Yãmb ‘zãmsa kɩt tɩ y sẽn tarã sek-y’ bɩ?

1. Kɩt tɩ bũmb nins d sẽn tarã sek-dã rat n yeelame tɩ bõe, la bõe la a pa rat n yeele?

YÃMB yaa ned sẽn kɩtd tɩ bũmb nins a sẽn tarã sekd-a bɩ? Ned sẽn kɩtd tɩ bũmb nins a sẽn tarã sekd-a tara sũ-noog la bãane, bala a tagsda bõn-sõma nins a sẽn tarã yell n yɩɩda. Bũmb nins a sẽn pa tarã pa yikd a sũuri, wall kɩt t’a lebg sũ-to-ned ye. La kɩt tɩ bũmb nins d sẽn tarã sek-dã pa rat n yeel tɩ d pa segd n bao n maneg bũmb d yɛlã sẽn yaa to-to wã wɛɛngẽ ye. Wala makre, kiris-ned sã n modgd sẽn na yɩl n tʋm a Zeova tʋʋmdã n paase pa wẽng ye. (Rom. 12:1; 1 Tɩm. 3:1) La ned sẽn kɩtd tɩ bũmb nins a sẽn tarã sekd-a sã n pa paam tɩ b kõ-a tʋʋmd a sẽn dat a Zeova tʋʋmdã pʋgẽ tao-tao, a pa lebgd sũ-to-ned ye.

2. D sã n pa kɩtdẽ tɩ bũmb nins d sẽn tarã sekd-do, tõe n wa kɩtame tɩ d maan bõe?

² D sã n pa kɩtdẽ tɩ bũmb nins d sẽn tarã sekd-do, tõe n waa ne yelle. Wala makre, neb kẽer sũy sẽn pa noom ne bũmb nins b sẽn tarã kɩtame tɩ b tʋmd wʋsgo, sẽn na yɩl n da bũmb kẽer sẽn pa maneg n yaa tɩlɛ ne-b ye. Zu-bʋko, kiris-neb meng n zu ligd la teed a taab b sẽn date. La b sõorã pa waoog ye. Tõe tɩ b tagsame yaa: ‘Mam segda ne bõn-kãnga,’ pa rẽ bɩ, ‘mam gũume n kaoose,’ wall ‘m na n wa yaoome n lebse.’ La a Zeova kisa wagdem buud fãa, tɩ paoogd a yʋʋrã me. (Yel. 30:9) Sãnda sẽn gũ n kaoos tɩ b pa kõt-b tʋʋmd b sẽn dat a Zeova tʋʋmdã pʋgẽ sãama b sũy wʋsgo, n tolg n bas a Zeova tũubu. (Gal. 6:9) Bõe n tõe n wa kɩt tɩ ned sẽn tũud a Zeova tags bũmb a woto maaneg yell menga? Tõe tɩ yaa a soabã sẽn wa n pa le maand sũ-noog ne bũmb nins a sẽn tarã yĩnga.

3. Bõe la Filip rãmb 4:11, 12 sõngd tõnd tɩ d bãnge?

³ D fãa tõe n zãmsa kɩt tɩ d sẽn tarã sekd-do. Tẽn-tʋmd a Poll yeelame t’a ‘zãmsa kɩt t’a sẽn tarã sek-a, baa a yɛlã sẽn wa n yaa a soaba.’ (Karm-y Filip rãmb 4:11, 12.) Yɩɩ a sẽn wa n be bãens roogẽ la a yeel woto. Baa a sẽn da be bãens roogẽ wã, a ra ket n tara sũ-noogo. A “zãmsa bũmb neb bilf bal sẽn mi,” rat n yeel tɩ kɩt tɩ f sẽn tarã sek-fo. Sã n yaa toog ne-d tɩ d maan sũ-noog ne bũmb nins d sẽn tarã, a Poll sẽn yeel bũmb ningã la a mak-sõngã wilgdame tɩ d tõe n zãmsa kɩt tɩ d sẽn tarã sek-do. La d pa segd n tags tɩ na n yɩɩ nana tɩ d maan sũ-noog ne d yɛlã sẽn yaa to-to wã ye. D segd n zãmsa kɩt tɩ d sẽn tarã sek-do. Wãn to? Sõs-kãngã pʋgẽ, d na n yãa zʋg-sõma a wãn sẽn tõe n sõng-d tɩ d maan sũ-noog ne bũmb nins d sẽn tarã.

