Y tõe n basa y yam tɩ beoog na n yɩɩ neere
Yãmb tagsdame tɩ beoog na n yɩɩ neer bɩ? Neb wʋsg tẽeda manegre, baa b sẽn maood ne zu-loe-kɛgems rũndã-rũndã wã. La rẽ yĩnga y tara bʋʋm n tõe n tẽ tɩ manegr n wat bɩ? N-ye! Biiblã togsda bũmb kẽer tɩ sõngd tõnd tɩ d tõe n tẽ tɩ beoog na n yɩɩ neere.
Bõe la Biiblã yet tɩ wilgdẽ tɩ manegr n wate?
Biiblã sõnga tõnd tɩ d bãng tɩ ãdem-biisã maooda ne zu-loe-kɛgemse. La a wilgdame tɩ zu-loe-kãens ka na n kell n nams tõnd wakat fãa yĩng ye. Ad makr a wãn sẽn wilgd rẽ.
Zu-loɛɛgã: Zagsã kaalem
Biiblã sẽn yete: “Bãmb na n mee rot n zĩnd b pʋsẽ.”—Ezayi 65:21.
Rẽ sẽn na n wa pids to-to: Ned fãa na n wa tara a toor n zaka.
Zu-loɛɛgã: Tʋʋmã kaalem, la naongã
Biiblã sẽn yete: “Mam sẽn yãk b rãmbã na n dɩɩ b nus-tʋʋmã yõod tɩ pidi.”—Ezayi 65:22.
Rẽ sẽn na n wa pids to-to: Neba fãa na n wa paama tʋʋmd sẽn kõt-b sũ-noogo, la sẽn na n naf-ba.
Zu-loɛɛgã: Tɩrlemã kaalem
Biiblã sẽn yete: “Nanambs n na n dɩ naam ne zemsgo.”—Ezayi 32:1.
Rẽ sẽn na n wa pids to-to: B pa na n le wẽg ned baa a ye a buud wall a yĩn-kõbg yĩng ye. Neba fãa na n talla manesem sẽn yaa sõma ne taaba.
Zu-loɛɛgã: Komã
Biiblã sẽn yete: “Kood wʋsg na n zĩnda tẽngã zugu. Tãensã zut na n pida ne koodo.”—Yɩɩn-sõamyã 72:16.
Rẽ sẽn na n wa pids to-to: Neba fãa na n paama rɩɩb wʋsg sẽn kõt laafɩ n dɩtẽ. Ned baa a ye pa na n le gãand pʋ-vɩʋʋgo, bɩ n dɩ tɩ pa sek-a ye.
Zu-loɛɛgã: Nin-kʋʋrã, la nen-kɛglmã
Biiblã sẽn yete: “B ned kam fãa na n zĩi a viyn tɩɩg tẽngre, la a kankang tẽngre, tɩ ned kae n na n kẽes-b rabeem ye.”—Mise 4:4.
Rẽ sẽn na n wa pids to-to: Neba fãa na n zĩi bãan tɩ rabeem pa tar ba, nin-wẽng sẽn pa na n le beẽ n wã yĩnga, la “nin-tɩrsã na n sooga tẽngã.”—Yɩɩn-sõamyã 37:10, 29.
Zu-loɛɛgã: Zabã
Biiblã sẽn yete: “Buud pa na n zẽk sʋʋg n zab ne buud a to, la b kõn le zãms zabr me ye.”—Ezayi 2:4.
Rẽ sẽn na n wa pids to-to: Laafɩ na n zĩnda tẽngã gill zugu. (Yɩɩn-sõamyã 72:7) Ned baa a ye pa na n le sãam a sũur b sẽn kʋ a ned zabr pʋgẽ yĩnga, la ned baa a ye me pa na n le zoe n bas a zak zabr yĩng ye.
Zu-loɛɛgã: Bãasã, la komslmã
Biiblã sẽn yete: “Tẽngã ned baa a ye pa na n yeel t’a ka laafɩ ye.”—Ezayi 33:24.
Rẽ sẽn na n wa pids to-to: Ned baa a ye pa na n le yɩ koamsa, bɩ n le lʋɩ bãag ye. (Ezayi 35:5, 6) Biiblã pʋlmame meng tɩ “kũum pa na n le zĩnd” ye.—Vẽnegre 21:4.
Zu-loɛɛgã: Pemsmã, la weoogã sãoongã
Biiblã sẽn yete: “We-raoogã ne tẽn-koɛɛngã na n kɩdmame. We-rasempʋɩɩgã sẽn yaa tẽn-nabrã na n maana sũ-noog la a pid ne tɩ-puudu.”—Ezayi 35:1.
Rẽ sẽn na n wa pids to-to: Tẽngã gill na n lebga arzãna, tɩ ãdem-biisã vɩɩmd a pʋgẽ wa Wẽnnaam sẽn da rat sɩngrẽ wã.—Sɩngre 2:15; Ezayi 45:18.
Biiblã sẽn yet tɩ beoog na n yɩɩ neerã yaa belgr bɩ?
