Wẽnnaam bee zĩig fãa bɩ?
Biiblã sẽn yete
Wẽnnaam tõe n yãa bũmb fãa, la a maan a sẽn date, zĩig ning fãa a sẽn date. (Yel-bũnã 15:3; Ebre-rãmbã 4:13) La Biiblã pa yet tɩ Wẽnnaam bee zĩig fãa bɩ t’a bee bũmb fãa pʋgẽ ye. A wilgdame tɩ Wẽnnaam sɩd beeme, la a wilgd a sẽn be zĩig ninga.
Wẽnnaam sẽn yaa to-to: Wẽnnaam yaa sɩɩga. (Zã 4:24) Ninsaalbã pa tõe n yã-a ye. (Zã 1:18) Neb sẽn yã Wẽnnaam vẽnegr pʋgẽ tɩ b gʋls Biiblã pʋgẽ wilgame tɩ Wẽnnaam bee zĩig takɩ. B pa tol n yeel bũmb tɩ wõnd Wẽnnaam bee zĩig fãa ye.—Ezayi 6:1, 2; Vẽnegre 4:2, 3, 8.
Wẽnnaam sẽn beẽ wã: Wẽnnaam bee zĩig ninsaalb sẽn pa tõe n vɩɩmde. A bee saasẽ, la a tara zĩig takɩ be. (1 Rĩm-dãmbã 8:30) Biiblã yeelame tɩ wakat n zĩnd tɩ malɛgsã seg taab ‘a Zeova taoore,’a tɩ wilgdẽ tɩ Wẽnnaam sẽn beẽ wã yaa zĩig takɩ.—Zoob 1:6.
Wẽnnaam sã n pa be zĩig fãa, a sɩd tõe n gesa mam yell bɩ?
N-ye. Wẽnnaam geta tõnd ned kam fãa yelle. Baa Wẽnnaam sẽn be saasẽ wã, a nee neb nins fãa sẽn be tẽngã zug n dat ne b sũur fãa n ta a yamã, la a get b yelle. (1 Rĩm-dãmbã 8:39; 2 Kibayã 16:9) Ges-y-yã a Zeova sẽn maande, n sõngd neb nins sẽn tũud-a ne b sũy fãa wã:
B sã n wa pʋʋsdẽ: B sã n pʋʋsdẽ, a Zeova kelgda bũmb ning fãa b sẽn yetã.—2 Kibayã 18:31.
B sũurã sã n wa sãame: ‘A Zeova pẽe sũ-sãang rãmbã, la b fãagda sũ-pa-noaang rãmbã.’—Yɩɩn-sõamyã 34:19.
B sã n wa pa mi y sẽn na n maane: A Zeova na n tũnuga ne a Gomdã sẽn yaa Biiblã ‘n zãms bãmb, la a wilg bãmb sor ning b sẽn tog n tũ’ wã.—Yɩɩn-sõamyã 32:8.
Tagsa sẽn pa zemse
Tagsg sẽn pa zemse: Wẽnnaam bee bũmb nins fãa a sẽn naanã pʋgẽ.
Sẽn yaa sɩdã: Wẽnnaam pa be tẽngã zug bɩ zĩig ninsaalb sẽn tõe n kẽngẽ ye. (1 Rĩm-dãmbã 8:27) Yaa sɩd tɩ ãdsã ne bõn-naands a taabã “moonda Wẽnnaam ziirã.” (Yɩɩn-sõamyã 19:2) La wa yagd sẽn pa be bũmb nins a sẽn yagã pʋgẽ wã, Wẽnnaam me pa be bũmb nins a sẽn naanã pʋgẽ ye. Bũmb nins yagdã sẽn yagã tõe n sõnga tõnd tɩ d bãng a sẽn yaa ned ning buudu. Woto me, bũmb nins tõnd sẽn ne wã sõngda tõnd tɩ d bãng Naandã, wala makre, a pãngã, a yamã la a nonglmã.—Rom dãmbã 1:20.
Tagsg sẽn pa zemse: Wẽnnaam sã n pa be zĩig fãa, a pa tõe n bãng bũmb fãa, la a wilg a pãng sẽn ka to wã me ye.
Sẽn yaa sɩdã: Wẽnnaam vʋʋsem sõngã yaa a pãngã a sẽn tʋʋmd ne wã. Ne vʋʋsem sõngã maasem, a tõe n yãa bũmb fãa, la a maan bũmb fãa, sẽn yaa zĩig ning fãa, la wakat ning fãa. Pa baood t’a mengã zĩnd be ye.—Yɩɩn-sõamyã 139:7.
Tagsg sẽn pa zemse: Yɩɩn-sõamyã 139:8 wã wilgdame tɩ Wẽnnaam bee zĩig fãa. Be b yeelame: “Baa mam sã n dʋ saasẽ, yãmb bee beenẽ. Ba mam sã n tɩʋ m gãagã kɩɩm-kulgu, yãmb leb n bee be.”
Sẽn yaa sɩdã: Vɛrse kãngã pa gomd Wẽnnaam sẽn beẽ wã yell ye. Wilgdame bal tɩ zĩig kae t’a zãrmã kɩt tɩ Wẽnnaam pa tõe n sõng-d ye.
a Biiblã wilgdame tɩ Wẽnnaam tara yʋʋre. A yʋʋrã la a Zeova.