SOGSG KOM-BƖƖSÃ SẼN SOKDE
M zoa sã n sãam m sũuri, m maanda wãna?
F sẽn segd n bao n bãnge
Zood kae sẽn zems zãng ye. Ninsaalbã pa zems zãng ye. Rẽ kɩtame tɩ baa f zoa meng-mengã tõe n wa maana bũmb bɩ n yeel bũmb sẽn na n sãam f sũuri. La bãng tɩ fo me pa zems zãng ye. Fo pa sak n deeg tɩ wakat ninga fo me maana bũmb sẽn sãam ned sũur sɩda?—Zak 3:2.
Ẽntɛrnetã. Bi-bɩɩg yʋʋr sẽn boond t’a Davɩɩd yeelame: “F sã n kẽ réseaux sociaux pʋgẽ n yãnd f zoa fot-rãmb a sẽn yõk soaare sasa, f sokda f meng bõe yĩng t’a pa ẽnvit foo. Rẽ tõe n sãama f sũur wʋsgo.”
F zoa sã n sãam f sũuri, gom ne-a.
F sẽn tõe n maane
Fees f menga. Biiblã yeelame: “Ra sak tɩ f sũur yik tao-tao ye. Bala, sũ-yikr paada yalembã pʋsẽ.”—Koɛɛg soaba 7:9.
A Alyssa yeelame tɩ “wakat ninga, bũmb ning sẽn kɩt tɩ f sũurã yikã pa tolg n yaa yell meng ye.”
Tagse: Rẽ yĩnga, bũmb kɩdg fãa tɩ f sũurã yikame bɩ? F pa tõe n mi n bas taale, f taabã sã n tudg sɩda?—Koɛɛg soaba 7:21, 22.
Tags sugrã sẽn wat ne nafa ninsã yelle. Ad Biiblã sẽn yete: “Sẽn tar-a yam . . . zu-zẽkrã yaa a sẽn basd b sẽn beeg yẽnda wã taalã.”—Yel-bũnã 19:11.
A Mallory yeelame: “Yell ning pʋgẽ, baa f sã n tar bʋʋm, yɩta sõma tɩ f sak n kõ sugri. Sak n kõ sugrã rat n yeelame tɩ f ra tẽegd a soabã sẽn maanã, tɩ yaa tɩlɛ t’a kot foo sugr wakat fãa ye. F sã n kõ sugri, bas tɩ sa.”
Tagse: Bũmb ning sẽn maanã sɩd yaa yell bɩ? Rẽ yĩnga, f pa tõe n sak n kõ sugr tɩ laafɩ ket y sʋk sɩda?—Koloos-rãmbã 3:13.
Zood pʋgẽ, d sã nnong n tẽegd mo-yõs sẽn zĩndi, yaa wa d sẽn pak roog n bas tɩ waood kẽedẽ.
Tags f to wã yelle. Biiblã yetame: “Bɩ yãmb ned kam fãa ra ges a meng sõngr yell bal ye, la bɩ a ges neb a taabã sõngr yell me.”—Filip-rãmbã 2:4.
A Nicole yeelame: “Zo-rãmb sã n nong taab la b waoogd taaba, kɩtdame tɩ b welgd yɛlã tao-tao, bala b modga sẽn na yɩl tɩ b zoodã paam pãnga. Rẽ kɩtame tɩ b pa rat tɩ b zoodã sãam ye.”
Tagse: F sã n maag f yĩng tagse, f pa mikd tɩ f zoa wã gomd ninga, bɩ bũmb a sẽn maan seka pẽgr sɩda?—Filip-rãmbã 2:3.
Ad bũmb f sẽn tog n tẽege: Ned sã n bao n bãng a sẽn na n welg yẽ ne a zo-rãmbã yɛl to-to, a sã n wa lebg kãsma na n sõng-a lame. Bɩ f ges f sẽn tõe n maan dẽ to-to, masã menga.