“Zabrã yaa a Zeova zabre”

Yʋʋmd 1999 wã, Fãrens goosneema wã yeelame tɩ tõnd filyallã sẽn be Fãrensã segd n yaoo lampo kũun ning b sẽn paam yʋʋmd 1993 n tãag yʋʋmd 1996 yĩnga. D talla yellã n kẽng Fãrens bʋ-kaoodbã taoore, la b mong-d-la bʋʋm. D kosame tɩ b lebs n kao bʋʋdã, la b le mong-d-la bʋʋm. Rẽ poore Fãrens goosneema wã reega filyallã ligd sẽn da be bãnkẽ wã. B sẽn deeg ligd ningã yɩɩda ero wã milyõ a naas la pʋɩ-sʋka. Yaoolem bũmb ning d sẽn da tõe n maan n le paam d ligdã yaa d sẽn na n tall yellã n kẽng Erop bʋ-kaoodbã sull ning sẽn get ninsaalbã dʋrwa-rãmb yellã taoore. La nand tɩ yellã ta Erop bʋ-kaoodbã taoore, tõnd ne Fãrens goosneema wã avoka-rãmb ra segd n sõsa ne ned sẽn tʋmd ne bʋ-kaoodbã, n bao n bãng d sã n tõe n zemsa taab tɩ pa ta bʋ-kaoodbã taoore.

D ra miime tɩ sẽn tʋmd-a ne bʋ-kaoodbã na n yeel-d lame tɩ d sak n yao bilfu. La d ra miime me tɩ d sã n sak n yao baa yaa bilfu, na n kɩɩsa Biiblã noyã. Saam-biisã la saam-bi-pogsã kõo kũunã n na n teel Rĩungã tʋʋma. Rẽnd ligdã pa goosneema wã rẽnd ye. (Mat. 22:21) Baa ne rẽ, d sak n maana bũmb ning Erop bʋ-kaoodbã sẽn da rat tɩ d maanã.

D tigma taab Erop bʋ-kaoodbã ro-neer a ye pʋgẽ. Sɩngrẽ wã ra wõnda wa pa na n yãk neng ye. Sẽn tʋmd-a ne bʋ-kaoodbã sẽn sɩng goamã, a yeelame t’a Zeova Kaset rãmbã segd n yaoo lampo kẽer Fãrens goosneema wã sẽn yeel tɩ b yao. Zĩig pʋgẽ d sok-a lame yaa: “Yãmb miime tɩ goosneema wã zoe n deega tõnd ligd bãnkẽ wã, la tɩ b sẽn deegã yɩɩda ero wã milyõ a naas la pʋɩ-sʋk sɩda?”

D yãa vẽeneg t’a ra pa mi, la t’a sũur sãama ne Fãrens goosneema wã sẽn maan bũmb ningã. Goosneema wã avoka-rãmb sẽn sak n deeg tɩ b sɩd maana woto wã poore, a manesmã toeema fasɩ. A gom-b lame, la a yeel tɩ tigsgã saame. Rẽ kɩtame tɩ m bãng vẽeneg t’a Zeova kẽesa a toog sẽn na yɩl tɩ d paam bʋʋm. D yii tigsgã zĩigẽ ne sũ-noogo. Bũmb ning sẽn maanã ling-d-la wʋsgo.

Yʋʋmd 2011 sigr kiuug rasem 30 wã, Erop bʋ-kaoodbã sull ning sẽn get ninsaalbã dʋrwa-rãmb yellã kaoo bʋʋdã n kõ tõnd bʋʋm. B yeelame tɩ b pa segd n kɩt tɩ tõnd yao lampo, la tɩ Fãrens goosneema wã segd n lebsa ligd ning b sẽn deegã n dogl yõodo. Hal n tãag rũndã, b sẽn kao bʋʋdã to-to wã ket n kogenda tũudum hakɩɩkã Fãrens soolmẽ wã. Sokr ning d sẽn tiig n sokã yɩɩ wa kugr ning sẽn kʋ a Golyatã. A yɩɩ sabab tɩ bʋ-kaoodbã kõ tõnd bʋʋm. Bõe n kɩt tɩ d paam bʋʋm? Yaa tɩ “zabrã yaa a Zeova zabre,” wa a Davɩɩd sẽn yeel a Golyatã.—1 Sãm. 17:45-47.

