Siglgã taoor lʋɩtb Sull lɛtre
“BƖ YÃMB paam bark la laafɩ sẽn yɩt tõnd Ba a Wẽnnaam la Zusoab a Zezi Kirist nengẽ.” A Poll tũnuga ne pʋʋsem gom-kãensã naoor wʋsgo, a lɛta nins a sẽn gʋls tigimsã pʋsẽ. A goama zemsa ne tõnd sẽn kot Wẽnd bũmb ning yãmbã yĩngã bal kɛpɩ.—Ef. 1:2.
Ad tõnd sɩd tara mi-beoog wʋsgo, lohorem d sẽn pa segd ne a Zeova sẽn maan-d ne a Zezi Kirist maoongã sẽn yaa rondã maasmã. Rondã maasem yĩnga, tõnd tata Wẽnnaam yam. Baa d sẽn modgd n zãmsd Biiblã, n moond koe-noogã bɩ d sẽn maand yel-sõms a taabã sẽn zem to-to fãa, d pa tõe n ta Wẽnnaam yam d meng modgrã yĩng ye. D yel-wẽna sugr la vɩɩm sẽn pa satã pa d modgrã keoor ye, yaa lohorem d sẽn pa segd ne a Zeova sẽn maan-do, a Zezi Kirist maasem yĩnga.—Rom 11:6.
A Poll gʋlsa a tẽed-n-taasã woto: “Tõnd kota yãmb tɩ y ra reeg Wẽnnaam barka zaalem ye. Tɩ bõe, bãmb yetame: ‘Mam leoka fo pʋʋsg bark wakate, la mam sõnga foom fãagr daare.’ Gese, masã yaa bark wakate. Gese, masã yaa fãagr daare.” Sẽn deng Zerizalɛm sãangã pipi kiris-nebã wakatẽ wã, “bark wakat” n zĩndi. Pʋ-peelem dãmb nins sẽn nong a Zeova wã paama fãagr tẽebã wɛɛngẽ. Rẽ kɩtame tɩ wẽn-sakdb nins fãa sẽn zoe n yi Zerizalɛm tɩ yʋʋmd 70 wã sẽn yɩ a sãangã yʋʋmdã nan pa ta wã paam n põse.—2 Kor. 6:1, 2.
Rũndã-rũndã me, tõnd vɩɩ “bark wakate,” la “fãagr daare.” Neb nins a Zeova sẽn sak tɩ b yaa a balemdb la sẽn paam fãagr tẽebã wɛɛngẽ wã tara saagr n na n paam fãagr yĩngã wɛɛngẽ me n põs a ‘Zeova ra-kãsengã’ sẽn kolg wʋsgã sasa.—Sof. 1:14.
A Zeova daarã sẽn watã kɩtame tɩ tõnd tar zɩɩb sẽn yaa kãsenga. Tõnd segdame n keoog nebã, la d sõng pʋ-peelem dãmbã tɩ b paam a Zeova lohorem d sẽn pa segd ne wã, tɩ kɩt tɩ bãmb me paam fãagre. A Poll ra miime tɩ tʋʋm-kãngã b sẽn da bobl-a wã ra yaa kãsenga. A gʋlsa me tɩ: “Mam sã n ka moon koe-noogã, toog n na n paam maam.” A leb n wilga a tagsg gom-kãensã pʋgẽ: “Mam tara . . . yam dãmba la sẽn ka yam dãmb samde. Woto yĩnga, mam data ne m sũur fãa n moon Koe-noogã.”—1 Kor. 9:16, Kãab-paalgã Koe-noogo; Rom 1:14, 15.
A Zeova na n ninga tõnd taale, d sã n maan yaal-yaal ne nebã keoogr sẽn yaa tʋʋmd sẽn fãagd yõyã. Tõnd mii bũmb ning a Zeova sẽn yeel no-rɛɛs a Ezekɩɛllã: “Ninsaal biiga, maam n kɩt tɩ f lebg Israɛll neba gũuda. Fo sã n wʋm mam goamã bɩ f sagl bãmb n kõ-ma. Mam sã n yeel tɩ nin-wẽng na n kiimi tɩ fo ka wilg-a n sagl-a t’a bas a manesem wẽngã n paam n vɩɩmde, nin-wẽngã na n kii a yel-wẽnã pʋgẽ, la mam na n ninga foom taal a kũumã yĩnga.”—Eze. 3:17, 18.
Yaoolem day kãensã sasa, yɛlã yaa toog wʋsgo. Yɩl n ges f zak yelle, f tʋʋm yelle, tigingã yɛl la koe-moonegã yelle, sɩd pa nana ye. Sẽn ye paase, yãmb sʋkã, wʋsg maooda ne bãase, yam-ka-m-mengã, kʋʋlem, la gɩdgr bɩ kɩɩsg menga. Yãmb wʋsg tara “zɩɩb sẽn yaa zɩsgo.” D rat n wilg-y lame tɩ d tagsda y yelle, n yet-y tɩ y maan wa a Zezi sẽn yeel woto wã: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo.” (Mat. 11:28) D rat n pẽga yãmb fãa hal sõma, y sẽn maan modgr n ket n balemd a Zeova baa ne zu-loeesã fãa wã.
Yãmb sẽn maan modgr n moon koɛɛgã la y zãms nebã, la a Zeova sẽn ning tʋʋmdã barkã yĩnga, neb 4762 n deegd lisg semen fãa dũniyã gill zugu. Tigims 1375 la b lugl rɩẽ. D saagdame tɩ Biiblã sɩd yetame tɩ bõe seb-paallã sẽn zoe n be ne buud goam 120 wã na n sõnga neb milyõ rãmb tɩ b paam lohorem d sẽn pa segd ne la laafɩ sẽn yit a Zeova nengẽ wã “fãagr daar” ning pʋgẽ tõnd sẽn be wã.
Bãng-y tɩ Siglgã taoor lʋɩtb Sull nong-y lame, la tɩ d pʋʋsda y yĩnga. D pʋʋsd-y-la bark me, y sẽn pʋʋsd tõnd me yĩngã.
Yãmb saam-biisã,
A Zeova Kaset rãmbã Siglgã taoor lʋɩtb Sulli