‘Yãk-y y sẽn na n tũ a soabã’

1. D sã n dat n paam sũ-noog hakɩɩka bõe la d segd n maane, la bõe yĩnga? (Ezayi 48:17, 18)

TÕND saasẽ Ba wã nong-d-la wʋsgo, n dat tɩ d vɩɩmã yɩɩ noog rũndã-rũndã la beoog sẽn wate. (Koɛ. 3:12, 13) A naan-d lame n kõ-d bãngr la minim toor-toore. La a pa naan-d tɩ d tõe n wilg d meng sore, wall tɩ d tõe n yãk sõma la wẽng d toor ye. (Koɛ. 8:9; Zer. 10:23) A miime tɩ sẽn na yɩl n paam sũ-noog hakɩɩka, d segd n tũud-a lame la d sakd-a.—Karm-y Ezayi 48:17, 18.

2. Bõe la a Sʋɩtãan dat tɩ d tẽ, la bõe la a Zeova maan n na n wilg t’a Sʋɩtãan yaa pʋ-yagda?

² A Sʋɩtãan ratame tɩ d tẽ tɩ baa d sã n pa tũud a Zeova, d tõe n paama sũ-noogo, la tɩ ninsaalbã tõe n wilga b mens sor tɩ zemse. (Sɩng. 3:4, 5) A Zeova basa ninsaalbã tɩ b soog b mens wakat bilf yĩnga, n na n wilg t’a Sʋɩtãan yaa pʋ-yagda. D nee vẽeneg tɩ ninsaalbã naamã waa ne zu-loees wʋsgo. La kibay wʋsg n be Biiblã pʋgẽ n wilgd pagb la rap sẽn tũ a Zeova n paam sũ-noogo. Sẽn yaa-a kãseng n yɩɩd b sʋkã yaa a Zeezi Kirist. D na n deng n bao n bãnga bũmb ning sẽn kɩt t’a yãk yam n tũ a Zeova wã. Rẽ poore d na n bao n bãnga bũmb ning sẽn kɩt tɩ d saasẽ Ba wã segd ne waoogrã. Sẽn na n baase, d na n goma bũmb kẽer sẽn kɩt tɩ d yãk yam n na n tũ a Zeova wã yelle.

A ZEEZI SẼN YÃK YAM N NA N TŨ A ZEOVA WÃ VÕORE

3. Bõe la a Sʋɩtãan pʋlem a Zeezi, la yam-bʋg la a Zeezi yãk-yã?

³ A Zeezi sẽn wa n be tẽngã zugã, a wilga wakat fãa t’a yãka yam n na n tũ a Zeova. Wala makre, a lisgã poor bilfu, a Sʋɩtãan pʋlm-a lame t’a sã n wõgemd n waoog-a vugr bala, a na n kõ-a-la dũniyã soolem toɛy-toɛyã fãa. A Zeezi leokame yaa: “Sʋɩtãana, looge! Bala b gʋlsame: ‘Yaa yãmb Wẽnnaam a Zeova la y segd n waooge, la yaa yẽ a ye bal la y segd n sak ne y sũur fãa.’” (Mat. 4:8-10) Bõe yĩng t’a Zeezi yãk yam n na n tũ a Zeova? D na n goma bũmb a wãn yelle.

4-5. Bõe n kɩt t’a Zeezi yãk yam n na n tũ a Zeova?

⁴ Sẽn yɩɩd fãa yaa nonglem n kɩt t’a Zeezi yãk yam n na n tũ a Zeova. A ra nonga a Ba wã ne a sũur fãa. (Zã 14:31) Sẽn paase, a Zeezi tũu a Zeova, bala a ra miime tɩ yaa bũmb sẽn segde. (Zã 8:28, 29; Vẽn. 4:11) A miime tɩ vɩɩmã yita a Zeova nengẽ, tɩ d tõe n kɩs-a-la sɩda, la t’a yaa kõata. (Yɩɩn. 33:4; 36:9; Zak 1:17) A Zeova togsda a Zeezi sɩd wakat fãa. A kõ-a-la bũmb nins fãa a sẽn tarã. (Zã 1:14) La a Sʋɩtãan yẽ waa ne kũum. A yaa pʋ-yagda, yão-be-ned la rat-m-ye soaba. (Zã 8:44) A Zeezi sẽn mi rẽ fãa wã kɩtame t’a pa bao meng n na n dɩk a Sʋɩtãan togs-n-taar n kɩɩs a Zeova ye.—Fili. 2:5-8.

