D sẽn tõe n kõ saglg to-to

1. Ãnd dãmb n segd n kõt taab saglse, la bõe yĩnga?

YÃMB nong n kõta neb a taabã sagls bɩ? Yaa nana ne neb kẽer tɩ b kõ saglse. Neb sãnda pa rat n kõ b taab saglse, wall b yɛɛsda sagls kũuni. Sẽn yaa a soab fãa, mi n yaa tɩlɛ tɩ d kõ d taabã saglse. Bõe yĩnga? A Zeezi wilgame tɩ yaa nonglmã n na n kɩt tɩ b bãng a karen-biisã n bake. (Zã 13:35) Bũmb a ye d sẽn tõe n maan n wilg tɩ d nonga d tẽed-n-taasã yaa d sẽn na n kõt-b sagls sã n wa yaa tɩlɛ. Wẽnnaam Gomdã wilgame tɩ yaa d sẽn na n kõt taab sagls ne pʋ-peelem la d zoodã pãng paasda.—Yel. 27:9.

2. Bõe maaneg la kãsem-dãmbã segd n zãmse, la bõe yĩnga? (Ges-y zĩ-gũbrã me: “Sagls nins d sẽn paamd Kiris-nebã vɩɩm la b tʋʋma tigsg sasa wã.”)

² Sẽn yɩɩd fãa, kãsem-dãmbã segd n bãnga sagls kũuni. A Zeova kɩtame t’a Zeezi yãk nin-kãens tɩ b ges tigingã yelle. (1 Pɩy. 5:2, 3) Bũmb a ye b sẽn tũnugd ne n maan dẽ yaa b sẽn tikd Biiblã n kõt tigingã neb saglse, b sã n wa wɛgsd sõssã. Sẽn paase, b segd n kõo tigingã neb yembr-yembr saglse, baa sẽn lak-b n bas bãgrã. Wãn to la kãsem-dãmbã la neb a taabã tõe n kõ sagls sẽn yaa sõma?

3. a) Bõe n tõe n sõng-d tɩ d tõogd n kõt neb a taabã sagl-sõma? (Ezayi 9:6; ges-y zĩ-gũbrã me: “D rɩk a Zeezi togs-n-taar saglsã kũun wɛɛngẽ.”) b) Bõe yell la d na n gom sõs-kãngã pʋgẽ?

³ D sã n dat n bãngd n kõt saglse, d tõe n bao n bãnga neb nins sẽn kõ mak-sõng rẽ wɛɛngẽ tɩ b gomd b yell Biiblã pʋgẽ wã kibay n paase. Wala makre, a Zeezi. Naam-yʋʋr a ye b sẽn pʋd-a yaa “Sagend sẽn ka to.” (Karm-y Ezayi 9:6.) Sõs-kãngã pʋgẽ, d na n yãa d sẽn tõe n maan to-to, ned sã n wa kos-d saglga, la d sẽn tõe n maan to-to, d sã n wa segd n kõ ned saglg t’a yaool n pa kos-do. D leb n na n yãa sẽn tar yõod tɩ d kõ saglg a wakate, la d sẽn segd n bãng n kõ saglgã võore.

NED SÃ N WA KOS-D SAGLGA

4-5. Ned sã n kos-d saglga, sok-bʋg la d segd n deng n sok d menga? Rɩk-y makre.

⁴ Ned sã n kos-d saglga, bõe la d segd n deng n maane? D tõe n getame tɩ yaa zu-zẽkre, n dat n sõng a soabã zĩig pʋgẽ. La d segd n deng n soka d meng yaa: “Rẽ yĩnga mam tara minim n tõe n kõ sagls tɩ yɩ sõma yel-kãngã wɛɛngẽ sɩda?” Wakat ninga yɩta sõma tɩ d yeel a soabã t’a tɩ kos ned sẽn tar minim bũmb ning wɛɛngẽ a sẽn dat saglgã sõngre.