MODG-Y N YƖ-Y SÕM-MITA

4. Bõe yĩng tɩ d sã n yaa sõm-mit bɩ na n sõng-d tɩ d maan sũ-noog ne bũmb nins d sẽn tarã? (1 Tesalonik rãmbã 5:18)

⁴ Ned sã n yaa sõm-mita, tõe n sõng-a lame t’a maand sũ-noog ne bũmb nins a sẽn tarã. (Karm-y 1 Tesalonik rãmb 5:18.) Wala makre d sũur sã n yaa noog d sẽn paamd bũmb nins sẽn yaa tɩlɛ ne-dã yĩnga, tõe n kɩtame tɩ d pa tagsd bũmb nins d sẽn dat n yaool n nan pa paamã yell wʋsg ye. D sũur sã n yaa noog ne tʋʋmd ning d sẽn tʋmd rũndã-rũndã a Zeova tʋʋmdã pʋgẽ wã yĩnga, d na n modg n tʋma tʋʋm-kãng sõma, n da bas n baood tʋʋmd a to ne d sũur fãa ye. Rẽnd pa lingr la Gʋls-sõamyã sẽn sagend tõnd tɩ d wae n pʋʋsd a Zeova barkã ye. D sã n yaa sõm-mita, na n sõng-d lame tɩ d paam “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.”—Fili. 4:6, 7.

5. Bõe n da segd n kɩt tɩ Israyɛll nebã maan sũ-noog ne bũmb nins b sẽn tarã? (Ges-y fotã me.)

⁵ D gom bũmb ning sẽn paam Israyɛll nebã yelle. B yẽgma naoor wʋsg ne a Zeova, b sẽn da pa le paamd rɩɩb nins b sẽn da rɩt Ezɩptã yĩnga. (Sõd. 11:4-6) Yaa sɩd tɩ b vɩɩmã ra pa nana we-raoogẽ wã ye. La bõe n da tõe n sõng-b tɩ b maan sũ-noog ne bũmb nins b sẽn tarã? B ra segd n tagsda bõn-sõma nins a Zeova sẽn maan n kõ-bã yelle, n wilg tɩ b sũur yaa noog ne rẽ. B ra segd n tẽegame tɩ b sẽn wa n yaa yembs n be Ezɩpt n namsdẽ wã, a Zeova kɩtame tɩ tood piig paam Ezɩpt nebã. Israyɛll nebã sẽn wa n paam b mens n na n loogã, b “fãa Ezɩpt nebã” n deeg wanzuri, sãnem la futu. (Yik. 12:35, 36) Ezɩpt nebã sẽn wa n pʋgl Israyɛll nebã n tɩ paam-b Mog-miuugã noorã, a Zeova maana yel-solemd n welg koomã tɩ b pasge. Sẽn paase b sẽn wa n be we-raoogẽ wã, a ra kõt-b-la mann daar fãa. La bõe yĩng tɩ Israyɛll nebã ra yẽgemd rɩɩb poorẽ? Baa ne a Zeova sẽn da kõt Israyɛll nebã rɩɩb tɩ sekdẽ wã, b sũur da pa noom ne bũmb ning a sẽn kõt-bã ye. B bas n data bũmb a to.

