ZÃMSGÃ YĨNGA 28
YƖƖLL 88 Zeova, wilg maam fo noyã
Bõe yĩng tɩ d segd n bao saglse?
“Neb nins sẽn baood saglsã tara yam.”—YEL. 13:10.
D SẼN NA N BÃNGE
D na n yãa d sẽn tõe n maan to-to tɩ sagls nins d sẽn paamdã naf-d sõma.
1. Bõe n tõe n sõng-d tɩ d bãngd n yãkd yam, tɩ d magb toor-toorã me yãkd nenga? (Yel-bũnã 13:10; 15:22)
D FÃA ratame tɩ d yam-yãkr toor-toorã yɩ sõma. D ratame me tɩ d magb toor-toorã yãkd nenga. Wẽnnaam Gomdã wilgda tõnd d sẽn tõe n maan to-to tɩ yɩ woto.—Karm-y Yel-bũn 13:10; 15:22.
2. Bõe la a Zeova pʋlem tõndo?
2 Soab ning sẽn tõe n kõ tõnd yam la sagls sẽn yaa sõma n yɩɩdã yaa d Ba a Zeova. A pʋlmame t’a na n sõng-d lame n yeel yaa: “Mam na n sagla foo, tɩ m ninã get-fo.” (Yɩɩn. 32:8) A Zeova sẽn yeel woto wã wilgdame t’a pa kõt tõnd sagls bal ye. Tõnd ned kam fãa yell pak-a lame, t’a sõngd tõnd sẽn na yɩl tɩ d tũ a saglsã.
3. Bõe yell la d na n gom sõs-kãngã pʋgẽ?
3 Sõs-kãngã pʋgẽ, d na n tika Wẽnnaam Gomdã n bao sogsg a naas leoore: 1) M sã n dat n dɩ saglsã yõodo, zʋg-sõng-bʋg la m segd n talle? 2) Ãnda nengẽ la m tõe n paam sagls sẽn yaa sõma? 3) Wãn to la m tõe n wilg tɩ m sɩd rata saglse? La 4) bõe yĩng tɩ m pa segd n kos m taabã tɩ b yãk yam n kõ-ma?
ZƲG-SÕNG-BƲG LA M SEGD N TALLE?
4. D sã n dat n dɩ saglsã yõodo, zʋg-sõng-bʋg la d segd n talle?
4 D sã n dat n dɩ saglsã yõodo, d segd n yɩɩ sik-m-meng soaba. D segd n sak n deegame tɩ d minimã la d bãngrã pa sek d na yãk yam d toor tɩ yɩ sõma ye. D sã n pa sik-m-meng soaba, a Zeova pa na n tõog n sõng-d ye. Rẽ na n kɩtame tɩ d sã n wa n karemd a Gomdã bɩ d pa ne tɩ yaa tɩlɛ tɩ d tũ sagls nins d sẽn paamd a pʋgẽ wã ye. (Mis. 6:8; 1 Pɩy. 5:5) La d sã n yaa sik-m-meng soaba, d na n sakda sagls nins sẽn tik Biiblã zugã la d tũudẽ.
5. Bõe la a Davɩɩd tõog n maan tɩ ra tõe n kɩt t’a lebg wuk-m-meng soaba?
5 D ges yam ning d sẽn tõe n dɩk rĩm a Davɩɩd kibarã pʋgẽ. Baa ne a sẽn tõog n maan bõn-kãsemsã, a pa lebg wuk-m-meng soab ye. Yʋʋm wʋsg nand t’a lebg rĩma, a yʋʋrã ra yiime a sẽn mi yʋʋm-teed wẽebã yĩnga. B kɩtame meng t’a wẽed pɛndg rĩmã taoore. (1 Sãm. 16:18, 19) B sẽn zae-a t’a na n lebg rĩmã poore, a Zeova vʋʋsem sõngã siga a zug n kõ-a pãnga. (1 Sãm. 16:11-13) Nebã ra pẽgd-a-la a sẽn da kʋʋd b bɛɛbã yĩnga. Wala makre, Filisti ned a Golyat sẽn da yaa nin-wobgã. (1 Sãm. 17:37, 50; 18:7) Ned sẽn yaa wuk-m-meng soab sã n tõog n maan bõn-kãensã, a tõe n tagsame tɩ pa tɩlɛ t’a kelg neb a taabã sagls ye. La pa yɩ woto ne a Davɩɩd ye.
