ZÃMSGÃ YĨNGA 21
YƖƖLL 21 Reng-y n bao-y Wẽnnaam Rĩungã
Bao-y galʋ-tẽng ning sẽn na n kell n pa wã
“Tõnd baooda galʋ-tẽng ning sẽn watã ne d sũur fãa.”—EBRE. 13:14.
D SẼN NA N BÃNGE
D na n yãa Ebre-rãmb sak 13 sẽn yet bũmb ningã sẽn tõe n sõng-d to-to rũndã-rũndã la beoog-daare.
1. A Zeezi pĩnd n togsame tɩ bõe n na n maan Zerizalɛm?
RASEM a wãn sẽn deng a Zeezi Kirist kũumã a togsa bãngr-gomde. Bãngr-gom-kãng reng n pidsa Zerizalɛm la a wẽnd-doogã sãoong sẽn wa n kolgdẽ wã. A pĩnd n togsame tɩ daar n wat tɩ ‘sodaas na n gũbg Zerizalɛm.’ (Luk 21:20) A Zeezi yeela a karen-biisã tɩ b sã n wa yã soda-kãense, b segd n yɩɩ tao-tao n zoe n yi Zide. A goamã pidsame. Rom sodaasã wa n gũbga Zerizalɛm.—Luk 21:21, 22.
2. Sagl-bʋs la tẽn-tʋmd a Poll kõ kiris-neb nins sẽn da be Zide la Zerizalɛmmã?
2 Yʋʋm a wãn nand tɩ Rom sodaasã wa gũbg Zerizalɛm, tẽn-tʋmd a Poll gʋlsa lɛtr goam sẽn tar pãnga, tɩ b boond-a rũndã-rũndã tɩ Ebre-rãmb sebrã. Lɛt-kãng pʋgẽ, a Poll kõo kiris-neb nins sẽn da be Zide la Zerizalɛmmã sagls n na n sõng-b tɩ b segl b mens bũmb nins sẽn da watã yĩnga. La yaa bõe la sẽn da watã? Yaa Zerizalɛm sãoongã. Kiris-nin-kãens sã n da rat n põs sãoongã, b ra segd n segl n saame n na n bas b zagsã la b tʋʋmã zĩisi. Rẽ n so t’a Poll gom Zerizalɛm yell n yeel yaa: “Tõnd pa tar galʋ-tẽng ka sẽn na n kell n pa ye.” Rẽ poore a paasame yaa: “Tõnd baooda galʋ-tẽng ning sẽn watã ne d sũur fãa.”—Ebre. 13:14.
3. “Galʋ-tẽng sẽn tar yẽbgr meng-mengã” yaa bõe, la bõe yĩng tɩ tõnd baood-a?
3 Kiris-nebã sẽn wa n yãk yam n na n yi Zerizalɛm la Zide wã, yaa vẽeneg tɩ neb wʋsg yaal-b lame la b la-ba. La b sẽn yãk yam n maan bũmb ningã kɩtame tɩ b põse. Rũndã-rũndã, nebã tõe n yaanda tõnd d sẽn pa teeg ninsaalbã, wall d sẽn pa baood naar vɩɩm dũni-kãngã pʋgẽ wã yĩnga. La bõe yĩng tɩ d yãk yam a woto? D miime tɩ dũni-kãngã pa na n kaoos ye. D baooda “galʋ-tẽng sẽn tar yẽbgr meng-menga,” “galʋ-tẽng ning sẽn watã,” rat n yeel tɩ Wẽnnaam Rĩungã.a (Ebre. 11:10; Mat. 6:33) Sõs-kãngã pʋgẽ d na n bao n bãnga 1) a Poll saglsã sẽn sõng pipi kiris-nebã to-to tɩ b kell n bao “galʋ-tẽng ning sẽn watã,” 2) a Poll sẽn sõng-b to-to tɩ b segl b mens bũmb ning sẽn da watã yĩnga, la 3) a saglsã sẽn tõe n sõng tõnd rũndã-rũndã to-to.
KƖS-Y SOAB NING SẼN PA NA N TOL N DAAG-Y N BASÃ SƖDA
4. Bõe yĩng tɩ Zerizalɛm ra tar yõod ne kiris-nebã?
4 Zerizalɛm ra tara yõod ne kiris-nebã. Yɩɩ be la b lugl kiris-nebã tiging yʋʋmd 33 soabã, tɩ b taoor lʋɩtb sullã me ra be tẽn-kãnga. Sẽn paase kiris-neb wʋsg ra tara zags la arzɛgs be. Baa ne rẽ a Zeezi keooga a karen-biisã tɩ na n wa yɩɩ tɩlɛ tɩ b zoe n yi Zerizalɛm, la baa Zide menga.—Mat. 24:16.
