SEBRÃ GOM-ZUG SÕSGÃ
A Zeova Kaset rãmbã yaa ãnd dãmba?
“Mam mi a Mike hal sẽn kaoose. A yaa a Zeova Kaset soaba. La bũmb kẽer võor la m da pa wʋmd a tũudmã zugu. Wala makre, a Zeova yaa ãnda? Bõe yĩng t’a Zeova Kaset rãmbã pa maand kibs rãmbã? Rẽ yĩnga a Mike pa tɩ naag tũudum sẽn pa sõma sɩda?”—A Becky sẽn be Kaliforni, Etazĩni soolmẽ.
“Mam yagsã sẽn wa n sɩng n zãmsd Biiblã ne a Zeova Kaset rãmbã, m da sokda m meng woto: ‘Yʋʋr ning sẽn yaa Zeova Kaset rãmbã rat n yeelame tɩ bõe? M zɩ n wʋm tũudum yʋʋr sẽn yaa woto ye!’”—A Zenon, sẽn be Õntario, Kanada soolmẽ.
“Maam ne m pagã ra tagsdame tɩ yaa d sẽn pa kẽnd wẽnd-doogẽ, tɩ d sũur pa noomẽ wã yĩng n kɩt t’a Zeova Kaset rãmbã wat n kaagd tõndo. La d ra yetame tɩ tõnd tũudmã sã n pa tõog n sõng tõndo, pa a Zeova Kaset rãmbã sẽn yaa tũudum paallã n na n tõog ye.”—A Kent, sẽn be Wasĩnton, Etazĩni soolmẽ.
“Mam da pa mi a Zeova Kaset rãmbã sẽn yaa neb ninsi, la b sẽn tẽed bũmb ninsã ye.”—A Cecilie, sẽn be Esbjerg, Danemark soolmẽ.
Tõe tɩ y zoe n yãa a Zeova Kaset rãmb sẽn moond koɛɛgã zak-zaka, bɩ zãma zĩisẽ, wall b sẽn kãabd neb sɛb sẽn tik Biiblã, pa rẽ bɩ Biibl zãmsgo. Tõe meng tɩ yaa a Zeova Kaset soab n kõ yãmb seb-kãngã. La tõe tɩ y sokda y meng a Zeova Kaset rãmbã sẽn sɩd yaa neb ninsi. Yãmb me tõe n tagsda wa neb nins yell d sẽn gom zugẽ wã.
Sã n yaa woto, yɛ la y tõe n paam y sogsgã leoore? Wãn to la y tõe n bãng a Zeova Kaset rãmbã sẽn tẽed bũmb ninsã, b sẽn maand to-to n paamd ligd n tʋmd b tʋʋmã, la bũmb ning sẽn kɩt tɩ b kaagd nebã b zagsẽ, bɩ n sõsd ne-b zãma sʋkã?
A Cecilie, d sẽn gom a yell zugẽ wã, yeela woto: “M karma kibay wʋsg sẽn gomd a Zeova Kaset rãmb yell ẽntɛrnetã zugu.” A paasa woto: “M wʋma neb sẽn wɩt a Zeova Kaset rãmbã, la neb sẽn gom n paoog-b me. Woto fãa kɩtame tɩ m sẽn da tagsd a Zeova Kaset rãmbã zugã pa zems ye.” Kaoosg zugẽ, a wa n sõsa ne a Zeova Kaset rãmba, n paam a sogsgã leoor tɩ yɩ-a noogo.
Yãmb me ratame n paam y sogsg leoor bɩ? Sã n yaa woto bɩ y sõs ne a Zeova Kaset rãmbã sẽn yiis seb-kãngã wã. (Yel-bũnã 14:15) D kɩsa sɩd tɩ sõss nins sẽn pʋgdã na n sõng-y lame tɩ y bãng tõnd sẽn yaa neb ninsi, d sẽn tẽede, la d sẽn tʋmd tʋʋm ninsi.