6. Bõe n wilgd t’a Davɩɩd ra sakd n kelgda saglse? (Ges-y fotã me.)
6 A Davɩɩd sẽn lebg rĩmã poore, a ra nong n bee ne neb sẽn kõt-a saglse. (1 Kib 27:32-34) Woto pa lingr ye. Bala a Davɩɩd ra minim n kelgda neb a taabã saglse. Pa rap sagls bal la a ra kelgd ye. A kelga pag a ye yʋʋr sẽn boond t’a Abigayɩll sagls me. A ra yaa a Naball sẽn yaa wuk-m-meng soaba, sõm-zɩt la ned sẽn pa mi neb waoogrã paga. A Davɩɩd sika a meng n kelg a saglgã sẽn da yaa sõma wã, tɩ kɩt t’a pa tudg n maan bũmb sẽn yaa wẽng ye.—1 Sãm. 25:2, 3, 21-25, 32-34.
A Davɩɩd sika a meng n kelg a Abigayɩll saglgã la a tũ (Ges-y sull a 6)
7. Yam-bʋg la d tõe n dɩk a Davɩɩd kibarã pʋgẽ? (Koɛɛg soaba 4:13) (Ges-y fot-rãmbã me.)
7 D tõe n dɩka yam a Davɩɩd kibarã pʋgẽ. Wala makre, d tõe n tara minim bũmb ning wɛɛngẽ wall d tar zu-sobendo. Baasgo, d pa segd n tags tɩ d mii bũmb fãa n pa le rat sagls ye. D segd n yɩɩ wa a Davɩɩd n sakd n kelgd sagl-sõma fãa, baa sẽn yaa ned ning n kõ-do. (Karm-y Koɛɛg soab 4:13.) D sã n maan woto, d pa na n tudg n maan bũmb n sãam tõnd ne neb a taabã sũur ye.
D segd n sakd n kelgda sagl-sõma fãa, baa sẽn yaa ned ning n kõ-do (Ges-y sull a 7)c
ÃNDA NENGẼ LA D TÕE N PAAM SAGLS SẼN YAA SÕMA?
8. Bõe yĩng tɩ yaa a Zonatã n da tõe n kõ a Davɩɩd saglg tɩ yɩ sõma n yɩɩda?
8 D gom bũmb a to a Davɩɩd kibarã sẽn sõngd tõnd tɩ d bãng yelle. A kelga neb sẽn da tar zood sõma ne a Zeova la sẽn da wʋmd a zu-loɛɛgã võor sõma saglse. Wala makre, a sẽn wa n dat n bãng a Sayull sã n na n bas-a lame n pa kʋ wã, a kosa a Sayull biig a Zonatã saglse. Bõe yĩng tɩ yaa a Zonatã n da tõe n kõ-a sagls sẽn yaa sõma? Bala a Zonatã ra tara zood sõma ne a Zeova, la a mi a ba a Sayull sõma me. (1 Sãm. 20:9-13) Wãn to la d tõe n dɩk a Davɩɩd togs-n-taare?
9. D sã n wa rat saglse, ãnda la d segd n kose? Rɩk-y makre. (Yel-bũnã 13:20)
9 D sã n wa baood saglse, yɩta sõma tɩ d kos ned sẽn tar zood sõma ne a Zeova la sẽn tar minim bũmb ning wɛɛngẽ d sẽn dat saglsã.a (Karm-y Yel-bũn 13:20.) D rɩk makr ne saam-biig sẽn yaa bi-bɩɩg sẽn dat ned n kẽ kãadem ne. Ãnda soab n tõe n kõ-a sagls sẽn yaa sõma? A zoa sẽn pa kẽ kãadem tõe n sõng-a lame, a sã n tik a saglsã Biiblã zug bala. La a sã n dat sagls sẽn yaa takɩ la sẽn na n nafa n yɩɩda, a tõe n kosa pag ne a sɩd sẽn mi-a sõma la sẽn kẽ kãadem yʋʋm wʋsg tɩ b kãadmã yaa sõma sõngre.
10. Bõe yell la d na n gom masã?
10 D zoe n yãa zʋg-sõng d sẽn segd n talle, la ned ning buud sẽn tõe n kõ tõnd sagl-sõma wã. Masã, d na n yãa d sẽn segd n wilg tɩ d sɩd rata saglsã võore, la d bao n bãng d sã n segd n kosa neb a taabã tɩ b yãk yam n kõ-do.
WÃN TO LA M TÕE N WILG TƖ M SƖD RATA SAGLSE?
11-12. a) Bõe la d pa segd n maane? b) Rĩm a Roboam sẽn wa n segd n yãk yam bũmb sẽn tar yõod wɛɛngẽ wã, bõe la a maan-yã?
11 Wakat ninga tõe n wõnda nina baooda saglse. La sɩd-sɩda, a zoe n yãka yam n baood ned sẽn na n teel-a a yam-yãkrã pʋgẽ. Ned a woto pa baood sagls ne a sũur fãa ye. Nin-kãng segd n tẽega bũmb ning sẽn paam rĩm a Roboammã.