6. Bõe la d tõe n maan tɩ sõng-d tɩ d yɩ sõm-mita?

⁶ La bõe n tõe n sõng-y tɩ y yɩ sõm-mita? Pipi, baood-y sẽk daar fãa n tagsd bõn-sõma nins y sẽn tarã yelle. Y tõe n baoo sebr n gʋls bũmb a yiib bɩ a tãab sẽn kɩt tɩ y sũur yaa noogo. (Wiis. 3:22, 23) Yiibu, nong-y n pʋʋsd-y barka. Ned sã n maan bũmb n kõ-y bɩ y pʋʋs a soabã barka. La sẽn yɩɩd fãa, pʋʋsd-y-yã a Zeova bark wakat fãa. (Yɩɩn. 75:1) Tãabo, bao-y zo-rãmb sẽn yaa sõm-mitba. D wae n dɩkda d zo-rãmbã togs-n-taare, tɩ b yaa sõm-mitb wall sõm-zɩtba. (Tõo. 1:26-28; 2 Tɩm. 3:1, 2, 5) D sã n minim n pʋʋsd barka, d pa na n tagsd bũmb nins d sẽn pa tarã yell wʋsg ye.

7. Bõe n sõng a Esi t’a lebg sõm-mita?

⁷ D gom bũmb ning sẽn paam saam-bi-poak a Esi sẽn be Ẽndonezi wã yelle. A yeelame: “Koronavirisã bã-loangdgã sasa, m wa n makda m yɛlã sẽn yaa to-to wã ne m tẽed-n-taasã rẽndã. Rẽ kɩtame tɩ m sũur da pa noom ne m sẽn tarã ye.” (Gal. 6:4) Bõe n sõng-a t’a toeem yam? A paasame: “M wa n sɩnga bõn-sõma nins m sẽn paamd daar fãa wã yell tagsgo, la m bʋgsd bõn-sõma nins m sẽn paamde, m sẽn be a Zeova siglgã pʋgẽ wã yĩngã zugu. Rẽ poore, m pʋʋsda a Zeova bark bõn-kãens yĩnga. Rẽ sõnga maam tɩ m maand sũ-noog ne bũmb nins m sẽn tarã masã.” Y sã n wa mik tɩ y sũur pa noom ne bũmb nins y sẽn tarã, yãmb me tõe n maana woto tɩ sõng-y tɩ y yɩ sõm-mita.

YƖ-Y SIK-M-MENG SOABA

8. Bõe n wilgd tɩ wakat n zĩnd t’a Baruk sũur da pa noom ne a yɛlã sẽn yaa to-to wã?

⁸ Wakat n zĩnd t’a Baruk sẽn da yaa no-rɛɛs a Zeremi seb-gʋlsdã sũur da pa noom ne a yɛlã sẽn yaa to-to wã ye. A Baruk ra tara tʋʋmd sẽn pa nana. A ra segd n sõnga a Zeremi tɩ b taas Israyɛll nebã sẽn yaa sõm-zɩtbã koe-beedo. La a Baruk wa n pa le tagsd bũmb ning sẽn tar yõod n yɩɩdã yell ye. A wa n basa a Zeova sẽn da rat t’a maan bũmb ningã yell tagsgo, n tagsd yẽ mengã la bũmb ning a sẽn datã yell wʋsgo. A Zeova kɩtame t’a Zeremi yeel a Baruk yaa: “Fo baooda bõn-kãsems f meng yĩnga. Ra le bao bũmb a woto ye.” (Zer. 45:3-5) Yaa wa a sẽn yeel-a yaa: “Maan sũ-noog ne f yɛlã sẽn yaa to-to rũndã-rũndã wã.” A Baruk saka remsgã, n kell n ta a Zeova yam.

9. Yam-bʋg la d tõe n dɩk 1 Korẽnt rãmb 4:6, 7 pʋgẽ? (Ges-y fot-rãmbã me.)

⁹ Wakat ninga, kiris-ned tõe n tagsdame tɩ b segd n kõ-a-la tʋʋmd ninga. Tõe tɩ yaa a sẽn tar minim wʋsg yĩnga, a sẽn tʋmd ne a sũur fãa wall a sẽn sɩng n tũud a Zeova hal sẽn kaoos yĩnga. La b tõe n basa yẽ n dɩk tʋʋmdã n kõ ned a to. Bõe n tõe n sõng-a t’a ra sãam a sũuri? A tõe n bʋgsa tẽn-tʋmd a Poll goam nins sẽn be 1 Korẽnt rãmb 4:6, 7 wã zugu. (Karm-y-yã.) Tʋʋmd ning fãa b sẽn kõ-do, wall minim ning fãa d sẽn tar yita a Zeova nengẽ. A Zeova pa kõ tõnd bõn-kãens d sẽn são d taabã yĩng ye. Yaa a barkã yĩng la d paam bõn-kãense.—Rom. 12:3, 6; Efɛɛ. 2:8, 9.

