Ikrɛn zabrã kɩtame tɩ rɩɩb paoong lebg toog dũniyã gill zugu

Yʋʋmd 2022 sig-noy kiuugã rasem 19 wã, dũniyã nin-kãsems sẽn yɩɩd bãmb 75 taasa ONU wã sull ning sẽn get yõ-koglgã yellã (Conseil de sécurité des Nations unies) koɛɛga, n wilg tɩ koronaviriisã bã-longdgã, ne zĩigã sẽn wɩngdã, n paas Ikrɛn zabrã kɩtame tɩ rɩɩb paoong lebg toogo, hal tɩ rẽ na n wa ne kom tẽns kẽer pʋsẽ dũniyã gill zugu. Rẽ poor bilfu, zʋrnall a ye (The Economist) pʋgẽ, b wilgame tɩ yɛlã zoe n pa nana dũniyã gill zugu, la tɩ neb wʋsg la komã na n maneg n namse, Ikɛn zabrã yĩnga. Biiblã ra reng n togsame tɩ kom na n zĩnda tõnd wakatã. La a kõo sagls sẽn tõe n sõng-d tɩ d tõog n mao ne zu-loe-kãnga.

Biiblã ra pĩnd n togsame tɩ kom na n zĩndame

• A Zeezi ra pĩnd n yeelame: “Buud na n yika zabr ne buud a to, tɩ rĩung me yik zabr ne rĩung a to. Kom . . . na n zĩnda zĩig-zĩiga.”—Matiye 24:7.

• Vẽnegr sebrã sẽn be Biiblã pʋgẽ wã gomda wed-rʋʋdb a naas yelle. Wed-rʋʋdbã sʋka, a ye n makd zabre, tɩ sẽn pʋgda yẽ soabã makd komã. Woto wilgdame tɩ wakat n wat tɩ rɩɩb paoong na n yɩ toogo, t’a ligdã me lebg toog wʋsgo. B yeelame: “Mam yãa wed-mo-sablga, la sẽn da zao-a a zugã ra zãada makdg a nugẽ. Mam wʋma bũmb sẽn wõnd koɛɛg sẽn . . . yeele: ‘Bɩle kilo yaa deniye a ye, la orz kilo a tãab yaa deniye a ye. La ra maan oliiv kaamã ne divẽ wã bũmb ye.’”—Vẽnegre 6:5, 6.

Biiblã sẽn da pĩnd n togs bũmb ning komã wɛɛngẽ wã pidsda rũndã-rũndã, sẽn yaa wakat ning Biiblã sẽn boond tɩ “yaoolem wakatã.” (2 Tɩmote 3:1) Y sã n dat n bãng bũmb a taab n paas yaoolem wakatã wɛɛngẽ, la wed-rʋʋdb a naasã Vẽnegr sebrã sẽn gomd b yellã wɛɛngẽ, bɩ y ges video ning gom-zug sẽn yaa: Dũniyã yɛl toeema yʋʋmd 1914 tɛka, la y karem sõsg ning gom-zug sẽn yaa: “Les cavaliers de l’Apocalypse : pourquoi vous y intéresser ?”

Biiblã sẽn tõe n sõng-y to-to

• Biiblã pʋgẽ, sagls n be be n tõe n sõng-d tɩ d tõog n mao ne zu-loeesã, wala makre, rɩɩbã ligd sẽn paasdã, la baa rɩɩbã kaalmã. Rẽ wɛɛngẽ, y tõe n paama sagls sõsg ning gom-zug sẽn yaa: “Comment vivre avec moins” wã pʋgẽ.

• Biiblã leb n sõngda tõnd tɩ d bãng tɩ manegr n wate. A wilgdame tɩ wakat n wat tɩ ‘tẽngã na n pid ne bɩle wʋsgo,’ la tɩ ned kam fãa na n paada rɩɩb n dɩtẽ tɩ sekdẽ. (Yɩɩn-sõamyã 72:16) Y sã n dat n bãng Biiblã sẽn yet bũmb ning beoog-daarã wɛɛngẽ, la bũmb ning sẽn kɩt tɩ y tõe n tẽ rẽ wã, bɩ y karem sõsg ning gom-zug sẽn yaa: “Une espérance réelle pour des jours meilleurs.”