Pa yɩ rẽ bal la b sẽn kao bʋʋd n kõ tõnd bʋʋm ye. Baa goosneema-rãmb sẽn tar pãng la tũudum toɛy-toɛy sẽn namsd tõndã, d paama bʋʋm naoor tusr la kobs-yi la pis-yi la a nu, tẽns pis-yopoe bʋ-kaoodb nins sẽn tar noor n yɩɩdã taoore, la bʋ-kaoodb sẽn get tẽns toɛy-toɛy yell taoore. Rẽ kɩtame tɩ b sak n deeg tɩ d yaa tũudum wa tũudum a taabã, tɩ d tara sor n na n moon koɛɛgã, n zãgs tɩ d kõn naag n maan bũmb nins nebã sẽn maand n wilgdẽ tɩ b nonga b tẽngã, la tɩ d pa rat tɩ b ning-d zɩɩm ye.

Sẽn mik tɩ mam tʋmda a Zeova Kaset rãmbã biru-kãsengã sẽn be Niuyork sẽn yaa Etazĩni soolmẽ wã, sɩnga wãn tɩ m wa kẽes m toog yell b sẽn tall n kẽng bʋ-kaoodb taoor Erope?

M DOAGDBÃ RA YAA MISIONEER-DÃMB SẼN TAR YẼESEM

M baaba yʋʋr la a George, tɩ m ma yʋʋr la a Lucille. B kẽnga Galaad lekoll piig la yiib-n-soabã. Mam sẽn wa n na n dog yʋʋmd 1956 tɩ b bee Etiyopi. B rɩka pipi kiris-nebã wakatẽ koe-moond a Filip yʋʋrã n pʋd maam. (Tʋʋ. 21:8) Yʋʋmd ning sẽn pʋglã, goosneema wã gɩdga a Zeova Kaset rãmbã tũudum. Baa ne m sẽn da yaa kɩdg wʋsgã, m ket n tẽra tõnd zakã rãmb sẽn da soosd n tʋmd tũudmã tʋʋmã. M da getame tɩ noomame! Zu-bʋko, yʋʋmd 1960, tẽngã taoor dãmb yeelame tɩ d yi tẽngã.

Tõnd zakã rãmb tɩ zĩnda Wisita sẽn be Kãnsas sẽn yaa Etazĩni soolmẽ wã. La mam roagdbã ra ket n nonga koɛɛgã mooneg wa b sẽn da wa n yaa misioneer-dãmbã. B sõnga maam ne m kẽem-bi-pugl a Judy la m yao-bi-ribl a Leslie sẽn dog Etiyopi me wã tɩ d wa nong a Zeova la d tũud-a ne d sũy fãa. M deega lisg m sẽn wa n tar yʋʋm piig la a tãabo. Yʋʋm a tãab poore, tõnd zakã rãmb yik n kẽnga zĩig koe-moondbã raab sẽn waoogẽ. Yɩɩ Arekipa sẽn be Peru wã.

Yʋʋmd 1974, m sẽn wa n tar yʋʋm piig la a nii bala, Peru filyallã yãka maam ne saam-biis a naas tɩ d lebg zall so-pakdba. B tʋma tõnd tɩ d tɩ moon zĩig koe-moond baa a ye sẽn zɩ n moone, tɩ yaa tãens soolem. D ra segd n moona neb nins sẽn gomd Kesuwa la Ayimara buud-goamã me. D ra tara mobill b sẽn maneg tɩ neb tõe n gãand a pʋgẽ n togd sore. D ra boond-a lame tɩ Koglgã, a sẽn wõnd koglgã yĩnga. M sã n mi n tẽeg d sẽn da tikd Biiblã n wilgd bab-kãng nebã tɩ ka la bilfu a Zeova na n kɩtame tɩ naongã, bãasã la kũumã sa wã, noom-m-la wʋsgo. (Vẽn. 21:3, 4) B sʋkã neb wʋsg lebga a Zeova Kaset rãmba.