5. Bõe la a Poll maan n na n sõng kiris-nebã tɩ b segl b mens bũmb ning sẽn da watã yĩnga?
5 A Poll sẽn da rat n sõng kiris-nebã tɩ b segl b mens n wa tõog n zoe n yi Zerizalɛmmã yĩnga, a sõng-b lame tɩ b bãng a Zeova tagsg sẽn yaa a soab ne Zerizalɛmmã n paase. A Poll tẽeg-b lame t’a Zeova nifẽ, wẽnd-doogã, maan-kʋʋrã la maand nins b sẽn da kõt Zerizalɛmmã pa le yaa sõamyã ye. (Ebre. 8:13) Zerizalɛm tẽngã neb fãa la bal pa tẽ Mesi wã ye. Pa le yaa tɩlɛ tɩ nebã kẽngd Zerizalɛm wẽnd-doogẽ wã n waoogd a Zeova ye. B pʋd n na n sãama Zerizalɛm ne a wẽnd-doogã.—Luk 13:34, 35.
6. Bõe yĩng t’a Poll sẽn yeel kiris-nebã bũmb ning Ebre-rãmb 13:5, 6 ra zems a wakate?
6 A Poll sẽn wa n na n gʋls a lɛtrã n tool Ebre-rãmbã tɩ Zerizalɛm yaa tẽng sẽn yidgi. Rom seb-gʋlsd a ye sẽn zĩnd wakat kãng boola Zerizalɛm tɩ “yaang tẽng ning yʋʋr sẽn yi n yɩɩdã.” Zʋɩf-rãmb n da yit tẽns wʋsg n wat be yʋʋmd-yʋʋmd tigã yĩnga, tɩ ra kẽesd tẽngã ligd wʋsgo. Sãmbg kae tɩ rẽ ra nafda kiris-neb kẽer me ye. Tõe tɩ yaa rẽ yĩng la a Poll sẽn yeel-b yaa: “Bɩ y yel-manesmã wilg tɩ y pa neb sẽn nong ligdi, la y kɩtdẽ tɩ bũmb nins y sẽn tarã sekd-yã.” Rẽ poore a lebs n togsa goam a Zeova meng a toor sẽn taas a nin-buiidã ned kam fãa n yeele: “Mam pa na n loog n bas foom a bada, la m pa na n tol n daag-f n bas ye.” (Karm-y Ebre-rãmb 13:5, 6; Tõo. 31:6; Yɩɩn. 118:6) Kiris-neb nins sẽn da be Zerizalɛm la Zide wã ra pa segd n yĩm gom-kãensã ye. Bõe yĩnga? Bala b sẽn deeg lɛtrã poor bilfu, yɩɩ tɩlɛ tɩ b zoe n bas b zagsã, b tʋʋmã zĩis la b paoongã fãa la bala. Rẽ poore b ra segd n zĩnda sãand hal tɩ ra pa nana ye.
7. Bõe yĩng tɩ d segd n maneg n kɩs a Zeova sɩd masã menga?
7 Rẽ sẽn wilgd tõnd bũmb ninga: Bõe n na n maan ka la bilfu? “To-kãsengã” na n sɩngame, tɩ dũni-kãngã sa. (Mat. 24:21) D segd n kell n maana sɩd ne Wẽnnaam la d segl d mens wakat kãng yĩng wa pipi kiris-nebã sẽn maanã. (Luk 21:34-36) To-kãsengã sasa, tõe n yɩɩ tɩlɛ tɩ d zoe n bas d bũmb kẽer wall d paoongã fãa, n kɩs sɩd zãng-zãng t’a Zeova pa n tol n daag a nin-buiidã n bas ye. La nand tɩ to-kãsengã sɩnge, d tõe n wilga sẽn yaa ned ning bɩ sẽn yaa bũmb ning la d sẽn teegã. Sok-y y meng yaa: ‘Mam tʋʋm-tʋmdɩ wã la m sẽn yãkd yam n maand bũmb ninsã wilgdame tɩ pa arzɛgsã la m teeg-yã, la tɩ m teega Wẽnnaam ning sẽn pʋlem t’a na n gesa m yellã bɩ?’ (1 Tɩm. 6:17) Yaa sɩd tɩ d tõe n dɩka yam bũmb ning sẽn maan pipi kiris-nebã wakatẽ wã pʋgẽ, la “to-kãsengã” sẽn watã na n yɩɩ toog buud sẽn zɩ n zĩndi. Woto wã, to-kãsengã sã n wa sɩnge, d na n maana wãn n bãng d sẽn segd n maanegã takɩ?