⁵ Bũmb a to sẽn kɩt t’a Zeezi yãk yam n na n tũ a Zeova wã yaa t’a ra tagsda rẽ sẽn na n wa ne bõn-sõma ninsã yelle. (Ebre. 12:2) A ra miime t’a sã n kell n maan sɩda, a na n kɩtame t’a Ba wã yʋʋr paam waoogre, la a pak sor tɩ b tõog tɩ wẽng buud fãa a Sʋɩtãan sẽn wa ne wã sa.

A ZEOVA SẼN SEGD NE WAOOGRÃ VÕORE

6-7. Bõe yĩng tɩ neb wʋsg pa tũud a Zeova rũndã-rũndã, la bõe yĩng t’a segd ne waoogre?

⁶ Rũndã-rũndã, neb wʋsg n pa tũud a Zeova, b sẽn nan pa mi a zʋg-sõma wã la bũmb nins fãa a sẽn maan n kõ-bã yĩnga. Tẽn-tʋmd a Poll sẽn moon neb nins Atɛnnã me ra yaa woto.—Tʋʋ. 17:19, 20, 30, 34.

⁷ A Poll yeela a kɛlgdbã tɩ Wẽnnaam sɩd-sɩdã “n kõt ninsaalbã fãa vɩɩm, vʋʋsem la bũmb fãa.” A paasame yaa: “Yaa yẽ maasem yĩng la tõnd vɩya, n kẽnd la d beẽ.” Wẽnnaam la Naandã sẽn “tũnug ne rao a ye n maan buud toɛy-toɛyã fãa” wã. Rẽnd a segda ne waoogre.—Tʋʋ. 17:25, 26, 28.

8. Bõe la a Zeova pa na n tol n maane, la bõe la a maan n wilg t’a nonga tõnd wʋsgo?

⁸ A Zeova sẽn yaa Naandã, n leb n yaa yĩngr la tẽng Naabã yĩnga, a ra tõe n modga nebã tɩ b tũ-a. La a Zeova pa na n tol n maan woto ye. A kõo ninsaalbã kaset buud toor-toor sẽn wilgd t’a beeme, la t’a nonga d ned kam fãa wʋsgo. A ratame tɩ neb wʋsg lebg a zo-rãmb wakat sẽn kõn sa yĩnga. (1 Tɩm. 2:3, 4) Rẽ n so t’a zãms tõnd sẽn na yɩl tɩ d tõog n wilg neb a taabã a raabã, la bõn-sõma nins a sẽn na n maan n kõ ninsaalbã. (Mat. 10:11-13; 28:19, 20) A sigla tigimsã n yãk kãsem-dãmb sẽn nong tõnd tɩ b get d yelle.—Tʋʋ. 20:28.

9. Bõe n wilgd t’a Zeova nonga ãdem-biisã?

⁹ A Zeova manesem sẽn yaa to-to ne neb nins sẽn pa rat n sak n deeg t’a beeme wã wilgdame t’a nonglmã yaa kãsenga. Tags-y n ges-y-yã. Hal pĩnd n tãag masã, neb milyaar-dãmb n yãk yam n na n tũ b mens noy n bas a Zeova rẽndã. La baa ne rẽ, a Zeova kõt-b-la bũmb nins sẽn yaa tɩlɛ ne-b la sẽn kõt-b sũ-noogã. (Mat. 5:44, 45; Tʋʋ. 14:16, 17) Yẽ maasem yĩnga, b tõe n paama zo-rãmb la zak rãmb sẽn nong-ba. B tõe n paama kamba, n tʋm b tʋʋmã n dɩ rẽ yõodo. (Yɩɩn. 127:3; Koɛ. 2:24) Bũmb wʋsg n wilgd vẽeneg tɩ d saasẽ Bã wã nonga ninsaalbã fãa. (Yik. 34:6) D lebg n tẽeg bũmb kẽer sẽn kɩt tɩ d yãk yam n tũud a Zeova, la a sẽn ningd-d bark to-to rẽ yĩnga.

