yelle, baa yel-lingdem sã n tiig n paam-do.

15. Roagdb nins sẽn yaa kiris-nebã tagsg segd n yɩɩd wãn ne b kambã? (Ges-y fotã me.)

¹⁵ Tẽns kẽer pʋsẽ, neb wʋsg sẽn dogd kambã yaa b sẽn dat tɩ b wa ges b yell b kʋʋlmã wakatã yĩnga. La Biiblã yeelame tɩ yaa roagdbã n segd n ges b kambã yelle. (2 Kor. 12:14) Yaa sɩd tɩ roagdbã sã n wa kʋʋndẽ, wat n yaa tɩlɛ tɩ kambã sõng-b ne bũmb kẽere, tɩ kamb wʋsg maand rẽ ne sũ-noogo. (1 Tɩm. 5:4) La roagdb nins sẽn yaa kiris-nebã miime tɩ bũmb ning sẽn kõt sũ-noog n yɩɩdã pa b sẽn na n sõng b kambã tɩ b wa paam ligd wʋsg n tõe n ges bãmb yell ye. Yaa b sẽn na n sõng-b tɩ b tũud a Zeova sõma.—3 Zã 4.

16. Bõe la roagdbã tõe n maan n sõng b kambã tɩ b wa tõog n ges b mens yelle? (Efɛɛz rãmbã 4:28)

¹⁶ Y sã n wa sõngd y kambã sẽn na yɩl tɩ b bãng b sẽn tõe n wa ges b meng yell to-to beoog-daare, bɩ y kõ-b mak-sõng n wilg tɩ y kɩsa a Zeova sɩda. Sõng-y-b tɩ b ket n paoodẽ tɩ b bãng tɩ wɩsg f meng n tʋm tara yõod wʋsgo. (Yel. 29:21; karm-y Efɛɛz rãmb 4:28.) B sã n wa bɩtẽ bɩ y sõng-b tɩ b wɩsg b mens n tʋm lekollẽ wã. Yɩta sõma tɩ roagdb nins sẽn yaa kiris-nebã maan vaeesgo, n paam Biiblã sagls n sõng b kambã tɩ b bãng n yãk yam karengã wɛɛngẽ. Rẽ na n sõnga b kambã tɩ b wa tõogd n get b mens yell la b tʋmd a Zeova tʋʋmdã sõma.

17. D tõe n basa d yam ne bõe?

¹⁷ Neb nins sẽn maand sɩd ne a Zeova wã tõe n basa b yam t’a tõe n gesa b yelle, la t’a rat n maana woto. D miime tɩ dũni-kãngã saabã sẽn kolgdã, bũmb toor-toor n na n kɩt tɩ yɩ toog tɩ d kell n kɩs a Zeova sɩda. La baa sẽn wa n yaa a soaba, d segd n kell n kɩsa sɩd t’a Zeova tara tõog n na n ges d yelle. D tõe n basa d yam tɩ d sẽn wa n be zĩig ning fãa, a Zeova nugã sẽn tar pãngã la a kangã sẽn tẽegã pa na n tol n yɩ koɛɛg t’a pa tõog n sõng-d ye.