SOGSG KOM-BƖƖSÃ SẼN SOKDE
M maanda wãn tɩ m roagdbã kɩs-m sɩda?
Fo sẽn segd n bãnge
Yaa f sã n wilg tɩ f yaa ned b sẽn tõe n teeg la b na n kɩs-f sɩda. Roagdbã noyã sakr yaa wa samd f sẽn tog n yao. Fo tog n saka f roagdbã. Ned sã n nong n yaood a sama, a sã n wa rat n penge, b na n sakame. Woto me, f sã n nong n sakd f roagdbã, f sã n wa kos sor n na n maan bũmbu, b na n sakame. La f sã n yaa ned b sẽn pa tõe n teege, f roagdbã pa na n kõt-f sor tɩ f maand bũmb kẽer ye. Rẽ pa tog n ling-f ye.
F sã n dat tɩ f roagdbã kɩs-f sɩda, baooda modgre. F sã n wilg tɩ f yaa ned b sẽn tõe n teege, la tɩ f tara yam, f roagdbã na n basd-f lame tɩ f maand f sẽn datã n yɩɩda.
AD KIBARE: A Craig yeelame: “M sẽn wa n yaa bi-bɩɩgã, m da mii m roagdbã sẽn dat tɩ m maanã takɩ. Dẽnd m da maanda wa b sẽn datã, la m soosdẽ me n maand m sẽn datã. Ra kɩtame tɩ yaa toog tɩ m roagdbã kɩs-m sɩda. Tarẽ-n-tarẽ, m wa n bãnga bũmbu. Pa m sẽn na n soosd n maand m sẽn datã la m roagdbã na n kõt-m sor tɩ m maand bũmb kẽer ye. M da tog n yɩɩ ned b sẽn tõe n teege, sẽn na yɩl tɩ b kɩs-m sɩda.”
F sẽn tõe n maane
Togsd sɩda, baa sã n wa yaa toogo. Ned buud fãa kongdame. La f sã n bao n na n solg f kongre, bɩ n yagd ziri, na n kɩtame tɩ f roagdbã pa le kɩs-f sɩd ye. F sã n yaool n modgd n togsd sɩd wakat fãa, la f sakd n deegd f kongre, f roagdbã na n yãame tɩ f yaa ned sẽn bɩ. Yaa ned a woto buud la b tõe n teege.
A Anna yeelame: “Baa f sã n kongdẽ, pa rẽ n na n kɩt tɩ f roagdbã pa kɩs-f sɩd wakat fãa ye. Yaa f sẽn na n baood n solg f kongrã.”
Biiblã yetame: “D . . . dat n zã d mens ne pʋ-peelem bũmb fãa pʋgẽ.”—Ebre-rãmbã 13:18.
Tags n gese: F roagdbã sã n sok foo f sẽn debde, bɩ f sẽn na n maan bũmb ninga, f togsd-b-la sɩda bɩ? B sã n sok foo f sẽn da beẽ, la f sẽn da maande, f solgda bũmb kẽer n pa togs bɩ?
Yɩ ned b sẽn tõe n teege. Sak noy nins b sẽn gãneg zakã pʋgã. Tʋmd zakã tʋʋm nins b sẽn kõt foo wã. Yɩ ned sẽn tũud lɛɛrã sõma. Maand ɛgzɛrsɩs-rãmbã karen-saambã sẽn kõtã. Lebgd n wat lɛɛr ning b sẽn yãk n kõ-fã.
A Ryan yeelame: “F roagdbã sã n sak tɩ f tũ f zo-rãmb n yi, la b yeel-f tɩ f lebg n wa yʋng wakat a wɛ, ra wa yʋng wakat piig sẽn loog minit pis-tã ye. Sã n pa rẽ, nindaare b pa na n sak n kõ-f sor tɩ f yi ne f zo-rãmbã ye.”
Biiblã yetame: “Ned kam fãa na n tʋka a meng zɩɩbo.”—Galat rãmbã 6:5.
Tags n gese: Fo tũuda lɛɛrã b sẽn yãk n kõ-fã bɩ? Fo tʋmda zakã tʋʋmã, la f tũud noy nins b sẽn gãnegã, baa noy nins sẽn pa noom foo wã bɩ?
Tall sũ-mare. Fo sã n maan bũmb sẽn kɩt tɩ f roagdbã pa le kɩs foo sɩda, f tog n modgdame n wa paam tɩ b le kɩs-f sɩda. Tall sũ-mare.
A Rachel yeelame: “M roagdbã sã n da zãgs tɩ b pa na n kõ-m sor tɩ m maan bũmb kẽere, tɩ m yaool n da getẽ tɩ m yʋʋmã taame, ra zabda maam. M da pa mi tɩ pa ned yʋʋm sẽn paasd yĩng la a paamd yam ye. M kosa m roagdbã tɩ b kõ-m sor tɩ m wilg-b tɩ m yaa ned b sẽn tõe n teege. Sɩngrẽ wã, pa yɩ nana ne-m ye. La m wa n tõogame. M bãngame tɩ pa ned yʋʋm sẽn waoog yĩng la b tõe n teeg-a ye. Yaa a tʋʋmã yĩnga.”
Biiblã yetame: “Makd-y y mens n get y sẽn yaa neb nins buudu.”—2 Korẽnt rãmbã 13:5.
Tags n gese: F sã n dat tɩ f roagdbã kɩs-f sɩda, bõe la f tõe n maan n wilg f sẽn sɩd yaa ned ninga?
AD YAM: Yãk f sẽn dat n maanega. Tõe tɩ yaa lɛɛrã tũub wɛɛngẽ, zakã tʋʋm wɛɛngẽ, noy nins b sẽn gãneg zakã pʋgẽ wã tũubu, bɩ bũmb a to wɛɛngẽ. Togs f roagdbã f sẽn yãk yam n na n maanã, la f kos-b tɩ b togs b sẽn dat tɩ f maan n paam tɩ b kɩs-f sɩda. Rẽ poore, modg n tũ Biiblã saglgã. A yeelame: ‘Yeeg nin-kʋdgã sẽn yaa fo pĩnd yel-manesmã.’ (Efɛɛz rãmbã 4:22) Bilf-bilfã, f roagdbã na n yãame tɩ f modgdame.