Bõe yĩng tɩ ninsaalbã pa tõogdẽ tɩ laafɩ zĩnd b sʋka?—Bõe la Biiblã yet rẽ wɛɛngẽ?

Dũniyã nanambsã la sigls toor-toorã pa tõogd tɩ laafɩ zĩnd ninsaalbã sʋk ye. Dũni gill zabr a yiib-n-soabã tɛka, zabã maneg n paama pãng rũndã-rũndã n yɩɩd pĩndã. Sẽn ta neb milyaar a yiibu, rat n yeel tɩ b sã n pʋɩ dũniyã gill nebã zĩis a naase, babg a ye neb fãa n vɩ zĩis zab sẽn beẽ.

Bõe yĩng tɩ ninsaalbã pa tõogd tɩ laafɩ beẽ? Bõe la Biiblã yet rẽ wɛɛngẽ?

Bũmb a tãab sẽn kɩt tɩ ninsaalbã pa tõe tɩ laafɩ zĩndi

1. 1. Neb wʋsg tara yel-manesem sẽn kɩt tɩ b pa makd meng n na n bao tɩ laafɩ zĩnd bãmb ne b taabã sʋk ye. Biiblã ra pĩnd n togsame tɩ tõnd wakatã, “nebã na n yɩɩ beed dãmba, neb sẽn nong ligdi, wuk-m-mens rãmba, waoog-m-mens rãmba, . . . neb sẽn pa maand sɩda, . . . neb sẽn pa baood laafɩ, . . . neb sẽn pa tar yõk-m-menga, nen-kɛglem dãmba, . . . tʋb-pa-wʋmdba, neb sẽn pid ne wuk-m-menga.”—2 Tɩmote 3:2-4.

2. 2. Ninsaalbã sẽn naag taaba, la b ned kam fãa yembr-yembr pa tõe n welg b zu-loeesã tɩ pa tũ ne Wẽnnaam a Zeova sẽn yaa d Naandã sõngr ye.a Biiblã yeelame tɩ “ninsaal sẽn kẽnd pa tõe n wilg a meng sor ye.”—Zeremi 10:23.

3. 3. Dũniyã gill bee a Sʋɩtãan munaafɩɩkã sẽn yaa naab sẽn tar pãng la a yaa wẽnem soabã nugẽ. Yẽ la “soab ning sẽn kẽesd dũniyã fãa moogã.” (Vẽnegre 12:9) Sẽn mik tɩ “dũniyã tõr bee wẽng soabã nugẽ” wã, zabã la namsgã pa tõe n pa zĩnd ye.—1 Zã 5:19.

Ãnd soab n tõe n kɩt tɩ laafɩ zĩndi?

Biiblã wilgda vẽeneg tɩ pa ninsaal n tõe n kɩt tɩ laafɩ zĩndi, la tɩ yaa Wẽnnaam bala.

• “‘Bala mam mii magb ning mam sẽn magd yãmb wɛɛngẽ wã sõma.’ Yaa a Zeova n yeele. ‘Mam dat n kɩtame tɩ y zĩnd bãane. Pa yel-beed la m dat tɩ y paam ye. Yaa sẽn na yɩl tɩ y tõog n bas y yam tɩ beoog na n yɩɩ neere.’”—Zeremi 29:11.

Wãn to la Wẽnnaam na n pids pʋlen-kãnga? “Wẽnnaam sẽn kõt laafɩ wã na n bedsa a Sʋɩtãan.” (Rom dãmbã 16:20) Wẽnnaam na n tũnuga ne goosneema sẽn be saasẽ, tɩ Biiblã boond-a tɩ “Wẽnnaam Rĩungã,” n kɩt tɩ laafɩ zĩnd dũniyã gill zugu. (Luk 4:4) A Zeezi Kirist sẽn yaa Rĩun-kãng rĩmã sã n wa sɩng a naamã rɩɩbo, ninsaalbã na n zãmsa b sẽn tõe n vɩɩmd ne laafɩ to-to.—Ezayi 9:6, 7.

• Y sã n dat n bãng n paase, bɩ y karem sõsg ning gom-zug sẽn yaa “Bõe la Wẽnnaam Rĩungã na n maane?”