Yaa tɩlɛ tɩ d yãk tũudum n kẽ bɩ?

Biiblã sẽn yete

N-ye. Bala Wẽnnaam datame tɩ nebã tigim taab n waoog yẽ. Biiblã yetame: “Bɩ d tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma. Bɩ d ra bas taab tiging . . . ye.”—Ebre-rãmbã 10:24, 25.

A Zeezi ra yeela bũmb sẽn wilgd t’a karen-biisã na n naaga taab tũudum a ye pʋgẽ. A yeelame: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:35) Kiristã karen-biis sẽn tõe n maan n wilg tɩ b nonga taab yaa b sẽn na n tigimd ne b tẽed-n-taasã. B tog n sigla sul-sula, n tigimd taab n waoogd Wẽnnaam, n pa vaandẽ ye. (1 Korẽnt rãmbã 16:19) A Zeezi karen-biisã fãa sẽn be dũniyã zugã yaa saam-biisi, wa zag-yɛng neba.—1 Pɩyɛɛr 2:17.

Yãk tũudum n kẽ bal pa sek ye

Yaa sɩd tɩ Biiblã wilgdame tɩ nebã tog n tigimda taab n waoogd Wẽnnaam. La a pa yet tɩ ned sã n yãk tũudum n kẽ bala, a tata Wẽnnaam yam ye. Ned sã n dat n ta Wẽnnaam yam, a sẽn be tũudum ning pʋgẽ wã tog n kɩtdame t’a manegd a vɩɩmã tɩ lebgd sõma daar fãa. Wala makre, Biiblã yetame: “Ad wẽn-tũudum ning sẽn yaa yɩlemde, la sẽn pa tar rẽok tõnd Wẽnnaamã sẽn yaa d Ba me wã nifẽ: Yaa f ges kɩɩbs la pʋg-kõap nins sẽn be toog pʋgẽ wã yelle, la f kell n da bas tɩ dũniyã rẽgm-f ye.”—Zak 1:27.