“Tõnd ka tõe n ka togs . . . ye”
1 A Zezi Kirist geta moonegã tʋʋmd yell neere. (Mat. 28:20; Mark 13:10) Baa ne sẽn yaa koe-moondb sõor sẽn pẽneg milyõ a yoob n moond n kõt kasetã tẽns 234 pʋsẽ wã, d ka tog n tags bal tɩ tõnd kasetã kũun saame ye. Hal tɩ Wẽnnaam wa yeel tɩ tʋʋmdã saame, “tõnd ka tõe n ka togs” yɛl nins d sẽn zãmsã ye.—Tʋʋ. 4:20.
2 Teeg-y Wẽnnaam vʋʋsem sõngã: A Sʋɩtãan wata ne weoogr sẽn yaa kãseng sẽn na yɩl n koms tõnd raoodo. (Wil. 12:17) Tõnd mengã yĩn-nems sẽn ka zems zãngã me namsda tõnd ne zu-loees wʋsgo. Yɛl a woto tõe n yuusa tõnd yamã n maan t’a ka tik moonegã tʋʋmd yõod sẽn yɩɩd fãa wã zug ye. Baasg zãnga, d sã n teeg a Zeova, a vʋʋsem sõngã na n sõnga tõnd tɩ d mao ne yel-gɩdgdg buud fãa.
3 Wakat ning b sẽn da namsd yʋʋm kob-yendẽ kiris-neb tigingã wʋsg b tẽebã yĩngã, saam-biisã pʋʋsame n kos Wẽnnaam sõngr sẽn na yɩl n ket n togsd a gomdã ne raood wʋsgo. A Zeova leoka b pʋʋsgã, n kõ-b a vʋʋsem sõngã, la a kõ-b yẽesem la pãn-tusdg ning b sẽn dat sẽn na yɩl n ket n moondẽ wã. Rẽ kɩtame tɩ b kell n kẽng taoor n togs koe-noogã ne raood n ka bas ye.—Tʋʋ. 4:29, 31; 5:42.
4 Ra zoe-y goam sẽn komsd raood ye: Zãma wã sẽn tagsd bɩ zirẽ-n-beed b sẽn yelg tõeeme n wa yɛɛsd tõndo. La tẽeg-y goam nins a Pɩɛɛr la tʋm-tʋmdb a taabã sẽn togs Sãnedrẽ wã ne raoodã tɩ be Tʋʋma 5:29- 32 pʋgẽ wã. Wala a Gamaliɛll sẽn yaa Tõogã karen-saambã sẽn sak n deegã, b ka tõe n sãam Wẽnnaam tʋʋmdã ye. Ka ne tõnd pãng la tʋʋmdã maand ye. Wẽnnaam teenda tʋʋm kãseng kãngã, la yaa yẽ bal n tõe n kɩt t’a maane!—Zak. 4:6.
5 Bɩ d bõos a Zeova a vʋʋsem sõngã daar fãa sẽn na yɩl n paam sõngr n ket n moond koe-noogã ne yẽesem. Bɩ d wa yeel wala a Zeremi tɩ Rĩungã koɛɛg yaa wala bugum sẽn dɩt tõnd kõabã pʋsẽ. (Zer. 20:9) Tõnd pa tõe n sĩnd ye!