B BOOL-M-LA D BIRU-KÃSENGẼ WÃ

Yʋʋmd 1977 wã, saam-biig a Albert Schroeder sẽn da yaa a Zeova Kaset rãmbã Siglgã taoor lʋɩtb Sull nedã waa Peru. A sẽn wa n be be wã, a sagla maam tɩ m gʋls Betɛllã tʋʋmd demande, sẽn na yɩl tɩ b bool-m tɩ m tɩ tʋm d biru-kãsengẽ wã. M sɩd maana woto. Rẽ poore bilfu, yʋʋmd 1977 sigr kiuug rasem 17 wã, m sɩnga tʋʋm Burkilin Betɛllẽ wã. Yʋʋm a naas nins sẽn pʋglã pʋgẽ, m tʋma ne sẽn yẽesd-b rotã la sẽn get-b rotã yellã.

Yʋʋmd 1978 sigr kiuugã pʋgẽ, m bãnga a Elizabeth Avallone tigis-kãseng sẽn tigim tẽns toɛy-toɛy neb Nuvɛll Orleyã sẽn be Lʋɩziyannã. Yẽ me roagdbã ra tũuda a Zeova ne b sũur fãa wa mam doagdbã. Rẽ t’a Elizabeth yaa wakat fãa so-pakd na maan yʋʋm a naase, n dat n kell n kẽes a meng zãng a Zeova tʋʋmdã pʋgẽ a yõor tɛka. Tigis-kãsengã poore d ra ket n sõsda ne taaba. Pa yã n kaoos la d wa nong taab wʋsg ye. D kẽe kãadem yʋʋmd 1979 zĩ-likr kiuug rasem 20 wã daare. Rẽ poore d naaga taab n tʋm Betɛllẽ wã.

D pipi tiging yɩɩ Brooklyn Spanish. Tigin-kãng saam-biisã la saam-bi-pogsã ra nong-d-la wʋsgo. Rẽ poore d zĩnda tigims a tãab pʋsẽ me. Tigin-kãens saam-biisã la saam-bi-pogsã wilga tõnd b nonglem, la b teel-d tɩ d kell n tʋm Betɛllẽ wã. D sũur nooma ne b sẽn teend tõndã, la d zo-rãmbã ne d zakã rãmb sẽn sõng tõnd n ges d roagdbã yell b kʋʋlem wakatã.

M SƖNGA BIRU NING SẼN GET BƲ-KAOOR YƐL YELLÃ PƲGẼ TƲMBO

Yʋʋmd 1982 yʋʋm-vẽkr kiuugã pʋgẽ, b yeela maam tɩ m tɩ tʋm Betɛllã biru ning sẽn get bʋ-kaoor yɛl yellã pʋgẽ hal tɩ ling-ma. Yʋʋm a tãab poore, b yeela maam tɩ m kẽng inivɛrsite n tɩ karem n lebg avoka. Karengã sasa, m bãngame tɩ Etazĩni la tẽns a taab neb sẽn tar lohorem n tõe n maan bũmb wʋsgã yaa a Zeova Kaset rãmbã sẽn kẽng bʋ-kaoodb taoor n tɩ paam bʋʋm maasem yĩnga. B gomda rẽ yell wʋsg karengã sasa.

Yʋʋmd 1986, b yãka maam tɩ m lebg biru ning sẽn get bʋ-kaoor yɛl yellã yel-gɛta. Rẽ tɩ m tara yʋʋm pis-tã. M sũur da yaa noog b sẽn kõ-m tʋʋm-kãng baa m sẽn da yaa bi-bɩɩgã. La m da yɛɛsdame me, bala bũmb wʋsg la m da pa mi, tɩ tʋʋmdã pa nana me ye.

Mam lebga avoka yʋʋmd 1988. La m da pa mi tɩ karengã toeema mam mengã la boog maam ne a Zeova zoodã pãng ye. Karen-bɛdã tõe n kɩtame tɩ d lebg ned sẽn nong naam, la kɩt tɩ d tagsdẽ tɩ d sãoo neb nins sẽn pa karem wa tõndã. A Elizabeth sõng-m-la wʋsgo. A sõnga maam tɩ m lebs n sɩng bũmb nins m sẽn da maand tɩ paasd maam ne a Zeova zoodã pãng nand tɩ m kẽng inivɛrsite wã maanego. Bilf-bilfu, m le wa n paama zood sõma ne a Zeova. Rẽ sõnga maam tɩ m bãng tɩ bũmb ning sẽn tar yõod n yɩɩdã pa pids f zug ne bãngr ye. Bũmb ning sẽn kɩtd tɩ d vɩɩmã tar bark n yɩɩd yaa d sẽn na n tar zood sõma ne a Zeova, n nong-a la d nong a nin-buiidã.

