Y tõe n paama sõngre, n wʋm Biiblã goam võore

Mams-y wa y sẽn na n kẽng tẽn-zẽnga, tɩ yaa y pipi kẽnde. Y na n yãa neb y sẽn pa mi, tɩ b minimdã la b rɩbdã me yaa bõn-sãams ne-yã. Sẽn paase, tẽngã ligd yaa toor ne yãmb tẽngã rẽndã. Yaa vẽeneg tɩ rẽ fãa tõe n kɩtame tɩ y pa mi y sẽn maandg ye.

Y sã n sɩng Biiblã karengo, tõe n yɩɩ woto. Y sã n wa karemdẽ, y na n yãa b sẽn gomd kʋdemd wẽndẽ yɛl yelle, tɩ yaa bõn-sãams ne-yã. Y na n karma kibay sẽn gomd Filisti neb yelle, la minimd kẽer nebã sẽn da tar tɩ y pa wʋmd a võor yelle. Wala makre, kibay sẽn gomd neb sẽn ‘pãrs b fut’ yelle. Y leb n na n yãa zĩis b sẽn gomd rɩɩb b sẽn boond tɩ mann yelle, la ligd b sẽn boond tɩ talã me yelle. (Yikri 16:31; Zozoe 13:2; 2 Sãmwɛll 3:31; Matye 25:15) Woto fãa tõe n kɩtame tɩ y pa wʋmd y sẽn karemdã võor ye. Y sã n kẽng tẽn-zẽnga, n paam ned sẽn na n bilg-y bũmb nins y sẽn pa mi wã võore, y sũur kõn yɩ noog sɩda? Woto me, y sã n paam ned sẽn na n sõng-y tɩ y wʋm Biiblã goam võore, sãmbg kae tɩ y sũur na n yɩɩ noogo.

NEB SẼN PAAM SÕNGR PĨND WẼNDẼ

B sẽn sɩng Biiblã gʋlsg yʋʋmd 1513 sẽn deng a Zeezi rogmã tɛk n tãag rũndã, b sõngda neb tɩ b wʋmd a goamã võore. Wala makre, a Moyiiz sẽn yɩ Israyɛll buudã pipi taoor lʋɩtã bilga bũmb nins a sẽn gʋlsã tɩ nin-buiidã kelge.—Tõodo 1:5.

Na maan yʋʋm tusr rẽ poore, neb sẽn da wʋmd Wẽnnaam goamã võor ra ket n beeme, n sõngd b taabã. Yʋʋmd 455 sẽn deng a Zeezi rogmã, zʋɩf-rãmb kʋʋng n tigim taab Zeruzalɛm tẽngã pʋgẽ. Kamb wʋsg meng n naage. Baraare, neb n karem “Wẽnnaam tõodã sebr” tɩ b taabã kelge. La pa rẽ bal ye. B ra ‘bilgda a võorã tɩ ned kam wʋmd b sẽn karmã sẽn dat n yeel a soaba.’—Neemi 8:1-8.

Yʋʋm kobs-nu rẽ poore, a Zeezi Kiris maana bũmb sẽn wõnd woto. Sɩd me, nebã wʋsg ra boond-a lame tɩ karen-saamba. (Zã 13:13) Wakat kẽere, a zãmsa neb kʋʋngo, la a sõsa ne neb yembr-yembr me. Vugri, a zĩnda tãng zug n sõs ne neb wʋsgo, hal t’a ‘zãmsgã yɛɛs nebã.’ (Matye 5:1, 2; 7:28) Yʋʋmd 33, a goma ne a karen-biis a yiib sẽn da yi Zeruzalɛm n debd tẽn-bil sẽn pẽ be, n ‘bilg bãmb bũmb nins sẽn be gʋls-sõamyã fãa pʋgẽ.’—Luk 24:13-15, 27, 32.

A Zeezi karen-biisã me ra sõngda nebã tɩ b wʋmd Wẽnnaam goamã võore. Daar a ye, rao sẽn da tʋmd Etiopi na-yirã n da karemd Biiblã sebr a yembre. A Zeezi karen-biig yʋʋr sẽn boond t’a Filip kolgame, n sok-a a sã n ‘wʋmda a sẽn karemdã võore.’ Raoã leokame tɩ “yẽnda na n yɩɩ wãn n tõog n wʋm a võor tɩ sã n ka ned n bilg n kõ-a.” A Filip sõng-a lame t’a wʋm a sẽn da karemdã võore.—Tʋʋmã 8:27-35.

Y TÕE N PAAMA SÕNGR RŨNDÃ-RŨNDÃ

Rũndã-rũndã, a Zeova Kaset rãmbã maanda wa pĩnd wẽndẽ neb nins sẽn sõng b taab tɩ b wʋm Wẽnnaam goamã võorã. B maanda woto dũniyã gill zugu, tẽns 239 pʋsẽ. (Matye 28:19, 20) Semen fãa, b sõngda neb milyõ a wɛ la zak sẽn na yɩl tɩ b wʋm Biiblã goam võore. Neb nins b sẽn sõngdã wʋsg pa kiris-neb ye. B zãmsda nebã zaalem. Tõe n yɩ a soabã zakẽ, zĩig a to, pa rẽ bɩ ne telefõn wall ordinatɛɛr maasem.

Y sã n dat tɩ ned sõng-y tɩ y wʋm Biiblã goam võore, y tõe n kosa a Zeova Kaset soab ning fãa y sẽn tõe n paame. Y na n bãngame tɩ Biiblã pa sebr võor wʋmb sẽn yaa toogo, la t’a “bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ.” A tõe n sõnga yãmb tɩ y tõog n “paam manegr la seglg tɩ maan tʋʋm-sõamy buud fãa.”—2 Tɩmote 3:16, 17.