⁵ D rɩk makre: Yãmb zoa n tar bãag tɩ namsd-a. A yeela yãmb t’a maana vaeesg b sẽn tõe n tɩp-a to-to wã wɛɛngẽ, n sok yãmb tɩ y tagsdame tɩ tɩbs-bʋg la sõma n yɩɩda. Y tõe n tara y tagsg rẽ wɛɛngẽ, la y pa logtor ye. Y pa paam zãmsg bã-kãng tɩbsgã wɛɛngẽ me ye. Bũmb y sẽn tõe n maan tɩ sõng y zoa wã n yɩɩd yaa y sẽn na n sõng-a t’a paam ned sẽn mi a bãagã tɩbs sõngre.

6. Ned sã n kos-d saglga, bõe yĩng tɩ yaa sõma tɩ d gũ bilf n yaool n leoke?

⁶ Baa d sã n tagsdẽ tɩ d tara minim bũmb ning wɛɛngẽ n tõe n kõ saglga, ned sã n wa kos-d saglg bõn-kãng wɛɛngẽ d tõe n gũu bilf n yaool n leok-a. Bõe yĩnga? Yel-bũn 15:28 yetame tɩ “nin-tɩrg . . . bʋgsdame n yaool n leoke.” La d sã n tagsdẽ tɩ d zoe n mii leoorã yẽ? D tõe n ket n data sẽk sẽn na yɩl n maan vaeesgo, n pʋʋs la d bʋgse. Woto, d tõe n kɩsa sɩd tɩ d sẽn na n yeel-a bũmb ningã zemsa ne a Zeova tagsg sẽn yaa a soab yel-kãng wɛɛngẽ wã. D gom no-rɛɛs a Natã yelle.

7. Yam-bʋg la y tõe n dɩk no-rɛɛs a Natã kibarã pʋgẽ?

⁷ Rĩm a Davɩɩd yeela a Natã t’a rat n mee roog n kõ a Zeova. A Natã yeel-a-la zĩig pʋgẽ t’a tõe n maana rẽ. La a Natã ra segd n deng n soka a Zeova. Bõe yĩnga? Bala a Zeova ra pa rat tɩ yɩ a Davɩɩd n na n me wẽnd-doogã ye. (1 Kib 17:1-4) Kiba-kãngã wilgdame tɩ ned sã n kos-d saglga, yɩta sõma tɩ d “maag ne goama.”—Zak 1:19.

8. Bõe me n kɩt tɩ d segd n tags sõma n yaool n kõ saglga?

⁸ Bũmb a to n kɩt tɩ d segd n tags sõma n yaool n kõ saglga. Yaa tɩ d sã n kõ ned saglg sẽn pa sõma tɩ wa ne zu-loeese, tõnd me tara taale. Vẽenega, tara yõod wʋsg tɩ d tags sõma n yaool n kõ saglga.

D SẼN TÕE N KÕ NED SAGLG TO-TO, BAA A SÃ N PA KOS-DO

9. Nand tɩ kãsem-dãmbã kõ ned saglga, bõe la b segd n deng n bao n bãnge? (Galat-rãmbã 6:1)

⁹ Wakat ninga, tõe n yɩɩ tɩlɛ tɩ kãsem-dãmbã kõ saam-biig wall saam-bi-poak sẽn “dɩk so-wẽng” saglga. (Karm-y Galat-rãmb 6:1.) Tõe tɩ ned a woto yãka yam n maand bũmb sẽn pa sõma tɩ tõe n wa kɩt t’a maan yel-wẽn-kãsenga. Kãsem-dãmbã bõn-daabã yaa sõng-a t’a kell n pa vɩɩm sẽn ka sɛtã sor zugu. (Zak 5:19, 20) La b sã n dat tɩ b saglsã kẽ a soabã, b segd n deng n bao n bãnga a sã n sɩd rɩka so-wẽnga. A Zeova kõo tõnd ned kam fãa sor t’a tõe n kelg a sũur-kasetã n yãk a toorẽ yam. (Rom. 14:1-4) La kãsem-dãmbã sã n yã t’a sɩd rɩka so-wẽnga, n yãk yam n na n sagl-a, wãn to la b tõe n maan dẽ?

