Biiblã goamã kɩtdame tɩ d tẽed manegre

Dũniyã gill zugu, nebã maooda ne zu-loees sẽn wat ne sũ-sãamse, yɩɩre, la toog menga. Yel-kãensã buud zoe n paama yãmb bɩ? Tõe tɩ bãaga, wall y ned kaalem n namsd yãmba. Tõe tɩ y sokda y meng yaa: ‘Vɩɩmã na n wa yɩɩ noog beoog-daar bɩ?’ D paamda sok-kãngã leoor Biiblã pʋgẽ, hal tɩ kengd raoodo.

1. Wãn to la Biiblã goamã kɩtd tɩ d tẽed manegre?

Biiblã wilgda dũniyã sẽn pid ne zu-loeesã võore. A wilgdame me tɩ zu-loe-kãensã na n wa saa ka la bilfu, tɩ yaa koe-noogo. Pʋlems nins sẽn be Biiblã pʋgẽ wã tõe n sõng-y lame “tɩ y tõog n bas y yam tɩ beoog na n yɩɩ neere.” (Karm-y Zeremi 29:11, 12.) B sõngda tõnd tɩ d maood ne d rũndã-rũndã zu-loeesã, tɩ d tar sũ-noog masã menga, la d tar bas-m-yam tɩ d na n wa paama sũ-noog wakat sẽn kõn sa.

2. Biiblã wilgdame tɩ vɩɩmã na n wa yɩɩ wãn to?

Biiblã wilgdame tɩ wakat n wat tɩ “kũum pa na n le zĩndi, sũ-sãanga, yãbr wall toog pa na n le zĩnd ye.” (Karm-y Vẽnegr 21:4.) Zu-loees nins fãa sẽn kɩt tɩ nebã pa le tẽed manegrã na n saame. Wala makre, naongã, yel-kɛgã, bãasã la kũumã. Biiblã wilgdame tɩ ninsaalbã na n wa paam n vɩɩmda arzãnã pʋgẽ wakat sẽn kõn sa, tẽngã zug ka.

3. Bõe n na n sõng-y tɩ y maneg n kɩs sɩd tɩ pʋlems nins sẽn be Biiblã pʋgẽ wã na n sɩd pidsame?

Neb wʋsg saagd n na n wa paama bõn-sõma buud toor-toore, la b pa mi b sã n tõe n kɩsa sɩd tɩ bõn-kãens na n wa pidsame ye. La pʋlems nins sẽn be Biiblã pʋgẽ wã yẽ na n pidsame. D sã n ‘maagd d yĩng n vaeesd Gʋls-sõamyã,’ na n sõng-d lame tɩ d maneg n kɩs sɩd ne Biiblã sẽn yetã. (Tʋʋma 17:11) Y sã n zãms Biiblã, na n sõng-y lame tɩ y bãng y sã n tõe n tẽe bũmb nins Biiblã sẽn yet beoog-daarã wɛɛngẽ wã.

D BAO N BÃNG N PAASE

4. Biiblã pʋgẽ, b pʋlmame tɩ d tõe n wa paam n vɩɩmda wakat sẽn kõn sa, tɩ yell buud kae ye

Ges-y pʋlems nins sẽn be Biiblã pʋgẽ wã. Bʋs n noom yãmb n tɩ yɩɩda, la bõe yĩnga?

Karm-y vɛrse-rãmbã b sẽn gʋls pʋleng fãa sɛɛgã, la y leok sogsgã:

• Yãmb tagsdame tɩ vɛrse-kãensã tõe n sõnga yãmb bɩ? Tõe n sõnga yãmb ne y zakã rãmb la y zo-rãmbã tɩ y tẽ manegr bɩ?

Mams-y wa yãmb sẽn na n be dũni pʋgẽ

5. Pʋlems nins sẽn be Biiblã pʋgẽ wã tõe n kɩtame tɩ y sẽn get yɛlã to-to wã toeeme

VIDEO: M da maoodame n dat tɩ yel-​kɛgã sa (4:07)

• Video wã pʋgẽ, bõe n da namsd a Rafika?

• Baa yel-kɛg nins a sẽn da ne wã sẽn pa sa wã, wãn to la Biiblã sõng-a?

Bũmb nins b sẽn pʋlem Biiblã pʋgẽ beoog vɩɩmã wɛɛngẽ wã tõe n sõng-d lame tɩ d tall raoodo, la d tõog n mao ne d zu-loeesã. Karm-y Yel-bũn 17:22 la Rom dãmb 12:12, tɩ rẽ poor bɩ y leok sogsgã:

• Yãmb tagsdame tɩ pʋlems nins sẽn be Biiblã pʋgẽ wã tõe n manega yãmb vɩɩmã bɩ? Bõe yĩnga?

KƲMSGO

Biiblã pʋgẽ, Wẽnnaam pʋlma bõn-sõma toor-toor sẽn wate, tɩ kɩt tɩ d tẽed manegre, la d tõe n mao ne d zu-loeesã.

Lebg-n-gese

• Bõe yĩng tɩ nebã segd n bãng Wẽnnaam sẽn pʋlem bũmb ninsã?

• Bõe la Biiblã yet beoog vɩɩmã wɛɛngẽ?

• Y sã n tẽed tɩ manegr n wate, wãn to la tõe n sõng-y masã menga?