SEBRÃ GOM-ZUG SÕSGÃ | A ZEOVA KASET RÃMBÃ YAA ÃND DÃMBA?
A Zeova Kaset rãmbã yaa nin-bʋs buudu?
A Zeova Kaset rãmbã yaa neb sẽn sigl sõma, n be dũniyã gill zugu. D pa tũudum sull ye. Yaa sɩd tɩ d biru-kãsengã bee Etazĩni, la a Zeova Kaset rãmbã wʋsg bee tẽns a taabẽ. B yɩɩda milyõ a nii, n moond koɛɛgã tẽns 230 la zak pʋsẽ. B sẽn moond koɛɛgã wilgdame tɩ b tũuda a Zeezi saglga. A ra yeela woto: “Wẽnnaam soolmã koe-no-kãngã na n moona dũni gill fãa, tɩ yɩ kaset soolem fãa nebã yĩnga.”—Matye 24:14.
Sẽn yaa tẽng ning fãa pʋgẽ la d be, d sakda taoor-dãmbã noya, la d pa kẽed politikã pʋgẽ ye. Bala, d sẽn yaa kiris-nebã, d sakda a Zeezi noore, n ‘ka dũni rẽnd’ ye. Sɩd me, tõnd pa kẽesd d toog politikã yɛl pʋgẽ, la zabr pʋgẽ me ye. (Zã 15:19; 17:16) Dũni gill zabr a yiib-n-soabã sasa, b yõga a Zeova Kaset rãmb n pag bãense, n nams-ba, la b kʋ kẽer menga, b sẽn zãgs tɩ b pa na n kẽes b toog politikã la zabã pʋsẽ wã yĩnga. Alemayn evɛk a yembr yeela woto: “A Zeova Kaset rãmbã n sɩd tõe n yeel t’a Hitler wakatẽ wã, bãmb bal n zãgs tɩ b kõn maan sodaare, b sũur-kasetã yĩnga.”
“A Zeova Kaset rãmbã tara raoodo. D tõe n bobla nin-kãensã sẽn pa rat-m-ye rãmbã tʋʋma, baa politikã pʋgẽ tʋʋm-kãsems menga. La d pa na n tõog tɩ b sak ye. . . . B sakda tẽngã taoor-dãmb noya, la b kɩsa sɩd tɩ yaa Wẽnnaam Rĩungã bal n tõe n welg ninsaalbã zu-loeese.”—Nová Svoboda zʋrnalle, Repiblik Kɛk.
La baasgo, d pa solgd d mens ye. A Zeezi pʋʋsa a Ba wã a karen-biisã yĩng n yeel woto: “Mam ka kot yãmb tɩ y yiis-b dũni ye.” (Zã 17:15) Tõnd me yaa wa neb a taabã. Rat n yeel tɩ d tara tʋʋmd n tʋmdẽ, d rooda raaga, la d kẽnd lekolle.