Politik taoor dãmb n yet tɩ Armagedõ na n waa ka la bilfu: Bõe la Biiblã yet rẽ wɛɛngẽ?

Yʋʋmd 2022 zĩ-likr kiuug rasem 10 sẽn yɩ tẽnẽ daarã yibeoogo, Risi sodaasã loba bõmb-dãmb Ikrɛn tẽns wʋsg pʋsẽ. Yɩɩ b sẽn sãam põ ning sẽn be Risi la Krime sʋkã rasem a yiib sẽn deng rẽ wã n kɩt tɩ Risi rãmbã maan woto. Bilf sẽn deng rẽ, politik taoor dãmb n da yeel tɩ d sã n pa gũusi, Armagedõ na n waame.

• “Hal [Etazĩni perzidã a John] Kennedy ne Kuba misill-dãmbã yellã tɛka, d zɩ n kolg Armagedõ wa sẽn yaa to-to rũndã-rũndã wã ye. . . . Mam pa tagsd tɩ b tõe n loba bõmb nikleyɛɛr zabr sasa tɩ pa baas ne Armagedõ ye.”—Etazĩni perzidã a Joe Biden sẽn yeele, yʋʋmd 2022 zĩ-likr kiuug rasem a 6.

• “Mam tagsdame tɩ rẽ tõe n kɩtame tɩ Armagedõ wa. Dũniyã tõr bee yell pʋgẽ.”—Ikrɛn perzidã a Volodymyr Zelensky sẽn yeele, b sẽn wa n sok-a bũmb ning sẽn na n maane, b sã n lob bõmb nikleyɛɛr zabr sasa wã. BBC News, yʋʋmd 2022 zĩ-likr kiuug rasem a 8.

B sã n lob bõmb nikleyɛɛr zabr sasa, tõe n kɩtame tɩ Armagedõ wa bɩ? Bõe la Biiblã yeta?

Bõmb nikleyɛɛr-dãmbã n na n kɩt tɩ Armagedõ wa bɩ?

Ayo. Yaa vugr bal la d yãt gom-bil ning sẽn yaa “Armagedõ” wã Biiblã pʋgẽ. A bee Vẽnegr 16:16. A pa bilgd zabr sẽn na n zĩnd buud toɛy-toɛy sʋk ye. Yaa zabr sẽn na n zĩnd Wẽnnaam ne “dũniyã gill rĩm-dãmbã” sʋka. (Vẽnegre 16:14) Wẽnnaam na n tũnuga ne Armagedõ zabrã n kɩt tɩ ninsaalbã naamã sa.—Dãniyɛll 2:44.

Sẽn na yɩl n bãng Armagedõ zabrã sẽn na n wa ne bũmb ning tẽngã zugã, bɩ y karem sõsg ning gom-zug sẽn yaa: Armagedõn zabrã yaa bõe?

Tẽns toɛy-toɛyã na n zaba taab ne bõmb nikleyɛɛr-dãmb tɩ sãam dũniyã ne a nebã fãa bɩ?

Ayo. Baa ninsaalbã nanambs sẽn tõe n lob bõmb nikleyɛɛr-dãmb zabr sasa beoog sẽn watã, Wẽnnaam pa na n bas tɩ b sãam tẽngã tõr ye. Ad Biiblã sẽn yete:

• “Tẽngã paada wakat sẽn kõn sa.”—Koɛɛg soaba 1:4.

• “Nin-tɩrsã na n sooga tẽngã. B na n vɩɩmda a zug wakat sẽn kõn sa.”—Yɩɩn-sõamyã 37:29.

La Biiblã sẽn pĩnd n togs bũmb ninsã la yɛl nins sẽn maand rũndã-rũndã wã wilgdame tɩ ka la bilfu, yel-kãsems n na n maan n kɩt tɩ bũmb wʋsg toeem tẽngã zugu. (Matiye 24:3-7; 2 Tɩmote 3:1-5) Y sã n dat n bãng Biiblã sẽn yet bũmb ning beoog-daarã wɛɛngẽ wã, bɩ y kos tɩ d wa zãms-y Biiblã. Pa yaood ligd ye.