D wilg naneb ne sɛbã
1 “Sɛb gʋlsg yaa wʋsgo, la a ka tar tɛk ye.” (Koɛ. 12:12) Sẽn be sɛb wʋsg pʋsẽ ka são karaagã sẽn tar b gʋlsmã meng ye. Baasg zãnga, ka woto ne sɛb nins Sosiete Wats Tawa sẽn yiisdã ye. B tara yõod wʋsgo, bala tẽeb rɩɩb sẽn fãagd yõy n be b pʋsẽ. B sõngda neb nins sẽn wilgd ratmã tɩ b wa bãng a Zeova, la b kengd b rãmb nins sẽn zoe n yaa a Zeova sõgen dãmb sẽn dɩk b mens n kõ wã tẽebo.
2 D ratame n taas neb a taabã tõnd sɛbã, bala d miimi tɩ nin-kãens tõe n dɩɩ b nafa. Baa b sẽn ka yaood ligd tɩ d yaool n kõ-bã, depãens rãmb n kẽed sʋk b yiisgã la b pʋɩɩbã pʋgẽ. Woto yĩnga, d ka rat n pʋɩ sɛbã yaar ye. D sã n pa kɩs sɩd tɩ nedã sɩd wilgda ratem, naoor wʋsgo d na n kãaba a soabã Gũusg Gasgã la Réveillez-vous! wã, bɩ tõe tɩ yɩ seb-vãoog bala. D segd n lebg n wa gesa ned ning fãa sẽn sak n deeg sebre, la a soabã sã n wilg ratem wakat kãnga, d tõe n kãaba sebr a to.
3 Kẽer yam tõe n yooda ne b togs nebã tɩ yaa yamleoog kũunã n teend tʋʋmdã, la naoor wʋsg sẽn yɩɩdã yaa sõma tɩ d maan woto. Rẽ kɩtdame tɩ yɩ vẽeneg ne nebã tɩ tõnd tʋʋmdã ka leebg ye. Rẽ kɩtdame tɩ yɩ vẽeneg n yɩɩd tɩ tõnd sẽn dat yaa moon Rĩungã koe-noog la d maan karen-biisi. Rẽ sõngda tõnd tɩ d bãng ratem hakɩkã n welge. Naoor wʋsgo, sã n yaa ne sɩgaarã la dũniyã sɛba neba tara ligd n daad rẽ. B sã n wilgda ratem ne pʋ-peelem ne bũmb ning y sẽn yeel-bã, b na n yãame tɩ yaa bũmb sẽn zems tɩ b maan kũun n teel kiris-nedemd hakɩkã. Tõnd sã n togsd nin-kãensã b sẽn teend tʋʋmdã to-to, d wilgdame tɩ d tara naneb ne sɛbã. D wilgdame tɩ d miimi, tɩ sẽn na yɩl n yiis-ba, wata ne depãens rãmba.
4 B sã n gom kũunã yell ne manesem sẽn zemse, neb wʋsg sũy na n yɩɩ noog tɩ b sõng ne tõnd tʋʋmdã sẽn tar yõod wʋsgã. Wakat n tõe n wa zĩnd tɩ y tagsdẽ tɩ ka zemsdẽ tɩ y gom kũuna yell ye, la naoor wʋsgo yɩta sõma tɩ pipi kẽngrẽ bɩ y gom a yelle, a soabã sã n wilg t’a rat n karma sɛbã y sẽn kãab-a wã.