SAKD-Y SẼN LƲƖT-B YÃMB TAOORÃ
8. Sagl-bʋs la a Zeezi kõ a karen-biisã?
8 Kiris-neb nins sẽn da yaa Ebre-rãmbã sẽn paam a Poll lɛtrã yʋʋm a wãn poore, b yãa Rom sodaasã sẽn wa n karg n gũbg Zerizalɛm tẽngã. Rẽ n yɩ bãnd sẽn wilg tɩ b segd n zoe n yii Zerizalɛm tẽngã, a sãoongã wakat sẽn ta wã yĩnga. (Mat. 24:3; Luk 21:20, 24) La b ra na n zoe n kẽnga yɛ? A Zeezi ra yeelame bal yaa: “Bɩ neb nins sẽn be Zide wã sɩng zoees n teesd tãensẽ wã.” (Luk 21:21) Tãens wʋsg n da be soolem-kãng pʋgẽ. Woto wã, b ra na n zoe n teesa yɛ?
9. Bõe yĩng tɩ ra tõe n yɩ toog ne kiris-nebã tɩ b bãng tãens nins b sẽn da segd n zoe n teesẽ wã? (Ges-y kartã me.)
9 Ad tãens kẽer kiris-nebã sẽn da tõe n zoe n kẽnge: Samaari tãensẽ wã, Galile tãensẽ wã, Hɛrmo tãngẽ wã, Libã tãensẽ wã, n paas tãens nins sẽn be Zʋrdẽ kʋɩlgã rʋʋndẽ wã. (Ges-y kartã.) Soolem-kãens sẽn yaa tãensã pʋsẽ, tẽns n da be tɩ neb kẽer getẽ tɩ yaa bãan zĩisi. Wala makre, Gamla tẽngã ra bee tãn-lug-lug a ye zugu, tɩ yɩl n ta be yaa toog wʋsgo. Zʋɩf-rãmb kẽer da getame tɩ tẽn-kãng yaa soondg zĩig meng-menga. La zab-toaag n zĩnd Zʋɩf-rãmbã ne Rom nebã sʋk tẽn-kãnga, tɩ neb wʋsg ki.b
Tãens wʋsg n da be pipi kiris-nebã sẽn tõe n zoe n kẽnge, la wa n lebga vẽeneg tɩ pa b fãa zut la b tõe n paam koglg ye (Ges-y sull a 9)
10-11. a) Tõe tɩ wãn to la a Zeova wilg kiris-nebã sore? (Ebre-rãmbã 13:7, 17) b) Kiris-nebã paama bark-bʋse, b sẽn kelg sẽn lʋɩt-b taoorã yĩnga? (Ges-y fotã me.)
10 Kaset wʋsg n wilgd t’a Zeova ra tũnugda ne sẽn lʋɩt-b tigingã taoorã n wilgd kiris-nebã sore. Wala makre, kʋdemdã yɛl-mit a ye yʋʋr sẽn boond t’a Ezɛɛb yeelame yaa: “Zerizalɛm tigingã neb paama vẽnegr Wẽnnaam sẽn kõ rap a sẽn yãke. B yeel-b lame tɩ b zoe n yi Zerizalɛm nand tɩ zabrã sɩnge, n tɩ zĩnd Peere tẽng ning b sẽn boond tɩ Pella wã.” Pella sɩd ra yaa tẽng sẽn zems ne kiris-nebã zoe n kẽnge. A pa zãr wʋsg ne Zerizalɛm, tɩ kɩt tɩ be kẽngr da yaa nana. Sẽn paase, tẽngã neb wʋsg ra yaa bu-zẽmse, n pa baood n na n zab ne Rom nebã n soog b mens wa Zʋɩf-rãmbã ye.—Ges-y kartã.