12 A Roboam n ledg a Salomo n lebg Israyɛll rĩma. A sẽn wa n lebg rĩmã tɩ Israyɛll nebã paama arzɛgs wʋsgo, la b ra getame t’a Salomo ra weoogd-b-la wʋsgo. Nin-buiidã kosa a Roboam t’a yols-ba. A Roboam kos-b lame tɩ b kõ-a weer t’a tags n yaool n leok-ba. Sɩngrẽ wã a maana neere, bala a kosa nin-kẽemb nins sẽn da tʋm ne a Salomo wã saglse. (1 Rĩm. 12:2-7) La a pa tũ nin-kẽembã sagls ye. Bõe yĩnga? Tõe t’a ra zoe n yãka a sẽn na n maan bũmb ningã, n baood ned sẽn na n teel-a a yam-yãkrã pʋgẽ. Sã n yaa woto, a paama teelg ning a sẽn da ratã a zo-rãmbã sẽn da yaa kom-bɩɩsã nengẽ. (1 Rĩm. 12:8-14) A Roboam leoka nin-buiidã tɩ zems a zo-rãmbã sẽn sagl-a bũmb ningã. Rẽ yɩɩ sabab tɩ rĩungã welg a yiibu, t’a Roboam paam zu-loees rẽ tɛk me.—1 Rĩm. 12:16-19.
13. D maanda wãn n bãng d sã n sɩd rata saglg ne d sũur fãa?
13 Yam-bʋg la d tõe n dɩk a Roboam kibarã pʋgẽ? D sã n wa kot saglse, segd n yɩɩ ne d sũur fãa. D maanda wãn n bãng d sã n sɩd baooda saglgã ne d sũur fãa? D tõe n soka d meng yaa: ‘M kota saglg n yaool n pa tũ, bala pa zems ne m sẽn datã bɩ?’ D rɩk makre.
14. B sã n kõ-d saglga, bõe la d segd n tẽege? Rɩk-y makre. (Ges-y fotã me.)
14 Mams-y wa b sẽn na n dat n kõ saam-biig tʋʋm-sõngo. Nand t’a sak tʋʋmdã, a kosa kãsem-soab saglse. Saam-biigã yeelame tɩ tʋʋmdã na n kɩtame t’a mii n bas a zakã rãmb n loog n tɩ kaoos bilfu. Kãsem-soabã tẽeg-a lame tɩ bũmb ning sẽn tar yõod n yɩɩd yaa a sõng a zakã rãmb tɩ b tẽebã kell n tall pãnga. (Efɛɛ. 6:4; 1 Tɩm. 5:8) Mams-y wa saam-biigã sẽn na n yeel tɩ kãsem-soabã saglgã pa sõma, n bas n tɩ kos saam-biis a taab sagls hal n wa paam ned sẽn na n togs-a goam sẽn noom-a. Saam-biigã sɩd baooda sagls bɩ, bɩ a zoe n yãka yam n baood ned sẽn na n teel-a a yam-yãkrã pʋgẽ? D segd n tẽegame tɩ d sũurã yaa zãmb soaba. (Zer. 17:9) Wakat ninga, sagls nins tõnd sẽn pa nongã n yaa sagls nins sẽn na n naf tõnd n tɩ yɩɩda.
D sɩd baooda sagl-sõma bɩ, bɩ d baooda ned sẽn na n teel-d d yam-yãkrã pʋgẽ? (Ges-y sull 14)
BÕE YĨNG TƖ M PA SEGD N KOS M TAABÃ TƖ B YÃK YAM N KÕ-MA?
15. Bõe la d pa segd n maane, la bõe yĩnga?
15 A Zeova ratame tɩ d ned kam fãa yãkd yam a toore. (Gal. 6:4, 5) D zoe n yãame tɩ ned sẽn tar yam na n baoo sagls Wẽnnaam Gomdã pʋgẽ, la kiris-neb tẽeb sẽn bɩ nengã n yaool n yãk yam n maan bũmbu. La d segd n gũusame n da wa baoodẽ tɩ neb a taab yãk yam n kõ-d ye. Kẽer maanda rẽ vẽeneg-vẽenega, n sok ned b sẽn nand yaa: ‘Sã n da yaa foo, f maanda wãna?’ Sãnda rɩkda ned a to togs-n-taar n pa reng n tags meng ye.