D SẼN YÃK YAM N TŨUD A ZEOVA WÃ VÕORE

10. a) Sẽn yɩɩd fãa bõe yĩng tɩ d yãk yam n tũud a Zeova? (Matiye 22:37) b) Wãn to la a Zeova sũ-marã naf yãmba? (Yɩɩn-sõamyã 103:13, 14)

¹⁰ Sẽn yɩɩd fãa, yaa d sẽn nong a Zeova ne d sũur fãa wã n kɩt tɩ d yãk yam n tũud-a wa a Zeezi. (Karm-y Matiye 22:37.) Yaa d sẽn bãng a Zeova sẽn yaa Wẽnnaam ning buudã n kɩt tɩ d nong-a. Wala makre, a Zeova maanda sũ-mar ne tõndo. Israyɛll nebã sẽn wa n tõdg-a wã, a yeel-b lame yaa: “M bõos tɩ y bas y manesem-wẽnsã.” (Zer. 18:11) A Zeova miime tɩ d pa zems zãnga, la tɩ d yaa tẽng tom. (Karm-y Yɩɩn-sõamyã 103:13, 14.) Y sã n bʋgs a Zeova sũ-marã la a zʋg-sõma a taabã zugu, pa kɩt tɩ y rat n tũ-a wakat sẽn kõn sa sɩda?

11. Bõe me n kɩt tɩ d yãk yam n tũud a Zeova?

¹¹ Bũmb a to sẽn kɩt tɩ d yãk yam n tũud a Zeova wã yaa d sẽn mi tɩ rẽ zemsame wã. (Mat. 4:10) Sẽn paase, d miime tɩ d sã n maan sɩd ne a Zeova pa na n yɩ zaalem ye. D sã n tũud a Zeova ne d sũur fãa d sõngdame t’a yʋʋrã paamd waoogre, d wilgdame t’a Sʋɩtãan yaa pʋ-yagda, la d noogd d Ba wã sũuri. D sã n yãk yam n tũud a Zeova rũndã-rũndã, d tõe n wa paam n tũ-a-la wakat sẽn kõn sa.—Zã 17:3.

12-13. Yam-bʋg la d tõe n dɩk a Zan ne a Pamela kibarã pʋgẽ?

¹² Baa kambã meng tõeeme n nonga a Zeova, tɩ b sã n wa bɩtẽ bɩ b nonglmã tar paasgo. D gom a Zan ne a yao a Pamela yelle.a B sẽn wa n sɩng Biiblã zãmsgã t’a Zan tara yʋʋm 11, t’a Pamela tar yʋʋm 10. Baa b roagdbã sẽn da pa rat n zãms Biiblã, b sakame tɩ b na n zãms Biiblã ne a Zeova Kaset rãmbã. La b yeelame me tɩ yaa tɩlɛ tɩ kambã tũud bãmb n kẽnd wẽnd-doogẽ wã wɩkɛn fãa. A Zan yeelame: “Bũmb nins a Zeova Kaset rãmbã sẽn zãms maam Biiblã pʋgẽ wã sõng-m-lame tɩ m pa bas tɩ m taabã tõog tɩ m yũ dorg wall m yo ye.”

¹³ Yʋʋm a wãn poore, b yiibã fãa lebga koe-moondba. B wa n lebga so-pakdba, la b get b roagdbã sẽn kʋʋlã yelle. A Zan tagsa b vɩɩmã sẽn yɩ to-to wã yell n yeel yaa: “Mam bãnga vẽeneg t’a Zeova geta a zo-rãmbã yelle, la ‘t’a Zeova mii neb nins sẽn yaa-a a rẽndã’ wa 2 Tɩmote 2:19 sẽn yetã.” Sãmbg kae t’a Zeova geta neb nins sẽn yãk yam n nong-a la b tũud-a wã yell ye.