10. Bõe la d tõe n maan tɩ sõng-d tɩ d bɩɩs sik-m-menga?

¹⁰ D sã n bʋgs mak-sõng ning a Zeezi sẽn kõ-dã zugu, tõe n sõng-d lame tɩ d bɩɩs sik-m-menga. Tẽeg-y yʋng ning a Zeezi sẽn waas a tẽn-tʋmdbã naoã yelle. Tẽn-tʋmd a Za yeelame: “A Zeezi sẽn da mi [1] tɩ Ba wã ninga bũmb fãa a nugẽ, la [2] t’a yii Wẽnnaam nengẽ, [3] n lebd Wẽnnaam nengẽ wã . . . sɩnga karen-biisã naoã waasgo.” (Zã 13:3-5) A Zeezi ra tõe n tagsame tɩ yaa tẽn-tʋmdbã n da segd n waas yẽ naoã. La a Zeezi sẽn wa n be tẽngã zugã, a pa tol n tags t’a toga ne naar vɩɩm ye. (Luk 9:58) A ra yaa sik-m-meng soaba. A sũur da nooma ne bũmb nins a sẽn tarã. A basa mamsg sẽn zems zãng tõnd yĩnga.—Zã 13:15.

11. Wãn to la sik-m-mengã sõng a Denis t’a sũur yaa noog ne a yɛlã sẽn yaa to-to wã?

¹¹ A Denis sẽn be Peyiba wã makame n na n dɩk a Zeezi togs-n-taar sik-m-mengã wɛɛngẽ, la ra pa nana ye. A yeelame: “B sã n mi n kõ ned tʋʋmd mam sẽn date, m sũurã sãamdame. Bala m tagsdame tɩ maam n da segd ne tʋʋmdã. Sã n wa yaa woto, m baooda sõss sẽn gomd sik-m-mengã yell n karem wall m kelge. JW Library^® aplikasiyõ wã pʋgẽ, m baoo zĩig n ning Biiblã vɛrse kẽer sẽn gomd sik-m-mengã yelle, sẽn na yɩl tɩ m sã n wa rat n lebg n karm-b bɩ m tõe n yã-b nana-nana. Sẽn paase m telesarza sõss kẽer sẽn gomd sik-mengã yell m telefõnnã pʋgẽ n wae n lebgd n kelgdẽ.a M bãngame tɩ bũmb nins fãa d sẽn maandã yaa sẽn na n pẽg a Zeova, pa sẽn na yɩl tɩ nebã pẽg-d ye. A Zeova basa d ned kam fãa t’a maand bũmb a tʋʋmdã pʋgẽ, la yaa yẽ n kɩtd tɩ yãkd nenga.” Y sũur sã n wa sãam b sẽn pa kõ-y tʋʋmd ning yĩnga, bɩ y modg n bɩɩs sik-m-meng n paase. Rẽ na n paasa yãmb ne a Zeova zoodã pãnga, la kɩt tɩ y sũur yɩ noog ne bũmb nins y sẽn tarã.—Zak 4:6, 8.

