Wẽnnaam tũnuga ne evolisiyõ wã n naan bõn-vɩɩs toor-toorã bɩ?

Biiblã sẽn yete

Ayo. Biiblã pʋgẽ, b wilga vẽeneg tɩ Wẽnnaam naana ninsaalbã n paas rũms la tɩɩs ne mood “buud” toor-toore. (Sɩngre 1:12, 21, 25, 27; Vẽnegre 4:11) B yeelame tɩ ninsaalbã fãa yita d yaab a Ãdem ne a Awa pendẽ. (Sɩngre 3:20; 4:1) Biiblã sẽn yet bũmb ningã pa wilgd tɩ Wẽnnaam tũnuga ne evolisiyõ wã n kɩt tɩ bõn-vɩɩs buud toor-toorã wa beẽ ye. La bũmb pa be Biiblã pʋgẽ n kɩɩsd siãnsã bãngdb sẽn yet tɩ bõn-naands buk fãa pʋgẽ, buud toor-toor n be wã ye.

Wẽnnaam tũnuga ne evolisiyõ wã bɩ?

Neb nins sẽn tẽed tɩ Wẽnnaam tũnuga ne evolisiyõ wã n naan bõn-vɩɩsã sẽn bilgd sẽn yɩ to-to wã yaa toor-toore. Sebr a yembr (Encyclopædia Britannica) yeelame tɩ neb kẽer tagsdame tɩ bũmb a ye Wẽnnaam sẽn tũnug ne n kɩt tɩ tɩɩsã ne bõn-vɩɩsã lebg b sẽn yaa to-to wã yaa tɩ tɩɩg wall rũng sã n be zĩig sẽn zems ne-a, a tõogd n vɩɩme la a fɩɩgdẽ.”

Ad tagsa a taab sãnda sẽn tare:

Bõn-vɩɩsã buk fãa talla yaab-yɛng sẽn zĩnd hal sẽn kaoose.
Bõn-vɩɩg tõe n toeemda bilf-bilf n wa lebg bõn-vɩɩg buud a to. Wala makre, wõaamsã tõe n toeemda bilf-bilf n wa lebg ninsaalba.
Yaa Wẽnnaam n kɩtd tɩ bõn-vɩɩsã tar toeeng woto.

Sẽn tẽed-b evolisiyõ wã sẽn yet bũmb ningã zemsa ne Biiblã sẽn yetã bɩ?

Sẽn tẽed-b tɩ Wẽnnaam tũnuga ne evolisiyõ wã n naan bõn-vɩɩsã sẽn yet bũmb ningã rat n yeelame tɩ Sɩngr sebrã sẽn be Biiblã pʋgẽ wã sẽn bilg naanegã sẽn yɩ to-to wã pa sɩd zãng ye. La a Zeezi sẽn gom Sɩngr sebrã sẽn yeel bũmb ningã yell to-to wã wilgdame tɩ sɩd yɩɩ woto. (Sɩngre 1:26, 27; 2:18-24; Matiye 19:4-6) Biiblã yeelame tɩ nand t’a Zeezi wa tẽngã zugu, a ra bee saasẽ ne Wẽnnaam, la t’a sõnga Wẽnnaam tɩ b naan “bũmba fãa.” (Zã 1:3) Rẽnd b sã n yeel tɩ Wẽnnaam tũnuga ne evolisiyõ wã n kɩt tɩ bõn-vɩɩs toor-toorã wa beẽ, pa zems ne Biiblã sẽn yetã ye.

Tɩɩs la rũms kẽer sẽn mi n toeem sẽn na yɩl n tõog n vɩɩmd zĩig ning b sẽn be wã yaa evolisiyõ bɩ?

Biiblã pa bilg bõn-vɩɩsã buk fãa sẽn tõe n toeem to-to ye. A pa yeel me tɩ rũmsã la tɩɩsã buud toor-toorã Wẽnnaam sẽn naanã pa tõe n toeem b sã n wa fɩɩgdẽ wall sẽn na yɩl n tõog n vɩɩmde, yɛlã sã n wa toeem zĩig ning b sẽn be wã ye. Baa neb kẽer sẽn get rẽ wa evolisiyõ wã, sɩd-sɩda, b pa toeemd n lebg bõn-vɩɩg wall tɩɩg buk a to ye.