SOGSG KOM-BƖƖSÃ SẼN SOKDE
Bũmb fãa waa woto bal bɩ, bɩ Wẽnnaam n naane?—Babg a 2: Bõe yĩng tɩ d segd n bao n bãng evolisiyõ sã n sɩd zĩndame?
A Alex yamã yuusdame. A ra sɩng n tẽedame tɩ Wẽnnaam beeme, la tɩ yẽ n naan bũmb fãa. La rũndã, karen-saambã wilgame tɩ evolisiyõ wã yaa bũmb sẽn yaa sɩda, la tɩ bãngdbã maana vaeesg n yã kaset sẽn wilgd rẽ. A Alex pa rat n kɩɩs karen-saambã goamã, tɩ b wa getẽ t’a ka yam ye. A yeela a sũurẽ yaa: ‘Bãngdbã sã n maana vaeesg n yã kaset sẽn wilgd tɩ evolisiyõ wã yaa sɩda, maam la ãnda n na n kɩɩse?’
Woto buud zoe n paama foo bɩ? Tõe tɩ hal f yãadmẽ, f tẽeda bũmb ning Biiblã sẽn yetã. A yetame: “Wẽnnaam naana saasã la tẽngã.” (Sɩngre 1:1) La tõe tɩ sẽn nan pa kaoose, neb n bao n na n kɩt tɩ f tẽ tɩ b sẽn yeel tɩ Wẽnnaam n naan bũmb fãa wã yaa soalma, la tɩ evolisiyõ wã la sɩda. Fo segd n tẽe b sẽn yetã bɩ? Bõe yĩng tɩ d segd n bao n bãng evolisiyõ sã n sɩd zĩndame?
Bʋʋm a yiib sẽn kɩt tɩ d segd n bao n bãng evolisiyõ sã n sɩd zĩndame
Siãnsã bãngdb kẽer pa kɩs sɩd ne evolisiyõ wã ye. Baa ne bãngdbã sẽn dɩk yʋʋm wʋsg n maan vaeesg evolisiyõ wã wɛɛngẽ wã, b nan pa yã bũmb b fãa sẽn tõe n tik n sak n deeg tɩ evolisiyõ wã yaa sɩd ye.
Tags n gese: Siãnsã bãngdb fãa sã n pa wʋmd taab evolisiyõ wã wɛɛngẽ, tɩ yaool n yaa bãmb n tar minim rẽ wɛɛngẽ, fo me pa segd n sok f meng b sẽn yetã sã n tara võor sɩda?—Yɩɩn-sõamyã 10:4.
Bũmb ning fo sẽn tẽedã tara yõodo. Bi-bɩɩg a ye yʋʋr sẽn boond t’a Zachary yeelame: “Sã n mikame tɩ vɩɩmã wa n bee woto bala, dẽnd tõnd vɩɩmã, la bũmb nins fãa sẽn be ãndũniyã pa tar yõod ye.” A sẽn togsã yaa gõaag zugu. Baasg zãnga, sã n mik tɩ evolisiyõ wã yaa sɩda, dẽnd vɩɩmã ka võor ye. (1 Korẽnt rãmbã 15:32) La sã n yaa Wẽnnaam n naan bũmb fãa, d tõe n paama sogsg nins d sẽn sokd d mens vɩɩmã wɛɛngẽ, la d beoogã wɛɛngẽ wã leoore.—Zeremi 29:11.
Tags n gese: Fo sã n bãng sɩdã evolisiyõ wã la naanegã wɛɛngẽ, wãn to la tõe n naf foom?—Ebre-rãmbã 11:1.
Sogsg f sẽn tog n sok f menga
NEB KẼER SẼN YETE: ‘Yaa bõn-kẽeng n pusgi, tɩ yɩ sabab tɩ ãndũniyã bũmb fãa wa beẽ.’
Yaa ãnda, bɩ bõe n kɩt tɩ bõn-kẽengã pusgi?
Bʋg la sɩda: B sẽn yeel tɩ bũmb fãa wa n bee woto tɩ pa tũ ne Naand sababã bɩ, bɩ b sẽn yet tɩ Naand n naan bũmb fãa wã la sɩda?
NEB KẼER SẼN YETE: ‘Yaa rũmsã n tall toeeng hal n wa lebg ninsaalba.’
Sã n yaa rũmsã n tall toeeng n wa lebg ninsaalba, wala makre sã n yaa wãamsã n lebg ninsaalba, bõe yĩng tɩ ninsaalbã yamã la b bãngrã yɩɩd wãamsã hal zĩig sẽn zãre?a
Bõe yĩng tɩ baa bõn-vɩɩs nins sẽn yaa kɩds n yɩɩdã vɩɩmã sẽn yaa to-to wã yaa yel-solemde?b
NEB KẼER SẼN YETE: ‘Sẽn tẽed-b evolisiyõ wã tara tikri.’
Ned sã n yeel woto, yẽ mengã maana vaeesg n yã bũmb sẽn wilgd tɩ evolisiyõ wã tara tikr bɩ?
Neb a wãn n tẽed evolisiyõ wã, b sẽn wʋm bal tɩ b yeel tɩ neb nins fãa sẽn tar bãngrã tẽeda rẽ wã yĩnga?
a Neb kẽer yetame tɩ ninsaalbã bãngr sẽn yɩɩd wãamsã, yaa ninsaalbã kalkõtã bedrem sẽn yɩɩd wãamsã rẽndã yĩnga. La sẽn na yɩl n bãng bũmb ning sẽn kɩt tɩ d pa tõe n tẽ rẽ wã, bɩ y ges Cinq questions à se poser sur l’origine de la vie borsiirã seb-neng 28.