11 Kiris-neb nins sẽn zoe n kẽng tãensẽ wã tũu a Poll saglgã, n kelg “sẽn lʋɩt-b taoor” tigingã pʋgẽ wã. (Karm-y Ebre-rãmb 13:7, 17.) Rẽ kɩtame tɩ b paam n põse. Sɩd-sɩda, Wẽnnaam zɩ n daag neb nins sẽn “gũud galʋ-tẽng sẽn tar yẽbgr meng-mengã,” rat n yeel tɩ Wẽnnaam Rĩungã n bas ye.—Ebre. 11:10.
Pella ra pa zãre, n le yaa zĩig b sẽn tõe n paam koglg me (Ges-y sull 10-11)
12-13. Ãnd dãmb la a Zeova tũnug ne n wilg a nin-buiidã sor toog wakate?
12 Rẽ sẽn wilgd tõnd bũmb ninga: A Zeova tũnugda ne neb nins sẽn lʋɩt taoorã n wilgd a nin-buiidã sor vẽenega. Kibay wʋsg n be Biiblã pʋgẽ n wilgd a Zeova sẽn yãk rap sẽn maan sɩd ne-a, tɩ b wilg a nin-buiidã sor toog wakate. (Tõo. 31:23; Yɩɩn. 77:20) Rũndã-rũndã me, d tara kaset wʋsg sẽn wilgd t’a Zeova ket n tũnugda ne sẽn lʋɩt-b taoorã n wilgd a nin-buiidã sore.
13 Wala makre, koronavirisã bã-loangdgã sasa, sẽn “lʋɩt-b taoorã” kõo tõnd saglse. B wilga kãsem-dãmbã b sẽn tõe n maan to-to n sõng b tẽed-n-taasã tɩ b kell n tũ a Zeova. Bã-loangdgã sɩngr poor bilfu, d maana tigis-kãseng buud-goam kobs nu la zak pʋgẽ. Saam-biisã tũnuga ne ẽnternetã, tele wã la radio wã n kelg tigis-kãsengã sõssã. A buud ra zɩ n zĩnd ye. Bã-loangdgã sasa, d ra ket n paamda zãmsg sẽn yit a Zeova nengẽ. Rẽ kɩtame tɩ zems-n-taar kell n zĩnd d sʋka. D kɩsa sɩd tɩ baa sẽn wa n yaa a soab fãa, a Zeova na n ket n sõngda sẽn lʋɩt-b taoorã tɩ b bãngd b sẽn segd n maanega. Sẽn na yɩl n segl d mens to-kãsengã yĩnga, la d wa tõog n tʋm ne yam wakat kãng sẽn na n yɩ toog wakatã, d segd n kɩsa a Zeova sɩd la d sakd a noyã. La zʋg-sõma bʋs me la d segd n bɩɩse?
NONG-Y TAAB NE SAAM-BIIR NONGLEM, LA Y REEGD TAAB SÃANDO
14. Zerizalɛm ne a wẽnd-doogã sãoong sẽn wa n kolgdẽ wã, zʋg-sõma-bʋs la kiris-nebã ra segd n bɩɩse? (Ebre-rãmbã 13:1-3)
14 To-kãsengã sã n wa sɩnge, na n yɩɩ tɩlɛ tɩ d wilg tɩ d nonga taab n yɩɩd pĩndã. Rẽ wɛɛngẽ, na n yɩɩ tɩlɛ tɩ d rɩk kiris-neb nins sẽn da be Zerizalɛm la Zide wã togs-n-taare. B ra wilgda wakat fãa tɩ b nonga taaba. (Ebre. 10:32-34) La Zerizalɛm ne a wẽnd-doogã sãoong sẽn wa n kolgdẽ wã, kiris-nebã ra segd n maneg n nonga taab ne “saam-biir nonglem” la b “maand sãambã sãand” n yɩɩd pĩndã.c (Karm-y Ebre-rãmb 13:1-3.) Dũni-kãngã saabã sã n wa ta, na n yɩɩ woto ne tõnd me.
15. Kiris-nebã sẽn yi Zerizalɛmmã poore, bõe yĩng tɩ b ra segd n nong taab ne saam-biir nonglem, la b reegd taab sãando?
15 Rom sodaasã sẽn wa n gũbg Zerizalɛm n wa tiig n loogã, kiris-nebã zoeeme n pa zã teed wʋsg ye. (Mat. 24:17, 18) B sẽn wa n zoet n dabd tãensẽ wã la b sẽn wa n ta sãandã weoogã, b ra segd n sõnga taaba. Yaa vẽeneg tɩ neb wʋsg n da rat sõngr tao-tao, tɩ rẽ kõ kiris-nebã weer tɩ b teel taab la b pʋɩ b sẽn tarã ne taaba, tɩ wilg tɩ b sɩd nonga taab ne saam-biir nonglem la tɩ b reegda taab sãando.—Tɩt 3:14.
