SEBRÃ GOM-ZUG SÕSGÃ | A ZEOVA KASET RÃMBÃ YAA ÃND DÃMBA?
Bõe yĩng tɩ d moond koɛɛgã?
Tõe tɩ bũmb kae sẽn welgd tõnd ne tũudum a taabã, n yɩɩd koɛɛgã d sẽn moond zĩig fãa wã ye. D moonda koɛɛgã zak-zaka, zãma sʋka, la zĩis nins fãa neb sẽn beẽ. Bõe yĩng tɩ d maand woto?
A Zeova Kaset rãmbã moonda koɛɛgã n waoogd Wẽnnaam, la b sõngd neb a taab tɩ b bãngd a yʋʋrã. (Ebre-rãmbã 13:15) D leb n dat n saka a Zeezi noore. A yeela woto: “Bɩ y kẽng n maan nebã buud fãa tɩ yɩ mam karen-biisi, . . . la y zãms bãmb tɩ b sak bũmb nins fãa mam sẽn yeel yãmb tɩ y maanã.”—Matye 28:19, 20.
Sẽn paase, d nonga d taabã. (Matye 22:39) Tõnd miime tɩ neb wʋsg tara b tũudum, la tɩ pa nebã fãa n dat n kelg tõnd koɛɛgã ye. La d kɩsa sɩd tɩ Biiblã tõe n kɩtame tɩ ned paam vɩɩm sẽn pa sate. Rẽ n so tɩ d rɩkd pipi kiris-nebã naoore, n ket n ‘zãmsd nebã la d moond a Zeezi Kiris koe-noogã daar fãa n ka basdẽ ye.’—Tʋʋmã 5:41, 42.
Bãngd a Antonio Cova Maduro yeelame “t’a Zeova Kaset rãmbã modgda wʋsgo, la b sakd namsgo, . . . sẽn na yɩl tɩ koɛɛgã b sẽn moondã ta dũniyã gill fãa.”—Venezuela Zʋrnall a yembre, El Universal,
Neb wʋsg sẽn karemd tõnd sɛbã pa a Zeova Kaset rãmb ye. Neb milyõ-rãmb me sẽn sakd tɩ d zãmsd-b Biiblã yaa tũudum a taab neba. La b sũy nooma wʋsgo, b sẽn paam t’a Zeova Kaset rãmb wat n kaagd-bã.
Tõe tɩ bũmb a taab la y rat n bãng a Zeova Kaset rãmbã zugu. Sã n yaa woto, y tõe n
soka a Zeova Kaset soaba,
kẽe tõnd sɩtã, www.jw.org pʋgẽ.
kẽnga tõnd tigissã. Kõomã yaa zaalem.