BIIBLÃ VƐRSE-RÃMB B SẼN BILG A VÕORE
Sɩngre 1:26: “Bɩ d maan ninsaal n wõneg d mense”
“Rẽ poore, Wẽnnaam yeelame: ‘Bɩ d maan ninsaal n wõneg d mense, t’a yɩ wa tõndo. La bɩ a soog zĩmã sẽn be mogrã pʋgẽ wã, bõn-yɩgdɩ wã sẽn yɩgd yĩngrã, yir dũmsã, tẽngã fãa, la bõn-vuudsã sẽn vuud tẽngã zugã.’”—Sɩngre 1:26, Dũni-paalgã lebgre.
“La Wẽnnaam yeelame: ‘Tɩ d naan ninsaal t’a yɩ wa tõndo n wẽneg tõndo, la a soog zĩma sẽn be kooma pʋgẽ wã ne bõn-yɩgdɩ wã sẽn yɩgd yĩngrã la rũmsa ne dũniyã fãa, la bõn-saagdsa fãa sẽn be tẽnga zugã.’”—Sɩngre 1:26, Wẽnnaam Sebre, 1983.
Sɩngr 1:26 goamã võore
Wẽnnaam naana ninsaal a meng wõnego, t’a tõe n bɩɩs a zʋg-sõma wã buudu. Wala makre, ninsaal tõe n bɩɩsa nonglem, tɩrlem, la a kʋm a taabã nimbãanega. Rẽ n so tɩ ninsaalbã tõe n dɩk Wẽnnaam togs-n-taare.
“Wẽnnaam yeelame: ‘Bɩ d maan ninsaal n wõneg d mense.’” Nand tɩ Wẽnnaam a Zeovaa naan bũmb fãa, a naana malɛk sẽn tar pãng wʋsgo. Kaoosg zugẽ, b wa n boond-a lame t’a Zeezi. Tũu ne yẽ maasem, “tɩ b naan bũmb a taabã fãa sẽn be saasẽ la sẽn be tẽngã zugã.” (Kolos rãmbã 1:16) A Zeezi rɩka Wẽnnaam togs-n-taar kɛpɩ, rat n yeel t’a “yaa Wẽnnaam ning ninsaal sẽn pa tõe n yã wã wõnego.” (Kolos rãmbã 1:15) Sɩd be bʋʋm la Wẽnnaam sẽn yeel-a yaa: “Bɩ d maan ninsaal n wõneg d mense.”
“Bɩ a soog . . . yir dũmsã, la tẽngã fãa.” Wẽnnaam pa naan rũmsã n wõneg a meng ye. Wẽnnaam pa naan-b tɩ b tar sũur-kaseto, wall tɩ b tõe n bɩɩs zʋg-sõma nins ninsaalbã sẽn tarã buud ye. Wala makre, nonglem. La baa ne rẽ, rũmsã yell paka Wẽnnaam. Rẽ n so t’a yeel ninsaalbã tɩ b ‘soog-ba.’ Woto wã, a Zeova yãka ninsaalbã tɩ b ges rũmsã yelle. (Yɩɩn-sõamyã 8:6-8; Yel-bũnã 12:10) A ratame tɩ ninsaalbã zã tẽngã neere, la b ges bũmb nins fãa sẽn be a zugã yell sõma.
B sẽn yeel bũmb ning n yaool n na n togs Sɩngr 1:26 goamã
Sɩngr sebrã pipi sags a yiibã pʋgẽ, b gomda Wẽnnaam sẽn naan ãndũniyã, tẽngã, la bõn-vɩɩsã fãa yelle. Bũmb nins fãa a Zeova sẽn naanã seka pẽgre, la ninsaal naanegã n yaa a tʋʋmd ning sẽn yɩ kãseng n tɩ yɩɩdã. Wẽnnaam sẽn wa n naan bũmba fãa n sa wã, a “gesa bũmb nins fãa a sẽn maanã, la a yãame tɩ ra yaa sõma wʋsgo.”—Sɩngre 1:31.
Ges-y video koɛɛg sẽn gomd Sɩngr sebrã sẽn yet bũmb ning naanegã wɛɛngẽ.
Tags-kɛg Sɩngr 1:26 wɛɛngẽ
Tags-kɛgre: Wẽnnaam tara yĩng wa ninsaalbã rẽnda.
Sɩdã: “Wẽnnaam yaa Vʋʋsem.” Wilgdame tɩ d pa tõe n yã-a ne nif ye. (Zã 4:24) Yaa sɩd tɩ Biiblã zĩis kẽere, b gomda Wẽnnaam nengã, a nusã, a sũurã, la a bũmb a taab yelle. Yaa gom-biis sẽn kɩt tɩ b sã n gomd Wẽnnaam yelle, bɩ ninsaalbã tõe n wʋm a võore. La pa sẽn dat n yeel tɩ Wẽnnaam tara yĩng ye.—Yikri 15:6; 1 Pɩyɛɛr 3:12.
Tags-kɛgre: Sɩngr 1:26 wilgdame t’a Zeezi la Wẽnnaam.
Sɩdã: Wẽnnaam ne a Zeezi yaa Ba ne a biig sẽn tar zood sẽn tar pãng wʋsgo, la a Zeezi pa Wẽnnaam ye. A Zeezi yeelame tɩ Wẽnnaam yɩɩda yẽnda. (Zã 14:28) Y sã n dat n bãng n paase, bɩ y ges video ning gom-zug sẽn yaa: A Zeezi Kirist yaa Wẽnnaam bɩ? Y tõeeme me n karem sõsg ning gom-zug sẽn yaa: “Bõe yĩng tɩ b boond a Zeezi tɩ Wẽnnaam Biiga?”
Ges-y video koɛɛg sẽn gomd Sɩngr sebrã sẽn gomd bũmb ningã yelle.
a Zeova wã yaa Wẽnnaam yʋ-peellã. (Yɩɩn-sõamyã 83:18) Ges-y sõsg ning gom-zug sẽn yaa: “A Zeova yaa ãnda?”