14. Bõe la d tõe n maan n sõng t’a Zeova yʋʋrã paam waoogre? (Ges-y fot-rãmbã me.)

¹⁴ D ratame tɩ nebã bãng tɩ bũmb nins a Sʋɩtãan ne a poorẽ dãmbã sẽn dõt a Zeova wã fãa yaa ziri. D rɩk makre. Yãmb tara zoa sẽn yaa nin-sõngo, kõat la sug-kõata. La yãmb wa n wʋmame tɩ ned yetẽ tɩ yãmb zoa wã yaa nin-toaag la pʋ-lik soaba. Y manesem na n yɩɩ wãna? Y na n gom n sõnga y zoa wã. Woto me, a Sʋɩtãan ne a poorẽ dãmbã sã n wa yelgd ziri n dat n sãam a Zeova yʋʋrã, d pa na n sĩnd ye. D na n goma ne raood n wilg tɩ b sẽn yetã yaa ziri. (Yɩɩn. 34:1; Eza. 43:10) D rat n wilga ne d no-goamã la d tʋʋm-tʋmdɩ wã tɩ d tũuda a Zeova ne d sũur fãa.

15. Tẽn-tʋmd a Poll sẽn sak n toeemã, bark-bʋs la a paam-yã? (Filip rãmbã 3:7, 8)

¹⁵ D sakd n toeema bũmb kẽer sẽn na yɩl n ta a Zeova yam wall n tʋm a tʋʋmã n paase. Wala makre, tẽn-tʋmd a Poll sak n basa ziir ning a sẽn da tar Zʋɩf-rãmbã sʋkã n lebg Kirist karen-biig n tũ a Zeova. (Gal. 1:14) Rẽ kɩtame t’a vɩɩmã tall barka. A leb n paamame n na n naag Kiristã n dɩ naam saasẽ. A pa tol n maan a bãngẽ a sẽn yãk yam n tũ a Zeova wã, tɩ tõnd me pa na n tol n maan d bãngẽ ye.—Karm-y Filip rãmb 3:7, 8.

16. Yam-bʋg la d tõe n dɩk a Ziliya kibarã pʋgẽ? (Ges-y fot-rãmbã me.)

¹⁶ D sã n lʋɩɩs a Zeova raabã maaneg taoore, d na n paama vɩɩm sẽn tar bark rũndã-rũndã la beoog sẽn wate. Saam-bi-poak a ye yʋʋr sẽn boond t’a Ziliya maana woto. Nand t’a bãng sɩdã, a ra naaga a wẽnd-doogã korallã n yɩɩndẽ a sẽn wa n yaa bilfã. Yɩɩn-yɩɩnd a ye n wʋm a koɛɛgã t’a sũur yɩ noog t’a yãk yam n na n zãms-a yɩɩla. Pa yã n kaoos la a Ziliya yʋʋrã yi t’a yɩɩnd zĩ-bɛdẽ ye. A sẽn wa n be lekoll-bedr pʋgẽ b sẽn zãmsd nebã yɩɩla, a karen-bi-taag a ye n sɩng Wẽnnaam yell goam ne-a. A wilg-a lame tɩ Wẽnnaam tara yʋʋre, la t’a yʋʋrã la a Zeova. Pa yã n kaoos la a Ziliya sɩng Biiblã zãmsg naoor a yiib semen fãa ye. A wa n yãka yam n na n bas yɩɩlã la a wɩsg a meng n tũ a Zeova. Pa yɩ yam-yãkr sẽn yɩ nana ye. A yeelame: “Neb wʋsg yeela maam tɩ m sẽn bas yɩɩlã yaa yalemdo. La m da rat n tũu a Zeova ne m sũur fãa.” Yʋʋm pis-tã la zak la woto a sẽn yãk yam-kãnga. A tagsg yaa wãn ne rẽ masã? Ad a sẽn yeele: “M yam gãee bãane. M kɩsa sɩd tɩ beoog sẽn wate a Zeova na n kõ-m-la m sũurã raab tɩ seke.”—Yɩɩn. 145:16.