D GOMDA BƲ-KAOODB TAOOR SẼN NA YƖL N PAAM SOR N MOON KOE-NOOGÃ

Mam sẽn karem n sa wã poore, sẽn da pak maam masã yaa sõng n sigl Betɛllã biru ning sẽn get bʋ-kaoor yɛl yellã sẽn na yɩl tɩ d tõog n gom bʋ-kaoodb taoor n kogl a Zeova nin-buiidã, la sõng tɩ d ket n tar sor n moond koe-noogã. D tʋʋmdã ra yaa noogo, la toog wʋsgo. Bala yɛlã toeemda tao-tao a Zeova siglgã pʋgẽ. Wala makre, tõnd da minim n kõta nebã d sɛbã la d reegd ligdi. La yʋʋmd 1990 wã, b kosa Betɛllã biru ning sẽn get bʋ-kaoor yɛl yellã tɩ b bao n bãng d sẽn tõe n maan to-to n da le maand woto ye. Rẽ tɛka, a Zeova Kaset rãmbã kõta nebã sɛbã n pa le reegd ligd ye. Rẽ booga tʋʋmã Betɛllẽ wã la koɛɛgã mooneg sasa. Hal n tãag rũndã, kɩtame me tɩ d pa yaood lampo-rãmb rẽ wɛɛngẽ ye. Neb kẽer da tagsdame tɩ rẽ na n kɩtame tɩ d pa le paamd ligdi, tɩ koɛɛgã mooneg pãng booge. La pa yɩ woto ye. Rũndã-rũndã, koe-moondbã sõor paasame n yɩɩd b sẽn da yaa to-to yʋʋmd 1990 wã naoor a yiibu. Sẽn paase, ned buud fãa tõe n paama sɛb sẽn tik Biiblã zug n karem n pa yiis ligd ye. M bãnga vẽeneg tɩ d sẽn tõogd n toeemd bõn-kãsems d siglgã pʋgẽ wã yaa ne a Zeova sõngre, la sagls nins d sẽn paamd tʋm-tʋmd sẽn tũud sɩdã nengẽ wã maasem yĩng bala.—Yik. 15:2; Mat. 24:45.

D sẽn paamd bʋʋm bʋ-kaoodb taoorã pa d sẽn tar avoka-rãmb sẽn mi b tʋʋmd yĩng ye. Naoor wʋsgo, bũmb ning sẽn kɩtd tɩ bʋ-kaoodbã la goosneema wã tʋm-tʋmdbã sõngd tõndã yaa a Zeova nin-buiidã manesem-sõngã. Yʋʋmd 1998 wã, bũmb n maan tɩ d yã rẽ vẽenega. Siglgã taoor lʋɩtb sull neb a tãab ne b pagb n kẽng Kuba n tɩ maan tigis-kãsems sẽn yɩ zalle. B sẽn wilg tɩ b yaa nin-bʋgsa, la tɩ b mii neb waoogrã kɩtame tɩ tẽngã taoor dãmb bas b yam tɩ d pa kẽesd d toog politikã yɛlẽ, n yɩɩd bũmb nins fãa d sẽn yeel-b tigissã d maan ne-bã sasa wã.

La wakat ninga, yɩl n toeem yɛlã yaa tɩlɛ tɩ d ‘gom bʋ-kaoodb taoor sẽn na yɩl n paam sor n moon koe-noogã.’ (Fili. 1:7) Wala makre, yʋʋm wʋsg pʋgẽ Erop tẽns kẽer taoor dãmb la Kooredisiid goosneema wã ra pa sak tɩ ned tara sor n tõe n zãgs sodaarã n tʋm tʋʋm a taab ye. Rẽ yɩɩ sabab tɩ b yõg Erop saam-biis na maan tus-piig la a nii, la Kooredisiid saam-biis tus-piig la wɛ la zak n pag bãens roogo, b sẽn kelg b sũur-kasetã n zãgs sodaarã yĩnga.

