SÕNGRE, ZAGSÃ RÃMB YĨNGA
Y sẽn tõe n sõng y biigã to-to t’a paam not-sõma
Wõnda y biigã toog kae ne lekollã ye. A pa zãmsd a lesõ-rãmbã, a pa maand a ɛgzɛrsis-rãmbã me ye. Rẽ kɩtame t’a not-rãmbã pa le yaa sõma, t’a manesmã me toeeme. Bõe la y tõe n maan n sõng y biigã t’a paam not-sõma?
Y sẽn segd n bãnge
Y sã n pẽdgd-a wʋsgo, yellã na n yãngame. Y sã n pẽdgd y biigã, a na n maanda yɩɩr lekollẽ wã, la zakẽ. Sẽn na yɩl n paam a menga, tõe t’a na n yagda ziri, n solgd not-rãmb nins sẽn pa sõma wã, n mamsd yãmb sĩyãtiirã a ɛgzame wã sɛb zutu, bɩ n pa le kẽnd lekollã ye. Yellã na n yãngame bala.
Y sã n kõt y biigã kũun wʋsgo, pa sõngd ye. A Andrew sẽn yaa biig baaba wã yeelame: “Tõnd bi-puglã sã n paam not-sõma, d kõt-a-la kũuni, n dat t’a le tʋm sõma nindaare. La rẽ kɩtame t’a ra tagsd kũunã a sẽn na n paamã yell bala. A sã n da pa paam not-sõma, a sũurã sãamda a sẽn pa na n paam kũunã, n yɩɩd a sẽn pa tʋm sõma wã.”
Y sã n ningd karen-saambã taale, pa na n yãk neng ye. Y biigã tõe n tagsame tɩ pa tɩlɛ t’a modg n paam not-sõma ye. A sã n wa konge, a na n ninga ned a to taale, t’a sã n wa paam yell me, bɩ a rat tɩ neb a taabã welge. Koɛɛg-koɛɛga, rẽ na n kɩtame tɩ y biigã pa tõog n bɩɩs zʋg-sõng sẽn na n wa sõng-a, a sã n wa lebg kãsem ye. A sã n wa maan bũmb sẽn pa sõma, a pa na n sak n deeg a kongr ye.
Y sẽn tõe n maane
Yõk-y y menga. Y sũurã sã n yikame, bɩ y bas tɩ sig tɩ y yaool n gom ne y biigã a not-rãmbã yelle. A Brett sẽn yaa biig baaba wã yeelame: “Mam ne m pagã sã n mi n sik d sũur n yɩ wʋmdba, d tõogd n sõnga d biigã.”
Biiblã saglga: “Ned buud fãa segd n wɩnga ne kelgre, la a maag ne goama, la a maag ne sũ-yikri.”—Zak 1:19.
Bao-y n bãng-y yellã sẽn sɩd yaa a soaba. Bũmb ning sẽn mi n kɩt tɩ kambã pa tar not-sõma wã yaa b karen-bɩ-taasã sẽn weoogd-ba, b sẽn toeem lekolle, b sẽn yɛɛsd ɛgzame-rãmb wʋsgã, zakã pʋgẽ zu-loeese, b sẽn pa gõe tɩ sekdẽ wã, b sẽn pa tar na-kẽndrã, bɩ b sẽn deemd wʋsgã. Da tags-y tɩ yaa kʋɩɩng bal ye.
Biiblã saglga: “Sẽn tagsd-a bũmb yell neer paamda sũ-noogo.”—Yel-bũnã 16:20.
Sõng-y y biigã t’a yamã kẽ karengã. Maan-y na-kẽndr a sẽn tõe n tũ n zãmsd a lesõ-rãmbã, la a maand a ɛgzɛrsis-rãmbã yiri. Bao-y zĩig biigã sẽn tõe n zĩnd n maan a ɛgzɛrsis-rãmbã tɩ bũmb pa tiis-a, wala makre, tele wã bɩ portaable. Ra kɩt-y t’a maan ɛgzɛrsis-rãmbã fãa zĩig pʋgẽ ye. Sã n pa rẽ, a yamã na n yii zãmsgã. Rao a yembr sẽn yit Alemayn t’a yʋʋr boond t’a Hector yeelame: “B sã n wa rat n maan devoaare, m sõngda m biigã t’a zãmsd a lesõ-rãmbã daar fãa, n da wa bas tɩ devoaarã daar ta n sa t’a yaool n sɩng ye.”
Biiblã saglga: “Bũmb fãa tara a wakate.”—Koɛɛg soaba 3:1.
Sõng-y y biigã t’a bãng karengã yõodo. Y biigã sã n bãng tɩ karengã tara yõod ne-a masã menga, a na n dat n modga ne karengã. Wala makre, matematikã tõe n sõng-a lame t’a zã a ligdã sõma.
Biiblã saglga: “Bao yam ne bãngre. . . . Nong yam.”—Yel-bũnã 4:5, 8, Wẽnnaam Sebre, 1983.
Ad yam: Sõng-y y biigã t’a maan a ɛgzɛrsis-rãmbã, la y ra maan n kõ-a ye. A Andrew paasame: “Tõnd bi-puglã teega tõndo, n pa baood n maan bũmb a toor ye.” Sõng-y y biigã t’a bãng a sẽn tõe n maan a ɛgzɛrsis-rãmbã a toor to-to.