Y sã n tagsda woto, d wʋmda a võore. La d sagend-y lame tɩ y bao n bãng Biiblã sẽn yet bũmb ning beoog daarã wɛɛngẽ wã. Bõe yĩnga? Bala pʋlems nins sẽn be Biiblã pʋgẽ wã yaa toor fasɩ ne nebã sẽn pʋlemd b taabã bũmb ninsã. Biiblã sẽn pʋlem bũmb ninsã yita Wẽnnaam nengẽ. Bɩ d ges bũmb a wãn sẽn tõe n kɩt tɩ y kɩs sɩd tɩ Biiblã pʋlemsã na n pidsame wã:
Wẽnnaam yaa sɩd soaba. Biiblã yetame tɩ Wẽnnaam “pa tõe n yag ziri” ye. (Tɩte 1:2) Sẽn paase, yaa Wẽnnaam bal n tar tõogo, n tõe n togs bũmb ning sẽn wat beoogo. (Ezayi 46:10) Kibay wʋsg n be Biiblã pʋgẽ n wilgdẽ tɩ Wẽnnaam sẽn yet bũmb ninsã pidsda wakat fãa. Y sã n dat n bãng n paas rẽ wɛɛngẽ bɩ y ges video ning gom-zug sẽn yaa: “Bõe n wilgd tɩ Biiblã yaa Wẽnnaam sebre?”
Wẽnnaam tara tõog n tõe n welg d zu-loeesã. Biiblã yeelame tɩ Wẽnnaam tara tõog n tõe n maan “bũmb ning fãa sẽn noom-a.” (Yɩɩn-sõamyã 135:5, 6) Woto rat n yeelame tɩ bũmb pa be n tõe n gɩdg Wẽnnaam t’a pa pids a pʋlemsã ye. Sẽn paase, Wẽnnaam rat n sõnga tõndo, bala a nonga tõndo.—Zã 3:16.
La tõe tɩ y sokda y meng yaa: ‘Wẽnnaam sã n dat n sõng tõndo, la a tar tõog n tõe n maan rẽ, bõe yĩng t’a bas tɩ d ket n maood ne zu-loees buud toor-toore?’ Y sã n dat n bãng rẽ bɩ y ges video ning gom-zug sẽn yaa: “Bõe yĩng tɩ Wẽnnaam bas tɩ namsgã beẽ?”
Wãn to la pʋlems nins sẽn be Biiblã pʋgẽ wã na n pidsi?
Wẽnnaam na n tũnuga ne a Rĩungã sẽn yaa goosneema sẽn be saasẽ wã n pids a pʋlemsã. A yãka a Zeezi Kirist t’a yaa a Rĩungã Rĩma, la a kõ-a tõog t’a na n ges tẽngã la nebã yelle. A Zeezi sẽn wa n be tẽngã zugã a maaga bãase, a rɩlga neb kom sẽn da tare, a kɩtame tɩ sobg yõke, la a vʋʋg neb sẽn da ki menga. (Mark 4:39; 6:41-44; Luk 4:40; Zã 11:43, 44) A sẽn maan woto wã wilgda a sẽn na n wa maane, a sẽn yaa Wẽnnaam Rĩungã Rĩmã yĩnga.
Sẽn na yɩl n bãng Wẽnnaam Rĩungã sẽn tõe n naf yãmb to-to bɩ y ges video ning gom-zug sẽn yaa: “Wẽnnaam Rĩungã yaa bõe?”
Biiblã sẽn pʋlem bũmb ninsã na n pidsa wakat bʋgo?
Ka la bilfu. Bõe yĩng tɩ yet woto? Bala Biiblã pĩnd n togsa bũmb toor-toor sẽn na n yɩ bãnde, n wilg tɩ Wẽnnaam Rĩungã kolgame. (Luk 21:10, 11) D nee bõn-kãens sẽn maand dũniyã gill zug rũndã-rũndã.
Y sã n dat n bãng rẽ bɩ y karem sõsg ning gom-zug sẽn yaa: “Wakat bʋg la Wẽnnaam Rĩungã na n soog tẽngã gilli?”
Wãn to la pʋlems nins sẽn be Biiblã pʋgẽ wã tõe n sõng yãmb rũndã-rũndã?
Biiblã gʋlsdbã nin-yend goma saagr ning Biiblã sẽn kõt tõndã yelle n yeel tɩ yaa wa “baar tõnd sɩɩsã yĩnga.” (Ebre-rãmbã 6:19) Baar kɩtdame tɩ koom-koglg yals kãn-kãe sob-kẽeng wakate. Woto me, saagr ning Biiblã sẽn kõt beoog daarã wɛɛngẽ wã sõngda tõnd tɩ d maood ne d zu-loeesã rũndã-rũndã. D sẽn saagd tɩ beoog na n yɩɩ neerã tõe n sõng-d lame tɩ d tall sũur pʋgẽ bãane, sũ-noogo, n tagsd neere, la pʋd n paas d yĩnsã laafɩ wã.—1 Tesalonik rãmbã 5:8.