Moon-y kambã koe-noogã
1 Y sã n ges nebã sẽn be tigingã tigissẽ la tigis-kãsemsẽ wã wʋsgo, y paamda kaset vẽeneg sẽn wilgd tɩ ‘kom-bɩɩs ne kom-pugli la kamb’ wʋsg n pẽgd a Zeova. (Yɩɩl 148:12) Rẽ tẽegda tõnd tɩ d segd n kõo kamb nins d sẽn segd koe-moonegã wakatã sor tɩ b bãng a Zeova la a kãabsã. Yaa d sẽn na n segend d mens la d gũusd neer n kõt kambã kaset la d na n tõog n maan woto. Yɛl kẽer n kẽed rẽ sʋk tɩ d segd n gese.
2 Tõnd mengã segd n tʋlgame n sõng kambã, la d tẽ tɩ b tõeeme n tall nonglem ne a Zeova. Neb sẽn kõ mak-sõma tɩ b gom b yell Biiblã pʋgẽ wala a Sãmwɛlle, a Davɩɩde, la a Tɩmote kõta tõnd bas-m-yam tɩ kambã tõe n dɩka b mens n kõ a Zeova ne manesem sẽn ka vigsdi. (1 Sãm. 2:18; Yɩɩl 71:17; 2 Tɩm. 3:14, 15) Tõnd wakatã me, mak-sõma woto beeme.
3 Yãmb sã n ning sallem tɩ biig yi n sɛg-yã: Yãmb sã n ning sallem tɩ biig wa zakã noore, yãmb minim n dat n na n yã a roagdbã bala, tɩ b sã n ka be yir bɩ y sãagd zak ning sẽn pʋgdã bɩ? Bi-kãng me vɩɩmã tara yõod wʋsgo. Bõe yĩng tɩ y ka na n maneg y moonegã goam n tõog n taas biigã me koe-noogã? Tõeeme tɩ y sã n wilg Arzãna sẽn na n yɩ to-to wã, la y togs bũmb ning sẽn na n wa beoog-daarã koɛɛg-koɛɛga, na n kɩtame tɩ biigã tʋlg n bãng n paase. Wala makre, kamb wʋsg mii ‘Tõnd Ba sẽn be arzãna’ pʋʋsgo. Rẽ kɩtame tɩ b sã n wilg-b pʋʋs-kãngã reegr sẽn na n kɩt tɩ dũniyã toeem to-to wã, b na n wʋma rẽ võor tao-tao.
4 Y sã n wa kõt kambã kaset bɩ y waoog zu-sobend ning b roagdbã sẽn tar b zutã. Dẽ y sã n kãabd kambã sɛb bɩ y maan gũusgu. Sẽn zems ne biigã yʋʋmã sẽn yaa to-to, zemsame tɩ y sok-a n ges a roagdbã sã n kõ-a-la sor t’a karem sɛb nins fãa a sẽn date. Sã n mikame t’a ka tar sor n na n deeg sɛba, t’a yaool n wilg t’a rat n bãng n paasame, y tõe n kõ-a-la kasetã ne noor bal la y maan segls n lebg n wa wakat ning a roagdbã sẽn be yiri. Rẽ tõe n kell n kõ-y-la sor tɩ y sõng bãmb me.
5 D sẽn yaa neb sẽn zemsd d meng ne yɛlã la d yaa gũusdbã yĩng me kɩtame tɩ d mi tɩ d tara bũmb nins kambã sẽn datã. A Zeova siglgã yiisa sɛb sẽn be yamleoogo, sẽn tar kɩbay sẽn zems ne tõnd wakatã kamb sẽn tar yʋʋm toɛy-toɛy yĩnga. Grand Enseignant la Biibl Kɩbay sɛbã yaa sõma wʋsg ne kom-bõonegã. Les jeunes s’interrogent ne Zak pʋgẽ sũ-noogã yaa sɛb sẽn tar kɩbay sẽn zems sẽn na yɩl n sõng kom-bɩɩsã. Ad Le plus grand homme de tous les temps sebrã sɩd yaa sebr sẽn tar yõod hal wʋsgo! Fot neebã sẽn be sebrã fãa pʋgẽ wã tõe n kɩtame tɩ kambã tagse, la b tʋlg n bãng Wẽnnaam ning sẽn maan-a bõn-naands ka tɛkã tɩ be yamleoog wʋsgã. D ra yĩm seb-bi sẽn tar fot neeb wʋsgo, wala Vɩɩnd-y ne sũ-noog wakat sẽn kõn sa tẽng zugu! seb-bilã ye. Dẽ, y sã n segend n na n yi moonego, bɩ y tags bũmb ning y sẽn na n zɩ tɩ tall yamleoog ne kambã.
6 A Zeova na n kaoa neba fãa bʋʋdo, tɩ ‘rasãmba la pʋg-sadb ne kom-bõonegã’ naage. (Eze. 9:6) Neb wʋsg sẽn balemd a Zeova sẽn na maan yʋʋm wʋsg masã saka sɩdã tɩ b ra yaa kamba. Rẽ segd n kɩtame tɩ d bãng tɩ d tog n moona kamb nins d sẽn segdã koe-noogã. D tõe n wilgame tɩ d nonga kambã wala a Zezi n taas-b koe-noogã n kɩt tɩ b paam barka. (Mat. 19:14, 15) Tall-y yam-sõng n kõ kom-bõonegã kasetã sõma, n saagdẽ tɩ bãmb me na tõog n lebg a Zeova balemdba.