Daar a ye zaabre, a Rebeka sẽn pids a yʋʋrã koom n sa, nin-kẽem n wudg n seg-a. Nin-kẽemã yeel-a lame yaa: “Mam kotame tɩ f kõ-m f yʋʋrã koom bilf tɩ m yũ.” Nin-kẽemã sẽn kos-a bũmb ningã ra pa toogo, rẽ me a kosa ne waoogre! A Rebeka ra neeme tɩ raoã yii zĩ-zargẽ. Rẽ n so t’a sik a yʋʋrã tao-tao, n pʋdg koom sẽn maase, n kõ raoã t’a yũ tɩ seke. A gũus n gesame tɩ raoã tara yʋgma piig sẽn da gãe yambẽ, la tɩ rũmsã koglg pa ning koom ye. A ra neeme tɩ raoã maag a yĩng n get-a, t’a ra rat n sõng-a wa a sẽn tõe tɛka. Rẽ n so t’a yeel yaa: “Mam na wii koomã n yũnug yãmb yʋgma wã me hal tɩ b yũ n tɩge.”—Sɩngre 24:17-19.

A Rebeka pa yeel bal t’a na n yũnuga yʋgma piigã ye. A yeelame t’a na n yũnug-b-la hal tɩ b tɩge. Ko-yũud meng-meng sã n tar yʋgemde, a tõe n yũu koom sẽn yɩɩd litr 95. Sã n mikame tɩ ko-yũud meng-meng n tar yʋgma piigã, a Rebeka ra na n wii koomã n kaoos lɛɛr-dãmba. La wõnda yʋgma wã ko-yũudã ra pa woto ye. A Rebeka sẽn wa n sak n na n yũnug-bã, a ra miime rẽ bɩ? Ayo. A ra rata ne a sũur fãa n modg wa a sẽn tõe tɛka, n maan nin-kẽemã sãando. Nin-kẽemã maaga a yĩng n get-a, t’a kẽnd n pidsd a yʋʋrã koom, n lebgd n wat n kiigd koglgã pʋgẽ.—Sɩngre 24:20, 21.

Ra zoe n yaa zaabre. Kibarã pʋgẽ, b pa wilg zĩig baa a ye t’a Rebeka paa bulgẽ wã n kaoos wʋsg ye. B pa wilg me t’a sẽn wa n sɛ wã, a zakã rãmb ra gõeeme, wall tɩ b tʋma ned t’a tɩ ges bõe yĩng t’a kaoosd woto ye.