16. Bõe la d tõe n maan n wilg tɩ d nonga d tẽed-n-taas nins sẽn dat sõngrã? (Ges-y fotã me.)
16 Rẽ sẽn wilgd tõnd bũmb ninga: Nonglmã kɩtame tɩ d sõngd d tẽed-n-taasã b sã n wa rat sõngre. A Zeova Kaset rãmb wʋsg sak n sõnga b tẽed-n-taas sẽn zoe n wa b tẽnsẽ wã zab la sabab-wẽns yĩnga. B sõng-b lame tɩ b paam bũmb nins sẽn yaa tɩlɛ ne-bã, la bũmb nins sẽn yaa tɩlɛ b tẽebã kengr yĩngã. Ikrɛn saam-bi-poak a ye sẽn zoe n bas a zak zabrã yĩng yeelame yaa: “D yãame t’a Zeova ra tũnugda ne d tẽed-n-taasã n sõngd tõnd la a wilgd-d sore. Sẽn sɩng ne Ikrɛnne, Hõngri la Alemayn d sẽn be masã wã, saam-biisã reeg-d-la neere, n ges d yell sõma.” Neb nins sẽn deegd b tẽed-n-taasã neere, la b get b yellã yaa tʋʋm-teed a Zeova nugẽ.—Yel. 19:17; 2 Kor. 1:3, 4.
Kiris-neb nins sẽn zoe n bas b tẽnsã rata d sõngre (Ges-y sull 16)
17. Bõe yĩng tɩ tar yõod tɩ d bɩɩs saam-biir nonglem la d reegd taab sãand masã menga?
17 Yaa vẽeneg tɩ to-kãsengã sẽn watã sasa, d tẽed-n-taasã na n maneg n data sõngre. (Hab. 3:16-18) Rũndã-rũndã, a Zeova wilgda tõnd d sẽn tõe n bɩɩs saam-biir nonglem to-to la d reegd taab sãando. To-kãsengã sasa la rẽ na n maneg n yɩ tɩlɛ.
BÕE N NA N MAAN KA LA BILFU?
18. Bõe la d tõe n maan n dɩk kiris-neb nins sẽn da yaa Ebre-rãmbã togs-n-taare?
18 Kʋdemdã yɛl-mitb wilgame tɩ kiris-neb nins sẽn zoe n kẽng tãensẽ wã paam n põsa Zerizalɛm sãoongã. B zoe n basa tẽngã, la a Zeova pa raag-b n bas ye. Na n yɩɩ wãn rũndã-rũndã? D pa mi yɛl nins sẽn watã sẽn na n yɩ to-to wã takɩ ye. La a Zeezi sagl-d lame tɩ d segl d mense. (Luk 12:40) D tara sagls nins a Poll sẽn kõ Ebre-rãmb sebrã pʋgẽ wã me. Sagl-kãens tara yõod rũndã-rũndã wa b sẽn da tar yõod pipi kiris-nebã wakatẽ wã. Sẽn paase, a Zeova mengã pʋlem-d lame t’a pa na n daag-d n bas ye. (Ebre. 13:5, 6) Bɩ d ket n baood Wẽnnaam Rĩungã sẽn yaa galʋ-tẽng ning sẽn na n kell n pa wã ne d sũur fãa, tɩ rẽ la d na n wa paam bark nins sẽn ka sɛtã a sẽn na n wa ne wã.—Mat. 25:34.
YƖƖLL 157 Laafɩ na yaa n zĩndi!
a Pĩnd wẽndẽ wã, ra wae n yaa rĩm n dɩt naam galʋ-tẽnsã zutu. B ra tõe n boola galʋ-tẽng a woto tɩ rĩungu.—Sɩng. 14:2.
b Yɩɩ yʋʋmd 67 soabã la rẽ maan-yã, kiris-nebã sẽn zoe n yi Zide la Zerizalɛmmã poor bilfu.
c Gom-bil ning b sẽn lebg tɩ “saam-biir nonglmã” bilgda nonglem ning sẽn be neb sẽn kĩ ne taab sʋka. La a Poll pʋda gom-bi-kãng n na n bilg nonglem ning sẽn be tigingã neb sʋkã.