Kũum vʋʋgrã yaa bõe?

Biiblã sẽn yete

Biiblã pʋgẽ, gom-bil ning b sẽn lebg tɩ “kũum vʋʋgrã” yita Gɛrk gom-bil sẽn yaa anastasis pʋgẽ. A võorã yaa “yikri,” pa rẽ bɩ “yik n yals yɛsa.” Ned sẽn vʋʋg yikame n yi kũ-rãmb sʋka, n le vɩ n yaa wa a sẽn da yaa to-to pĩndã.—1 Korẽnt rãmbã 15:12, 13.

Baa ne gom-bil ning sẽn yaa “kũum vʋʋgrã” sẽn pa be Biiblã babg ning b sẽn da gʋls ne Ebre wã tɩ b wae n boondẽ tɩ Kãab-kʋdgã pʋgẽ wã, b gomda kũum vʋʋgr yell beenẽ. Wala makre, Wẽnnaam tũnuga ne no-rɛɛs a Ooze n pʋlem yaa: “Mam na n fãaga mam nin-buiidã Yaoogã pãngẽ. M na n yiis-b-la kũumẽ.”—Ooze 13:14; Zoob 14:13-15; Ezayi 26:19; Dãniyɛll 12:2, 13.

Yɛ la sẽn ki-bã na n vʋʋge? Neb kẽer na n vʋʋgame n tɩ vɩɩmd saasẽ, n naag Kiristã n dɩ naam. (2 Korẽnt rãmbã 5:1; Vẽnegre 5:9, 10) Biiblã boonda rẽ tɩ “pipi kũum vʋʋgrã,” la “dẽenem kũum vʋʋgrã.” Woto wilgdame tɩ vʋʋgr a to n be. (Vẽnegre 20:6; Filip rãmbã 3:11) Kũum vʋʋgr a to wã yaa sẽn na n vɩɩmd tẽngã zugu. Yaa rẽ la sẽn na n vʋʋg-bã wʋsg na n paame.—Yɩɩn-sõamyã 37:29.

Wãn to la sẽn ki-bã na n vʋʋge? Wẽnnaam kõo a Zeezi tõog t’a tõe n vʋʋg sẽn ki-bã. (Zã 11:25) A Zeezi na n vʋʋga “sẽn be-b yaad pʋsẽ wã fãa,” tɩ b ned kam fãa yɩ wa a sẽn da yaa to-to wã. A na n vʋʋg-a-la ne zʋg nins a sẽn da tarã la a pʋ-tẽerã. (Zã 5:28, 29) Neb nins sẽn na n vʋʋg n tɩ vɩɩmd saasẽ wã na n lebga wa malɛgse, tɩ sẽn na n vɩɩmd-b tẽngã zugã paam yĩng sẽn tar laafɩ sõma.—Ezayi 33:24; 35:5, 6; 1 Korẽnt rãmbã 15:42-44, 50.

Ãnd dãmb n na n vʋʋge? Biiblã yeelame tɩ “Wẽnnaam na n vʋʋga nin-tɩrsã ne sẽn pa-b nin-tɩrsã me.” (Tʋʋma 24:15) Nin-tɩrsã yaa neb nins sẽn maan sɩd ne Wẽnnaamã. Wala makre, a Nowe, a Saara la a Abrahaam. (Sɩngre 6:9; Ebre-rãmbã 11:11; Zak 2:21) Sẽn pa-b nin-tɩrsã yaa neb sẽn pa tũ Wẽnnaam noyã, b sẽn pa paam segb n bãng no-kãens yĩnga.

La neb nins sẽn maand wẽng wʋsg ne yamleoog n pa rat n toeemã pa na n vʋʋg ye. Ned a woto sã n maan kaalem, a sãama wakat fãa yĩnga, n pa na n tol n vʋʋg ye.—Matiye 23:33; Ebre-rãmbã 10:26, 27.

Wakat bʋg la sẽn ki-bã na n vʋʋge? Biiblã pĩnd n togsame tɩ neb nins sẽn na n vʋʋg n kẽng saasẽ wã vʋʋgrã na n yɩɩ Kirist waoongã wakate. Wakat kãng sɩnga yʋʋmd 1914. (1 Korẽnt rãmbã 15:21-23) Neb nins sẽn na n vɩɩmd tẽngã zugã vʋʋgrã na n yɩɩ a Zeezi Kirist naamã sẽn na n kaoos yʋʋm tusrã sasa, wakat ning b sẽn na n maneg tẽngã t’a wa lebg arzãnã.—Luk 23:43; Vẽnegre 20:6, 12, 13.

