Ikrɛn zabrã sẽn sɩngã taa yʋʋmde: Bõe la Biiblã yet tɩ kɩt tɩ d tõe n tẽed manegre?

Yʋʋmd 2023 wao-fugdg kiuugã rasem 24 sẽn yaa Arzũmã n tõkd yʋʋmde, Ikrɛn zabrã sẽn sɩngã. Ne neb kẽere, Ikrɛn ne Risi zabrã sẽn sɩngã tɛka, yaa Ikrɛn ne Risi sodaas na maan bãmb 300 000 n ki, bɩ n pogle, tɩ na maan neb 30 000 sẽn pa sodaas me maan kaalem. La b sõorã tõe n yɩɩga woto.

Bʋko, pa wõnd Ikrɛn ne Risi zabrã na n saa ka la bilf ye.

• “Risi sodaasã sẽn kẽ Ikrɛn n sɩng zabrã taa yʋʋmd la bala. La bũmb pa wilgd vẽeneg tɩ zabrã na n saa ka la bilf ye. Bũmb pa wilgd tɩ Ikrɛn bɩ Risi n na n tõog zabrã ye. Bũmb pa wilgd me tɩ b na n tõog n yẽsa ne taab n kɩt tɩ zabrã sa ye.”—Yaa radio b sẽn boond tɩ NPR (National Public Radio) n yeele, yʋʋmd 2023 wao-fugdg kiuugã rasem 19 wã.

Zab-kãngã n paas zab a taabã sẽn wat ne toog la namsgã kɩtame tɩ neb wʋsg sẽn be dũniyã gill zugã sũy sãame. Bõe la Biiblã yet tɩ kɩt tɩ d tõe n tẽed manegre? Zabã na n wa saame bɩ?

Zabr sẽn na n kɩt tɩ zabã fãa sa

Biiblã gomda zabr yelle. La yaa zabr sẽn na n kɩt tɩ ãdem-biisã paam fãagre, pa sẽn na n sãam-b ye. B boonda zab-kãng tɩ Armagedõ zabrã. Biiblã yetame tɩ yaa “Wẽnnaam Sẽn-tõe-a-fãa wã ra-kãsengã zabrã.” (Vẽnegre 16:14, 16) Ne zab-kãng maasem, Wẽnnaam na n kɩtame tɩ ninsaalbã goosneema-rãmbã sẽn wa ne zab buud toor-toorã pa le zĩnd ye. Y sã n dat n bãng Armagedõ zabrã sẽn na n wa ne laafɩ hakɩɩk to-to wã, bɩ y karem sõss nins sẽn be tẽngrã:

• “Armagedõ zabrã yaa bõe?”

• “Armagedõ yaa kiba-noogo!”