“Bɩ bũmbã fãa maan tẽeb kengr yĩnga”
1 Tõnd manesmã ne d saam-biisã pʋgẽ, d segd n maana sẽn yaa neer b tẽeb kengr yĩnga. Rẽ rat n yeelame tɩ b tẽebã koglg yell segd n pak-d lame. Tõnd sã n tara nug-tʋʋmd t’a pʋgẽ bɩ teed koosg bɩ leebg buud kẽed sʋka, d segd n maana gũusg tɩ baa fɩ ra wa lub d saam-biisã ye.—2 Kor. 6:3; Fil. 1:9, 10.
2 Kẽer kẽesa b mens afɛɛr dãmb toɛ-toɛ pʋsẽ, n get b kiris-nin-taasã wala neb sẽn tõe n yɩ b raadense. Te-koosg sigls kẽer sagla neb nins sẽn tʋmd b yʋʋr yĩngã tɩ b ges ned kam fãa wala ned sẽn tõe n yɩ raadenga, tɩ b rãmb nins sẽn yaa b tẽed-n-taasã be sʋka. Saam-biis kẽer n tigim Kaset rãmb sẽn na yɩl n sagl-b tɩ b kẽ afɛɛr pʋgẽ. Kẽer koosa b teed tigis-kãsemsẽ wã, hali n tũnug ne dũniyã neb n maan dẽ. Rẽ yĩnga zemsame tɩ kiris-ned tũnug ne a mitins teokarasi wã pʋgẽ n naf a tẽeb saam-biisã zug bɩ? Ayo!—1 Kor. 10:23, 24, 31-33.
3 Saam-biisã segd n maana gũusgu: Woto ka rat n yeel tɩ kiris-ned ka tõe n maan afɛɛr ne a saam-biig ye. Rẽ bee ne ned kam fãa t’a rɩk sard zĩ-kãnga. La kẽer sɩngda afɛɛr dãmb sẽn kɩtd tɩ ned yɩ rat-tɩ-loog soaba, la b tusd b tẽed-n-taas tɩ b wa tɩ b tʋm ne taab bɩ b wa kẽes b ligd a pʋgẽ. Afɛɛr kãensã wʋsg lʋɩtame, n kɩtdẽ tɩ neb nins sẽn kẽes b mens a pʋgẽ wã ligd bɛd yɩ bõne. Baa sã n yaa yõod paoong zĩig pʋgẽ tʋlsem n tus neb nins sẽn wa n naagã tɩ b kẽ yellã pʋgẽ, ned ning sẽn sigl-a afɛɛrã ka segd n tags tɩ afɛɛrã sã n lʋɩ a ka tar taal ye. A segd n denga pĩnd n tags neer n ges afɛɛrã sã n wa pa tõoge, rẽ sẽn na n mad saam-biisã to-to tẽebã la yĩngã wɛɛngẽ. Sẽn yɩɩd fãa, b rãmb nins sẽn tar teokaratik taoor-sobendã segd n gũusa neer b nug-tʋʋmã wɛɛngẽ. Bala neb a taabã tõe n get-b-la ne waoogr la b talld bas-yard sẽn yaa kãseng ne-ba. Yitẽ-la wẽng tɩ b tik bas-yard kãng zug n tʋm yooko. Saam-biig tõeeme n kong zu-nood baleng tʋʋmdã pʋgẽ, neb a taabã sã n le pa waoogd-a.
4 Tõnd bõn-datl segd n yaa “maan bũmbã fãa tẽeb kengr yĩnga.” (1 Kor. 14:26, NW ) D ka tog n maan bũmb ba a ye sẽn na n kẽes leebg yɛl tigingã pʋgẽ bɩ sẽn tusd tɩ b maan woto ye. Yɛl a woto pʋd n ka tar loees ba a yembr ne bʋʋm ning d sẽn tar sẽn tik Gʋlsg Sõamyã zug n tigimd taabã ye.—Heb. 10:24, 25.