10-12. Kãsem-dãmbã sã n segd n kõ ned saglg t’a soabã yaool n pa kos-ba, bõe la b segd n maane? Rɩk-y makre. (Ges-y fot-rãmbã me.)

¹⁰ Kãsem-dãmbã sã n segd n kõ ned saglg t’a soabã yaool n pa kos-ba, pa nana ye. Bõe yĩnga? Tẽn-tʋmd a Poll yeelame tɩ ned tõe n dɩka so-wẽng n yaool n pa miẽ ye. Rẽ n so tɩ nand tɩ kãsem-dãmbã kõ ned saglga, bũmb kẽer la b segd n maan tɩ sõng a soabã t’a kelge.

¹¹ Kõ ned saglg t’a yaool n pa kos-f yaa wa f sẽn na n dat n bʋd kood zĩig sẽn yaa koɛɛng pʋgẽ. F na n deng koo zĩigã n yaool n bʋde. Rẽ na n kɩtame tɩ zĩigã bʋke. Yaa rẽ poor la y na n yaool n bʋd koodã. Sẽn na n baase, y na n zãgsa koom sẽn na yɩl tɩ koodã tõog n bul n yi. Woto me, nand tɩ kãsem-soab kõ ned saglga, bũmb toor-toor la a segd n deng n maan tɩ sõng a soabã t’a kelge. Wala makre, a na n baoo wakat sẽn zems n sõs ne-a, n deng n wilg t’a rata a neere. Nebã sã n miẽ tɩ kãsem-soab nonga neb n leb n yaa nin-bʋgsgo, na n yɩɩ nana tɩ b kelg a saglse.

¹² Sõsgã sasa, kãsem-soabã tõe n tẽeg-a lame tɩ ned buud fãa tudgdame, n mi n dat saglga. Rẽ tõe n kɩtame tɩ yɩ nana t’a sak n kelg a saglgã. (Rom. 3:23) Kãsem-soabã na n bʋka a koɛɛgã n gom ne waoogre, n tik Gʋls-sõamyã n wilg-a sor ning a sẽn dɩkã sẽn yaa wẽngã võor vẽenega. Saam-biigã sã n sak n deeg t’a tudgame, kãsem-soabã na n tũnuga ne goam sẽn yaa vẽenega, n wilg-a bũmb ning a sẽn segd n maan n dems yɛlã. Sẽn na n baase, kãsem-soabã na n pẽga saam-biigã bũmb nins a sẽn maand tɩ yaa sõma wã yĩnga, la a naag-a n pʋʋse.—Zak 5:15.

13. Bõe la kãsem-dãmbã tõe n maan n kɩs sɩd tɩ ned wʋmda b saglg võor sõma?

¹³ Wakat ninga kãsem-soab tõe n goma goama, t’a sẽn sagend ned ningã pa wʋm a goamã võor sõma ye. Bõe la kãsem-dãmbã tõe n maan n kɩs sɩd t’a wʋmda b goamã võor sõma? B tõe n soka a soabã sogsg ne yam la waoogre. (Koɛ. 12:11) A soabã sẽn na n leok sogsgã to-to wã na n sõngame tɩ b bãng a sã n wʋma saglgã võor sõma.