KELL-Y N TŨ-Y-YÃ A ZEOVA

17. Dũniyã saab sẽn kolgdã võor yaa bõe ne neb nins sẽn yãk yam n tũud Wẽnnaamã, la ne neb nins sẽn nan pa maand woto wã?

¹⁷ Dũni-kãngã saabã ta n saame. Tẽn-tʋmd a Poll yeelame: “‘Keta bilf bala,’ la ‘soab ning sẽn watã na n waame. A waoongã pa na n kaoos ye.’” (Ebre. 10:37) Rẽ võor yaa bõe ne tõndo? Wilgdame tɩ wakat ning sẽn ket tɩ nebã tõe n yãk yam n tũ a Zeova wã lebga bilfu. (1 Kor. 7:29) D sã n zoe n yãka yam n tũud Wẽnnaam, d miime tɩ baa d sẽn na n paam zu-loeesã, “keta bilf bal” tɩ rẽ fãa sa.

18. Bõe la a Zeezi ne a Zeova rat tɩ d maane?

¹⁸ A Zeezi pa sagl nebã tɩ b lebg a karen-biis bal ye. A yeelame tɩ b segd n pʋg-a-la wakat fãa. (Mat. 16:24) Dẽnd baa d sã n sɩnga a Zeova tũub hal na maan yʋʋma, d segd n yãka yam n pa na n tol n bas ye. D segd n kell n modgame n tũ a Zeova. Rẽ maaneg tõeeme n pa yɩ nana ye. La d sã n modg n maan dẽ, d na n paama bark la sũ-noog masã menga.—Yɩɩn. 35:27.

19. Yam-bʋg la d tõe n dɩk a Zeraar kibarã pʋgẽ?

¹⁹ Neb kẽer tagsdame tɩ f sã n yãk yam n na n tũ a Zeova, f mongda f meng bũmb wʋsgo. Y sã n yaa bi-bɩɩga, y tagsdame tɩ y sã n yãk yam n na n tũ a Zeova y vɩɩmã pa na n yɩ noog bɩ? Saam-biig a ye sẽn yaa bi-bɩɩg t’a yʋʋr boondẽ t’a Zeraar yeelame: “M da tagsdame tɩ m sẽn yaa a Zeova Kaset soabã kɩtame tɩ m pa tõe n noog m yõor ye. M da getame tɩ m rog-taasã wʋsg ra maanda bũmb toor-toor n noogd b yõore. Wala makre, b ra saoodame, n dood pagba, wall b tãood nen-kɛglem ze-video-rãmba, tɩ mam yẽ yaa tigissã kẽnd la koɛɛgã mooneg bala.” A Zeraar sẽn da tagsd woto wã kɩtame t’a maan bõe? A yeelame: “M da soosd n maanda bũmb kẽer hal tɩ m sũur noomẽ. La rẽ ra pa kõt-m sũ-noog hakɩɩk ye. M wa n tagsa Biiblã noyã tũub sẽn nafd ned to-to wã yelle, n yãk yam n na n tũ a Zeova ne m sũur fãa. Rẽ tɛka, m yãame t’a Zeova kelgda m pʋʋsgo.”

20. D segd n yãka yam n maan bõe?

²⁰ Yɩɩn-gʋlsd a ye yeela a Zeova yaa: “Sũ-noog soab la ned ning yãmb sẽn yãke, n tall-a n kolg y meng sẽn na yɩl t’a zĩnd y samanã pʋsẽ wã.” (Yɩɩn. 65:4) Bɩ d yãk yam n kell n tũ a Zeova wa a Zozuwe. A yeelame yaa: “Maam ne m zakã rãmb yẽ, tõnd na n tũu a Zeova.”—Zoz. 24:15.