La yʋʋmd 2011 sẽoog kiuug rasem a 7 wã, Erop bʋ-kaoodbã sull ning sẽn get ninsaalbã dʋrwa-rãmb yellã kaoo bʋʋd a Bayatyan ne Armeni tẽngã taoor dãmb yellã wɛɛngẽ. B yeelame tɩ Erop tẽnsã fãa segd n kõo ned kam fãa sor t’a tõe n zãgs sodaarã a sẽn tẽed bũmb ninsã yĩnga, n tʋm tʋʋmd a to. Rẽ poore yʋʋmd 2018 sigr kiuug rasem 28 wã, Kooredisiid bʋ-kaoodb sull n dɩk no-sɩɩr a woto buudu. Tõnd saam-biis nins sẽn yaa kom-bɩɩsã kẽer sã n da sak n maan tẽngã taoor dãmb sẽn datã, baa yaa bãmb n wãn bala, d ra pa na n paam tɩ Erop bʋ-kaoodbã la Kooredisiid bʋ-kaoodbã rɩk no-sɩɩr a woto ye.

Biru ning sẽn be d biru-kãsengẽ wã n get bʋ-kaoor yɛl yellã la b rãmb nins sẽn be filyall-dãmbẽ wã dũniyã gill zugã tʋmda wʋsgo, sẽn na yɩl tɩ d ket n tar sor n tũud a Zeova la d moond Rĩungã koe-noogã. D getame tɩ d sẽn paam n gomd d tẽed-n-taas nins sẽn be tẽns b sẽn gɩdg d tũudmã pʋsẽ wã yʋʋr yĩngã yaa zu-zẽkre. Baa d sã n kẽng bʋ-kaoodb taoor n pa paam bʋʋm, d paam n kõo kasetã guvɛrneer-dãmb la rĩm-dãmba, n paas buud toɛy-toɛy neba. (Mat. 10:18) D sã n wa na n gom bʋ-kaoodb taoor wall d gʋls-b sebr n wilg tɩ d tara bʋʋm, d wae n paasda Biiblã vɛrse-rãmba. Bʋ-kaoodbã, sẽn gomd-b goosneema wã yʋʋr yĩngã, zʋrnalist-rãmbã la zãma wã fãa segd n tagsa vɛrse-kãens zugu. Pʋ-peelem dãmbã bãngda a Zeova Kaset rãmbã, n bãng tɩ b sẽn tẽed bũmb ninsã tika Biiblã zugu. B sʋkã kẽer lebga tõnd tẽed-n-taase.

D PƲƲSDA A ZEOVA BARKA

Yʋʋm pis-naas la zakã sẽn loogã pʋgẽ, m paam n sõnga filyall-dãmb dũniyã gill zug ne yɛl sẽn tar loees ne laloa wã, la m paam n gom bʋ-kaoodb sul sẽn tar noor n yɩɩd taoore, la nin-kãsems wʋsg taoore. Mam nonga m tʋmd-n-taas nins sẽn tʋmd biru ning sẽn be d biru-kãsengẽ wã n get bʋ-kaoor yɛl yellã la b rãmb nins sẽn be filyall-dãmbẽ wã dũniyã gill zugã, la m nand-ba. Mam neeme t’a Zeova ning-m-la bark wʋsgo, tɩ m vɩɩmã noome.

A Elizabeth teela maam ne a sũur fãa la ne nonglem yʋʋm pis-naas la nu wã sẽn loogã pʋgẽ, noog la toog wakate. Mam nand-a-la wʋsgo, bala a maanda woto fãa baa ne a sẽn bẽed bãag sẽn kɩt t’a pa tar pãng wʋsgã.

M bãnga vẽeneg tɩ pãng la tõogr pa yit tõnd mensã nengẽ ye. Yaa wa a Davɩɩd sẽn yeelã: “A Zeova yaa pãng a nin-buiidã yĩnga.” (Yɩɩn. 28:8) Sɩd-sɩda, “zabrã yaa a Zeova zabre.”