Zabã la zĩigã sẽn wɩngdã kɩtame tɩ rɩɩb paoong lebg toog dũniyã gill zugu—Bõe la Biiblã yet rẽ wɛɛngẽ?

Ikrɛn zabrã, ne zĩigã wɩngrã sẽn wat ne yɛl ninsã kɩtame tɩ rɩɩb paoong lebg toogo. Tẽns nins laogã sẽn pa waoog tɩ yaa toog ne neb wʋsg tɩ b paam rɩɩb tɩ sekã pʋsẽ, maneg n yaa toog n yɩɩda.

• “Zabã, zĩigã sẽn wɩngdã, esãensã ligd sẽn paasdã la yɛl a taab kɩtame tɩ rɩɩbã paoong pa le yaa nana ye.”—A António Guterres sẽn yaa Nasɩyõzĩni wã sekertɛɛr zenerallã n yeele, yʋʋmd 2023 sẽoog kiuugã rasem 17.

• “Risi pa le naag kaool ning b sẽn maan n na n yiisd kood Ikrɛn n kẽngd zĩis a taabã ye. Bãngdbã tagsdame tɩ rẽ na n kɩtame tɩ rɩɩbã paoong maneg n lebg toog dũniyã gill zugu, la tɩ rɩɩbã ligd na n maneg n paasa tẽns nins laogã sẽn pa waoogã pʋsẽ, sẽn yɩɩd fãa Afirikdinoor ne Moyẽnoriyã tẽnsã pʋsẽ.”—Atalayar.com, yʋʋmd 2023 sẽoog kiuugã rasem 23.

Ges-y Biiblã sẽn yet bũmb ning rɩɩbã paoong sẽn lebg toogã la beoog daarã wɛɛngẽ.

Biiblã ra pĩnd n togsame tɩ rɩɩbã paoong na n lebga toogo

• A Zeezi ra pĩnd n yeelame yaa: “Buud na n yika zabr ne buud a to, tɩ rĩung yik zabr ne rĩung a to. Kom . . .na n zĩnda zĩig-zĩiga.”—Matiye 24:7.

• Vẽnegr sebrã sẽn be Biiblã pʋgẽ wã gomda wed-rʋʋdb a naas yelle. Wed-rʋʋdbã sʋka, a ye n makd zabre, tɩ sẽn pʋgda yẽ soabã makd komã. Woto wilgdame tɩ wakat n wat tɩ rɩɩb paoong na n yɩ toogo, t’a ligdã me lebg toog wʋsgo. B yeelame: “Mam yãa wed-mo-sablga, la sẽn da zao-a a zugã ra zãada makdg a nugẽ. Mam wʋma bũmb sẽn wõnd koɛɛg sẽn . . . yeele: ‘Bɩle kilo yaa deniye a ye, la orz kilo a tãab yaa deniye a ye. La ra maan oliiv kaamã ne divẽ wã bũmb ye.’”—Vẽnegre 6:5, 6.

Biiblã sẽn da pĩnd n togs bũmb ning komã wɛɛngẽ wã pidsda rũndã-rũndã sẽn yaa wakat ning Biiblã sẽn boond tɩ “yaoolem wakatã.” (2 Tɩmote 3:1) Y sã n dat n bãng bũmb a taab n paas yaoolem wakatã wɛɛngẽ, la wed-rʋʋdb a naasã Vẽnegr sebrã sẽn gomd b yellã wɛɛngẽ, bɩ y ges video ning gom-zug sẽn yaa: Dũniyã yɛl toeema yʋʋmd 1914 tɛka, la y karem sõsg ning gom-zug sẽn yaa: “Les cavaliers de l’Apocalypse : pourquoi vous y intéresser ?”

Biiblã sẽn tõe n sõng-y to-to

• •Biiblã pʋgẽ, sagls n be be n tõe n sõng-d tɩ d tõog n mao ne zu-loeesã, wala makre, rɩɩbã ligd sẽn paasdã, la baa rɩɩbã kaalmã. Rẽ wɛɛngẽ, y tõe n paama sagls sõsg ning gom-zug sẽn yaa: “Comment vivre avec moins” wã pʋgẽ.

• Biiblã leb n sõngda tõnd tɩ d bãng tɩ manegr n wate. A wilgdame tɩ wakat n wat tɩ ‘tẽngã na n pid ne bɩle wʋsgo,’ la tɩ ned kam fãa na n paamda rɩɩb n dɩtẽ tɩ sekdẽ. (Yɩɩn-sõamyã 72:16) Y sã n dat n bãng Biiblã sẽn yet bũmb ning beoog-daarã wɛɛngẽ, la bũmb ning sẽn kɩt tɩ y tõe n tẽ rẽ wã, bɩ y karem sõsg ning gom-zug sẽn yaa: “Une espérance réelle pour des jours meilleurs.”