B sẽn vẽneg a Zã t’a yã bũmb ninsã

A Zã sẽn wa n be bãens roog Patmos tẽngã, a Zeezi vẽneg-a-la naoor 16 t’a yã yɛl sẽn na n wa maane. Wilgda a Zeova sẽn na n maan to-to t’a yʋʋrã paam waoogre, t’a Rĩungã wa, t’a raabã maan tẽngã zug wa sẽn maand saasẽ wã.

Vẽnegr a ye pʋgẽ, a Zã yãa a Zeova sẽn zĩ a naamã geer zug saasẽ, n tar ziir wʋsgo, tɩ kãsem-dãmb 24 gũbg-a. Kãsem-dãmbã ra fõgna sãnem pugli. Sa-yãgb n da yit a Zeova geerẽ wã, tɩ b wʋmd sa-tãs me rãamde. Kãsem-dãmb 24 yĩgimda a Zeova taoor n waoog-a. A Zã le yãa neb wʋsg sẽn yit tẽns toor-toore, sẽn gomd buud-goam toor-toore, n tũud a Zeova. A Zeezi b sẽn boond tɩ Wẽnnaam Pe-bilã tall-b lame n kẽng vɩɩm koom zĩigẽ. Rẽ poore, a Zã le yãa a Zeezi sẽn yaa Rĩm saasẽ, tɩ kãsem-dãmb 24 be ne-a. A yãa a Zeezi sẽn zab ne a Sʋɩtãan sẽn yaa dargõ wã la ne a zĩn-dãmbã. A Zeezi rig-b lame tɩ b wa tẽngã zugu.

Rẽ poore, a Zã yãa Wẽnnaam Pe-bilã ne neb tus-koabg la tus pis-naas la a naase, tɩ b yas Siyõ tãngã zugu. A leb n yãa malɛk sẽn yɩgd n gilgd tẽngã n yet nebã tɩ b zoe Wẽnnaam la b pẽg-a.

Rẽ poore, a yãa Armagedõ zabrã. Zabrã sasa, a Zeezi ne a sodaasã tõoga a Sʋɩtãan ne a dũniyã. Sẽn na n baase, a Zã yãame tɩ Wẽnnaam daabã maana tẽngã zug wa sẽn maand saasẽ wã. B sãama a Sʋɩtãan ne a poorẽ dãmbã fãa, tɩ sẽn be-b saasẽ wã, ne neb nins fãa sẽn be tẽngã zugã tũud a Zeova a ye bala, n waoogd-a.