Zãmsg 11
Tẽeb la tũudum yel-maandɩ Wẽnnaam sẽn kisi
Tẽeb la tũudum yel-maandɩ bʋs buud n pa sõma? (1)
Kiris-nebã segd n tẽeme tɩ Wẽnnaam yaa Tãablem bɩ? (2)
Bõe yĩng tɩ kiris-neb hakɩkã ka maand Nowɛlle, Paka, bɩ rogem daar tẽegr kibs rãmba? (3, 4)
Sẽn ki-bã tõe n maana sẽn vɩ-bã wẽng bɩ? (5)
A Zezi kii pik zug bɩ? (6)
Tara yõod tɩ d ta Wẽnnaam yam bɩ? (7)
1. Pa tẽeb la tũudum yel-maandɩ wã fãa n yaa wẽns ye. La sã n mik tɩ b yita ziri tũudmẽ wã bɩ b kɩɩsda Biiblã, b pa tat Wẽnnaam yam ye.—Matɩe 15:6.
2. Tãablmã: Rẽ yĩnga a Zeova yaa Tãablem, sẽn dat n yeel tɩ mens a tãab Wẽnnaam bɩ? Ayo! Ba wã sẽn yaa a Zeova wã n yaa Wẽnnaam sɩd-sɩd sẽn-ka-to. (Zã 17:3; Mark 12:29) A Zezi n yaa a Biribl kãsenga, la a sakda Wẽnnaam. (1 Korẽnt dãmba 11:3) Ba wã yaa kãseng n yɩɩd biigã. (Zã 14:28) Vʋʋsem sõngã pa ned ye, yaa Wẽnnaam pãngã a sẽn tar n tʋmdẽ wã.—Sɩngre 1:2; Tʋʋma 2:18.
3. Nowɛllã la Pakã: A Zezi pa rog yʋʋm-sar kiuug rasem 25 daar ye. A roga zĩ-likr kiuug pipi raarã sẽnẽ, yʋʋmdã sasa ning pe-kɩɩmbã sẽn da paad yɩng ne b piisã yʋndã. (Luk 2:8-12) A Zezi zɩ n kõ kiris-nebã noor tɩ b maan a rogmã kibs ye. La a yeela a karen-biisã tɩ b tẽegd a kũumã yelle. (Luk 22:19, 20) Nowɛllã ne a yel-maandɩ wã yii kʋdemd wẽndẽ ziri tũudmã pʋgẽ. Pakã me ne a yel-maandɩ wã, wala makre, gɛlã ne soomsã b sẽn togsd n maandẽ wã me yita be. Pipi kiris-nebã ra pa maand Nowɛll bɩ Pak ye. Rũndã-rũndã kiris-neb hakɩkã me pa maand-b ye.
4. Rogem daar tẽegr kibs rãmbã: Rogem daar tẽegr kibs rãmb a yiib bal yell la Biiblã gomda, la yɩɩ neb sẽn da pa balemd a Zeova n maan kibs kãense. (Sɩngre 40:20-22; Mark 6:21, 22, 24-27) Pipi kiris-nebã ra pa maand rogem daar tẽegr kibs rãmb ye. Rogem daar tẽegr kibs rãmbã yita kʋdemd wẽndẽ ziri tũudmã pʋgẽ. Kiris-neb hakɩkã kõta taab kũun la b segd taab n kokd pemsem yʋʋmdã pʋgẽ sasa a taaba.
5. Sẽn ki-bã rabeem zoeese: Sẽn ki-bã pa le tõe n maan baa fʋɩ, b pa le mi baa fʋɩ. Tõnd pa tõe n sõng-ba, bãmb me pa tõe n sõng tõndo, bɩ n maan-d wẽng ye. (Yɩɩl Sõamyã 146:4; Koɛɛg Soaba 9:5, 10) Sɩɩg kiidame, a pa ket n vɩ kũum poor ye. (Ezekɩɛll 18:4, NW) La wakat ninga, malɛg-wẽns b sẽn boond tɩ zĩn dãmb n maand b mens wa b yaa sẽn ki-bã. D pa segd n balem wall d zoe sẽn ki-bã ye.—Ezai 8:19.
6. Pikã: A Zezi pa ki pik zug ye. A kii ra-luk bɩ raoog zugu. Gɛrk gom-biig ning b sẽn lebg Biibl dãmb wʋsg pʋsẽ tɩ “pikã” võor yaa raoog bala. Pikã yita kʋdemd wẽndẽ ziri tũudum pʋsẽ. Pipi kiris-nebã pa tall pik b Wẽnnaam balengã pʋgẽ ye. Woto yĩnga, yãmb tagsdame tɩ zemsame tɩ d tall pik n balem Wẽnnaam bɩ?—Tõodo 7:26; 1 Korẽnt dãmba 10:14.
7. Tẽeb la tũudum yel-maandɩ kãensã kẽer basg tõe n yɩɩ toog wʋsg ne-yã. Tõe tɩ y roagdb la y zo-rãmb mak n na n kɩt tɩ y ra toeem y sẽn tẽed bũmb ninsã ye. La y sẽn na n noog Wẽnnaam sũur n tar yõod n yɩɩd y sẽn na n noog ninsaalbã sũyã.—Yelbũna 29:25; Matɩe 10:36, 37.
[Foto, seb-neng 22]
Wẽnnaam pa Mens a tãab Wẽnnaam ye
[Foto, seb-neng 23]
Nowɛllã ne Pakã yita kʋdemd wẽndẽ ziri tũudum pʋsẽ
[Foto, seb-neng 23]
D pa tar bʋʋm baa a yembr n na n balem sẽn ki-bã bɩ n zoe-b ye