BƲGSD-Y-YÃ A ZEOVA PƲLEMSÃ ZUGU

12. Bõe la a Zeova pʋlem tɩ watẽ, tɩ tõe n sõng-d tɩ d sũur yɩ noog ne d sẽn tarã? (Ezayi 65:21-25)

¹² D sã n bʋgsd bõn-sõma nins a Zeova sẽn pʋlem tɩ watẽ wã zugu, d sũur na n maneg n yɩɩ noog ne bũmb nins d sẽn tarã. A Ezayi sebrã pʋgẽ, a Zeova wilgame t’a miime tɩ vɩɩmã yaa toog wʋsg rũndã-rũndã, la a pʋlmame me t’a na n wa kɩtame tɩ zu-loeesã fãa sa. (Karm-y Ezayi 65:21-25.) D na n paama zag-neeba, n vɩ ne bãan me. D na n tʋmda tʋʋm sẽn be yamleoogo, la d paamd rɩɩb buud toor-toor tɩ sekdẽ. D pa na n le yɛɛsd yel-beed na wa n paam tõnd wall d kambã ye. (Eza. 32:17, 18; Eze. 34:25) D tõe n basa d yam tɩ pʋlen-kãensã fãa na n pidsame.

13. Zu-loe-bʋs la d tar rũndã-rũndã, la d sã n bʋgsd bõn-sõma nins sẽn watã zugu wãn to la sõngd tõndo?

¹³ Yaa masã meng la d segd n tagsd bõn-sõma nins sẽn watã yell n yɩɩda. Bõe yĩnga? Bala d bee “yaoolem wakatã,” tɩ d fãa tar zu-loees me tɩ kɩt tɩ “vɩɩmã lebg toogo.” (2 Tɩm. 3:1) La a Zeova kõt-d-la saglse, pãng la sõngr ning d sẽn datã daar fãa sẽn na yɩl tɩ d tõog toogo. (Yɩɩn. 145:14) Sẽn paase, d sẽn saagd tɩ manegr n watã sõngd-d-la zu-loees wakate. Tõe tɩ yɩl n tõog n ges y zakã rãmb yell yaa toog wʋsgo. Na n kell n yɩɩ woto wakat fãa bɩ? Ayo! A Zeova pʋlmame tɩ arzãnã pʋgẽ y na n paamda bũmb nins fãa sẽn yaa tɩlɛ ne-yã, la sẽn yɩɩd rẽ menga. (Yɩɩn. 9:18; 72:12-14) Tõe tɩ y bẽeda bãag sẽn tõt saabo, yam-ka-meng bãaga, wall bãag sẽn komsd-y-yã. Y na n kell n namsa woto tɩ saagr kae bɩ? A bada. Bãag wall kũum pa na n zĩnd Wẽnnaam dũni-paalgã pʋgẽ ye. (Vẽn. 21:3, 4) Rẽ sõngda tõnd tɩ d pa sãamd d sũur wall d lebg sũ-to-neda, bũmb nins sẽn namsd tõnd rũndã-rũndã wã yĩng ye. Ned sã n wa maan-d kɛgre, d ned sã n maan kaalem, d sã n wa bẽed bãag wall d maooda ne zu-loɛɛg a to, d tõe n kell n talla sũ-noogo. Bõe yĩnga? Bala baa d yɛlã sẽn yaa kãn-kãe to-to rũndã-rũndã, d miime tɩ d ‘namsgã yaa wakat bilf yĩnga,’ la tɩ ka la bilfu d na n paama yolsg wakat fãa yĩng dũni-paalgã pʋgẽ.—2 Kor. 4:17, 18.

14. Bõe la d tõe n maan n paas d tẽebã pãnga?

¹⁴ Yɩl n tõog n kell n maan sũ-noog ne d sẽn tarã, d segd n tẽeme tɩ manegr n wate. La bõe n tõe n paas d tẽebã pãnga? Bũmb a ye sẽn tõe n sõng tõnd yaa d sẽn na n mamsd d vɩɩmã sẽn na n yɩ to-to arzãnã pʋgẽ. Wala makre, sã n wa yaa toog tɩ d paam ligd n ges d meng yelle, d tõe n mamsa d vɩɩmã sẽn na n yɩ to-to wakat ning ligdi, sam la naong sẽn pa na n le be wã. D sũur sã n sãamd d sẽn dat tʋʋmd a Zeova tʋʋmdã pʋgẽ tɩ b nan pa kõ-d yĩnga, d tõe n bʋgsa d sẽn na n wa zems zãnga, n tũ a Zeova yʋʋm tusa tɩ bõn-kãens pa le tar yõodã zugu. (1 Tɩm. 6:19) Sɩngrẽ wã, tõe n yɩɩ toog tɩ d zʋʋg zu-loeesã n tagsd bõn-sõma nins sẽn watã yelle. La d sã n minim n tagsd bõn-sõma nins a Zeova sẽn pʋlem tõnd tɩ watẽ wã yelle, wat n lebga nana tɩ d ra le tagsd d zu-loeesã yell wʋsg ye.