Bõe yĩng tɩ d tõe n tẽ tɩ kũum na n vʋʋgame? Biiblã gomda neb a wɛ vʋʋgr yelle, tɩ neb maan kaset ne rẽ. (1 Rĩm-dãmbã 17:17-24; 2 Rĩm-dãmbã 4:32-37; 13:20, 21; Luk 7:11-17; 8:40-56; Zã 11:38-44; Tʋʋma 9:36-42; 20:7-12; 1 Korẽnt rãmbã 15:3-6) A Zeezi sẽn vʋʋg a Lazaarã sɩd yɩɩ bõn-kãsenga, bala a Lazaar da maana kaalem tɩ kaoos rasem a naase. Sẽn paase, yɩɩ neb kʋʋng taoor la a Zeezi maan yel-solemdã. (Zã 11:39, 42) Baa neb nins sẽn da kis a Zeezi wã ra pa tõe n kɩɩs tɩ yel-solemdã pa zĩnd ye. Rẽ n so tɩ b bao n na n kʋ a Zeezi ne a Lazaar fãa.—Zã 11:47, 53; 12:9-11.

Biiblã wilgdame tɩ Wẽnnaam tõe n vʋʋga neb nins sẽn ki wã, la t’a rat n maana rẽ. A pʋ-tẽerã sẽn ka koakã yĩnga, a tẽra bũmb fãa neb nins a sẽn na n vʋʋgã zugu, n na n wa tũnug ne a pãn-kãsengã n vʋʋg-ba. (Zoob 37:23; Matiye 10:30; Luk 20:37, 38) Wẽnnaam tõe n vʋʋga neb nins sẽn ki wã, la a rata rẽ! Kũum vʋʋgrã sẽn watã wɛɛngẽ, Biiblã goma Wẽnnaam yell n yeel yaa: “Yãmb na n yãgdame n dat n yã y nusã tʋʋmde.”—Zoob 14:15.

Tags-kɛg neb kẽer sẽn tar kũum vʋʋgrã wɛɛngẽ

Tags-kɛgre: Kũum vʋʋgrã yaa sɩɩgã sẽn na n le wa kẽ yĩngẽ wã.

Sɩdã: Biiblã yetame tɩ sɩɩgã yaa ninsaalã tõre, la pa bũmb sẽn be ninsaal pʋgẽ n ket n vɩ a kũum poor ye. (Sɩngre 2:7, notã; Ezekɩyɛll 18:4) B sã n na n vʋʋg neda, b pa kɩtd t’a sɩɩgã le wa kẽ a yĩngẽ wã ye. B lebgd n naan-a lame t’a yaa sɩ-vɩɩga.

Tags-kɛgre: B na n vʋʋga neb kẽer n lebg n sãam-ba.

Sɩdã: Biiblã yetame tɩ “sẽn tʋm-b tʋʋm-wẽnsã na n vʋʋga bʋʋd yĩnga.” (Zã 5:29) La bʋʋdã pa na n tik bũmb nins b sẽn maan nand tɩ b ki wã zug ye. Na n tika bũmb nins b sẽn na n maan b vʋʋgrã poorã zugu. A Zeezi yeelame yaa: “Sẽn ki-bã na n wʋma Wẽnnaam Biigã koɛɛga, la sẽn kelg-b neerã na n vɩɩmdame.” (Zã 5:25) Neb nins sẽn na n ‘kelg neer’ bɩ n sak bũmb nins b sẽn na n zãms b vʋʋgrã poorã na n paamame tɩ b gʋls b yʋyã “vɩɩm seb-pindmã” pʋgẽ.—Vẽnegre 20:12, 13.

Tags-kɛgre: B sã n vʋʋg neda, yaa ne yĩng ning a sẽn da tar nand t’a ki wã.

Sɩdã: Ned kũum poore, a yĩngã põogdame t’a lebg tẽng tom.—Koɛɛg soaba 3:19, 20.