16. Yel-bʋg n da be Korẽnt tigingã pʋgẽ rũms nins b sẽn kʋ n maan maoong n kõ bõn-naandsã nemd wãbr wɛɛngẽ, la ãnda n da segd n yãk yam rẽ wɛɛngẽ? (1 Korẽnt rãmbã 8:7; 10:25, 26)
16 Tẽeg-y yell ning sẽn da be Korẽnt tigingã pʋgẽ rũms nins b sẽn kʋ n maan maoong n kõ bõn-naandsã nemd wãbr wɛɛngẽ wã yelle. A Poll yeela Korẽnt kiris-nebã yaa: “Tõnd miime tɩ bõn-naandg pa baa fʋɩ dũniyã pʋgẽ, la tɩ Wẽnnaam a to ka be n zʋʋg Wẽnnaam-yɛngã ye.” (1 Kor. 8:4) Tigingã neb kẽer sẽn mi rẽ wã kɩtame tɩ b getẽ tɩ b tõe n daa nemd raagẽ wã n wãbe, baa sã n yaa rũng b sẽn kʋ n kõ bõn-naandg nemdo. Sãnda yãka yam n pa na n wãb nemd a woto, bala na n kɩtame tɩ b sũur-kasetã ning-b taale. (Karm-y 1 Korẽnt rãmb 8:7; 10:25, 26.) Yaa ned kam fãa n da segd n yãk yam rẽ wɛɛngẽ. A Poll pa tol n sagl Korẽnt kiris-nebã tɩ b yãk yam b taabã yĩnga, wall tɩ b maan wa b taabã ye. B ned kam fãa “na n yalsa Wẽnnaam taoor t’a kao a bʋʋd wa sẽn zems a tʋʋma.”—Rom. 14:10-12.
17. D sã n maan wa neb a taabã bala, tõe n waa ne bõe? Rɩk-y makre. (Ges-y fot-rãmbã me.)
17 Yell a woto tõe n zĩnda rũndã-rũndã. D rɩk makr ne zɩɩmã pʋgẽ bõn-kɩdsã. Kiris-ned fãa segd n yãka a sã n na n sak n deega bõn-kãense.b Bõn-kãensã võor wʋmb tõe n yɩɩ toog ne-do, la yaa ned kam fãa n segd n tʋk a meng zɩɩb rẽ wɛɛngẽ. (Rom. 14:4) D sã n yãk yam n na n maan wa ned a to yel-kãens wɛɛngẽ, tõe n booga d sũur-kasetã pãnga. D sã n dat n kibl d sũur-kasetã la d paas a pãnga, d segd n kelgd-a lame. (Ebre. 5:14) Woto wã, wakat-bʋg la d segd n kos kiris-ned tẽeb sẽn bɩ saglga? Yaa d sã n maan vaeesg n ket n dat sõngr sẽn na yɩl n bãng d sẽn tõe n tũ Biiblã sagls to-to d yellã pʋgẽ.
D segd n deng n maana vaeesg n yaool n bao saglse (Ges-y sull 17)
KET-Y BAOOD-Y SAGLSE
18. Bõe la a Zeova maan n kõ-do?
18 A Zeova sẽn bas tɩ d tõe n yãk d toorẽ yamã wilgdame t’a kɩs-d-la sɩda. A kõo tõnd Biiblã sẽn yaa a Gomdã. A leb n kõ-d-la zo-rãmb sẽn tar yam n tõe n sõng-d tɩ d bãng d sẽn tõe n tũ Biiblã sagls to-to. Woto, a wilgame t’a yaa d Ba sẽn get d yell ne nonglem. (Yel. 3:21-23) Bõe la d tõe n maan n wilg tɩ d sũur nooma ne a sẽn get d yell to-to wã?
19. Bõe la d tõe n maan n kɩt t’a Zeova sũur yɩ noogo?
19 Tags-y n ges-y-yã: Roagdb sã n neẽ tɩ b kambã bɩtame n lebgd neb sẽn tagsd sõma, n tar yam, n tũud a Zeova la b sõngd b taabã, noom-b-la wʋsgo. A Zeova me sã n neẽ tɩ d bɩta tẽebã pʋgẽ, n baood sagls la d yãkd yam sẽn waoogd-a, noom-a-la wʋsgo.
YƖƖLL 127 Mam sẽn tog n yɩ ned ning buudu
a Kiris-ned sã n wa baood sagls ligdã zãab wɛɛngẽ, laafɩ wã baoob wɛɛngẽ, wall bũmb a to wɛɛngẽ, a tõe n kosa ned sẽn pa tũud a Zeova sõngre.
b Y sã n dat n bãng n paas bɩ y ges Vɩɩmd-y wakat sẽn kõn sa! sebrã sak 39 nimero a 5 wã la “Bũmb a taabã” zĩigẽ.
c FOT-RÃMBÃ BILGRI: Kãsem-soab sẽn sagend kãsem-soab a to a sẽn gom to-to b tigsg sasa wɛɛngẽ.