Tõnd segd n ninga Wẽnnaam taal d sẽn namsdã yĩng bɩ?

Biiblã sẽn yete

Biiblã leokda vẽeneg tɩ ayo! A Zeova pa naan ninsaalbã n dat tɩ b nams ye. La d pipi yaab a Ãdem ne a Hawa tõdgame tɩ Wẽnnaam kõn yɩ b naaba, n bao n na n lugl b toorẽ noy sõma ne wẽngã wɛɛngẽ. B zãaga b mens ne Wẽnnaam, tɩ rẽ kɩt tɩ b namse.

Rũndã-rũndã, b kɩɩsgã kɩtame tɩ tõnd me namsdẽ. La Wẽnnaam zɩ tʋlg tɩ ninsaalbã nams baa bilf ye.

Biiblã yetame: “Bɩ ned baa a yembr sẽn paam makr da yeel tɩ yaa Wẽnnaam n makd yẽnda ye. Bala, wẽng ka tõe n mak Wẽnnaam, la bãmb mengã ka makd ned baa a yembr ye.” (Zak 1:13) Ned buud fãa namsdame, baa neb nins sẽn tat Wẽnnaam yamã.