Bõe yĩng tɩ yãmb pa maand Pakã?

Neb wʋsg sẽn yete

Goam sẽn pa sɩda: Yaa a Zeova Kaset rãmbã sẽn pa kiris-nebã n kɩt tɩ b pa maand Pakã.

Sɩdã: Tõnd tẽedame t’a Zeezi Kiris n yaa tõnd fãagdã, d maanda d sẽn tõe fãa n ‘tũud bãmb naoã.’—1 Pɩyɛɛr 2:21; Luk 2:11.

Goam sẽn pa sɩda: Yãmb pa tẽed t’a Zeezi ki n vʋʋgame ye.

Sɩdã: Tõnd tẽedame t’a Zeezi vʋʋgame. Tõnd kɩsa sɩd tɩ kiris-nebã tẽeb yẽbga a Zeezi vʋʋgrã zugu, tɩ d moond koɛɛgã n wilgd nebã rẽ.—1 Korẽnt-rãmbã 15:3, 4, 12-15.

Goam sẽn pa sɩda: Yãmb kambã sẽn pa na n paam n noog-b sũy Pakã daarã pa pak yãmb ye.

Sɩdã: Tõnd nonga d kambã. D maagda d yĩng n zãmsd-ba, la d sõngd-b tɩ b paamd sũ-noogo.—Tit 2:4.

Bõe yĩng t’a Zeova Kaset rãmbã pa maand Pakã?

• Pakã pa tik Biiblã ye.

• A Zeezi yeelame tɩ d tẽegd a kũumã yelle. A pa yeel tɩ d tẽegd a vʋʋgrã ye. Yʋʋmd fãa, tõnd tẽegda a Zeezi kũumã yell nisãn kiuug rasem 14.—Luk 22:19, 20.

• Tõnd kɩsa sɩd tɩ Pakã sẽn tik rog-n-migs pĩnd neb sẽn da maand n kot rogmã, kɩtame t’a pa ta Wẽnnaam daab ye. Wẽnnaam datame tɩ d tũ yẽ a ye bala. A sũur pa noom ne tũudum sẽn naagd rog-n-migs yɛl sẽn pa tat a raab ye.—Yikri 20:5; 1 Rĩm-dãmbã 18:21.

Tõnd tẽedame tɩ d sẽn yãk yam n pa maand Pakã zemsa ne Biiblã sẽn yetã. Biiblã sagend-d lame tɩ d tall “yam ne bãngr neere,” la d ra tũud ninsaalbã minund ye. (Yel-bũnã 3:21; Matye 15:3) Ned sã n sok-d sokr Pakã wɛɛngẽ, d wilgd-a-la d sẽn tẽede. D leb n miime tɩ bee ne ned fãa t’a maan a sẽn date.—1 Pɩyɛɛr 3:15.