15. Yam-bʋg la y tõe n dɩk a Kirista goamã pʋgẽ?

¹⁵ D tõe n dɩka yam bũmb ning sẽn paam a Kirista wã pʋgẽ. Yaa a Denis sẽn yaa saam-biig ning yell d sẽn gom tɩ loogã paga. A yeelame: “Mam bẽeda bãag sẽn komsd m gĩinã. Daarã tõr la bala, m gãee m gãagã zugu. M pa tõe n kẽne, n zĩ puus-puus zugu. Toog n tar-m wakat fãa. Sẽn nan pa kaoose, logtor ning sẽn tɩpd maamã yeela maam tɩ m da tẽ tɩ m yĩnsã na n sãoogame ye. La zĩig pʋgẽ m tagsame yaa: ‘A sẽn get beoog-daarã to-to wã yaa toor ne maam.’ M tagsda bõn-sõma nins sẽn watã yelle, tɩ kɩt tɩ m yam gãe bãane. Rũndã-rũndã, m maooda ne zu-loees wʋsgo. La dũni-paalgã pʋgẽ, m na n paama vɩɩm sẽn tar barka.”

“BŨMB PA PAOOGD SẼN ZOET-B YẼ WÃ YE”

16. Bõe n kɩt t’a Davɩɩd tõog n yeel tɩ “bũmb pa paoogd” sẽn zoet-b a Zeova wã?

¹⁶ Baa d sã n maand sũ-noog ne d sẽn tarã, pa na n kɩt tɩ d pa paam zu-loees ye. Tẽeg-y rĩm a Davɩɩd yelle. A kamb a tãab bɩ sẽn yɩɩd rẽ n maan kaalem a nifẽ. Neb n dõd-a t’a maana wẽnga, b zãmb-a lame, yʋʋm wʋsg pʋgẽ me yɩɩ tɩlɛ t’a zoe n solge, rĩm a Sayull sẽn da baood-a n na n kʋ wã yĩnga. Baa ne zu-loeesã, a Davɩɩd sũur da yaa noog ne a yɛlã sẽn yaa to-to wã. A goma a Zeova yell n yeel yaa: “Bũmb pa paoogd sẽn zoet-b yẽ wã ye.” (Yɩɩn. 34:9, 10) Bõe n kɩt t’a tõog n yeel woto? Bala a miime tɩ baa ne a Zeova sẽn pa kɩt t’a gil zu-loeesã, a gesa a yell t’a ra paamd bũmb nins sẽn yaa tɩlɛ ne-a wã wakat fãa. (Yɩɩn. 145:16) Tõnd me tõe n kɩsa sɩd wa a Davɩɩd t’a Zeova na n sõng-d lame tɩ d tõog toog d zu-loeesã fãa pʋgẽ. Baa d yɛlã sẽn yaa to-to fãa, d tõe n paama sũ-noog la bãane.

17. Bõe yĩng tɩ y rat n zãms kɩt tɩ y sẽn tarã sek-yã?

¹⁷ A Zeova ratame tɩ y maan sũ-noog ne y sẽn tarã. (Yɩɩn. 131:1, 2) Bɩ y modgd n zãmsd kɩt tɩ y sẽn tarã sek-yã. Y sã n modg n yɩ sõm-mita, sik-m-meng soab la y tagsd bõn-sõma nins a Zeova sẽn pʋlem-dã yelle, la y paas y tẽebã pãnga, y na n tõog n yeelame yaa: ‘Mam sũur sɩd noomame.’—Yɩɩn. 16:5, 6.