SOGSG KOM-BƖƖSÃ SẼN SOKDE
Bõe yĩng tɩ m roagdbã pa basd maam tɩ m noogd m yõore?
F zo-rãmb n bool foo tɩ f wa soaare wɩkɛnnã. Fo kosa f roagdbã sor n na n kẽnge, tɩ b yeel vẽeneg tɩ pa tõe ye. Rẽ pa ling foo ye. Bala yaa woto la b yeel nindaarẽ.
Ad bũmb kẽer yell d sẽn na n gom sõs-kãngã pʋgẽ:
Bõe yĩng tɩ m roagdbã zãgsd wakat fãa?
F sã n getẽ tɩ f sã n kos f roagdbã sor n na n maan bũmbu b zãgsdame, f tõe n tagsame tɩ b pa rat tɩ f noog f yõor ye.
Bi-pugl a ye yʋʋr sẽn boond t’a Marie tagsg yɩɩ woto a sẽn wa n paam a pipi portaablã. A yeelame yaa: “M baaba kõo maam noy wʋsg m sẽn tõe n telesarz aplikasiyõ-rãmb ninsã wɛɛngẽ, m sẽn tõe n sõs ne neb ninsi, la m sẽn tõe n sõs ne-b n ta lɛɛr ninga. Mam zo-rãmbã yaool n tara sor n maand b sẽn dat fãa.”
Tags n gese: Rẽ yĩnga a Marie ba wã sɩd ra pa rat t’a noog a yõor bɩ? Tõe t’a ba wã ra maanda yɩɩr bõe wɛɛngẽ?
Noy nins b sẽn gãneg sorã zug kẽnã wɛɛngẽ wã kɩtame tɩ f pa tõe n kẽn wa f sẽn dat ye. La kogend-f lame tɩ f ra paam zu-loɛɛg ye. Yaa woto me ne noy nins roagdbã sẽn lugundã
Y sẽn tõe n mak n gese: Mams tɩ f yaa roagda, n tar bi-bɩɩg sẽn nan paam portaable. Bõe wɛɛngẽ la f na n maan yɩɩre? No-bʋs la f na n kõ-a sẽn na yɩl n kogl-a? A sã n yeel tɩ f pa rat t’a noog a yõore, f na n yeel-a lame tɩ bõe?
“M baaba yeta maam wakat fãa tɩ m ning m meng a zĩigẽ. M sẽn maan woto wã sõnga maam tɩ m bãng a noyã yõodo, la bũmb ning sẽn kɩt t’a kõ-m no-kãensã. M tagsdame tɩ m sã n da tar kamba, m da na n datame tɩ b maan bũmb ning m baaba sẽn dat tɩ m maanã.”—A Tanya.
M na n maana a wãn n paam tɩ m roagdbã sake?
“F sã n gomd n tãsdẽ pa na n maneg yellã ye. Sẽn paase, foo ne f roagdbã moor pa na n le noom ne taab ye. F sã n wẽed no-koɛɛma, f roagdbã na n getame tɩ f ket n yaa yãaga, la tɩ f pa segd ne lohorem wʋsg ye.”—A Richard.
“Mam roagdbã sẽn kõt maam noy ninsã yaa m neer yĩnga. B pa baood n na n gɩdg-m tɩ m da noog m yõor ye. B ratame bal tɩ m sẽn na n noog m yõor to-to wã yɩ sõma, la ra wa ne zu-loees ye.”—A Ivy.
Biiblã saglga: “Yalem sũur sã n yiki, a yiisda sẽn be a sũurẽ wã zãnga, la yam soab tõogda a menga.”—Yel-bũnã 29:11.
“M da mi n tallda m telefõnnã n maan bũmb nins m baaba sẽn yeel tɩ m da maanã. M solgd n toonda m zo-rãmbã mesaaz-rãmb yʋn-sʋka, bɩ n telesarz aplikasiyõ-rãmb m baaba sẽn yeel tɩ m da telesarz ye. La wakat fãa a wat n bãngame n maneg n keng noyã, a sẽn pa le kɩs-m sɩdã yĩnga. Noyã kɩɩsg zɩ n yɩ sõma baa bilf ye.”—A Marie.
“Tall sũ-mare. Tõe n kaoosame tɩ f roagdbã yaool n wa toeem b noyã. La b sã n neẽ tɩ f sakda noy nins b sẽn gãnegã, b tõe n kõ-f-la lohorem n paase.”—A Melinda.
Biiblã saglga: “Sakd-y y ba-rãmbã la y ma-rãmbã bũmb fãa pʋgẽ.”—Kolos rãmbã 3:20.
“F sã n pẽdgd f roagdbã n pa satẽ, pa na n naf foo wall kɩt tɩ f paam bũmb ning f sẽn datã ye.”—A Natalie.
“F roagdbã ratame tɩ f wilg tɩ f tara yam-sõngo. Rẽ n so tɩ m sã n wa sõsd ne m roagdbã, m modgdame tɩ m sẽn yetã tik bʋʋm-tɩrg zugu, la pa sẽn noom maamã zug ye. M sã n maan woto, nong n yãkda nenga.”—A Joseph.
Biiblã saglga: “Waoog f ba la f ma.”—Efɛɛz rãmbã 6:2.