Bao-y n pẽneg-y Wẽnnaam

A feesda sũyã n baood sẽn yaa sõma

1 RĨM DÃMBA 14:13

A ZEOVA “feesda nebã fãa sũyã, n mi tõnd fãa tagsg la d ratem.” (1 Kibaya 28:9) D sã n karemd gom-kãensã a Zeova sẽn kɩt tɩ b gʋlsã, d neeme t’a sɩd nanda tõnd hal wʋsgo. Baa ne d sẽn yaa neb sẽn pa zems zãngã, a Zeova feesda tõnd sũyã, n baood bũmb ning sẽn yaa sõma. A sẽn gom a Abiya yell 1 Rĩm dãmb 14:13 pʋgẽ wã n yeel bũmb ningã wilgda rẽ vẽenega.

A Abiya sẽn da vɩ ne neb ninsã ra yaa nin-yoodo. A ba a Zeroboam sẽn yɩ rĩmã ne a na-roogã neb fãa yɩɩ wẽn-kɩɩsdba.a Woto kɩtame t’a Zeova yeel t’a na n menemsa a Zeroboam zakã neb “wa ned sẽn pɩɩsd sagdo.” (1 Rĩm dãmba 14:10) La a yeelame t’a Zeroboam buudã pʋgẽ, yaa a biig a Abiya sẽn da bẽed bã-kɛgengã bal n na n paam yaoogo.b Bõe yĩnga? Bala, “Israɛll Zusoab a Wẽnnaam yãa yel-sõmd yẽ a ye bal nengẽ, a Zeroboam buudã sʋka.” (1 Rĩm dãmba 14:1, 12, 13) Gom-kãensã wilgda tõnd bõe a Abiya zugu?

Biiblã pa yet t’a Abiya yɩɩ ned sẽn da tũud Wẽnnaam ne a sũur fãa ye. La baasg zãnga, Wẽnnaam “yãa yel-sõmd” a nengẽ. Tõe tɩ yaa bũmb la a maan tũudmã wɛɛngẽ tɩ yɩ Wẽnnaam noogo. Rabẽ rãmbã sɛbã pʋsẽ, b yetame tɩ tõe t’a Abiya ra kẽnga Zerizalɛm wẽnd-doogẽ wã n tɩ pʋʋs a Zeova, bɩ tõe t’a kɩtame tɩ sodaas nins a ba wã sẽn da yãk tɩ gɩdgd nebã tɩ b pa tõe n kẽng Zerizalɛmmã bas nebã gɩdgre.

D pa mi yel-sõmd ning a Abiya sẽn maanã takɩ ye. La ra seka pẽgre. Pipi, yel-sõmd ning a sẽn maanã yɩɩ ne a sũur fãa. Bala b yeelame tɩ b yãa yel-sõmdã ‘a nengẽ,’ rat n yeel t’a sũurẽ wã. Yiib-n-soaba, a yel-sõmdã buud ra ka to ye. A sak n maana yel-sõmd a woto, baa ne a sẽn da yaa a “Zeroboam buudã” nedã. Bãngd a yembr yeela woto: “Neb sã n vɩ ne neb sẽn pa tar zʋg-sõma, bɩ yaa b zakã rãmb meng n yaa nin-yoodo, tɩ b baas n ket n tar b zʋg-sõmã wã, sɩd seka pẽgre.” Ned a to me yeelame t’a Abiya yel-sõmdã ra “yaa vẽenega, . . . wa ãds sẽn yãgd ki-lika, la wa sɛɛdr tɩɩs sẽn yas ne vãad toada, tɩ b rasãndã maneg n pukdẽ, tɩɩs nins sẽn gũbg-bã sẽn ka vãadã yĩnga.”

Sẽn yɩɩd fãa, 1 Rĩm dãmb 14:13 wã goamã wilgda tõnd bũmb sẽn be yamleoog wʋsg a Zeova zugu, la wilgd a sẽn feesd tõnd sũyã n baood bũmb ningã. Tẽeg-y tɩ b yeelame t’a Zeova ‘yãa yel-sõmd a Abiya nengẽ.’ Woto wilgda vẽeneg t’a Zeova feesa a Abiya sũurã sõma, hal n wa yã a yel-sõmdã. D sã n na n mak a Abiya ne a zakã rãmba, yaa wa bãngd a yembr sẽn yeelã: A yaa wa kĩndf “sẽn be mogr noor kug sʋka.” A Abiya yel-sõmdã yɩɩ a Zeova noog wʋsgo, hal t’a keo-a, n yeel t’a zakã neb fãa sẽn yaa nin-wẽnsã sʋka, yaa yẽ a ye bal n na n paam yaoogo.

Rẽ yĩnga d sẽn bãng tɩ baa ne tõnd sẽn pa zems zãngã, a Zeova feesda d sũyã n baood bũmb ning sẽn yaa sõma d nengẽ wã, pa kengd d pɛlg sɩda? (Yɩɩl Sõamyã 130:3) Woto segd n kɩtame tɩ d maneg n bao n pẽneg a Zeova n paase, bala d bãngame t’a yaa Wẽnnaam sẽn feesd d sũyã n baood baa yaa bũmb bilf sẽn yaa sõma.

[Tẽngr not rãmbã]