D SẼN TÕE N BÃNG N KÕ SAGLG TO-TO, TƖ ZEMS A WAKAT ME

14. Bõe yĩng tɩ d pa segd n kõ ned saglg ne sũ-yikri?

¹⁴ D fãa sẽn yaa neb sẽn pa zems zãngã yĩnga, d mi n maana bũmb wall d yeel gomd n sãam d to sũuri. (Kolo. 3:13) Wẽnnaam Gomdã wilgame meng tɩ d tõe n maana bũmb n kɩt tɩ d to sũur yiki. (Efɛɛ. 4:26) La d pa segd n kõ ned saglg ne sũ-yikr ye. Bõe yĩnga? Bala “ninsaal sũ-yikr pa wat ne sẽn yaa tɩrg Wẽnnaam nifẽ ye.” (Zak 1:20) D sã n bao n na n kõ ned saglg ne sũ-yikri, d tõe n zẽna yɛlã. Woto pa rat n yeel tɩ ned sã n maan bũmb tɩ d sũur yiki d pa segd n togs a soabã ye. La d sã n gũ tɩ d sũurã wa sig tɩ d yaool n na n gom ne a soabã, yɩta sõma n yɩɩda. D tõe n dɩka yam a Elihu sẽn kõ a Zoob sagl-sõma wã nengẽ.

15. Yam-bʋg la d tõe n dɩk a Elihu mak-sõngã pʋgẽ? (Ges-y fotã me.)

¹⁵ A Elihu kelga a Zoob n maan rasma, t’a gomd n wilgdẽ t’a zo-rãmbã sẽn dõt-a bũmb ninsã pa sɩd ye. A ra kʋmda a Zoobe. La a sũurã wa n yika ne a Zoobe, bala a togsa goam sẽn pa sɩd a Zeova zugu, tɩ sẽn da pak-a yaa a wilg t’a pa tar taal bala. Baa ne rẽ, a Elihu maaga a yĩng n gũ t’a Zoob ne a zo-rãmbã gom n sa t’a yaool n na n gome. A sẽn wa n na n gomã me, a sagla a Zoob ne bʋgsem la waoogre. (Zoob 32:2; 33:1-7) A Elihu mak-sõngã wilgda tõnd bũmb sẽn tar yõodo. Wilgdame tɩ d sã n dat n kõ saglg tɩ yɩ sõma, d pa segd n gom ne sũ-yikr ye. D segd n goma ne waoogr la nonglem.—Koɛ. 3:1, 7.

D KET N KÕT SAGLS LA D KELGD SAGLSE

16. Yam-bʋg la d tõe n dɩk Yɩɩn-sõamyã 32:8 goamã pʋgẽ?

¹⁶ Vɛrse ning zug sõs-kãngã sẽn tikã yeelame t’a Zeova ‘sagenda tõnd t’a ninã get tõndo.’ (Karm-y Yɩɩn-sõamyã 32:8.) Rẽ wilgdame tɩ pa bũmb a sẽn maand vugr bal ye. A pa kõt tõnd sagls bal ye. A sõngd-d lame sẽn na yɩl tɩ d tũ saglsã. Woto pa mak-sõng d sẽn segd n tũ sɩda? D sã n kõ ned saglga, d tõe n dɩka a Zeova togs-n-taar n ket n kengd a raood la d sõngd-a sẽn na yɩl t’a tõog n tũ.

17. Kãsem-dãmbã sã n kõt sagls sẽn yaa takɩ la sẽn tik Biiblã zugu, d tõe n mak-b-la ne bõe? Wilg-y y leoorã võore. (Ezayi 32:1, 2)

¹⁷ Yaa masã la segd n kõt sagls la d kelgd sagls n yɩɩd pĩndã. (2 Tɩm. 3:1) Kãsem-dãmb nins sẽn kõt sagls sẽn yaa takɩ la sẽn tik Biiblã zugã yaa “wa kʋɩls koom zĩ-koɛɛngẽ.” (Karm-y Ezayi 32:1, 2.) D sũur yaa noog ne zo-rãmb nins sẽn kõt tõnd sagls nins d sẽn segd n wʋme, la pa sagls nins sẽn na n yɩ-d noogã ye. B goamã yaa wa “sãnem pomm-dãmb b sẽn sag wanzuri laas pʋsẽ.” (Yel. 25:11) Bɩ d fãa ket n baood yam sẽn na n sõng-d tɩ d bãngd n kõt saglse, la d kelgd sagl-sõma.