Biiblã sẽn yet bũmb ning garbgã wɛɛngẽ
1 Wõnda garbg bɩ bõosg yaa bũmb sẽn sɩng tẽn-kʋdem wẽndẽ yaang tẽnsẽ wã. Yaa rẽ meng n kɩt tɩ Hebre Gʋlsgã sẽn ka wilg tɩ garbg yɩɩ bũmb sẽn zĩnd wʋsg bɩ t’a yɩɩ yel-kãseng Israɛll buudã pʋgẽ wã yaa bũmb sẽn lingdã. Yɩɩ woto buudã sɩngrẽ hali n tãag b sẽn wa n tall-b n kẽng yembd Babilonã. Israɛll nebã sẽn da wa n yit yembd Eziptã, b “kosa Ezipt rãmba wanzũri fãnteedo la sãnem fãnteedo la futu. . . . la bãmb fãa Ezipt rãmbã.” (Yik. 12:35, 36) La woto ra zemsa ne Wẽnnaam noyã la a bãngr-goamã. La ra yaa vẽeneg tɩ b ra geta rẽ wala rolb sẽn zemse, b sẽn tʋm n kaoos yʋʋm wʋsg yembd pʋgẽ n kõ Ezipt nebã la b nams b nusẽ wã yĩnga. (Yik. 3:21, 22; Tõo. 15:12-15) Yel-kãng ka tikr sẽn wilgd tɩ garbg segdame ye.
2 Zoense, wobse, la bãad dãmb a taab n da be a Zezi la a tʋm-tʋmdbã wakatẽ bõos rãmbã sʋka. Tõeeme tɩ yaa nin bãag ning b sẽn boond ne nasarend tɩ oftalmi (sẽn yaa bãag sẽn ket n wɛ Moyẽnoriã wã) n kɩt tɩ nin-kãensã kẽer lebg zoense. (Mark 10:46-49; Luk 16:20, 22; 18:35-43; Zã 9:1-8; Tʋʋ. 3:2-10) Wala rũndã bõos rãmbã, b rag n nong n yasa soayã noya, bɩ b yas zĩis nins zãma sẽn watẽ, wala wẽn-dooga noore. Ne b sẽn da get tɩ doos maaneg tara yõodã, neba ra paoogda bõos rãmbã, hal t’a Zezi makrã pʋgẽ yel-gɛtã tol n yeel tɩ: “Bõosg yaa yãnd ne maam.”—Luk 16:3.
3 Ba a Zezi ne a tʋm-tʋmdbã sẽn maan bõos rãmbã neerã, b ka sagl neb tɩ b garb ye. B sakame tɩ neb maan-b sãando, la b ka garb ye. A Zezi yeela neb nins sẽn da pʋgd-a n dat rɩɩb balã tɩ b ra tʋm “rɩɩb ninga sẽn sãamd yĩng ye. Bɩ y tʋm dɩɩb ninga sẽn paada n kõt vɩɩm sẽn ka sɛta yĩnga.” (Zã 6:26, 27) A Pɩɛɛr yeela bõaas wẽn-doogẽ wã woto: “Mam ka tar wanzũri bɩ sãnem ye. La mam na n kõo foom bũmb ninga mam sẽn tarã.” A tũnuga ne tẽeb kũun ning a sẽn da tarã n sãoog rao wã. (Tʋʋ. 3:6) Baa wakat ninga kom sẽn yõk tʋm-tʋmdbã, tɩ b kong gãag zĩig la futã, b namsame ‘n tʋm ne b mens nusi, wĩntoog ne yʋngo, n ka rat n [yɩ zɩɩb, NW ] n kõ neb a taab ye.’ (1 Kor. 4:11, 12; 1 Tes. 2:9) Noor ning kiris-nebã sẽn da segd n tũ wã la woto: “Ned sã n ka rat n tʋm, bɩ a ra rɩ me ye.”—2 Tes. 3:10-12.